रविवार 14 मार्च 1982 की अव्यक्त मुरली

>

14-03-82 om shanti avyakt baapdaada madhuban

“baapdaada dvaara desh videsh ka samaachaar”

baapdaada bole:-

‘‘aaj baapdaada bachchon ke saath sair karne gaye the। baapdaada ko saari srishti ki parikrama lagaane mein kitna samay lagta hoga? jitne samay mein chaahen utne samay mein parikrama ko poora kar sakte hain। chaahe vistaar se karen, chaahe saar mein karen। aaj double videshiyon se milne ka din hai na। isliye sair samaachaar sunaate hain। videsh mein kya dekha aur desh mein kya dekha?

kuchh samay pahle videsh ki visheshta ki lahar bhaarat mein aai - woh kya thi? jaise videsh mein alpakaal ke sukh ke saadhnon ki masti mein sada masta rehte the - aise bhaaratvaasiyon ne bhi videshi sukh ke saadhnon ko khoob apne prati kaarya mein laaya। khoob videshi saadhnon dvaara alpakaal ke sukhon mein masta hone ki anubhooti ki। aur ab bhi kar rahe hain। bhaarat vaalon ne alpakaal ke saadhnon ki kaapi ki aur kaapi karne ke kaaran apni asli shakti ko kho diya। roohaaniyat se kinaara kar liya aur videshi sukh ke saadhnon ka sahaara le liya। aur videsh ne kya kiya? samajhdaari ka kaam kiya। bhaarat ki asli roohaani shakti ne unhon ko videsh mein aakarshit kiya। iska parinaam harek naamdhaari roohaani shakti vaale ke paas athva nimitta gurooon ke paas videshi followers jyaada dekhne mein aayenge। videshi aatmaayen nakli saadhnon ko chhodkar asliyat ki taraph,roohaaniyat ki taraph jyaada aakarshit ho rahi hain aur bhaaratvaasi nakli saadhnon mein masta ho gaye hain। apni cheej ko chhod paraai cheej ke taraph ja rahe hain aur videshi aatmaayen asli cheej ko dhoondhane, parakhne aur paane ki jyaada ichchhuk hain।

to aaj baapdaada desh-videsh ka sair kar rahe the। us sair mein yahi dekha ki bhaaratvaasi kya kar rahe hain aur videshi kya kar rahe hain? bhaaratvaasiyon ko dekh baapdaada ko taras aa raha tha ki itne oonche kul ki number one dharma ki aatmaayen,peechhe ke dharma vaalon ki chhodi hui cheejon ko apnaane mein aise masta ho gaye hain jo apni vishesh vastu ko bhool gaye hain। is kaaran bhaarat roopi ghar mein baithe hue, bhaarat roopi ghar mein aaye hue shreshtha mehmaan baap ko bhi nahin jaante aur videsh ki aatmaayen door baithe bhi sirf sandesh sunte hi pahchaan kar aur pahunch gai hain। to baapdaada dekh rahe hain ki double videshi bachchon ki parakhne ki aankh bahut tej hai। door se parakhne ki aankh dvaara,anubhav dvaara baap dekh liya aur pa liya। aur bhaaratvaasi, unmein bhi baapdaada ko aabu nivaasiyon par jyaada taras hai jo paas hote bhi parakhne ki aankh nahin। parakhne ki aankh se andhe rah gaye na! aise bachchon ko dekh taras to aayega na! to double videshiyon ki kamaal dekh rahe the।

doosra kya dekha hai ki aajkal jaise bhaarat gareeb hai aise ab last samay najdeek hone ke kaaran videshiyon mein bhi sampannata mein kami aa gai hai। jaise vriksha jab hara bhara hota hai to phal-phool sab lage hue hote hain lekin jab vriksha sookhne shuru hota hai to sab phal phool bhi sookhne shuru ho jaate hain। to yeh desh ki praapti roopi visheshta jisse praja sukhi rahe, khush rahe, shanti ka vaataavran rahe woh phal phool sookhne lag gaye hain। abhi videsh mein bhi naukri sahaj nahin milti। pahle kab videsh mein yeh problem suni thi? to yeh bhi nishaani hai sukh ke saadhan aur shanti ke phal sookh rahe hain। bhaarat roopi mukhya tana sookh raha hai uska prabhaav mukhya shaakhaaon par bhi padna shuru ho gaya hai। yeh krishchayan dharma last ki mukhya badi shaakha hai। vriksha ke chitra mein krishchayan dharma kaun-si shaakha hai? jo mukhya shaakhaayen dikhaate ho usmein to last hua na। us shaakha tak sampannata ke praapti ki hariyaali sookh gai hai। yeh nishaani hai saare vriksha ke jadajdeebhoot avastha ki। to saare vishwa mein alpakaal ke praapti roopi phal-phool sookhe hue dekhe। sirf baaki do baaten hain –

ek - man se, mukh se chillaana aur doosra kaise bhi majboori se jeevan ko, desh ko chalaana। chillaana aur kaarya se chalaana। yeh do kaam baaki rah gaye hain। khushi-khushi se chalna woh samaapta ho gaya hai। kaise bhi chalaana hai yeh rah gaya hai। videsh mein bhi yeh rooprekha ban gai hai। to yeh bhi kya nishaani hui?majboori se chalaana kahaan tak chalega! ab jo chilla rahe hain aise vishwa ko kya karna hai? majboori se chalaane vaalon ko praapti ke pankh de udaana hai। kaun uda sakega?jo svayan udti kala mein hoga। to udti kala mein ho?udti kala va chadhti kala - kis kala mein ho? chadhti kala bhi nahin,abhi udti kala chaahiye। kahaan tak pahunche ho? double videshi kya samajhte hain? majority to baap samaan shikshak quality hain na। to teacher arthaat udti kala vaale। aise hi ho na?

achha - aaj to sirf sair samaachaar sunaaya। ab desh-videsh vaale practical mein nishaaniyaan spashta dekh rahe hain। aajkal jo baat hoti to kehte hain 100varsha pahle hui thi। sab vichitra baaten ho rahi hain। kyonki yeh vichitra baap ko pratyaksha karengi। sabke mukh se abhi yeh aavaaj nikal raha hai ki ab kya hoga?yeh question mark sabki buddhi mein spashta ho gaya hai। ab phir yeh bol niklenge ki jo hona tha woh ho gaya। baap aa gaya। question marks samaapta ho, full stop lag jaaega। jaise mathni se makkhan nikaala jaata hai to pahle halchal hoti hai baad mein makkhan nikalta hai। to yeh question mark roopi halchal ke baad pratyakshata ka makkhan niklega। ab teji se halchal shuru ho gai hai। chaaron or ab pratyakshata ka makkhan vishwa ke aage dikhaai dega। lekin is makkhan ko khaane vaale kaun? taiyaar ho na khaane ke liye? sabhi aap pharishton ka aahvaan kar rahe hain। achha –

sarva apraapta aatmaon ko sarva praapti karaane vaale, sarva ko parakhne ka netra daan karne vaale mahaadaani, sarva ko santushtata ka vardaan dene vaale vardaani santushta aatmaayen,sada sva ke praapti ke pankhon dvaara anya aatmaon ko udaane vaale,sada udti kala vaale, sada sva dvaara baap ko pratyaksha karne vaale, vishwa ke aage prakhyaat hone vaale shreshtha aatmaon ko baapdaada ka yaad pyaar aur namaste।''

videshi bachchon ke saath- avyakt baapdaada ki personal mulaakaat

sada apne ko sarva praapti sampanna anubhav karte ho? sarva praaptiyon ki anubhooti hai?jis aatma ko sarva praaptiyon ki anubhooti hogi,unki nishaani kya dikhaai degi?woh sada santushta hoga। unke chehre par sada prasannata ki nishaani dikhaai degi। unke chehre se dikhaai dega ki yeh sab kuchh paai hui aatma hai। jaise dekho laukik reeti se jo raajkumaar,raajkumaari hote hain va oonche kul ke hote hain to unke chehre se dikhaai deta ki yeh bharpoor aatmaayen hain। aise aap roohaani kul ki aatmaon ke chehre se dikhaai de - jo kisko nahin mila hai woh inko mila hai। aise anubhav hota hai ki hamaari chalan aur chehra badal gaya hai chehre par praapti ki chamak aa gai hai?double videshiyon ko double chance mila hai to seva bhi double karni hai। double seva kaise karenge? sirf vaani se nahin lekin chalan se bhi aur chehre se bhi। jaise svayan parvaane bane ho,aise anek parvaanon ko shama ke paas laane vaali aatmaayen ho। to aapki udaan dekhte hi anya parvaane bhi aapke peechhe-peechhe udne lag jaayenge। jaise aap sabhi har baat ki gahraai mein jaate ho, aise har gun ki anubhooti ki gahraai mein jaao। jitna gahraai mein jaayenge utna roj naya anubhav kar sakenge। jaise shant swaroop ka anubhav roj karte ho lekin har roj naveenta ka anubhav karo। naya anubhav tab hoga jab ekaantavaasi honge। ekaantavaasi arthaat sada sthool ekaanta ke saath-saath ek ke ant mein sada rehna।

ek ‘‘baba''shabd bhi jo baar-baar kehte ho, woh har baar naya anubhav hona chaahiye। jaise shuru mein jab aaye tab bhi baba shabd kehte the, madhuban mein aaye tab bhi yahi bola aur ab jab jaayenge tab bhi ‘baba'shabd bolenge lekin pahle bolne mein aur ab ke bolne mein kitna antar hoga! yeh anubhav to hai na? baba shabd to vahi hai lekin jigri praapti ke aadhaar par vahi baba shabd anubhav mein aage badhta gaya। to pharka padta hai na! aise sab gunon mein bhi roj naya anubhav karo। shant swaroop to ho lekin shanti ki anubhooti kis point ke aadhaar par hoti hai, jaise dekho main aatma paramdham nivaasi hoon,isse bhi shanti ki anubhooti hoti hain aur - main aatma satayug mein sukh-shanti swaroop hoongi uska anubhav dekho to aur hoga। aise hi karma karte hue ashaanti ke vaataavran mein hote bhi - main aatma shant swaroop hoon, uski anubhooti karte ho to uska anubhav aur hoga। pharka ho gaya na teenon mein। hain to shant swaroop। aise roj us shant swaroop ki anubhooti mein bhi progress ho। kab kis point se shant swaroop ki anubhooti karo,kabhi kisse to roj ka naya anubhav hoga aur sada isi mein busy rahenge ki naya-naya mile। nahin to kya hota hai chalte- chalte vahi yaad ki vidhi, vahi murli sunne aur sunaane ki vidhi, phir vahi baat kahaan-kahaan common anubhav hone lagti hai। isliye phir umang bhi jaise sada rehta hai vaise hi rehta hai, aage nahin badhta। aur iski result mein phir kahaan albelaapan bhi aa jaata hai। yeh to mujhe aata hi hai, yeh to jaante hi hain! to udti kala ke bajaay thaharti kala ho jaati hai। isliye svayan tatha jin aatmaon ke liye nimitta bante ho, unhein sada naveenta ka anubhav karaane ke liye yeh vidhi zaroor chaahiye। samjha! aap sab majority seva ke nimitta aatmaayen ho na to yeh visheshta zaroor dhaaran karni hai। roj koi na koi point nikaalo - shant swaroop ke anubhooti ki points kya hain? aise prem swaroop,aananda swaroop sabki vishesh point buddhi mein rakhte hue roj naya-naya anubhav karo। sada aise samjho ki aaj naya anubhav karke auron ko karaana hai। phir amritvele baithne mein bhi badi roochi hogi। nahin to kabhi-kabhi susti ki lahar aa jaati hai। jahaan nai cheej milti hai vahaan susti nahin hoti hai। aur vahi-vahi baaten hain to susti aane lagti hai। to samjha kya karna hai? tareeka samajh mein aaya?abhi koi prashn poochhna hai to poochho - videshiyon ko vaise bhi variety achhi lagti hai। jaise picnic mein namkeen bhi chaahiye, meetha bhi chaahiye। aur variety prakaar ka chaahiye to jab bhi anubhav karne baithte ho to samjho abhi baapdaada se variety picnic karne ja rahe hain। picnic ka naam sunkar hi phurta ho jaayenge। susti bhaag jaayegi। vaise bhi aap logon ko picnic karna, baahar mein jaana achha lagta hai na! to chale jaao baahar, kabhi paramdham mein chale jaao, kabhi svarga mein chale jaao, kabhi madhuban mein aa jaao, kabhi london centre mein chale jaao,kabhi Australia pahunch jaao। variety hone se ramneekta mein aa jaayenge। achha-

‘‘videshi bachchon dvaara poochhe gaye kuchh prashn - baapdaada ke uttar''

prashn -chalte-chalte purooshaartha me jab rookaavat aati hai to kya karna chaahiye? rookaavat aane ka kaaran kya hota hai?

uttar -jab kai prakaar ke papers saamne aate hain, to un papers ka saamna karne ki shakti na hone ke kaaran purooshaartha mein rookaavat aa jaati hai, aise samay par doosron ka sahayog lena zaroori hota hai। jaise kaar mein battery jab thodi dheeli ho jaati hai, kaar apne aap nahin chalti hai to doosron se thoda dhakka lagvaate hain na! to jis bhi aatma mein aapka faith ho aur samjho inse hamko madad mil sakti hai to unse thoda-sa sahayog lekar aage badh jaana chaahiye। pahle use apni baat spashta sunaana chaahiye ki aise hai, phir sahayog milne se chal padenge। kyonki hota kya hai - jis samay aisi stage aati hai us samay direct baap se sahayog lene ki himmat nahin hoti hai, isliye phir saakaar mein thodaasa sahayog lenge to phir direct lene mein madad mil jaayegi।

prashn -baba ke saath ham bachche bhi chakkar par (vishwa parikrama par) kaise ja sakte hain?

uttar -iske liye baap samaan vishwa kalyaankaari ki behad ki stage mein sthit hona pade jab us stage mein sthit honge to aise anubhav karenge jaise chitra dikhaate ho - globe ke oopar shreekrishna baitha hua hai, aise main vishwa ke globe par baitha hoon। to automatically vishwa ka chakra lag jaayega। jaise bahut oonche sthaan par chale jaate ho to chakkar lagaana nahin padta lekin ek sthaan par rehte saara dikhaai deta hai। aise jab top ki stage par, beejroop stage par, vishwa kalyaankaari sthiti mein sthit honge to saara vishwa aise dikhaai dega jaise chhota‘baal' hai। to second mein chakkar lagaakar aayenge kyonki oonchi stage par rahenge। baaki kabhi-kabhi divya drishti dvaara anubhav hota hai practical chakkar lagaane ka। woh phir sookshm aakaari swaroop dvaara। jaise plen mein chakkar lagaakar aao vaise aakaari roop dvaara vishwa ka chakkar laga sakte ho। donon prakaar se chakra laga sakte। jab hain hi vishwa ke rachayita ke bachche to saari rachna ka chakra to lagaayenge na!

prashn - kai baar yog mein bahut achhi-achhi touching hoti hain lekin yeh baba ki hi touching hai, uska pata kaise chale?

uttar -1- baba ki touching hamesha powerful hogi aur anubhav hoga ki yeh meri shakti se kuchh vishesh shakti hai।

2- jo baba ki touching hogi usmein sahaj saphalta ki anubhooti hogi।

3- jo baba ki touching hogi usmein kabhi bhi kyon, kya ka question nahin hoga। bilkul spashta hoga। to in baaton se samajh lo ki yeh baba ki touching hai।

prashn- ham buddhi se surrender hain ya nahin, uski parakh kya hai?

uttar-buddhi se surrender ka arth hai - buddhi jo bhi nirnay kare woh shreemat ke anukool ho। kyonki buddhi ka kaarya hai nirnay karna। to buddhi mein shreemat ke sivaae aur koi baat aaye hi nahin। buddhi mein sada baba ki smriti hone ke kaaran automatically nirnay shakti vahi hogi aur uski practical nishaani yeh hogi - ki unki judgement satya hogi tatha saphalta vaali hogi। unki baat svayan ko bhi janchegi aur auron ko bhi janchegi ki baat badi achhi kahi hai। sabhi mahsoos karenge ki inki buddhi badi clear aur surrender hai। apni buddhi par santushtata hogi। question nahin hoga ki pata nahin right hai ya wrong hai।

prashn- kai nishchaybuddhi bachche 4-5saal chalne ke baad chale gaye,yeh lahar kyon?is lahar ko kaise samaapta karen?

uttar-jaane ka vishesh kaaran - seva mein bahut busy rehte hai lekin seva aur sva ka balance kho dete hain। to jo achhe-achhe bachche rook jaate hain unhon ka ek to yeh kaaran hota aur doosra unhon ka koi vishesh sanskaar aisa hota hai jo shuru se hi usmein kamjor hote hain lekin use chhipaate hain, yuddha karte rehte hain apne aap se। baapdaada ko va nimitta bani hui aatmaon ko apni kamzori spashta sunaakar use khatma nahin karte। chhipaane ke kaaran woh beemaari andar hi andar vikraal roop leti jaati hai aur aage badhne ka anubhav nahin hota, phir dilshikasta ho chhod dete hain। teesra kaaran yeh bhi hota - ki aapas mein sanskaar nahin milte hain। sanskaaron ka takkar ho jaata hai।

ab is lahar ko samaapta karne ke liye ek to seva ke saath-saath sva ka full attention chaahiye। doosra jo bhi aate hain unhon ko baapdaada va nimitta bani hui aatmaon ke aage bilkul clear hona chaahiye। agar service mein thoda bhi anubhav karo ‘tu mach' hai to apni unnati ka saadhan pahle sochna chaahiye aur nimitta bani hui aatmaon ko bhi apni raay de deni chaahiye। jo naye aate hain unhon ko pahle in baaton ka attention dilaana chaahiye। apne sanskaaron ki checking pahle se hi karni chaahiye। agar kisi se apna sanskaar takkar khaata hai to usse kinaara kar lena achha hai। jis circumstance mein sanskaaron ka takkar hota hai,unmein alag ho jaana hi achha hai।

prashn- agar kisi sthaan par seva ki result nahi nikalti hai to apni kami hai ya dharni aisi hai?

uttar-pahle to seva ke sab saadhan sab prakaar se use karke dekho। agar sab tarah se seva karne ke baad bhi koi result nahin to dharni ka pharka ho sakta hai। agar apni koi kamzori hai, jis kaaran service nahin badhti to zaroor andar me dil khaati hai ki hamaare kaaran seva nahin hoti। aise samay mein phir ek do ka sahayog le force dilaana chaahiye। yadi apna kaaran hoga to us dharni se nikalne vaali aatmaayen bhi dheeli dhaali hongi। teevra purooshaartha nahin। achha।