बुधवार 5 फ़रवरी 1975 की अव्यक्त मुरली

> 05-02-75 om shanti avyakt baapdaadaamdhuban

pavitrata - pratyakshata ki poorvagaamini hai aur personality ki janni

roohaani royalty ke sanskaar bharne vaale, sarvotam personality banaane vaale, vishwa ke parampita shiv bole -

aaj baap sarva devon ke bhi dev, sarva raajaaon ke bhi raaja banaane vaale rachayita ki rachna, arthaat shreshtha aatmaon ke shreshtha bhaagya ko dekh harshit ho rahe hain। aap oonche-se-oonche,baap se bhi oonchi banne vaali aatmaayen hain। aaj aisi oonchi aatmaon ki vishesh do baaten dekh rahe hain। woh kaun-si hain?ek roohaani royalty, doosri personality। jab hain hi oonche-se-oonche baap ki oonchi santaan - jinhon ke aage devtaayen bhi shreshtha nahin gaaye jaate, raajaayen bhi charnon mein jhukte hain, aur sarva naami-graami aatmaayen bhi bhikhaari ban eeshvareey prasaad lene ke liye jigyaasa rakh aane vaali hain to aisi sarva- aatmaon ke nimitta bane hue aap sabhi master-gyaandaata aur vardaata ho। to aisi royalty hai?vaastav mein to purity hi royalty hai aur purity hi personality hai। ab apne ko dekho kitne percent purity dhaaran ki hui hai? purity ki parakh va pahchaan harek ki royalty aur personality se ho rahi hai।

royalty kaunsi hai? royal aatma ko had ki vinaashi vastu va vyakti mein kabhi aakarshan nahin hoga। jaise laukik reeti se royal personality vaali aatma ko kinheen chhoti-chhoti cheejon mein okh nahin doobti hai,kisi ke dvaara giri hui koi bhi cheej sveekaar karne ki ichchha nahin hoti hai,unke nayan sada sampanna hone ke nashe mein rehte hain, arthaat nayan neeche nahin hote hain, unke bol madhur aur anmol arthaat ginti ke hote hain aur unke samparka mein khumaari anubhav hoti hai, aise hi roohaani royalty usse bhi padam guna shreshtha hai।

aisi royalty mein rahne vaali aatmaon ki kabhi bhi ek-doosre ke avgunon ya kamjori ki taraph aankh bhi nahin ja sakti। jisko doosra chhod raha hai arthaat mitaane ke purooshaartha mein laga hua hai, aisi chhodne vaali cheej arthaat giraavat mein laane vaali cheej aur giri hui cheej, roohaani royalty vaale ke sankalp mein bhi dhaaran nahin ho sakti va doosre ki vastu ki taraph kabhi sankalp roopi okh bhi nahin ja sakti। to yeh puraane tamoguni svabhaav, sanskaar,kamzoriyaan shoodron ki hain na ki braahmanon ki। shoodron ki vastu ki taraph sankalp kaise ja sakta hai? agar dhaaran karte hain to jaise kahaavat hai na ki ‘‘kakh ka chor so lakh ka chor’’ - to yeh bhi second-maatra va sankalpamaatra dhaaran karne vaali aatmaaen royal nahin gaayi jaayengi।

roohaani royalty vaali aatmaon ke bol mahaavaakya hote hain। ye vaakya golden versions hote hain, jinhen sunne vaale bhi golden ej ke adhikaari ban jaate hain। ek-ek bol ratna ke samaan velyuebal hota hai ve duhkh dene vaale, giraane vaale ya patthar ke samaan bol nahin hote, saadhaaran aur vyartha bhi nahin hote, samartha aur sneh ke bol hote hain। saare din ke uchchaaran kiye hue bol aise shreshtha hote hain ki hisaab nikaalne par smriti mein aa sakte hain ki aaj aise aur itne bol bole। royalty vaale ki nishaani va visheshta yeh hai ki pachaas bol bolne vaale vistaar ke bajaay das bol ke saar mein bole, kvontiti ko kam kar kvoliti mein laaye। roohaani royalty vaale ke samparka mein jo bhi aatma aaye, use thode samay mein bhi, us aatma ke daataapan ki va vardaataapan ki anubhooti honi chaahiye, sheetalta va shanti ki anubhooti honi chaahiye jo har-ek ke man mein yeh gungaan ho ki yeh kaun-sa pharishta tha,jo samparka mein aaya। thode samay mein bhi us tadapti hui aur bhatakti hui aatma ko bahut kaal ki pyaas bujhaane ka saadhan va thikaana dikhaai dene lage। isko kaha jaata hai - paaras ke sang loha bhi paaras ho jaae, arthaat roohaani royalty vaale ki roohaani najar se nihaal ho jaae। aisi royalty anubhav karte ho?

ab seva ki gati teevra chaahiye। woh tab hogi, jab aisi roohaani royalty chehre se dikhaai degi। tab hi sarva-aatmaon ka ulaahna poorn kar sakenge। aisi purity ki personality ho ki jo mastak dvaara shuddh aatma aur satopradhaan aatma dikhaai de arthaat anubhav kar sake,naynon dvaara bhaai-bhaai ki vritti arthaat shuddh,shreshtha vritti dvaara vaayumandal va vibration parivartit kar sako। jab laukik personality apna prabhaav daal sakti hai to purity ki personality kitni prabhaavshaali hogi? shuddh smriti dvaara nirbal aatmaon ko samarthi swaroop bana sakte ho? aisi royalty aur personality svayan mein pratyaksha roop mein laao। tab svayan ko va baap ko pratyaksha kar sakenge! ab vishesh merciful bano। svayan par bhi aur sarva par bhi merciful! sahaj hi sarva ke snehi aur sahayogi ban jaayenge। samjha?aise bhaagya ka sitaara chamak raha hai na? aise dharti ke sitaaron ko sab chamakta hua dekhna chaahte hain।

achha, golden versions dvaara golden ej laane vaale, sarva ke prati sada merciful,sarvagunon se sampanna,sarva praapti karne vaale, ek aatma ko bhi vanchit nahin rakhne vaale aise sada daata, roohaani royalty aur personality mein rahne vaale,sada chamakte hue sitaaron ko baapdaada ka yaad-pyaar aur namaste!