शुक्रवार 19 मार्च 1982 की अव्यक्त मुरली

>

19-03-82 om shanti avyakt baapdaada madhuban

“‘karma'' - aatma ka darsharnna karaane ka darpan”

karmon ki guhya gati ko jaanne vaale baapdaada bole-

‘‘aaj sarvashaktivaan baap apne shakti sena ko dekh harshit ho rahe hain। harek master sarvashaktivaan aatmaon ne sarvashaktiyon ko kahaan tak apne mein dhaaran kiya hai? vishesh shaktiyon ko achhi tarah se jaante ho aur jaanne ke aadhaar par chitra banaate ho। yeh chitra,chaitanya swaroop ki nishaani hai - ‘‘shreshthata athva mahaanta।'' har karma shreshtha,mahaan hai isse siddha hai ki shaktiyon ko charitra arthaat karma mein laaya hai। nirbal aatma hai va shaktishaali aatma hai, sarvashakti sampanna hai va shakti swaroop sampanna hai - yeh sab pahchaan karma se hi hoti hai kyonki karma dvaara hi vyakti aur paristhiti ke sambandh va samparka mein aate hain। isliye naam hi hai - ‘‘karma-kshetra,karma-sambandh,karma-indriyaan,karma bhog,karma yog''। to is saakaar vatan ki visheshta hi - ‘karma' hai। jaise niraakaar vatan ki visheshta karmon se ateet arthaat nyaare hain। aise saakaar vatan arthaat karma। karma shreshtha hai to shreshtha praalabdha hai,karma bhrashta hone ke kaaran dukh ki praalabdha hai। lekin donon ka aadhaar ‘karma'hai। karma,aatma ka darshan karaane ka darpan hai। karma roopi darpan dvaara apne shakti swaroop ko jaan sakte ho। agar karma dvaara koi bhi shakti ka pratyaksha roop dikhaai nahin deta to kitna bhi koi kahe ki main master sarvashaktivaan hoon lekin karmakshetra par rehte karma mein nahin dikhaaya to koi maanega? jaise koi bahut hoshiyaar yoddha ho, yuddha mein bahut hoshiyaar ho lekin yuddha ke maidaan mein dushman ke aage yuddha nahin kar paaye aur haar kha le to koi maanega ki yeh hoshiyaar yoddha hai? aise agar apni buddhi mein samajhte rahen ki main shakti swaroop hoon lekin paristhitiyon ke samay, samparka mein aane ke samay, jis samay jis shakti ki aavashyakta hai us shakti ko karma me nahin laate to koi maanega ki yeh shakti swaroop hain?sirf buddhi tak jaanna woh ho gaya ghar baithe apne ko hoshiyaar samajhna। lekin samay par swaroop na dikhaaya, samay par shakti ko kaarya mein nahin lagaaya, samay beet jaane ke baad socha to shakti swaroop kaha jaayega?yahi karma mein shreshthata chaahiye। jaisa samay vaisi shakti karma dvaara kaarya mein lagaaven। to apne aapko saare din ki karma leela dvaara check karo ki ham master sarvashaktivaan kahaan tak bane hain!

vishesh kaun si shakti samay par vijayi banaati hai aur vishesh kaun si shakti ki kamzori baar-baar haar khilaati hai? kai bachche apni kamjor shakti ko jaante bhi hain। kabhi koi dhaarna yukta sangathan hota ya apne sva purooshaarthiyon ka vaayumandal hota to varnan bhi karenge lekin saadhaaran reeti mein। majority apni kamzori ko doosron se chhipaane ki koshish karte hain। samay par koi sunaate bhi hain phir bhi usi kamzori ke beej ko kam pahchaante hain। oopar-oopar se varnan karenge। baahar ke roop ke vistaar ka varnan karenge lekin beej tak nahin jaayenge। isliye result kya hoti hai - us kamzori ke oopar ki shaakhaayen to kaat dete hain,isliye thoda samay to samaapta anubhav hoti hain lekin beej hone ke kaaran kuchh samay ke baad paristhitiyon ka paani milne se phir usi kamzori ki shaakha nikal aati hai। jaise aajkal ke vaayumandal mein,duniya mein beemaari khatma nahin hoti hai- kyonki beemaari ke beej ko doctor nahin jaante। isliye beemaari dab jaati hai lekin samaapta nahin hoti hai। aise yahaan bhi beej ko jaankar beej ko samaapta karo। kai beej ko jaante bhi hain lekin jaante hue bhi albelepan ke kaaran kahenge, ho jaayega, ek baar se thode hi khatma hoga?samay to lagta hi hai! aise jyaada samajhdaari kar lete hain। jis samay powerful banna chaahiye us samay knowledgeful ban jaate hain। lekin knowledge ki shakti hai, us knowledge ko shakti roop mein use nahin karte। point ke roop se use karte hain lekin har ek gyaan ki point shastra hai, use shastra ke roop se use nahin karte। isliye beej ko jaano। albelepan mein aakar apni sampannata mein va sampoornata mein kami nahin karo। aur agar beej ko jaanne ke baad svayan mein jaanne ki shakti anubhav karte ho lekin bhasma karne ki shakti nahin samajhte ho to anya jvaala swaroop shreshtha aatmaon ka bhi sahayog le sakte ho, kyonki kamjor aatma hone kaaran direct baap dvaara connection aur correction nahin kar paate to second number shreshtha aatmaon ka sahayog le svayan ko verify karaao। verify hone se sahaj purify ho jaayenge। to samjha kya check karna hai aur kaise check karna hai?

ek to chhipaao nahin। doosra jaante hue taal nahin do, chala nahin do। chalaate ho to chillaate bhi ho। to aaj baapdaada shakti sena ki shakti ko dekh rahe the। abhi praapta ki hui shaktiyon ko karma mein laao kyonki vishwa ki sarva aatmaon ke aage, ‘karma'hi aapki pahchaan karaaenge। karma se woh sahaj jaan lenge। karma sabse sthool cheej hai। sankalp sookshm shakti hai। aajkal ki aatmaayen sthool mote roop ko jaldi jaan sakti hain। vaise sookshm shakti sthool se bahut shreshtha hai lekin logon ke liye sookshm shakti ke baayabreshan catch karna abhi mushkil hai। karma shakti dvaara aapki sankalp shakti ko bhi jaante jaaenge। mansa seva karmana se shreshtha hai। vritti dvaara vrittiyon ko, vaayumandal ko parivartan karna yeh seva bhi ati shreshtha hai। lekin isse sahaj karma hai। uski paribhaasha to pahle bhi sunaai hai lekin aaj is baat ko spashta kar rahe hain ki karma dvaara shakti swaroop ka darshan athva saakshaatkaar karaao to karma dvaara sankalp shakti tak pahunchna sahaj ho jaayega। nahin to kamjor karma,sookshm shakti buddhi ko bhi, sankalp ko bhi neeche le aayenge। jaise dharni ki aakarshan oopar ki cheej ko neeche le aati hai। isliye chitra ko charitra mein laao। achha –

aise har shakti ko karma dvaara pratyaksha dikhaane vaale, apne shakti swaroop dvaara sarvashaktivaan baap ko pratyaksha karne vaale, sada parakhne aur parivartan shakti swaroop, sada charitra dvaara vichitra baap ka saakshaatkaar karaane vaale,aise master sarvashaktivaan,shreshtha karma karta,shakti swaroop aatmaon ko baapdaada ka yaadapyaar aur namaste।''

party ke saath-

1- maaya ke mehmaan nivaaji ki result hai - udaasi - sada apne ko baapdaada ke saathi samajhte ho? jab sada baap ka saath anubhav hoga to uski nishaani hai - ‘sada vijayi'। agar jyaada samay yuddha mein jaata hai, mehnat ka anubhav hota hai to isse siddha hai - baap ka saath nahin। jo sada saath ke anubhvi hain ve muhabbat mein lavleen rehte hain। prem ke saagar mein leen aatma kisi bhi prabhaav mein aa nahin sakti। maaya ka aana yeh koi badi baat nahin lekin woh apna roop na dikhaaye। agar maaya ki mehmaan-nivaaji karte ho to chalte- chalte ‘udaasi'ka anubhav hoga। aise anubhav karenge jaise na aage badh rahe hain na peechhe hat rahe hain। peechhe bhi nahin hat sakte, aage bhi nahin badh sakte - yeh maaya ka prabhaav hai। maaya ki aakarshan udne nahin deti। peechhe hatne ka to savaal hi nahin lekin agar aage nahin badhte to beej ko parkho aur use bhasma karo। aise nahin - chal rahe hain, aa rahe hain, sun rahe hain, yathaashakti seva kar rahe hain। lekin chaik karo ki apni speed aur stage ki unnati kahaan tak hai। achha।

2- mahaaprasaad vahi banta jo ek dhak se baap par bali chadhe- sabhi bachche jeevanmukta sthiti ka vishesh varsa anubhav karte ho?jeevanmukta ho ya jeevanbandha?trustee arthaat jeevanmukta। to marjeeva bane ho ya mar rahe ho? kitne saal marenge?bhakti maarga mein bhi jad chitra ko prasaad kaunsa chadhta hain? jo jhaatku hota hai। chilchilaakar marne vaala prasaad nahin hota। baap ke aage prasaad vahi banega jo jhaatku hoga। ek dhak se chadhne vaala। socha,sankalp kiya, ‘mera baba,main baba ka'to jhaatku ho gaya। sankalp kiya aur khatma! lag gai talvaar! agar sochte, banenge, ho jaayenge… to gen…gen arthaat chilchilaana। gen gen karne vaale jeevanmukta nahin। baba kaha - to jaisa baap vaise bachche। baap saagar ho aur bachche bhikhaari hon, yeh ho nahin sakta। baap ne offer kiya - mere bano to ismen sochne ki baat nahin। achha –