बुधवार 11 मई 1977 की अव्यक्त मुरली

>

11-05-77om shanti avyakt baapdaadaamdhuban

sampanna swaroop ki nishaani - shubh chintan aur shubh chintak

baap samaan sampoorn swaroop bachchon ko dekh baba bole:-

baap-daada sadaiv bachchon ko sampoorn swaroop mein dekhte hain। harek bachcha baap samaan aananda, prem-swaroop,sukh, shanti swaroop hai। harek ke mastak se, naynon se kya nazar aate hain? jo baap ke gun hai,vahi gun bachchon se nazar aate hai? harek gunon aur shakti ka bhandaar hai। apne ko bhi sadaiv aise sampanna samajhkar chalte ho?sampanna swaroop ki nishaani, sarva aatmaon ko do baaton se dikhaai degi। woh do baaten kaun-si hain?aisi sampanna aatma, sadaiv svayan prati shubh-chintan mein rahegi aur anya aatmaon ke prati shubh-chintak rahegi। to ‘shubh-chintan aur shubh-chintak’ - yeh donon hi nishaaniyaan sampanna aatmaon mein dikhaai dengi। sampanna aatma ke paas ashubh chintan,va vyartha chintan svatah hi samaapta ho jaata hai, kyonki shubh chintan ka khazaana, satya gyaan, aisi aatma ke paas bahut hota hai। jaise royal family (ROYAL FAMILY;raajya parivaar) ke bachche ashubh chintan va vyartha chintan ke pattharon va mitti se nahin khelte। shubh chintan ke liye kitna athaah khazaana mila hai, us ko jaante ho na? akhut khazaana hai na? ‘shubh chintan arthaat samartha sankalp।’ to samartha aur vyartha, donon nahin rah sakte। jaise raat aur din nahin hote। amritvele uthte aur aankh kholte hi, kya shubh sankalp va chintan karna hai, yeh bhi baap ne suna diya hai। jaise amritvele shaktishaali baap ke sneh sahit shubh sankalp karenge, vaisa hi saare din par prabhaav padega, kyonki amritvela aadi kaal hai; sato pradhaan samay hai। baap dvaara bachchon ko vishesh vardaanon, va vishesh sahayog ka samay hai। isliye amritvele ke,pahle sankalp ka aadhaar, saare din ki dincharya par hota hai। jaise gaayan hai - ‘brahma ne sankalp se srishti rachi’,sankalp ka itna mahatva dikhaaya hua hai। brahma aadi kaal mein rachna rachte hain। vaise tum brahman aadi kaal arthaat amritvele, jaisa sankalp rachenge, vaisa hi saare din ki dincharya roopi srishti automatically (AUTOMATICALLY;svatah) hoti rahegi।

braahmanon ka pahla sankalp kaun-sa hai? us samay kaun-si stage hoti hai? baap samaan sthiti mein sthit ho milte ho na?aankh kholte,kaun-sa sankalp aata hai?baap ke sivaae aur koi dikhaai deta hai?jab good morning (Good Morning) karte ho,to bachcha samajh baap ko good morning karte ho na?to bachcha arthaat maalik। aur baap bhi bachchon ko kya respaand (Respond;javaab) karte hain - ‘baalak so maalik bachche।’baap ke bhi sirtaaj bachche। to pahla hi sankalp samartha hua na। pahli mulaakaat baap se hoti hai,aur pahle milan mein baap har roz, ‘samaan bhav’ ka vardaan deta hai। jismen sab vardaan samaae hue hain। to jiska aarambha hi itna mahaan ho to unka saara din kaisa hoga? vyartha ho sakta hai?

lekin aisi shreshtha mulaakaat sada kaun kar sakta hai? jiska sankalp bhi baba aur sansaar bhi baba hai। aise baap ke sameep bachchon ki mulaakaat sameep se hoti hai। nahin to sameep ki mulaakaat nahin, lekin saamne ki mulaakaat hoti hai। sab bachche,mulaakaat zaroor karte hain, lekin (1) number one bachche samaan swaroop se, sameep arthaat saath ka anubhav karte hain, saath bhi itna jaise ki do nahin,lekin ek hain। (2) second number, baap ke sneh ko,baap ke vardaanon ko,baap ke milan ko, samaan swaroop se nahin, lekin samaan banne ke shubh sankalp swaroop hokar milte hain। sammukh ka anubhav arthaat baap se sarva praapti ho rahi hain, aisi anubhooti karte hain। to first number,samaan bankar milte;second number, samaan banne ke sankalp se milte hain। teesre number ki to baat hi nahin poochho। (3) teesre number vaalon ki leela,vichitra hoti hai। abhi-abhi bachcha ban milenge, aur abhi-abhi maangane vaale ban jaayenge। bahuroopi hote hain, kab kis roop mein milenge, kab kis roop mein। to bachchon mein bhi milan manaane mein number vaar ho jaate hain।

lekin jinka sankalp sada shreshtha hai arthaat baap ke samaan-swaroop ka milan hai, unhon ka amritvele ka pahla sankalp saare din ki dincharya par prabhaav daalta hai। aisi aatmaaen,nirantar shubh chintan mein svatah hi rehti hain। second number svatah nahin rehte, lekin baar-baar attention rakhne se shubh chintan mein rehte। teesra number shubh chintan aur vyartha chintan donon yuddha mein rehte,kab vijayi,kab dilshikasta ho jaate। sada shubh chintan mein raho। uska saadhan sunaaya - ‘aadi kaal ka samartha sankalp।’ aise shubh chintan mein rahne vaala,saare din mein, sambandh-samparka mein aai hui aatma prati sada shubh chintak rehta hai। kaisi bhi koi aatma,chaahe satoguni, chaahe tamoguni samparka mein aave, lekin sabhi ke prati shubh-chintak arthaat apkaari ke oopar bhi upkaar karne vaale। kabhi kisi aatma ke prati ghrina drishti nahin hogi, kyonki jaante hain ki agyaan ke vasheebhoot hain। arthaat besmajh bachcha hai। besmajh bachche ke koi bhi karma par ghrina nahin hoti hai,aur hi bachche ke oopar raham,va sneh aayega। aisa shubh chintak sadaiv apne ko vishvaprivarta ka, vishwa-kalyaankaari samajhte hue aatmaon ke oopar raham dil hone ke kaaran,ghrina bhaav nahin, lekin sada shubh bhaav aur bhaavna rakhenge। isi kaaran sada shubh chintak honge। isne aisa kyon kiya,yeh nahin sochenge, lekin is aatma ka kalyaan kaise ho, woh sochenge। aisi shubh chintak stage sada hoti hai? agar shubh chintan nahin, to shubh chintak bhi nahin। donon ka sambandh hai। aise sampanna banne ke lakshya rakhne vaale, in donon lakshan ko dhaaran karo। samjha? agar vyartha sankalp chalenge, to shubh chintan ki stage thahar nahin sakegi। isliye apni chaitanya shakti ko dekho। shubh chintak banne ka abhyaasi bano, aapki hi shaktiyaan hain na!

jo seva karte hain, aise sevaadhaariyon ke prati baap ka sada vishesh sneh rehta hai,kyonki tyaag moortta hain na। to tyaag ka bhaagya svatah hi mil jaata hai। kya aur kaise milta hai,usko jaante ho? jaise ek hota hai mehnat se kamaana aur doosra hota hai achaanak koi lottery mil jaae to apne purooshaartha ki shaktiyon va sarvagunon ki anubhooti karna, yeh to sabhi karte hain, lekin vishesh sahayog ka pratyaksha phal, aisi anubhooti hogi, jaise mere purooshaartha ki stage se praapti adhik hai। jis anubhootiyon ke purooshaartha ka lakshya bahut samay se rakhte aae, woh anubhootiyaan aise sahaj aur powerful stage ki hogi, jo na chaahte hue man se yahi niklega ki - kamaal hai baba ki! mainne jo socha bhi nahin ki aise ho sakta hai - woh saakaar mein anubhav kar rahe hain। to aise baap ke vishesh vardaan ki praapti ka anubhav, sahayogi aatmaon ko hota hai। aise anubhav jeevan ka ek vishesh yaadgaar roop ban jaata hain। achha।

aise baap ke sada sahayogi aatmaaen, har kadam se follow father karte hue baap ko pratyaksha karne vaale, sada svayan ki gunon ki praapti ki lahron mein lahraate harshit rahne vaale, baap ke sneh mein samaae hue, aisi samaan aatmaon ko baap-daada ka yaad-pyaar aur namaste।

party se

sada in karma indriyon se nyaare arthaat apne ko ‘aatma maalik’ samajh,baap ke pyaare ban chalte ho?baap ke pyaare kaun hain? jo nyaare hain। baap bhi sarva ka pyaara kyon hai? kyonki nyaara hai। agar nyaara nahin hota, aap jaise janma-maran mein aata to sarva ka pyaara nahin ho sakta। to aap bhi sab baap ke pyaare tab banenge jab sada apne ko shareer ke bhaan se nyaare samajhkar chalenge। bina nyaare banne ke, pyaare nahin ban sakte। jitna jo nyaare arthaat aatmik smriti mein rehte utna hi baap ka pyaare hote। isliye number vaar yaad-pyaar dete hain na। number ka aadhaar hai - nyaare banne par। apne number ko nyaarepan ki sthiti se jaan sakte ho? baap bachchon ki maala sumarte hain। maala sumarne mein number one kaun aaenge? jo nyaare athva samaan honge। aise nahin - ham to peechhe aae hain hamko koi jaante nahin hai। baap to sab bachchon ko jaante hain। isilae pyaara banne ka aadhaar nyaara banna hai - yeh pakka karo। isi pahle paath ke paper mein full marks milne hain। isliye check karo - chal raha hoon, bol raha hoon jo bhi kar raha hoon woh karte hue, karaane vaala ban karke kara rahe hain। aatma karaane vaali hai aur karma indriyaan karne vaali hain। isi paath ko pakka karne se sada sarva khazaane ke maalikpan ka nasha rahega। koi apraapta vastu anubhav nahin hogi। baap mila, sab mila। sirf kahne maatra nahin - use sarva praapti ka anubhav hoga,sada khushi,shanti, aananda mein magan rahega। ‘mil gaya, pa liya’ - yahi nasha rahega।

sada apne svabhaav ke seat (Seat;aasan) par set rehte ho? svamaan ki seat kaun-si hai? oonche te ooncha baap ke oonche bachche va brahman hain। is shreshtha svamaan par sada sate rehte ho ya seat hilti hai?maaya seat ko hilaane ki koshish karti hai। jab hain hi oonche te oonch baap ke bachche to phir yeh bhoolna kyon chaahiye? yeh brahman janma bhi natural life (Natural Life;svaabhaavik jeevan) hai। natural life ki baat bhoolti nahin। temparri (Temporary;alpakaalik) baat bhoolti hai। shubh chintan ka khazaana, jo baap dete hain,us khazaane ka baar-baar sumiran karna arthaat use (USE) karna। use karne se khushi hogi।

shubh chintan mein rehna bhi manan hai। manan se jo khushi roopi makkhan niklega, woh jeevan ko shaktishaali bana dega। phir koi hila nahin sakta। maaya hilegi, khud nahin hilega। angad ka misaal kinhon ka hai?mahaarthiyon ka। to aap mahaarthi ho na?jab kalpa pahle nahin hile the to abhi kaise hilenge? sada achal, ‘angad samaan’ sada ek ras sthiti mein sthit, jara bhi sankalp mein bhi hilta nahin-’yeh hai angad।’

sada shastradhaari ban maaya ka saamna karte chal rahe ho? jo shastradhaari hote hain woh sada nirbhay hote hain। kisse?dushman se। jaise pahre vaala chaukeedaar agar shastradhaari hota hai aur usko nishchay hai ki - mera shastra dushman ko bhagaane vaala hai,haar khilaane vaala hai to woh kitna nirbhay ho karke chalta rehta hai। to yahaan bhi maaya kitna bhi saamna kare lekin shastradhaari hain to maaya se kabhi ghabdaayenge nahin, darenge nahin, haar nahin khaayenge,arthaat sada vijayi honge। to sarva shastra sada kaayam rehte hain? ek bhi kam hua to haar ho sakti hai। shastra hai shaktiyaan,to sarva shaktiyaan roopi shastra sada kaayam rehte hain? sambhaalne aate hain? paandavon ki bahaaduri ko bahut lambe chaude roop mein dikha diya hai - shaktiyon ki bahaaduri shastra dikhaaye hain। paandav sada prabhu ke saathi the aur saath ke kaaran vijayi hue। aapko bhi sada baap ke saath ka anubhav hota hai? jab saath ka anubhav hoga to jo baap ke gun,baap ki shaktiyaan woh aapki hain। jaise baap roohaani hai vaise saath mein rahne vaale bhi roohaaniyat mein rahenge। shareer ko dekhte bhi rooh ko dekhenge।

amritvele ka anubhav sabhi karte ho? agar kisi ko ghar baithe lottery mile aur phir bhi usko woh chhod de to usko kya kahenge? woh bhi ghar baithe lottery milti hai, agar abhi is lottery ko na lenge to yeh din bhi yaad karenge। abhi yeh praapti ke din hain,thode samay ke baad yahi din pashchaattaap ke ho jaaenge! to jitna chaaho utna lo। speed tej karo। sadaiv yaad rakho - ‘ab nahin to kabhi nahin।’ aaj bhi nahin, lekin abhi - usko kaha jaata hai ‘teevra purushaarthi।’

ghar chalne ki taiyaari ki hai? taiyaar hona arthaat sab rassiyaan tooti hui hon। to sab tooti hui hain? agar rassiyaan tooti hui hongi to ghar jaaenge nahin to janma lena padega। service mein samaapti ki hai? jyaada ulahne vaale rahe hain ya sandesh vaale?jab tak vishwa ko sandesh nahin diya to vishwa-kalyaankaari naam kaise padega? phir to india ke kalyaankaari hue।

itne abhyaasi hue ho ki kuchh bhi ho - sahaj hi shareer se nikal jaaenge। yeh practice hai? koi bhi sambandh va sanskaar kasmaksa na kare। jaana to sabko hai lekin ek jaaenge sahaj,ek jaaenge yuddha karte-karte। to jaane ke liye taiyaar ho - yeh to theek, lekin sahaj jaaenge,yeh taiyaari hai? direct jaayenge ya via jaayenge? ‘dharmaraajpuri kastampuri hai।’ agar kuchh saath mein rah gaya to kastam mein rookna padega। to jaane ke saath yeh bhi taiyaari chaahiye। dekhna kastam clear hai? passport aadi sab check karna,bag-baggage sab check karna।

achha। om shanti।