रविवार 2 मई 1982 की अव्यक्त मुरली

>

02-05-82 om shanti avyakt baapdaada madhuban

“vishesh jeevan kahaani banaane ka aadhaar - sada chadhti kala”

avyakt baapdaada shreshtha aatmaon prati bole:-

‘‘baapdaada harek bachche ki jeevan kahaani dekh rahe hain। harek ki jeevan kahaani mein kya-kya takdeer ki rekhaayen rahi hain। sada ekras unnati ki or jaate rahe hain va utraai aur chadhaai mein chal rahe hain! aise donon prakaar ki lakeer arthaat jeevan ki leela dikhaai di। jab chadhaai ke baad kisi bhi kaaranvash chadhti kala ke bajaae utarti kala mein aate hain to utarne ka prabhaav bhi apni taraph kheenchata hai। jaise bahutkaal ki chadhti kala ka prabhaav bahut kaal ki praapti karaata hai। sahaj yogi jeevan vaale, sada baap ke sameep aur saath ki anubhooti karte hain। sada svayan ko sarva shaktiyon mein master samajhne se sahaj smriti swaroop ho jaate hain। koi bhi paristhitayaan va pareekshaayen aate hue sada apne ko vighnavinaashak anubhav karte hain। to jaise bahut kaal ki chadhti kala ka, bahutkaal aisi shaktishaali sthiti ka anubhav karte hain aise chadhti kala ke baad phir utarti kala hone se svatah aur sahaj yeh anubhav nahin hote। lekin vishesh attention,vishesh mehnat karne ke baad yeh sab anubhav karte hain। sada chadhti kala arthaat sada sarva praapti ko paai hui moorti। aur chadhne ke baad utarne aur phir chadhne vaale, ganvaai hui vastu ko phir paane vaale, aise utarne-chadhne vaali aatmaayen anubhav karti hain ki ‘paaya tha lekin kho gaya'। aur paane ke anubhvi hone ke kaaran phir se usi avastha ko paane ke bina rah bhi nahin sakte। isliye vishesh attention dene se phir se anubhav ko pa lete hain lekin sadaakaal aur sahaj ki list ke bajaae doosre number ki list mein aa jaate hain। paas with honour nahin lekin paas hone vaalon ki list mein aa jaate hain। teesre number ki to baat svayan hi soch sakte ho ki uski jeevan kahaani kya hogi! teesra number to banna hi nahin hai na?

apni jeevan kahaani ko sada unnati ki or badhne vaali, sarva visheshtaaon sampanna,sada praapti swaroop aisa shreshtha banaao। abhi-abhi oopar, abhi-abhi neeche va kuchh samay oopar kuchh samay neeche aise utarne-chadhne ke khel mein sada ka adhikaar chhod nahin dena। aaj baapdaada sabhi ki jeevan kahaani dekh rahe the। to sada chadhti kala vaale kitne honge aur kaun honge? apne ko to jaan sakte ho na ki main kis list mein hoon! utarne ki paristhitiyaan,pareekshaayen to sabke saamne aati hain, bina pareeksha ke to koi bhi paas nahin ho sakta lekin - 1. pareeksha mein saakshi aur saatheepan ki smriti swaroop dvaara full paas hona va paas hona va majboori se paas hona ismen antar ho jaata hai। 2. badi pareeksha ko chhota samajhna va chhoti-si baat ko bada samajhna,ismen antar ho jaata hai। 3. koi chhoti-si baat ko jyaada simran, varnan aur vaataavran mein phailaae isse bhi chhote ko bada kar dete hain। aur koi phir badi baat ko bhi check kiya aur saath-saath change kiya aur sada ke liye kamjor baat ko full stop laga dete hain! full stop lagaana arthaat phir se bhavishya ke liye full stock jama karna। aage ke liye full paas ke adhikaari banna। to aise bahutkaal ki chadhti kala ke takdeervaan ban jaate hain। to samjha jeevan kahaani ki visheshta kya rakhni hai? isse sada aapki vishesh jeevan kahaani ho jaayegi! jaise koi ki jeevan kahaani vishesh prerna dilaati hai, utsaah badhaati hai, himmat badhaati hai, jeevan ke raaste ko spashta anubhav karaati hai, aise aap har vishesh aatma ki jeevan kahaani arthaat jeevan ka har karma anek aatmaon ko aise anubhav karaave। sabke mukh se, man se yahi aavaaj nikle ki jab nimitta aatma yeh kar sakti hai to ham bhi karen। ham bhi aage badhenge। ham bhi sabhi ko aage badhaayenge,aisi prerna yogya vishesh jeevan kahaani sada banaao। samjha - kya karna hai? achha-

aaj to double videshiyon ke milne ka din hai। ek taraph hai videshiyon ka aur doosre taraph hai phir bahut najdeek vaalon (madhuban nivaasiyon) ka! donon ka vishesh milan hai। baaki to sab gallery mein dekhne ke liye aaye hain isliye baapdaada ne aaye hue sab bachchon ka regard rakh murli bhi chalaai। achha-

sada milan-season ke saar ko jeevan mein laane vaale, vishesh eeshaaron ko apne jeevan ka sadaakaal ka vardaan samajh, vardaani moorta banne vaale, sunna arthaat banna,milna arthaat samaan banna - isi slogan ko sada smriti swaroop mein laane vaale,sneh ka return sada nirvighna banaane ka sahayog dene vaale, sada anubhvi moorta ban sarva mein anubhvon ki visheshta bharne vaale, aise sada baap samaan sampanna, shreshtha aatmaon ko baapdaada ka yaadapyaar aur namaste।''

deedi ji ke saath:- sabhi baap ki nimitta bani hui bhujaayen apna-apna kaarya yathaartha roop mein kar raheen hain? yeh sabhi bhujaayen hain na? to sabhi right hand hain va koi left hand bhi hai?jo svayan ko brahman kahlaate hain,aise brahman kahlaane vaale sab right hand hain ya braahmanon mein hi koi left hand hain, koi right hand hain? (brahman kabhi right hand ban jaate kabhi left hand) to bhujaayen bhi badli hoti hain kya? vaise to raavan ke sheesh dikhaate hain abhi-abhi uda, abhi-abhi aa gaya। lekin braahmanon mein bhi brahma ki bhujaayen badli hoti rehti hain kya?aise to phir roj bhujaayen badalti hongi?

vaastav mein brahmaakumaar aur brahmaakumaari kahlaate to sab hain lekin andar mein woh svayan mahsoos karte hain ki ham pratyakshaphal khaane vaale nahin hai, mehnat ka phal khaane vaale hain। yeh bhi antar hai na। koi pratyakshaphal khaane vaale hain aur koi mehnat ka phal khaane vaale hain। bahut mehnat ki aavashyakta nahin hai। sirf dridh sankalp aur shreemat - isi aadhaar par har sankalp aur karma karte chale to mehnat ki koi baat hi nahin। in donon hi aadhaar par na chalne ke kaaran jaise gaadi patri se utar jaati hai phir bahut mushkil hota hai। agar gaadi patri par chal rahi hai to koi mehnat nahin,engine chala raha hai, woh chal rahi hai। to in donon aadhaar mein se, chaahe dridh sankalp,chaahe shreemat inmen se ek ki bhi kamzori hai to ek patri ho gai। koi shreemat par chale,bahut attention rakhe lekin dridh sankalp ki kamzori ho to iski result kya hogi? mehnat ka phal khaayenge। aise mehnat ka phal khaane vaale bhi ‘kshatriy'ki line mein aa gaye। jab bhi unse koi baat poochho to mehnat ya mushkil ki baat hi sunaayenge। jaise sunaaya tha ek baat ko nikaalte to doosri aa jaati,choohe ko nikaalte to billi aa jaati,billi ko nikaalte to - kutta aata… aise nikaalne mein hi lage rehte hain। teen dharma saath-saath sthaapan ho rahe hain na, brahman,devta aur kshatriy। to teenon hi prakaar ke dikhaai denge na। kaeeyon ka to janma hi bahut mehnat se hua hai। aur kaiyon ne bachpan se hi mehnat karna aarambha kiya hai। yeh bhi bhinna-bhinna takdeer ki lakeeren hain। koi se poochhenge to kahenge hamne shuru se koi mehnat nahin ki। shreemat par chalna hai, yogi banna hai yeh svatah lakshya swaroop ho gaya। aise nahin,albele honge lekin svatah swaroop ban karke chalte hain। albele bhi mehnat nahin mahsoos karte hain lekin woh hai ulti baat! uska phir bhavishya nahin banta hai। baap samaan praapti ka anubhav nahin karte hain। baaki janma se albele - bas khaaya, piya aur apni pavitra jeevan bitaai,niyam-pramaan chalne vaale lekin - dhaarna ko jeevan mein laane vaale nahin। unka bhi yahaan nemeenaath ke roop mein gaayan hota hai। to kai sirf nemeenaath bhi hain। yog mein,class mein aayenge sabse pahle। lekin paaya kya? kahenge haan sun liya। aage badhna-badhaana woh lakshya nahin hoga। sun liya maja aa gaya, theek hai। aaya, gaya,chala, khaaya - aise ko kahenge - nemeenaath। phir bhi aison ki bhi pooja hoti hai। itna to karte hain ki niyam pramaan chal rahe hain। uska bhi phal - poojya ban jaate hain। barsaat mein ananya nahin aayenge lekin woh zaroor aayenge। phir bhi pavitra rehte hain isliye poojya zaroor ban jaate hain। aise bhi to chaahiye na। das varsha bhi ho jaayenge - to bhi agar unse koi baat poochhte to pahle din ka uttar hoga vahi 10 varsha ke baad bhi denge। achha-

abhi baapdaada vatan mein bahut chit-chat karte hain। donon svatantra aatmaayen hain। seva to second mein kiya, sarva ko anubhav karaaya phir aapas mein kya karenge?rooh-roohaan karte rehte hain। brahma baap ki yahi janma ke pahle din ki aasha thi। kaun-si?sada yeh phakhur aur nasha raha - ki main bhi baap samaan zaroor banoonga। aadi ke brahma ke bol yaad hain? ‘‘aa raha hoon,sama raha hoon,''yahi sada nashe ke bol janma ke sankalp aur vaani mein rahe। to yahi aadi ke bol ab kaarya samaapta kar jo lakshya rakha hai usi lakshya roop mein sama gaye। pahle arth maaloom nahin tha lekin bani hui bhaavi pahle se bol rahi thi। aur last mein kya dekha?baap samaan vyakta ke bandhan ko kaise chhoda! saanp ke samaan puraani khaal chhod di na! aur kitne mein khel hua? ghadiyon ka hi khel hua na। isko kaha jaata hai baap samaan vyakta bhaav ko bhi sahaj chhod ‘nashtomoha smriti swaroop'। yeh sankalp bhi utha - main ja raha hoon, kya ho raha hai! bachche saamne hain lekin dekhte bhi nahin dekha। sirf light-might, samaanta ki drishti dete udta panchhi ud gaya। aise hi anubhav kiya na! kitni sahaj udaan hui, jo dekhne vaale dekhte rahe aur udne vaala ud gaya। isko kaha jaata hai - aadi mein yahi bol aur ant mein woh swaroop ho gaya। aise hi follow father। achha-''

double videshiyon ke saath

sabhi snehi aur sahayogi aatmaayen ho na! sneh ke kaaran baap ko pahchaana aur sahayogi aatma ho gaye। to snehi aur sahayogi ho, seva ka umang utsaah sada rehna hai lekin baaki kya rah gaya? snehi-sahayogi ke saath sada shakti swaroop। shaktishaali aatma sada vighna-vinaashak hogi aur jo vighna vinaashak honge woh svatah hi baap ke diltakhtansheen honge। takhta se neeche laane vaali hai hi maaya ka koi-na-koi vighna। to jab maaya hi nahin aayegi to phir sada takhtansheen rahenge। uske liye sada apne ko combined samjho। har karma mein bhinna-bhinna sambandh se saath ka anubhav karo। to sada saath mein rahenge, sada shaktishaali bhi rahenge aur sada apne ko ramneek bhi anubhav karenge। kisi bhi prakaar ka akelaapan nahin mahsoos karenge kyonki bhinna-bhinna sambandh mein saath rahne vaale sada ramneek aur khushi ka anubhav karte hain। vaise bhi jab sada ek hi baat hoti hai, ek hi baat roj-roj suno va karo to dil udaas ho jaati hai। to yahaan bhi baap ke saath bhinna-bhinna sambandhon ka anubhav karne se sada umang utsaah bana rahega। sirf baap hai,main bachcha hoon yeh nahin,bhinna-bhinna sambandh ka anubhav karo। to jaise madhuban mein aane se hi apne ko manoranjan mein anubhav karte ho aur saath ka anubhav karte ho aise hi anubhav karenge ki pata nahin din se raat,raat se din kaise hua? vese bhi videshi log change pasanda karte hain। to yahaan bhi ek dvaara bhinna-bhinna anubhav karne ka bahut achha chance hai।

mahaaveer ki visheshta - sada ek baap doosra na koi

sada apne ko mahaaveer samajhte ho? mahaaveer ki visheshta - ek raam ke sivaae aur koi yaad nahin! to sada ek baap doosra na koi aisi smriti mein rahne vaale ‘sada mahaaveer'। sada vijay ka tilak laga hua ho। jab ek baap doosra na koi to avinaashi tilak rahega। sansaar hi baap ban gaya। sansaar mein vyakti aur vastu hi hoti,to sarva sambandh baap se to vyakti aa gaye aur vastu,woh bhi sarva praapti baap se ho gai। sukh-shanti-gyaan-aananda-prem… sarva praaptiyaan ho gai। jab kuchh raha hi nahin to buddhi aur kahaan jaayegi,kaise? achha-