शनिवार 4 जनवरी 1969 की साकार मुरली

08-01-2026 (04-01-1969) praatahmurli om shanti "baapdaada"' madhuban

om shanti। roohaani baap baith roohaani bachchon ko samjhaate hain। tum is paathshaala mein baith oonch darja paate ho। dil mein samajhte ho ham bahut oonch te oonch svarga ka pad paate hain। aise bachchon ko to khushi bahut honi chaahiye। agar sabko nishchay hai to sab ek jaise to ho na saken। first se last number tak to hote hi hain। papers mein bhi first se last number tak number hote hain। koi fail bhi honge, to koi paas bhi hote honge। to har ek apni dil se poochhe - baba jo hamko itna oonch banaate hain, main kahaan tak laayak bana hoon? phalaane se achha hoon va kam hoon? yeh padhaai hai na। dekhne mein bhi aata hai, jo koi subject mein kamzor hote hain to neeche chale jaate hain। bhal monitor hoga to bhi koi subject mein kam hoga to neeche chala jaayega। virla hi koi scholarship lete hain। yeh bhi school hai। tum jaante ho ham sab padh rahe hain, ismen pahli-pahli baat hai pavitrata ki। baap ko bulaaya hai na - pavitra banne ke liye। agar criminal aai kaam karti hogi to khud feel karte honge। baba ko likhte bhi hain, baba ham is subject mein kam hain। student ki buddhi mein yeh zaroor rehta hai - ham phalaani subject mein bahut-bahut kam hoon। koi aise bhi samajhte hain ham fail honge। ismen pahle number ki subject hai - pavitrata। bahut likhte hain baba hamne haar khaai, to usko kya kahenge? unki dil samajhti hogi - ab main chadh nahin sakoonga। tum pavitra duniya sthaapan karte ho na। tumhaari em object hi yeh hai। baap kehte hain - bachchon, maamekam yaad karo aur pavitra bano to in lakshmi-naaraayan ke gharaane mein ja sakte ho। teacher to samajhte honge yeh itna oonch pad pa sakenge va nahin? woh hai supreme teacher। yeh daada bhi school to padha hua hai na। koi-koi chhokre (ladke) bhi aise kharaab kaam karte hain jo aakhir master ko saza deni padti hai। aage bahut jor se sazaayen dete the। abhi saza aadi kam kar di hai to students aur hi jaasti bigadte hain। aajkal student kitna hangaama karte hain। student ko new blood kehte hain na। woh dekho kya karte hain! aag laga dete hain, apni javaani dikhlaate hain। yeh hai hi aasuri duniya। javaan ladke hi bahut kharaab hote hain, unki aankhen bahut criminal hoti hain। dekhne mein to bade achhe aate hain। jaise kaha jaata hai na - eeshvar ka ant nahin paaya jaata, aise unka bhi ant nahin paaya jaata, ki yeh kis prakaar ka manushya hai। haan, gyaan ka buddhi se pata padta hai, yeh kaise padhta hai, inki activity kaisi hai। koi to baat karte hain jaise mukh se phool nikalte hain, koi to aisi baat karte jaise patthar nikaalte hain। dekhne mein bahut achhe, points aadi bhi likhte hain parantu hain pattharbuddhi। baahar ka show hai। maaya badi dushtar hai isliye gaayan hai aashcharyavat sunanti, apne ko shivbaaba ki santaan kahlaavanti, auron ko sunaavanti, kathanti phir bhaaganti arthaat traitor bananti। aise nahin, hoshiyaar traitor nahin bante hain, achhe-achhe hoshiyaar bhi traitor ban padte hain। us sena mein bhi aise hota hai। aeroplane sahit hi doosre desh mein chale jaate hain। yahaan bhi aise hota hai, sthaapna mein badi mehnat lagti hai। bachchon ko bhi padhaai mein mehnat, teacher ko bhi padhaane mein mehnat hoti hai। dekha jaata hai yeh sabko disturb karte hain, padhte nahin hain to school mein hantar lagaate hain। yeh to baap hai, baap kuchh bhi nahin kehte hain। baap ke paas yeh kaanoon nahin hai, yahaan to bilkul shant rehna hota hai। baap to sukhdaata, pyaar ka saagar hai। to bachchon ki chalan bhi aisi honi chaahiye na, jaise devtaayen hote hain। tum bachchon ko baba sadaiv kehte hain tum padmaapadma bhaagyashaali ho। parantu padmaapadma durbhaagyashaali bhi bante hain। jo fail hote hain unko to durbhaagyashli kahenge na। baba jaante hain - ant tak yeh hota rehta hai। koi na koi mahaan durbhaagyashaali bhi zaroor bante hain। chalan aisi hoti hai samjha jaata hai yeh thahar nahin sakenge। itna oonch banne laayak nahin hai, sabko duhkh dete rehte hain। sukh dena jaante hi nahin to unki haalat kya hogi! baba sadaiv kehte hain - bachche, apni achhi reeti sambhaal karo, yeh bhi drama anusaar hone ka hai, aur hi lohe se bhi badtar ban jaate hain। so bhi achhe-achhe kabhi chitthi bhi nahin likhte hain। bichaaron ka kya haal hoga!

baap kehte hain - main aaya hoon sarva ka kalyaan karne। aaj sarva ki sadgati karta hoon, kal phir durgati ho jaati hai। tum kahenge ham kal vishwa ke maalik the, aaj gulaam ban gaye hain। abhi saara jhaad tum bachchon ki buddhi mein hai। yeh wonderful jhaad hai। manushyon ko yeh bhi pata nahin hai। abhi tum jaante ho kalpa maana poore 5 hazaar varsha ka accurate jhaad hai। ek second ka bhi farka nahin pad sakta। is behad ke jhaad ki tum bachchon ko abhi knowledge mil rahi hai। knowledge dene vaala hai vrikshapti। beej kitna chhota hota hai, unse phal dekho kitna bada nikalta hai। yeh phir hai wonderful jhaad, inka beej bahut chhota hai। aatma kitni chhoti hai। baap bhi bahut chhota, in aankhon se dekh bhi nahin sakte। bhal vivekaanand ka batlaate hain - usne kaha jyoti unse nikal mere mein sama gai। aisi koi jyoti nikalkar phir sama thode hi sakti hai। kya nikla? yeh samajhte nahin। aise-aise saakshaatkaar to bahut hote hain, parantu vo log maan dete hain, phir mahima bhi likhte hain। bhagvaanuvaach - koi bhi manushya ki mahima hai nahin। mahima hai to sirf devtaaon ki hai aur jo aisa devta banaane vaala hai uski mahima hai। baba ne card bahut achha banaaya tha। jayanti manaana ho to ek shivbaaba ki। in (lakshmi-naaraayan) ko bhi aisa banaane vaala to shivbaaba hai na। bas ek ki hi mahima hai, us ek ko hi yaad karo। yeh khud kehte hain oonch te oonch banta hoon phir neeche bhi utarta hoon। yeh kisko pata nahin hai - oonch te oonch lakshmi-naaraayan hi phir 84 janmon ke baad neeche utarte hain, tat tvam। tum hi vishwa ke maalik the, phir kya ban gaye! satayug mein kaun the? tum hi sab the, nambarvaar purushaartha anusaar। raaja-raani bhi the, sooryavanshi-chandravanshi dynasty ke bhi the। baba kitna achhi reeti samjhaate hain। is srishti chakra ka gyaan tum bachchon ki buddhi mein chalte-phirte rehna chaahiye। tum chaitanya light house ho। saari padhaai buddhi mein rahni chaahiye। parantu woh avastha hui nahin hai, hone ki hai। jo paas with honour honge unki yeh avastha hogi। saara gyaan buddhi mein hoga। baap ke laadle, lovely bachche bhi tab kahlaayenge। aise bachchon par baap svarga ki raajaai kurbaan karte hain। kehte hain main raajaai nahin karta hoon, tumko deta hoon, isko nishkaam seva kaha jaata hai। bachche jaante hain baba hamko sir ke oopar chadhaate hain, to aise baap ko kitna yaad karna chaahiye। yeh bhi drama bana hua hai। baap sangam par aakar sabko sadgati dete hain, nambarvaar purushaartha anusaar। number one highest bilkul pavitra, number last bilkul apvitra। yaad-pyaar to baba sabko dete hain।

baba kitna achhi reeti samjhaate hain, kabhi bhi mithya ahankaar nahin aana chaahiye। baap kehte hain - khabardaar rehna hai, rath ka bhi regard rakhna hai। is dvaara hi to baap sunaate hain na। isne to kabhi gaali nahin khaai thi। sab pyaar karte the। abhi to dekho kitni gaali khaate hain। kai traitor ban bhaaganti ho gaye to phir unki gati kya hogi, fail honge na! baap samjhaate hain maaya aisi hai isliye bahut khabardaari rakhte raho। maaya kisko bhi chhodti nahin hai। sab prakaar ki aag laga deti hai। baap kehte hain mere sab bachche kaam chita par chadh kaale koyle ban gaye hain। sab to ek jaise nahin hote hain। na sabka ek jaisa part hai। inka naam hi hai veshyaalay, kitna baar kaam chita par chadhe honge। raavan kitna jabardasta hai, buddhi ko hi patit bana deta hai। yahaan aakar baap se shiksha lene vaale bhi aise ban jaate hain। baap ki yaad bigar criminal aankhen kabhi badal nahin sakti isliye soordaas ki kahaani hai। hai to banaai hui baat, drishtaanta bhi dete hain। abhi tum bachchon ko gyaan ka teesra netra milta hai। agyaan maana andhiyaara। kehte hain na tum to andhe, agyaani ho। ab gyaan hai gupta, ismen kuchh bolne ka nahin hai। ek second mein saara gyaan aa jaata hai, sabse easy gyaan hai। phir bhi ant tak maaya ki pareeksha chalti rahegi। is samay to toofaan ke beech mein hain, pakke ho jaayenge phir itna toofaan nahin aayenge, girenge nahin। phir dekhna tumhaara jhaad kitna badhta hai। naamaachaar to hona hi hai। jhaad to badhta hi hai। thoda vinaash hoga tab phir bahut khabardaar rahenge। phir baap ki yaad mein ek-dam chatak jaayenge। samjhenge time bahut thoda hai। baap to bahut achha samjhaate hain - aapas mein bahut pyaar se chalo। aankh nahin dikhaao। krodh ka bhoot aane se shakla hi ekdam badal jaati hai। tumko to lakshmi-naaraayan jaisi shakla vaala banna hai। em object saamne hai। saakshaatkaar pichhaadi ko hota hai, jab transfer hote hain। jaise shuru mein saakshaatkaar hue aise ant samay mein bhi bahut part dekhenge। tum bahut khush rahenge। mirooa maut malooka shikaar… pichhaadi mein bahut scene-scenery dekhni hai tab to phir pachhtaayenge bhi na - hamne yeh kiya। phir unki saza bhi bahut kadi milti hai। baap aakar padhaate hain, unki bhi ijzat nahin rakhte to saza milegi। sabse kadi saza unko milegi jo vikaar mein jaate hain ya shivbaaba ki bahut glaani karaane ke nimitta bante hain। maaya badi jabardasta hai। sthaapna mein kya-kya hota hai। tum to abhi devta bante ho na। satayug mein asur aadi hote nahin। yeh sangam ki hi baat hai। yahaan vikaari manushya kitna duhkh dete hain, bachchiyon ko maarte hain, shaadi zaroor karo। stri ko vikaar ke liye kitna maarte hain, kitna saamna karte hain। kehte hain sannyaasi bhi rah na sake, yeh phir kaun hai jo pavitra rah dikhaate hain। aage chal samjhenge bhi zaroor। sivaae pavitrata ke devta to ban nahin sakte। tum samjhaate ho - hamko itni praapti hoti hai tab chhoda hai। bhagvaanuvaach - kaam jeete jagatjeet। aisa lakshmi-naaraayan banenge to kyon nahin pavitra banenge। phir maaya bhi bahut pachhaadti hai। oonchi padhaai hai na। baap aakar padhaate hain - yeh simran achhi reeti bachche nahin karte hain to phir maaya thappad laga deti hai। maaya avagyaayen bhi bahut karaati hai phir unka kya haal hoga। maaya aisa beparvaah bana deti hai, ahankaar mein le aati hai baat mat poochho। nambarvaar raajdhaani banti hai to koi kaaran se banengi na। abhi tumko past, present, future ka gyaan milta hai to kitna achhi reeti dhyaan dena chaahiye। ahankaar aaya yeh mara। maaya ekdam worth not A penny bana deti hai। baap ki avagya hui to phir baap ko yaad kar nahin sakte। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।