बुधवार 14 अक्टूबर 1981 की अव्यक्त मुरली

>

14-10-81 om shanti avyakt baapdaada madhuban

"sarva khazaanon ki chaabi ek shabd -‘baba'"

sarvashreshtha bhaagya vidhaata, padmaapdam bhaagyashaali banaane vaale baapdaada bole –

aaj bhaagyavidhaata baap apne bhaagyashaali bachchon ko dekh rahe hain। bhaagyashaali to sabhi bane hain lekin bhaagyashaali shabd ke aage kahaan saubhaagyashaali, kahaan padmaapdam bhaagyashaali। bhaagyashaali shabd donon ke liye kaha jaata hai। kahaan sau aur kahaan padam,antar ho gaya na, bhaagya vidhaata ek hi hai। vidhaata ki vidhi bhi ek hi hai। samay aur vela bhi ek hi hai। phir bhi nambarvaar ho gaye। vidhaata ki vidhi kitni shreshtha aur sahaj hai। vaise laukik reeti se aajkal kisi ke oopar grahchaari ke kaaran takdeer badal jaati hai to grahchaari ko mita kar shreshtha takdeer banaane ke liye kitne prakaar ki vidhiyaan karte hain! kitna samay, kitni shakti aur sampatti kharcha karte hain! phir bhi alpakaal ki takdeer banti hai। ek janma ki bhi guarantee nahin kyonki ve log vidhaata dvaara takdeer nahin badalte। alpagya, alpa-siddhi ke praapta hue vyakti dvaara alpakaal ki praapti karte hain। woh hain alpagya vyakti aur yahaan hai vidhaata। vidhaata dvaara avinaashi takdeer ki lakeer khinchava sakte ho। kyonki bhaagyavidhaata donon baap is samay bachchon ke liye haajar na jar hain। jitna bhaagya vidhaata se bhaagya lene chaaho utna ab le sakte ho। is samay hi bhaagya-daata bhaagya baantane ke liye aayen hain। is samay ko drama anusaar vardaan hai। bhaagya ke bhandaare bharpoor khule hue hain। tan ka bhandaara,man ka, dhan ka, raajya ka, prakriti daasi banne ka,bhakta banaane ka, sab bhaagya ke bhandaare khule hain। kisi ko bhi vidhaata dvaara special praapti ka chance nahin milta hai। sabko ek jaisa chance hai। koi bhi baaton ka kaaran bhi bandhan ke roop mein nahin hai। peechhe aane ka kaaran,pravritti mein rahne ka kaaran, tan ke rog ka kaaran, aayu ka kaaran, sthool degree ya padhaai ka kaaran,kisi bhi prakaar ke kaaran ka taala bhandaare mein nahin laga hua hai। din-raat bhaagya vidhaata ke bhandaare bharpoor aur khule hue hain। koi chaukeedaar nahin hai। phir bhi dekho lene mein number ban jaaten hain। bhaagya vidhaata number se nahin dete hain। yahaan bhaagya lene ke liye queue mein bhi nahin khada karte hain। itne bade bhandaare hain bhaagya ke, jab chaaho jo chaaho adhikaari ho। aise hai na? koi taala aur queue to nahin hai na?amritvele dekho-desh videsh ke sabhi bachche ek hi samay par bhaagya vidhaata se milan manaane aate, to milna ho hi jaata hai। milan manaana hi milna ho jaata hai। maangate nahin hain, lekin bade te bade baap se milna arthaat bhaagya ki praapti hona। ek hai baap bachchon ka milna, doosra hai koi cheez milna। to milan bhi ho jaata hai or bhaagya milna bhi ho jaata hai। kyonki bade aadmi kabhi bhi kisi ko khaali nahin bhej sakte hain। to baap to hai hi vidhaata, vardaata,bharpoor bhandaare। khaali kaise bhej sakte! phir bhi bhaagyashaali,saubhaagyashaali padam bhaagya shaali, padmaapadma bhaagyashaali,aise kyon banten hain? dene vaala bhi hai, bhaagya ka khazaana bhi bharpoor hai, samay ka bhi vardaan hai। in sab baaton ka gyaan arthaat samajh bhi hain। anjaan bhi nahin hain phir bhi antar kyon? (drama anusaar)। drama ko hi abhi vardaan hai,isliye drama nahin kah sakte।

vidhi bhi dekho kitni saral hai। koi mehnat bhi nahin batlaate, dhakke nahin khilaate,kharcha nahin karaate। vidhi bhi ek shabd ki hai। kaun sa ek shabd? ek shabd jaante ho?ek hi shabd sarva khazaanon ki va shreshtha bhaagya ki chaabi hai। vahi chaabi hai, vahi vidhi hai। woh kya hai? yeh ‘‘baba''shabd hi chaabi aur vidhi hai। to chaabi to sabke paas hai na? phir pharka kyon?chaabi atak kyon jaati hai?right ke bajaae left taraph ghuma dete ho। svachintan ke bajaae, parchintan,yeh ulte taraph ki chaabi hai। svadarshan ke badle pardarsha na, badalne ke bajaae, badla lene ki bhaavna,svaprivarttan ke bajaae par-parivarttan ki ichchha rakhna। kaam mera naam baap ka, iske bajaae naam mera kaam baap ka,isi prakaar ki ulti chaabi dhuma dete hain,to khazaane hote hue bhi bhaagyaheen khazaane pa nahin sakte। bhaagya vidhaata ke bachche aur ban kya jaate hain?thodi si anchali lene vaale ban jaate। doosra kya karte hain?

aajkal ki duniya mein jo amoolya khazaane laakarsa va tijoriyon mein rakhte hain, unhon ke kholne ki vidhi double chaabi lagaaten hain va do baari chakkar lagaana hota hai। agar woh vidhi nahin karenge to khazaane mil nahin sakte। laakarsa mein dekha hoga - ek aap chaabi lagaayenge,doosra bank vaala lagaayega। to double chaabi hogi na! agar sirf aap apni chaabi lagaakar kholne chaaho to khul nahin sakta। to yahaan bhi aap aur baap donon ke yaad ki chaabi chaahiye। kai bachche apne nashe mein aakar kehte hain - main sab kuchh jaan gaya hoon, main jo chaahoon woh kar sakta hoon, kara sakta hoon। baap ne to hamko maalik bana diya hai। aise ulte mai-pan ke nashe mein baap se sambandh bhool, svayan ko hi sab kuchh samajhne lagte hain। aur ek hi chaabi se khazaane kholne chaahte hain। arthaat khazaanon ka anubhav karne chaahte hain। lekin bina baap ke sahayog va saath ke khazaane mil nahin sakte, to double chaabi chaahiye। kai bachche baap-daada arthaat donon baap ke bajaae ek hi baap dvaara khazaane ke maalik banne ke vidhi ko apnaate hain,isse bhi praapti se vanchit ho jaate hain। hamaara niraakaar se direct connection hai,saakaar ne bhi niraakaar se paaya isliye ham bhi niraakaar dvaara hi sab pa lenge, saakaar ki kya aavashyakta hai। lekin aisi chaabi khandit chaabi ban jaati hai। isliye saphalta nahin mil paati hai। hansi ki baat to yeh hai,naam apna brahmaakumaari,kumaari kahlaayenge aur connection shiv baap se rakhenge। to apne ko shivkumaar, kumaari kahlaao na! brahmaakumaar aur kumaari kyon kehte?surname hi hai shiv vanshi brahmaakumaar,brahmaakumaari to donon hi baap ka sambandh hua na!

doosri baat - shiv baap ne bhi brahma dvaara hi svayan ko pratyaksha kiya। brahma dvaara brahman adopt kiye। akela nahin kiya। brahma maa ne baap ka parichay dilaaya। brahma maa ne paalna kar baap se varse ke yogya banaaya।

teesri baat - raajya-bhaagya ko praalabdha mein kiske saath aayenge? niraakaar to niraakaari duniya ke vaasi ho jaayenge। saakaar brahma baap ke saath raajya-bhaagya ki praalabdha bhogenge। saakaar mein hero part bajaane ka sambandh saakaar brahma baap se hai va niraakaar se?to saakaar ke bina sarva bhaagya ke bhandaare ke maalik kaise ho sakte hain? to khandit chaabi nahin lagaana। bhaagya vidhaata ne bhaagya baanta hi brahma dvaara hai। sivaae brahmaakumaar,kumaari ke bhaagya ban nahin sakta।

aap longo ke yaadgaar mein bhi yahi gaayan hai ki brahma ne jab bhaagya baanta to soye hue the! soye hue the va khoye hue the? is liye ulti chaabi nahin lagaao, double chaabi lagaao। double baap bhi aur double aap aur baap bhi, isi sahaj vidhi se sada bhaagya ke khazaane se padmaapadma bhaagyashaali ban sakte ho। kaaran ko nivaaran karo to sada sampanna ban jaayenge। samjha? achha।

aise bhaagya vidhaata ke sada shreshtha bhaagyavaan bachchon ko, sahaj vidhi dvaara vidhaata ko hi apna banaane vaale, sada sarva bhaagya ke khazaanon se khelne vaale, ‘‘baba-baba''kehna nahin lekin ‘‘baba''ko apna banaana aur khazaanon ko paana, aise sada adhikaari bachchon ko baapdaada ka yaad pyaar aur namaste।

party se vyaktigat mulaakaat

suna to bahut hai, sunne ke baad swaroop bane? sunna arthaat swaroop banna। isko kaha jaata hai - manras। sirf sunna to kanras ho gaya। lekin sunna aur banna,yeh hai manras। mantra hi hai - manamnaabhav। man ko baap mein lagaana। jab man lag jaata hai to jahaan man hoga,vahaan swaroop bhi sahaj ban jaayenge। jaise dekho kisi bhi sthaan par baithe sukh va khushi ki baaton mein man chala jaata hai to swaroop hi woh ban jaata hai। to manras arthaat jahaan man hoga vaisa ban jaayengen। ab kanras ka samay samaapta hua aur manras ka samay chal raha hai। to abhi kya ban gaye?bhaagya ke khazaanon ke maalik, sarvashreshtha bhaagyavaan ban gaye na! jaisa baap vaise ham। aise samajhte ho na? chaabi bhi suna di aur vidhi bhi suna di। abhi lagaana aap ka kaam hai। chaabi lagaane to aati hain na?agar chaabi ko ulta chakkar lag gaya to bahut mushkil ho jaayega। chaabi bhi chali jaayegi aur khazaana bhi chala jaayega। to aap sab sulti chaabi lagaane vaale padmaapadma bhaagyashaali ho na? padmaapadma bhaagyashaali ki nishaani kya hogi? unke har kadam mein bhi padma honge aur ve har kadam mein bhi padmo ki kamaai jama karenge। ek bhi kadam padmon ki kamaai se vanchit nahin hoga। isliye double padma, ek padma kamal pushpa ko bhi kehte hain, agar kamal pushpa ke samaan nahin to bhi apne bhaagya ko bana nahin sakte। keechad mein phansana arthaat bhaagya ko ganvaana। to padmaapadma bhaagya shaali arthaat padma samaan rehna aur padmon ki kamaai karna, to dekho yeh donon hi nishaaniyaan hain! sada nyaare aur baap ke pyaare bane hain! nyaara pan hi baap ko pyaara hai। jitna jo nyaara rehta hai utna svatah hi baap ka pyaara ho jaata। kyonki baap bhi sada nyaara hai, to woh baap samaan ho gaya na! to har kadam mein check karo ki har kadam arthaat har second,har sankalp mein, har bol mein, har karma mein, padmon ki kamaai hoti hai! bol bhi samartha, karma bhi samartha, sankalp bhi samartha। samartha mein kamaai hogi, vyartha mein kamaai jaayegi। to harek apna chart svatah hi check karo। karne ke pahle check karna yeh hai, yathaartha checking। iske karne ke baad check karo to jo kar chuke woh to ho hi gaya na! isliye pahle check karna phir karna। samajhdaar va knowledge- full ki nishaani hi hai - ‘‘pahle sochna phir karna।'' karne ke baad agar socha to aadha ganvaaya, aadha paaya। kane ke pahle socha to sada paaya। gyaani tu aatma arthaat samajhdaar। sirf raat ko va subah ko chenking nahin karte, lekin har samay pahle checking karenge phir karenge। jaise bade aadmi pahle bhojan ko check karaate hain phir khaate hain। to yeh sankalp bhi buddhi ka bhojan hai, isliye aap bachchon ko sankalp ki bhi checking kar phir sveekaar karna hai arthaat karma mein laana hai। sankalp hi check ho gaya to vaani aur karma svatah hi check ho jaayenge। beej to sankalp hai na! aap jaise bade aur kalpa mein hue hi nahin hain।

2. sada karmayogi ban har karma karte ho? karma aur yog donon combined rehta hai? jaise shareer aur aatma donon combined hokar karma kar hi hai, aise karma aur yog donon combined rehte hain? karma karte yaad na bhoole aur yaad mein rehte karma na bhoole। kai aise karte hain ki jab karmakshetra par jaate hain to yaad bhool jaati hai। to isse siddha hai ki karma aur yaad alag ho gai। lekin yeh donon kamba- end hain। title hi hai - karmayogi। karma karte yaad mein rahne vaale sada nyaare aur pyaare honge,halke honge, kisi bhi karma mein bojh anubhav nahin karenge। karmayogi ko hi doosre shabdon mein kamal pushpa kaha jaata hai। to kamal pushpa ke samaan rehte ho? kabhi kisi bhi prakaar ka keechad arthaat maaya ka vibration touch to nahin hota hai? kabhi maaya aati hai ya vidaai lekar chali gai? maaya ko apne saath bitha to nahi dete ho? maaya ko bithaana arthaat baap se kinaara karna। isliye maaya ke bhi knowledgeful ban door se hi use bhaga do। knowledgeful anubhav ke aadhaar se jaante hain ki maaya ki utpatti kab aur kaise hoti hai। maaya ka janma kamjori se hota hai। kisi bhi prakaar ki kamjori hogi to maaya aayegi। jaise kamjori se anek beemaariyon ke jarmas paida ho jaate hain। aise aatma ki kamjori se maaya ko janma mil jaata hai। kaaran hai - apni kamjori, aur uska nivaaran hai - roj ki murli। murli hi taaja bhojan hai, shaktishaali bhojan hai। jo bhi shaktiyaan chaahiye, un sabse sampanna roj ka bhojan milta hai। jo roj shaktishaali bhojan grahan karta hai woh kamjor ho nahin sakta। roj yeh bhojan to khaate ho na, us bhojan ka vrat rakhne ki jaroorat nahin। roj aise shaktishaali bhojan milne se master sarvashaktivaan rahenge। bhojan ke saath-saath bhojan ko hajam karne ki bhi shakti chaahiye। agar sirf sunne ki shakti hai,manan karne ki shakti nahin,to bhi shaktishaali nahin ban sakte। sunne ki shakti arthaat bhojan khaaya aur manan shakti arthaat bhojan ko hajam kiya। donon shakti vaale kamjor nahin ho sakte।

teachers ke saath - sevaadhaari ki visheshta hi hai - tyaag aur tapasya।jahaan tyaag aur tapasya hai, vahaan sevaadhaari ki sada saphalta hai। sevaadhaari arthaat jiska ek baap ke sivaae or koi nahin। ek baap hi saara sansaar hai। jab sansaar hi baap ho gaya to aur kya chaahiye! sivaae baap ke aur dikhaai na de। chalte-phirte,khaate-peete ek baap aur doosra na koi। yahi smriti mein rakhna arthaat saphalta moortta banna। saphalta kam hoti to check karo- zaroor baapdaada ke saath koi doosra beech mein aa gaya hai। saphaltaamoortta ki nishaani - ek baap mein saara sansaar।