रविवार 15 जुलाई 1973 की अव्यक्त मुरली

>

15-07-73 om shanti avyakt baapdaadaamdhuban

lagaav aur svabhaav ke badalne se vishwa-parivartan

najron se nihaal karne vaale, duhkh va ashaanti se door le jaane vaale, mukti jeevanmukti ka varsa dene vaale, light house aur might house banaane vaale, sarva ki manokaamnaaon ko poorn karne vaale, vishwa-kalyaankaari baba bole:-

kya aavaaz se pare shant-sthiti itni hi priy lagti hai ki jitni aavaaz mein aane ki sthiti priy lagti hai? aavaaz mein aana aur aavaaz se pare jaana ye donon hi ek samaan sahaj lagte hain ya aavaaz se pare jaana mushkil lagta hai? vaastav mein svadharma shant-swaroop hone ke kaaran aavaaz se pare jaana ati sahaj hona chaahiye। abhi-abhi ek second mein jaise sthool shareer dvaara kahin bhi jaane ka ishaara mile to jaise jaana aur aana ye donon hi sahaj anubhav hote hain, vaise hi is shareer ki smriti se buddhi dvaara pare jaana aur aana ye donon hi sahaj anubhav honge। arthaat kya ek second mein aisa kar sakte ho? jab chaahen shareer ka aadhaar len aur jab chaahen shareer ka aadhaar chhod kar apne ashareeri swaroop mein sthit hon jaayen, kya aise anubhav chalte-phirte karte rehte ho?jaise shareer dhaaran kiya vaise hi phir shareer se nyaare ho jaana in donon ka kya ek hi anubhav karte ho? yahi anubhav antim paper mein first number laane ka aadhaar hai। jo last paper dene ke liye abhi se taiyaar ho gaye ho ya ho rahe ho? jaise vinaash karne vaale ek ishaara milte hi apna kaarya sampanna kar denge, arthaat vinaashkaari aatmaayen itni ever-ready hain ki ek second ke ishaare se apna kaarya abhi bhi praarambha kar sakti hain। to kya vishwa ka nav-nirmaan karne vaali arthaat sthaapna ke nimitta bani hui aatmaaen aise ever-ready hain? apni sthaapna ka kaarya aise kar liya hai ki jisse vinaashkaariyon ko ishaara mile?

jaise yaadav sena ne full force se taiyaari ki hui hai, kya vaise hi paandav sena bhi apni sarva taiyaariyaan kar samay ka intajaar kar rahi hain?-aise ever-ready ho?jaise light house aur power house) ek second ke switch on karne se chaaron or light va might phaila dete hain, kya aise hi paandav sena ek second ke direction pramaan light house aur might house ban sarva-aatmaon ko light aur might ka vardaan de sakti hain?jaise sthool nazar ek second mein ek sthaan par baithe chaaron or dekhti hain, kya aise hi teesre netra dvaara ek second mein aap chaaron or na sirf bhaarat lekin saare vishwa ki aatmaon ko nazar se nihaal kar sakte ho?jaise saral aur sahaj reeti se sthool netra dvaara nazar phaila sakte ho,kya vaise hi aap nazar se nihaal kar sakte ho? gaayan bhi hai-ek second mein teesra netra khulne se vinaash ho gaya। vinaash ke saath sthaapna to hai hi। baap ke saathsaath bachchon ka bhi gaayan hai। kya teesra netra aisa power full hai jo door tak nazar ja sake?jaise sthool netra ki nazar kamjor hoti hai to door tak nahin dekh sakti,kya vaise hi apne teesre netra ki shakti dekhte rehte ho?

teesre netra ko shaktishaali banaane ke liye keval mukhya do shabdon par attention chaahiye। teesre netra mein kamzori aane ki bhi vahi do baaten hain। woh kaun-si? sthool nazar ke kamzor hone ka kaaran kya hota hai?-brain-work ka jyaada hona। baaten to vahi hain lekin in sabhi baaton ko do shabdon ke saar mein laane se attention rakhna sahaj ho jaata hai। to kamjori laane ke do shabd hain -- ek lagaav,doosra puraana svabhaav। kisi ko apna puraana svabhaav kamzor karta hai aur koi ko kisi prakaar ka bhi lagaav kamzor karta hai। yeh do mukhya kamjoriyaan hain। iska vistaar bahut hai। harek ka koi- na koi lagaav hai aur harek mein nambarvaar percentage mein abhi tak puraana svabhaav hai। yadi yeh svabhaav aur lagaav badal jaay to vishwa bhi badal jaay। kyonki jab vishwa ke parivartak svayan hi nahin badle hain to ve vishwa ko kaise badal sakte hain?

apne mein check karo ki kya kisi bhi prakaar ka lagaav hai? chaahe woh sankalp ke roop mein lagaav ho, chaahe sambandh ke roop mein, chaahe samparka ke roop mein aur chaahe apni koi visheshta ki hi taraph ho। agar apni koi bhi visheshta mein bhi lagaav hai to woh bhi lagaav bandhan-yukta kar dega aur woh bandhan-mukta nahin karega kyonki lagaav ashareeri banne nahin dega aur woh vishvakalyaankaari bhi ban nahin sakega। jo apne hi lagaav mein phansa hua hai woh vishwa ko mukti va jeevanmukti ka varsa dila hi kaise sakta hai?lagaav vaala kabhi sarva-shakti sampanna ho nahin sakta, lagaav vaala dharmaraaj ki sajaaon se sampoorn mukta salaam dene vaala nahin ban sakta। lagaav vaale ko salaam bharna hi padega aur lagaav vaale sampoorn first janma ka raajya bhaagya pa na sake। isi prakaar puraane svabhaav vaale naye jeevan, naye yug ka sampoorn aur sada anubhav nahin kar paate। har aatma mein bhaai-bhaai ka bhaav na rakhne se svabhaav ek vighna ban jaata hai। vistaar ko to svayan bhi jaante ho। lekin abhi kya karna hai?vistaar ko jeevan mein sama kar baap-samaan ban jaana hai। na koi puraana svabhaav ho aur na koi lagaav ho। jabki tan, man aur dhan sabhi baap ko samarpan kar diya, to dene ke baad phir mera vichaar, meri samajh aur mera svabhaav yeh shabd hi kahaan se aaya? kya mera abhi tak hai ya mera so tera ho gaya?jab kaha-’mera so tera’ -to mera man samaapta ho gaya na? man aur tan baap ki amaanat hai। aapki to nahin hai na? ‘mera man chanchal hai’-yeh kehna kahaan se aaya?kya abhi tak mera-pan nahin chhoota? mera-pan kismen hota hai? bandar mein, woh khud mar jaayega lekin uska mera-pan nahin marega। isliye chitrakaaron ne mahaaveer ko bhi poonchh ki nishaani de di hai। hain mahaaveer lekin poonchh zaroor hai। to yeh poonchh kaun-si hai? lagaav aur svabhaav ki। jab tak is poonchh ko aag nahin lagaai hai, tab tak lanka ko aag nahin lag sakti। to vinaash ki warning ki sahaj nishaani kaun-si hui?isi poonchh ki aag lagaani hai। jab sabhi mahaaveeron ki lagan ki aag lag jaayegi to kya yeh puraana vishwa rahega? isliye ab sabhi prakaar ke lagaav aur svabhaav ko samaapta karo।

jaise vinaashkaari aatmaayen vinaash ke liye tadapti hain, kya aise hi aap sthaapna vaale vishwa-kalyaan ke liye tadapte ho? aisi self service aur vishwa ki service in donon ke liye naye-naye invention nikaalte ho?jaise woh log abhi invention kar rahe hain ki aise powerful yantra banaayen jo vinaash sahaj aur sheeghra ho jaaye to kya aise aap mahaaveer, silence ki shakti ke inventor aisa plan bana rahe ho ki jo saare vishwa ko parivartan hone mein athva use mukti aur jeevanmukti ka varsa lene mein sirf ek second hi lage aur sahaj bhi ho jaaye? aap muaaphik paitees varsha na lagen। to aisi refine invention se ek second mein nazar se nihaal, ek second mein duhkhi se sukhi,nirbal se balvaan aur ashaanti se shanti ka anubhav kara sako। kya aise refine roohaani shastra aur yuktiyaan sochte ho ki ek second mein unka tadapna banda ho jaay? jaise bam dvaara ek second mein mar jaayen, vaise ek second mein unko vardaan, mahaadaan de sako, kya aise mahaadaani aur aise vardaani bane ho? kya sarva ki manokaamnaaen poori karne vaali kaamdhenu bane ho, ab kya svayan mein koi kaamna to nahin rahi hui hai na? agar apni koi kaamna hogi to kaamdhenu kaise banenge? ‘mera naam ho’, aur meri shaan ho’’-yeh kaamna bhi nahin ho। samjha?

aise ek second mein teesre netra dvaara vishwa ko nazar se nihaal karne vaale, ek second mein ashaanti aur duhkh se paar le jaane vaale, lagaav aur svabhaav se ateet karmaateet sthiti mein sthit hone vaale, mukti aur jeevanmukti ke varse ke praapti ke jeevan mein sada rahne vaale, mukta aur jeevanmukta aatmaon ko baapdaada ka yaad pyaar aur namaste।