शुक्रवार 11 मई 1984 की अव्यक्त मुरली

>

11-05-84om shanti avyakt baapdaadaamdhuban

braahmanon ke har kadam, sankalp,karma se vidhaan ka nirmaan

vidhaata, vardaata baapdaada master vidhaata, vardaata bachchon prati bole:-

‘‘vishwa rachta apne naye vishwa ke nirmaan karne vaale nae vishwa ki takdeer bachchon ko dekh rahe hain। aap shreshtha bhaagyavaan bachchon ki takdeer vishwa ki takdeer hai। naye vishwa ke aadhaar swaroop shreshtha bachche ho। naye vishwa ke raajya-bhaagya ke adhikaari vishesh aatmaayen ho। aapki nai jeevan vishwa ka nav-nirmaan karti hain। vishwa ko shreshthaachaari sukhi-shant-sampanna banaana hi hai,aap sabke is shreshtha dridh sankalp ki anguli se kalayugi duhkhi sansaar badal sukhi sansaar ban jaata hai kyonki sarva shaktivaan baap ki shreemat pramaan sahayogi bane ho। isliye baap ke saath aap sabka sahayog,shreshtha yog vishwa-parivartan kar leta hai। aap shreshtha aatmaon ka is samay ka sahajyogi-raajayogi jeevan ka har kadam, har karma naye vishwa ka vidhaan ban jaata hai। braahmanon ki vidhi sada ke liye vidhaan ban jaati hai। isliye daata ke bachche daata, vidhaata aur vidhi-vidhaata ban jaate hain। aaj last janma tak bhi aap daata ke bachchon ke chitron dvaara bhakta log maangate hi rehte hain। aise vidhi-vidhaata ban jaate jo ab tak bhi chief justice bhi sabhi ko kasam uthaane ke samay eeshvar ka ya eeshta dev ka smriti swaroop banaae kasam uthvaate hain। last janma mein bhi vidhaan mein shakti aap vidhi-vidhaata bachchon ki chal rahi hai। apna kasam nahi uthaate। baap ka ya aapka mahatva rakhte hain। sada vardaani swaroop bhi aap ho। bhinna-bhinna vardaan, bhinna-bhinna devtaaon aur deviyon dvaara aapke chitron dvaara hi maangate hain। koi shakti ka devta hai to koi vidya ki devi hai। vardaani swaroop aap bane ho tab abhi tak bhi parampara bhakti ki aadi se chalti rahi hai। sada baapdaada dvaara sarva praapti swaroop prasannachitta,prasannata swaroop bane ho to ab tak bhi apne ko prasanna karne ke liye deveedevtaaon ko prasanna karte hain ki ye hi humein sada ke liye prasanna karenge। sabse bade te bada khazaana ‘santushtata’ka baap dvaara aap sabne praapta kiya hai। isliye santushtata lene ke liye santoshi devi ki pooja karte rehte hain। sabhi santushta aatmaayen - santoshi maa ho na। sab santoshi ho na! aap sabhi santushta aatmaayen santoshi moorta ho। baapdaada dvaara saphalta janma-siddha adhikaar roop mein praapta ki hai isliye saphalta ka daan, vardaan aapke chitron se maangate hain। sirf alpa-buddhi hone ke kaaran,nirbal aatmaayen hone ke kaaran,bhikhaari aatmaayen hone ke kaaran alpakaal ki saphalta hi maangate hain। jaise bhikhaari kabhi bhi yeh nahin kahenge ki hajaar roopaya do। itna hi kahenge kuchh paise de do। roopaya, do de do। aise yeh aatmaayen bhi sukh-shanti pavitrata ki bhikhaari alpakaal ke liye saphalta maangengi। bas yeh mera kaarya ho jaae,ismen saphalta ho jaae। lekin maangate aap saphalta swaroop aatmaon se hi hain। aap dilaaraam baap ke bachche dilvaala baap ko sabhi dil ka haal sunaate ho,dil ki baaten karte ho। jo kisi aatma se nahin kar sakte woh baap se karte ho। sachche baap ke sachche bachche bante ho। ab bhi aapke chitron ke aage sab dil ka haal bolte rehte hain। jo bhi apni koi chhipaane vaali baat hogi,sabke snehi sambandhi se chhipaayenge lekin devi-devtaaon se nahin chhipaayenge। duniya ke aage kahenge main yeh hoon, sachcha hoon, mahaan hoon। lekin devtaaon ke aage kya kahenge? jo hoon woh yahi hoon। kaami bhi hoon to kapti bhi hoon। to aise naye vishwa ki takdeer ho। har ek ki takdeer mein paavan vishwa ka raajya bhaagya hai।

aise vidhaata-vardaata, vidhi-vidhaata sarva shreshtha aatmaayen ho। harek ke shreshtha mat roopi haathon mein svarga ke svaraajya ka gola hai। ye hi maakhan hai। raajya-bhaagya ka maakhan hai। harek ke sir par pavitrata ki mahaanta ka, light ka crown hai। diltakhtansheen ho। svaraajya ke tilakdhaari ho। to samjha ‘main’ kaun? ‘main kaun’ki paheli hal karne aaye ho na? pahle din ka paath yeh padha na। main kaun? main yeh nahin hoon aur main yeh hoon। isi mein hi saara gyaan saagar ka gyaan samaaya hua hai। sab jaan gaye ho na! yahi roohaani nasha sada saath rahe। itni shreshtha aatmaayen ho। itni mahaan ho। har kadam, har sankalp, har karma yaadgaar ban raha hai। vidhaan ban raha hai। isi shreshtha smriti se uthaao। samjha। saare vishwa ki najar aap aatmaon ki taraph hai। jo main karoonga vo vishwa ke liye vidhaan aur yaadgaar banega। main halchal mein aaoongi to duniya halchal mein aayegi। main santushtata prasannata mein rahoongi,to duniya santushta aur prasanna banegi। itni jimmevaari har vishwa nav-nirmaan ke nimitta aatmaon ki hai। lekin jitni badi hai utni halki hai। kyonki sarvashaktivaan baap saath hai। achha-

aise sada prasannachitta aatmaon ko, sada master vidhaata, vardaata bachchon ko, sada sarva praapti swaroop santushta aatmaao ko, sada yaad dvaara har karma ka yaadgaar banaane vaali poojya mahaan aatmaon ko vidhaata vardaata baapdaada ka yaadapyaar aur namaste।’’

kumaaron ke alag-alag group se avyakt baapdaada ki mulaakaat

1. sabhi shreshtha kumaar ho na?saadhaaran kumaar nahin,shreshtha kumaar! tan ki shakti,man ki shakti sab shreshtha kaarya mein lagaane vaale। koi bhi shakti vinaashi kaarya mein lagaane vaale nahin। vikaari kaarya hai vinaashkaari kaarya, aur shreshtha kaarya hai - eeshvareey kaarya। to sarva shaktiyon ko eeshvareey kaarya mein lagaane vaale shreshtha kumaar। kahaan vyartha ke khaate mein to koi shakti nahin lagaate ho?abhi apni shaktiyon ko kahaan lagaana hai yeh samajh mil gai। isi samajh dvaara sada shreshtha kaarya karo। aise shreshtha kaarya mein sada rahne vaale, shreshtha praapti ke adhikaari ban jaate hain। aise adhikaari ho?anubhav karte ho ki shreshtha praapti ho rahi hai? ya honi hai? har kadam mein padmon ki kamaai jama ho rahi hai yeh anubhav hai na?jiski ek kadam mein padmon ki kamaai jama ho woh kitne shreshtha hue! jiski itni jama sampatti ho usko kitni khushi hogi! aajkal ke lakhapti,karodapti ko bhi vinaashi khushi rehti hai aapki avinaashi property hai। shreshtha kumaar ki paribhaasha samajhte ho? ‘sada har shakti shreshtha kaarya mein lagaane vaale’। vyartha khaata sada ke liye samaapta hua?shreshtha khaata jama hua?ya donon chalta hai? ek khatma hua। abhi donon chalaane ka samay nahin hai। abhi woh sada ke liye khatma। donon hoge to jitna jama hona chaahiye utna nahin hoga। ganvaaya nahi, jama hua to kitna jama hoga! to vyartha khaata samaapta hua,samartha khaata jama hua।

2. kumaar jeevan shaktishaali jeevan hai। kumaar jeevan mein jo chaahe woh kar sakte ho। chaahe apne ko shreshtha banaayen, chaahe apne ko neeche giraayen। yeh kumaar jeevan hi ooncha ya neecha hone vaali hai। aisi jeevan mein aap baap ke ban gaye। vinaashi jeevan ke saathi ke karmabandhan mein bandhane ke bajaae sachcha jeevan ka saathi le liya। kitne bhaagyavaan ho! abhi aaye to akele aaye ya combined hokar aaye? (combined) ticket to nahin kharcha ki na?to yeh bhi bachat ho gai। vaise agar shareer ke saathi ko laate to ticket kharcha karte, unka saamaan bhi uthaana padta aur kamaakar roj khilaana bhi padta। yeh saathi to khaata bhi nahin sirf vaasna lete hain। roti kam nahin ho jaati aur hi shakti bhar jaati hai। to bina kharcha,bina mehnat ke aur saathi bhi avinaashi, sahayog bhi poora milta hai। mehnat nahin lete aur sahayog dete hain। koi mushkil kaarya aaye, yaad kiya aur sahayog mila। aise anubhvi ho na! jab bhakton ko bhi bhakti ka phal dene vaale hain to jo jeevan ka saathi banne vaale hain unko saath nahin denge? kumaar combined to bane lekin is combined mein bephikar baadshaah ban gaye। koi jhanjhat nahin, bephikar hain। aaj bachcha beemaar hua, aaj bachcha school nahin gaya… ya koi bojh nahin। sada nirbandhan। ek ke bandhan mein bandhane se anek bandhanon se chhoot gaye। khaao piyo mauj karo aur kya kaam! apne haath se banaaya aur khaaya। jo chaaho woh khaao। svatantra ho। kitne shreshtha ban gaye। duniya ke hisaab se bhi achhe ho। samajhte ho na ki duniya ke jhanjhaton se bach gaye। aatma ki baat chhodo, shareer ke karma bandhan ke hisaab se bhi bach gaye। aise safe ho। kabhi dil to nahin hoti ki koi gyaani saathi bana den? koi kumaari ka kalyaan kar den?aisi dil hoti hai? yeh kalyaan nahin hai - akalyaan hai। kyon? ek bandhan bandha aur anek bandhan shuru hue। yeh ek bandhan anek bandhan paida karta। isliye madad nahin milegi। bojh hoga। dekhne mein madad hai lekin hai anek baaton ka bojh। jitna bojh kaho utna bojh hai। to anek bojh se bach gaye। kabhi svapna mein bhi nahin sochna। nahin to aisa bojh anubhav karenge jo uthna hi mushkil। svatantra rahkar bandhan mein bandhe to padmaguna bojh hoga। woh anjaan se bichaare bandh gaye, aap jaanboojhkar bandhenge to aur pashchaataap ka bojh hoga। koi kachcha to nahin hai? kachche ki gati nahin hoti। na yahaan ka rehta, na vahaan ka rehta। aapki to sadgati ho gai hai na। sadgati maana shreshtha gati। thoda sankalp aata hain?photo nikal raha hai। agar kuchh neeche oopar kiya to photo aayega। jitne pakke banenge utna vartamaan aur bhavishya shreshtha hai।

3. sabhi samartha kumaar ho na! samartha ho? sada samartha aatmaayen jo bhi sankalp karengi, jo bhi bol bolengi, karma karengi woh samartha hoga। samartha ka arth hi hai - vyartha ko samaapta karne vaale। vyartha ka khaata samaapta aur samartha ka khaata sada jama karne vaale। kabhi vyartha to nahin chalta? vyartha sankalp ya vyartha bol ya vyartha samay। agar second bhi gaya to kitna gaya! sangam par second kitna bada hai। second nahin lekin ek second ek janma ke baraabar hai। ek second nahin gaya, ek janma gaya। aise mahatva ko jaanne vaale samartha aatmaayen ho na। sada yeh smriti rahe ki ham samartha baap ke bachche hain,samartha aatmaayen hain। samartha kaarya ke nimitta hain। to sada hi udti kala ka anubhav karte rahenge। kamzor ud nahin sakte। samartha sada udte rahenge। to kaun si kala vaale ho? udti kala ya chadhti kala? chadhne mein saans phool jaata hai। thakte bhi hain, saans bhi phoolta hai। aur udti kala vaale second mein manzil par saphalta swaroop bane। chadhti kala hai to zaroor thakenge, saans bhi phoolega - kya karen, kaise karen,yeh saans phoolta hai। udti kala mein sabse paar ho jaate। touching aati hai ki yeh karen,yeh hua hi pada hai। to second mein saphalta ki manzil ko paane vaale - isko kaha jaata hai samartha aatma। baap ko khushi hoti hai ki sabhi udti kala vaale bachche hain, mehnat kyon karen। baap to kahenge - bachche mehnat se bache rahen। jab baap raasta dikha raha hai - double light bana raha hai to phir neeche kyon aa jaate ho? kya hoga, kaise hoga, yeh bojh hai। sada kalyaan hoga,sada shreshtha hoga,sada saphalta janma siddha adhikaar hai, is smriti se chalo।

4. kumaaron ko paper dene ke liye yuddha karni padti hai। pavitra banna hai, yeh sankalp kiya to maaya yuddha karna shuru kar deti hai। kumaar jeevan shreshtha jeevan hai। mahaan aatmaayen hain। abhi kumaaron ko kamaal karke dikhaani hai। sabse bade te badi kamaal hai - baap ke samaan ban baap ke saathi banaana। jaise aap svayan baap ke saathi bane ho aise auron ko bhi saathi banaana hai। maaya ke saathiyon ko baap ke saathi banaana hai - aise sevaadhaari। apne vardaani swaroop se shubh bhaavna aur shubh kaamna se baap ka banaana hai। isi vidhi dvaara sada siddhi ko praapta karna hai। jahaan shreshtha vidhi hai vahaan siddhi zaroor hai। kumaar arthaat sada achal। halchal mein aane vaale nahin। achal aatmaayen auron ko bhi achal banaati hain।

5. sabhi vijayi kumaar ho na? jahaan baap saath hai vahaan sada vijay hai। sada baap ke saath ke aadhaar se koi bhi kaarya karenge to mehnat kam aur praapti jyaada anubhav hogi। baap se thoda sa bhi kinaara kiya to mehnat jyaada praapti kam। to mehnat se chhootne ka saadhan hai - baap ka har second har sankalp mein saath ho। is saath se saphalta hui padi hai। aise baap ke saathi ho na?jo baap ki aagya hai us aagya ke pramaan kadam hon। baap ke kadam ke peechhe kadam ho। yahaan kadam rakhen ya na rakhen, right hai ya wrong hai,yeh sochne ki bhi jaroorat nahin। naya koi raasta ho to sochna bhi pade। lekin jab kadam par kadam rakhna hai to sochne ki baat nahin। sada baap ke kadam par kadam rakh chalte chalo। to manjal sameep hi hai। baap kitna sahaj karke dete hain - ‘shreemat’hi kadam hai। shreemat ke kadam par kadam rakho। to mehnat se sada chhooten rahenge। sarva saphalta adhikaar ke roop mein hogi। chhote kumaar bhi bahut seva kar sakte hain। kabhi bhi masti nahin karna, aap ki chalan, bol chaal aisa ho jo sab poochhen ki yeh kis school mein padhne vaale hain। to seva ho jaayegi na। achha-

yuglon ke group se avyakt baapdaada ki mulaakaat:-

1. ek mat ke patte par chalne vaale to fast raphtaar vaale honge na! donon ki mat ek, yeh ek mat hi pahiya hai। ek mat ke pahiyon ke aadhaar par chalne vaale sada teevragti se chalte hain। donon hi pahiye shreshtha pahiye hain। ek dheela ek tej to nahin ho na?donon pahiye ekras। teevra purooshaartha mein paandav number one hain ya shaktiyaan? ek do ko aage badhaana arthaat svayan aage badhna। aise nahin aage badhaakar khud peechhe ho jaaen। aage badhaana svayan aage badhna। sabhi lucky aatmaayen ho na? dilli aur baambe nivaasi vishesh lucky hain - kyonki raaste chalte bhi bahut khazaana milta hai। vishesh aatmaon ka sang, sahayog,shiksha sab praapta hota hai। yeh bhi vardaan hai jo bina nimantran ke milta rehta hai। doosre log kitni mehnat karte hain। saare brahman jeevan mein ya seva ki jeevan mein aisi shreshtha aatmaayen do-teen baari bhi kahaan par mushkil pahunchte hain lekin aap bulaao, na bulaao,aapke paas sahaj hi pahunch jaate hain। to sang ka rang jo prasiddha hai,vishesh aatmaon ka sang bhi umang dilaata hai। kitna sahaj bhaagya praapta karne vaali bhaagyavaan aatmaayen ho। sada geet gaate raho - ‘vaah mera shreshtha bhaagya’। jo praapti ho rahi hai uska return hai - sada udti kala। rookne aur chalne vaale nahin। sada udne vaale।

2. sada apne ko baap ki chhatrachhaaya ke andar rahne vaale anubhav karte ho? baap ki yaad hi ‘chhatrachhaaya’hai। jo chhatrachhaaya ke andar rehte woh sada safe rehte hain। kabhi barsaat ya toofaan aata to chhatrachhaaya ke andar chale jaate hain। aise baap ki yaad ‘chhatrachhaaya’hai। chhatrachhaaya mein rahne vaale sahaj hi maayaajeet hain। yaad ko bhoola arthaat chhatrachhaaya se baahar nikla। baap ki yaad sada saath rahe। jo aise chhatrachhaaya mein rahne vaale hain unhein baap ka sahayog sada milta rehta hai। har shakti ki praapti ka sahayog sada milta rehta hai। kabhi kamzor hokar maaya se haar nahin kha sakte। kabhi maaya yaad bhula to nahin deti hai? 63 janma bhoolte rahe, sangamayug hai yaad mein rahne ka yug। is samay bhoolna nahin। bhoolne se thokar khaai,duhkh mila। abhi phir kaise bhoolenge! abhi sada yaad mein rahne vaale।

3. sada apne vishesh part ko dekh harshit rehte ho? oonche te oonche baap ke saath part bajaane vaale vishesh paartadhaari ho। vishesh paartadhaari ka har karma svatah hi vishesh hoga kyonki smriti mein hai ki - main vishesh paartadhaari hoon। jaise smriti vaisi sthiti svatah ban jaati hai।

har karma, har bol vishesh। saadhaaranta samaapta hui। vishesh paartadhaari sabhi ko svatah aakarshit karte hain। sada is smriti mein raho ki hamaare is vishesh part dvaara anek aatmaayen apni visheshta ko jaanengi। kisi bhi vishesh aatma ko dekh svayan bhi vishesh banne ka umang aata hai। kahaan bhi raho,kitne bhi maayaavi vaayumandal mein raho lekin vishesh aatma har sthaan par vishesh dikhaai de। jaise heera mitti ke andar bhi chamakta dikhaai deta। heera - heera hi rehta hai। aise kaisa bhi vaataavran ho lekin vishesh aatma sada hi apni visheshta se aakarshit karegi। sada yaad rakhna ki - ham vishesh yug ki vishesh aatmaayen hain।

vidaai ke samay:-

sangamayug hai hi milne ka yug। jitna milenge utna aur milne ki aasha badhegi। aur milne ki shubh aasha honi bhi chaahiye। kyonki yeh milne ki shubh aasha hi maaya jeet bana deti hai। yeh milne ka shubh sankalp sada baap ki yaad svatah dilaata hai। yeh to honi hi chaahiye। yeh poori ho jaayegi to sangam poora ho jaayega। aur sab ichchhaayen poori hui lekin yaad mein sada samaaye rahen, yeh shubh ichchha aage badhaayegi। aise hai na! to sada milan mela hota hi rahega। chaahe vyakta dvaara chaahe avyakt dvaara। sada saath hi rehte hain phir milne ki aavashyakta hi kya! har milan ka apna-apna swaroop aur praapti hai। avyakt milan apna aur saakaar milan apna। milna to achha hi hai। achha- sada shubh aur shreshtha prabhaat rahegi। woh to sirf goodmorning karte lekin yahaan shubh bhi hai aur shreshtha bhi hai। har second shubh aur shreshtha isliye second-second ki mubaarak ho।achha। omshaanti।