गुरुवार 23 अक्टूबर 1975 की अव्यक्त मुरली

>

23-10-75 om shanti avyakt baapdaadaamdhuban

intazaar ko chhodkar intazaam karo!

vishwa ki takdeer ko ooncha banaane vaale, maayaavi-srishti ka mahaavinaash kar daivi-srishti ki sthaapna karne vaale, rachayita shiv baba, nav-nirmaan ke intazaam mein ek-jut ho jaane ka aahvaan karte hue bole:-

aaj baapdaada vishwa ki takdeer banaane vaale takdeer-vaan bachchon ki tasveer dekh rahe hain। kis-kis aatma mein kaun-kaun si takdeer ki lakeeren dikhaai deti hain aur kaun-kaunsi ab spashta hone vaali hai? har ek ke takdeer ki lakeer apni-apni dikhaai de rahi hai। takdeer ki rekhaaon mein mukhya chaar subjects ki chaar rekhaayen dikhaai deti hai। bahut thode bachche hain jinki chaaron ki chaaron hi rekhaayen spashta hain arthaat chaaron hi subjects mein tadbeer dvaara apni oonchi takdeer banaai hai। is pramaan paas with honours aur first class arthaat first division mein aise takdeervaan hi aayenge jinhon ki chaaro hi takdeer ki lakeeren spashta hain। paas with honours ki takdeer ki lakeeren chaaron hi or ek samaan chamakti hui spashta dikhaai deti hain। jo hain ‘ashta ratna।’doosre number mein first division vaale sau ratna,jinki chaaron hi lakeeren dikhaai deti hain lekin samaan spashta roop nahin hain। koi jyaada tej hain, koi kuchh kam। second division solah hajaar। un solah hajaar mein se pahle do teen hajaar ki rekhaaon mein chaar subjects mein se teen subjects 50% marks mein paas hain aur ek subjects mein 25% mein paas hain arthaat na ke baraabar hain। aise sarva takdeervaanon ki takdeer dekhi।

aaj baapdaada chaaron taraph ke brahman bachchon ki janma-patri dekh rahe the। janma-patri dekhte vartamaan samay maijoreti ke andar ek vishesh sankalp chalta hua dekha। woh kya? vishwa ki aadhaarmoortta aatmaayen bhi koi aadhaar par khadi hui dekheen। woh aadhaar kya? duniya ke vinaashkaari saadhnon ko dekhte hain va prakriti ki halchal kab hoti hai, kahaan hoti hai, hoti hai ya nahin hoti hai? - is aadhaar par aadhaarmoortta ko khade hue dekha। aise aadhaar par thaharne vaale bachchon se baapdaada ka prashn hai ki sthaapna karne vaale vinaash ke aadhaar par rahege to sthaapna karne vaalon ka bhavishya kya hoga? vinaash jvaala prajjavlit karne ke aadhaarmoortta kaun? prakriti ka parivartan karne vaale kaun?prakriti va vinaash ke saadhnon ke aadhaar par khade hue purooshon se uttam purooshottam ho sakte hain athva purooshottam ke order par arthaat shreshtha sankalp ke aadhaar par, sarva aadhaarmoortto ke sampoorn banne ke aadhaar par vinaashkaari saadhan va prakriti apna kaarya karegi?order dene vaala kaun? adhikaari kaun - prakriti ya purooshottam?aadhaarmoortta ka kisi aadhaar par rehna unko adhikaari kahenge?to kya dekha?-intazaam karne vaale intazaar mein hain। intazaam karne mein albelaapan aur intazaar karne mein alert (chaukanne) hain। isko dekhte hue baapdaada ko hansi bhi aai aur raham bhi aaya, - kyon? maaya ki chaturaai ko ab tak bachche parakh nahin sake hain। intazaar ki meethi neend mein maaya sula rahi hai aur bachche aadhe kalpa ke sone ke sanskaar-vash ho kar koi to second ka jhutka khaate hain aur phir hosh mein aate hain, phir intazaam karne ke josh mein aa jaate hain aur koi to kuchh minute ke liye so bhi jaate hain, phir josh aur hosh mein aate hain। teesri prakaar ke bachche kaaphi aaraam se sote-sote beech-beech me okh khol kar dekhte rehte hain ki abhi kuchh hua, abhi tak to kuchh nahin hua hai। jab hoga tab dekha jaayega। yeh drishya dekh kya hansi nahin aayegi?

teesra netra milte hue bhi maaya ko parakh nahin sakte, isliye maaya ko achhi tarah se parakhne ke liye parakh-shakti ko vishesh roop se apne mein dhaaran karo। do maas hain ya chaar maas hain,yeh samay ki ginti nahin karo lekin svayan ko samartha banaao। hoga athva nahin hoga, kya hoga aur kab hoga?in sankalpon ke bajaae purooshottam sthiti mein sthit ho sangathan ko sampoorn banaane ke sankalp ke aadhaar se prakriti ko order dene ke adhikaari bano। hona to chaahiye lekin pata nahin kya hoga, shaayad ho, do chaar maas mein to kuchh dikhaai nahin deta hai,sangamayug chaalees varsha ka hai athva pachaas varsha ka hai -isi prakaar ke sankalp bhi sampoorn nishchay ke aage baap ke va svayan ke sthaapna ke kaarya mein vighna daalne vaala ati sookshm roop ka royal sanshay hai। jab tak yeh sanshay hai tab tak sampoorn vijayi nahin ban sakte। gaayan hi hai - ‘nishchay buddhi vijayanti।’to vijayi aatma ko sanshay ke royal roop ka sankalp ho nahin sakta।

sampoorn nishchay buddhi apne vishwa-parivartan ke kaarya mein din-raat busy rahege। jaise koi vishesh kaarya ki zimmevaari hoti hai to din-raat intazaam mein lag jaate hain, na ki intazaar karte hain ki jab time hoga tab stage sajaayenge va saadhnon ko apnaayenge। samay ke pahle intazaam kiya jaata hai। to vishwa ke parivartan ki zimmevaari,yeh bhi parivartan samaaroh abhi manaane ka hai। sarva aatmaon ko apne-apne anusaar satopradhaan banaane ka va baap ka parichay dene ka vishaal vishwa ka sammelan karna hai। iske liye pahle se hi aap ko apni sthiti ki stage banaane ka intazaam karna hai ya us samay karoge? jaise sthool stage ke bina,bhaashan karna va sandesh dena nahin ho sakta vaise antim samay par svayan ke sampoorn sthiti ki stage bina vishaal vishwa-sammelan mein sandesh kaise de sakenge? arthaat baap ko prasiddha va prakhyaat kaise kar sakenge? to stage ko pahle se taiyaar karenge athva us samay karenge?isliye intazaar ko chhod intazaam mein lag jaao। yeh sankalp bhi vyartha sankalp hai, is vyartha ko bhi samartha mein parivartan karo। adhikaari bano। prakriti ko order karne ke samartha stage ko banaao। sangathit roop se sarva braahmanon ke andar raham ki bhaavna, vishwa-kalyaan ki bhaavna, sarva-aatmaon ko duhkhon se chhudaane ki shubh kaamnaae jab tak dil se utpanna nahin hongi tab tak vishwa-parivartan rooka hua hai। abhi halchal mein ho - ek hi sankalp mein achal aur atal nahin ho। angad samaan adol banna arthaat antim ghadi laana। to sangathit roop se aise ek sankalp ko apnaao arthaat dridh sankalp ki ikatthi anguli sabhi do,to yeh kaliyugi parvat parivartan karke golden world ko la sake। samjha? kya intazaam karna hai? achha।

ant mein baapdaada ne ek sankalp mein angad samaan achal rahne vaale ki - yeh sab hua hi pada hai, aise sampoorn nishchay buddhi, har sankalp, bol aur karma mein sada vijayi, aise adhikaari bachchon ko yaad-pyaar diya aur namaste ki।

deedi ji ke saath

sangathan ka bal arthaat ek hi sankalp

roohaani yaatri jo double yaatra karne aate hain - ek madhuban ki yaatra, doosri vishesh madhuban mein roohaani yaatra। to double yaatra karne vaale yaatri jo bhi aate hain woh aaraam se apni yaatra saphal karke jaate hain। sab santushta rehte hain। gaaya jaata hai ki yadi dil bada hai,to jagah bhi badi hai। sthool jagah bhale hi kam ho lekin aane vaalon ki, svaagat karne vaalon ki aur sait karne vaalon ki dil badi hai to jagah ki kami mahsoos nahin hogi। phir 63janmon ki, ki hui yaatraaon se to sab selveshansa sangam ki yaatra par jyaada milti hain। woh jad chitron ki yaatra kitni mushkil hoti hai।

aap log bhi to yeh dekh-rekh karti ho ki hamaara sangathan ek sankalp vaala kahaan tak bana hai? shaastron mein gaayan hai ki brahma ko sankalp utha ki srishti rachen to srishti rachi gai। yahaan akele brahma ki to baat nahin, lekin brahma sahit sab braahmanon ka bhi jab ek saath yeh sankalp uthe ki ab ham sab ever ready hain aur nai duniya ki sthaapan honi hi chaahiye ya hogi hi - aisa dridh sankalp jab braahmanon ke andar utpanna ho,tab hi srishti ka parivartan ho arthaat nai srishti ki rachna practical mein dikhaai de। ismen bhi sangathan ka bal chaahiye। ek do ka va sirf aath ka nahin,lekin saare sangathan ka ek sankalp chaahiye। sankalp se srishti rachna, iska rahasya is prakaar se hai। sankalp utpanna hoga aur second mein samaapti ka nagaada bajna shuru ho jaayega।

ek taraph samaapti ka nagaada, doosri taraph nai duniya ka nazaara saath-saath dikhaai dega। vahaan hi vinaash ki ati hogi aur vahaan hi jalmai ke beech chaaron or vinaash mein ek hissa dharti aur baaki teen hissa to jalmai hogi na? yeh jo sabhi peechhepeechhe anek dharmo ke kaaran anek desh bane hain, woh anek dharma jab samaapta honge to anek desh bhi ek sairgaah ke roop mein jal ke beech ek taapu ke muaaphik ho jaayenge। to ek taraph vinaash ki ati ke nagaade honge,doosri taraph first prince (shreekrishna) ke janma ka aavaaj bulanda hoga, woh patte par nahin aayega। dikhaate hain na jalmai ke baad patte par shreekrishna aaya। teen hisse jalmai mein hone ke kaaran bhaarat jab paristaan banta hai to usko jalmai dikha diya hai। aise jalmai ke beech pahla patta jo first aatma hai uske janma ka chaaron or aavaaj prasiddha hoga ki first prince pratyaksha ho chuka hai, janma ho chuka hai। to woh bhi ati mein hoga arthaat jalmai ke teen hisse ka nazaara hoga aur ek hissa bhaarat-paristaan ke roop mein pragat hoga। jo dikhaate hain ki sone ki dvaarika paani se nikal aayi, lekin paani se nahin - teen hisse paani mein honge। isliye paani ke beech sone ki dvaarika dikhaai degi। isliye kehte hain ki sone ki dvaarika paani se nikal aayi। sirf us baat ka poora varnan nahin kar sake hain aur usi samay par first aatma ke janma ki jayjaykaar hogi। aise nazaare saamne aate hain to puraani duniya ke mahaavinaash ka nagaada aur naye first prince ke janma ka nazaara saathsaath dikhaai dega। jaise nagaada bajaane se pahle nagaade ko garam kiya jaata hai tab aavaaj bulanda hoti hai। yeh bhi yog agni se nagaada bajne ke pahle taiyaari chaahiye tab nagaade mein aavaaz bulanda hogi। intazaam mein lage hue ho na?intazaar karne vaalon ko bhi intazaam mein lagaao tab jayjaykaar ho jaayegi।

jab shareer ko chalaana aa jaayega tab raajya chalaana aa jaayega। shareer ko chalaana arthaat raajya karna। to raajya karne ke sanskaar bharne hain na? knowledgeful kaha jaata hai to full knowledge mein tan, man, dhan aur jan sab aa jaata hai। agar ek ki bhi knowledge kam hai to knowledgeful nahin kahenge। samjha? sada saphaltaamoorta banne ka aadhaar bhi knowledgeful hai। knowledge nahin to saphaltaamoorta bhi nahin ho sakte। samay ke pramaan purooshaartha ki gati bhi teevra honi chaahiye। samay ki raphtaar tej hai aur chalne vaalon ki raphtaar dheeli hai to samay par kaise pahunchenge? ‘ek bal, ek bharosa’, - yeh hai mukhya subject। har samay ek ki hi yaad mein ek-ras rehna। isi purooshaartha mein hi sada saphal ho to muzil par pahunch hi jaayenge। jo atoot sneh mein rehte hain unko sahayog bhi svatah praapta hota hai।

murli hai laathi, is laathi ke aadhaar se koi kami bhi hogi to woh bhar jaayegi। yeh aadhaar hi apne ghar tak aur apne raajya tak pahunchaayega lekin lakshya se, niyampoorvak nahin, lekin lagan se। to lagan se murli padhna va sunna arthaat murleedhar ki lagan mein rehna। murleedhar se sneh ki nishaani ‘murli’hai। jitna murli se sneh hai utna hi samjho murleedhar se bhi sneh hai। sachche brahman ki parakh murli se hogi। murli se lagan arthaat sachcha brahman। murli se lagan kam arthaat half-caste brahman।