मम्मा की मुरली - gyan-sitar-45

२९.१०.६२

ham direct paramatma ki god ke bachche varse ke hakdaar hain

geet:- le lo duaayen maa-baap ki…।

om shanti। abhi yeh to samjha hai ki dua, daya, kripa, aasheervaad … yeh bhakti-maarga ke shabd hain। yeh gyaan-maarga mein nahin kaam aa sakte hain kyonki yahaan sambandh hi niraala hai। bhakti-maarga mein to guru-shishya aadi-aadi hain। lekin yahaan yeh sambandh nahin hain । bhal paramatma ko satguru bhi kehte hain lekin ham jaante hain ki woh hamaara baap hai, teacher bhi hai to guru bhi hai। hamaare sabhi sambandh ek se hi ho gaye hain। woh teacher, guru, dharmaraaj sab hai, parantu hai hamaara baap । isliye koi baap se daya-kripa nahin maangate hain। baap par hamaara hak hai, ham apna hak jamaate hain। ham unke practical god ke, dharma ke bachche aakar bane hain। woh hamko god mein lene aaya hai। bhale bhakti-maarga mein bhi kehte hain ki ham tumhaari santaan hain parantu woh hak nahin jamaate hain। hamne to practical mein chaitanya mein unko apna baap banaaya hai। god ka bachcha bhi to hak rakhta hai। main us baap ki milkiyat ka vaaris hoon। to yahaan kripa ki baat nahin। parantu hamko lena hi hai, to unko dena hi hai।

baap khud baith padhaate hain, jisse janma-janmaantar ke liye hamaari aajeevika sadaakaal sukh ki banti aati hai। to usko hamne baap banaaya hai। aisa apne paas nasha hona chaahiye ki ek ham hi baap ke practical mein bane hain ! phir aisa teacher bhi kiske paas hoga ! unki padhaai se ham manushya se devta bante hain। 'devta' shabd sun samajhte hain ki devta bhi kya hain ? lekin devta maana sarva praapti । guru naanak ne bhi unki hi mahima ki hai। unki anguli ek taraph dikhaate hain ki ek ko yaad karo। lekin ab to baap aaya hai, direct kehta hai ki "mujhe yaad karo। mera parichay main hi deta hoon। meri baat main hi jaanta hoon। tumhaari baaten bhi main hi jaanta hoon ki tumhaara kismen kalyaan aur kismen akalyaan hai।” dharma ke pitaaen bhi jo aate hain woh bhi apne bachchon ke pita hain। lekin yeh to unhon ka bhi pita hai। Christ ne bhi aise nahin kaha ki main paramatma hoon। sabne kaha hai- main unka bachcha hoon। sab authority ka maalik woh hai aur ham unke direct bane hain ! hamaara dharma bahut ooncha hai, jiske liye svayan paramatma ko hi aana padta hai। aur dharma sthaapan karne mein paramatma ko aane ki jarurat nahin ।

ek devi-devta dharma hi hai jisko god-goddess kehte hain। aur dharma vaalon ko god-goddess nahin kahenge। unhon ka apna-apna naam hai – Christian, bauddhi, aadi-aadi। lekin paramatma dvaara jo dharma sthaapan hua un par naam pada hai god-goddess kyonki sabhi manushyon mein bade ho gae। hamaara dharma sthaapan bhi woh aakar karta hai jo khud janma-maran mein nahin aata hai। to paalna bhi doosron se karaate hain। unko paalanhaar, vinaash, sthaapan-karta kehte hain। ab khud upasthit ho kaarya kar rahe hain। hamko aisa laayak banaate hain। yeh jo abhi ki paalna chalti hai woh koi paramatma ki nahin hai। ismen to karmon anusaar kisko achhi roti milti, kisko nahin bhi milti hai। yeh koi paramatma ki paalna nahin hai। ham jaante hain ki satayug mein jo hamko paalna milti hai woh paramatma ki hi milti hai। abhi ke purushaartha ka woh phal hai। sach-sach to vahi paramatma ki paalna hai। abhi sukh ki paalna nahin hai – kabhi duhkh to kabhi sukh । ham abhi hi apna poora account bhar lete hain, phir aadha kalpa khaate rehte hain। ismen daya, kripa ki koi baat nahin ।

koi aate hain, milte hain to kehte hain - hamaare prati shubh bhaavna rakhna । ab aise to hai hi nahin ki hamaari ashubh bhaavna hai। ham to sabke shubhchintak hain -- kyon na yeh bhi apni jeevan banaaye, aabaad kare। hamaari buddhi mein kiske liye bhi different bhaavna nahin hai। yeh sirf kahne ki rasma chali aati hai jo guru logon ke aage jaakar kehte hain। phir unhon ki alpa bhaavna poori bhi hoti hai, tab yeh rasma chali aati hai। ab ham to in baaton mein jaate nahin। hamko to baba se saara hak, saara varsa lena hai jo phir vahaan aisi ichchha nahin rehti । yahaan to ichchhaaen lagi rehti hain। lekin yeh jo baaten suni hain ki ichchha ki avidya, to kehte hain ki ichchhaaon ko maaro। to hath se man ko maarte hain। parantu jiski apraapti hai, to jarur ichchha uthti hai। dhan na ho, to jarur ichchha hoti hai। ichchha ghatti nahin hai। hamaare mein apraapti kyon hoti hai ? uske liye purushaartha karna hai। to yeh bhi gyaan hai। ichchha duhkh nahin deti, lekin apraapti duhkh deti hai। hamaare paas apraapti na ho - unka saadhan chaahiye। ichchhaaon ke liye kehte hain ki man ko maaro । lekin maaya ko maarna hai। vaise sankalp to bhagwan mein bhi hain jisne itna gyaan diya hai। lekin bhagwan ke sankalp oonche hain। itni knowledge dekar itna ooncha banaaya hai ! devtaaon ko bhi raajdhaani chalaane ke liye man-buddhi hai। jad thode hi banna hai। ab jap-tap-yog ke liye yeh nahin ki man ko maaro lekin ham to chalte-phirte unki yaad mein rehte hain arthaat tap kar rahe hain।

ham hi raajarishi hai, raajaai ke liye tap karte hain। is tap ke bal se hamko raajaai milti hai । hamne yeh raajaai kisse chheenkar nahin li hai। agar chheen kar li ho to pahle jiske paas thi unki bhi mahima honi chaahiye। to iska matlab raajaai lakshmi-naaraayan se hi shuru hoti hai। kaliyug mein is yogbal ki tarkeeb se itni badi raajaai lete hain। phir kehte hain ki yogbal se bachche kaise paida hote hain ? lekin yogbal ki taakat se jab raajaai li hai to woh taakat vahaan bhi chalti hai। yeh sansaar hai bhog bal ka aur woh hai yogbal ka। yeh double taaj bhi yogbal se paaya hai। abhi ham brahman bane, phir devta bante hain। shoodra se devta nahin ban sakte hain lekin pahle shoodra se markar pavitra brahman banna hai। ab harek apne se poochhe ki main brahman bana hoon ? brahman banna kam baat nahin hai। brahma ki mukh-vanshaavli banna hai।