सोमवार 19 दिसंबर 1983 की अव्यक्त मुरली

>

19-12-83 om shanti avyakt baapdaada madhuban

parmaatma pyaar - nihsvaartha pyaar

pyaar ke saagar shivbaaba apne snehi bachchon prati bole-

aaj sneh ke saagar baap apne snehi bachchon ko dekh rahe hain। snehi sab bachche hain phir bhi nambarvaar hain। ek hai sneh karne vaale। doosre hain sneh nibhaane vaale। teesre hain sada sneh swaroop ban sneh ke saagar mein samaae hue। jisko ‘lavleen bachche’ kehte। lovely aur lavleen donon mein antar hai। baap ka banna arthaat snehi,lavleen banna। saare kalpa mein kabhi bhi aur kis dvaara bhi yeh eeshvarees sneh,parmaatma pyaar praapta ho nahin sakta। parmaatma pyaar arthaat nihsvaartha pyaar। parmaatma pyaar - is shreshtha brahman janma ka aadhaar hai। parmaatma pyaar janma-janma ki pukaar ka pratyaksha phal hai। paramatma pyaar naye jeevan ka jeeydaan hai। parmaatma pyaar nahin to jeevan neeras, sookhe ganne ke muaaphik hai। parmaatma pyaar baap ke sameep laane ka saadhan hai। parmaatma pyaar sada baapdaada ke saath arthaat paramatma ko saathi anubhav karaata hai। parmaatma pyaar mehnat se chhudaae sahaj aur sada ke yogi,yogayukta sthiti ka anubhav karaata hai। parmaatma pyaar sahaj hi teen manjal paar kara deta hai।

1. deh-bhaan ki vismriti।2.deh ke sarva sambandhen ki vismriti। 3.deh ki, deh ke duniya ki alpakaal ki praapti ki aakarshanmay padaarthon ka aakarshan sahaj samaapta ho jaata hai। tyaag karna nahin padta lekin shreshtha sarva praapti ka bhaagya svatah hi tyaag kara deta hai। to aap prabhu premi bachchon ne tyaag kiya va bhaagya liya?kya tyaag kiya? anek chattiyaan laga hua vastra,jadajdeebhoot puraani antim janma ki deh ka tyaag, yeh tyaag hai? jise svayan bhi chalaane mein majboor ho, uske badle pharishta swaroop light ka aakaar jismen koi vyaadhi nahin,koi puraane sanskaar svabhaav ka ansh nahin, koi deh ka rishta nahin, koi man ki chanchalta nahin,koi buddhi ke bhatakne ki aadat nahin - aisa pharishta swaroop,prakaashmay kaaya praapta hone ke baad puraana chhodna,yeh chhodna hua? liya kya aur diya kya? tyaag hai va bhaagya hai? aise hi deh ke svaartha sambandh,sukh-shanti ka chain chheenne vaale vinaashi sambandhi, abhi bhaai hai abhi svaarthavash dushman ho jaate, duhkh aur dhokha dene vaale ho jaate,moh ki rassiyon mein baandhane vaale,aise anek sambandh chhod ek mein sarva sukhdaai sambandh praapta karte to kya tyaag kiya? sada lene vaale sambandh chhode,kyonki sabhi aatmaayen leti hi hain, dete nahin। ek baap hi daataapan ka pyaar dene vaala hai, lene ki koi kaamna nahin। chaahe kitni bhi dharmaatma,mahaatma,punya aatma ho, gupta daani ho, phir bhi leta hai,daata nahin hai। sneh bhi shubh lene ki kaamna vaala hoga। baap to sampanna saagar hai isliye woh daata hai! parmaatma pyaar hi daataapan ka pyaar hai। isliye unko dena nahin, lena hai। aise hi vinaashi padaartha vishay bhog arthaat vish bhare bhog hain। mere-mere ki jaal mein phansaane vaale vinaashi padaartha bhog-bhog kar kya ban gaye? pijde ki panchhi ban gaye na। aise padaartha, jisne kakhapti bana diya,uske badle sarvashreshtha padaartha dete jo padmaapadmapti banaane vaale hain। to padma paakar, kakh chhodna, kya yeh tyaag hua! parmaatma pyaar bhaagya dene vaala hai। tyaag svatah hi hua pada hai। aise sahaj sada ke tyaagi hi ‘shreshtha bhaagyavaan’ bante hain।

kabhi-kabhi baap ke aage vai laadle hi kahen, laad pyaar dikhaate hain ki hamne itna tyaag kiya,itna chhoda phir bhi aise kyon! baapdaada muskaraate hue bachchon ko poochhte hain ki chhoda kya aur paaya kya? iski list nikaalo। kaun sa taraph bhaari hai - chhodne ka va paane ka?aaj nahin to kal to chhodna hi hai, majboori se bhi chhodna hi padega, agar pahle se hi samajhdaar ban, praapta kar phir chhoda to woh chhodna hua kya! bhaagya ke varnan ke aage tyaag kaudi hai। bhaagya heera hai। aise samajhte ho na! va bahut tyaag kiya hai?bahut chhoda hai? chhodne vaale ho ya lene vaale ho? kabhi bhi svapna mein bhi aisa sankalp kiya to kya hoga?apne bhaagya ki rekha, mainne kiya, mainne chhoda, isse lakeer ko mitaane ke nimitta ban jaate। isliye svapna mein bhi kab aisa sankalp nahin karna।

prabhu-pyaar sada samarpan bhaav svatah hi anubhav karaata hai। samarpan bhaav baap samaan banaata। parmaatma pyaar baap ke sarva khazaanon ki chaabi hai kyonki pyaar va sneh adhikaari aatma banaata hai। vinaashi sneh, deh ka sneh raajya bhaagya ganvaata hai। anek raajaaon ne vinaashi sneh ke peechhe raajya bhaagya ganvaaya। vinaashi sneh bhi raajya bhaagya se shreshtha maana gaya hai। parmaatma pyaar, ganvaaya hua raajya bhaagya sadaakaal ke liye praapta karaata hai। double raajya adhikaari banaata hai। svaraajya aur vishwa ka raajya paate। aise parmaatma pyaar praapta karne vaali vishesh aatmaayen ho। pyaar karne vaale nahin lekin pyaar mein sada samaaye hue lavleen aatmaaen bano। samaaye hue samaan hain- aise anubhav karte ho na!

naye-naye aaye hain to naye aage jaane ke liye sirf ek hi baat ka dhyaan rakho। sada prabhu pyaar ke pyaase nahin lekin prabhu pyaar ke bhi paatra bano। paatra banna hi supaatra banna hai। sahaj hai na। to aise aage badho। achha!

aise paatra so supaatra bachchon ko, prabhu prem ki adhikaari aatmaon ko,prabhu pyaar dvaara sarvashreshtha bhaagya praapta karne vaali bhaagyavaan aatmaon ko,sada sneh ke saagar mein samaaye hue baap samaan bachchon ko, sarva praaptiyon ke bhandaar sampanna aatmaon ko baapdaada ka yaad-pyaar aur namaste।’’

party ke saath

prashn:- maha-tapasya kaun si hai? jis tapasya ka bal vishwa ko parivartan kar sakta hai?

uttar:- ‘ek baap doosra na koi’ - yeh hai maha-tapasya। aisi sthiti mein sthit rahne vaale mahaatpasvi hue। tapasya ka bal shreshtha bal gaaya jaata hai। jo is tapasya mein rehte - ‘ek baap doosra na koi’, unmein bahut bal hai। is tapasya ka bal vishwa parivartan kar leta hai। hathayogi ek taang par khade hokar tapasya karte hain lekin aap bachche ek taang par nahin, ek ki smriti mein rehte ho, bas - ek hi ek। aisi tapasya vishwa-parivartan kar degi। to aise vishvakal yaankaari arthaat mahaan tapasvi bano।