सोमवार 19 नवंबर 1984 की अव्यक्त मुरली

>

19-11-84om shanti avyakt baapdaadaamdhuban

behad ki vairaag vritti se siddhiyon ki praapti

sada achal aur adol bhav’’ ka vardaan dene vaale shiv baba bole-

aaj vishwa rachayita apni shreshtha rachna ko va rachna ke poorvaj aatmaon ko dekh rahe hain। chaaron or ki poorvaj poojya aatmaayen baapdaada ke saamne hain। poorvaj aatmaon ke aadhaar se vishwa ki sarva aatmaon ko shakti aur shanti praapta ho rahi hai aur honi hai। anek aatmaayen poorvaj poojya aatmaon ko shanti deva, shakti deva kah yaad kar rahi hain। aise samay par shanti deva aatmaayen master shanti ke saagar, master shanti ke soorya apni shanti ki kirnen, shanti ki lahren daata ke bachche deva ban sarva ko de rahe ho! yeh vishesh seva karne ke abhyaasi bane ho va anya bhinna-bhinna prakaar ki sevaaon mein itne busy ho jo is vishesh seva ke liye phursat aur abhyaas kam hota hai? jaisa samay vaise seva ke swaroop ko kalpana sakte ho? agar kisi ko paani ki pyaas ho aur aap badhiya bhojan de do to woh santushta hoga? aise vartamaan samay shanti aur shakti ki aavashyakta hai। mansa ki shanti dvaara aatmaon ko man ki shanti anubhav kara sakte ho! vaani dvaara kaanon tak aavaaz pahuncha sakte ho lekin vaani ke saath mansa shakti dvaara man tak pahuncha sakte ho! man ka aavaaz man tak pahunchta hai। sirf mukh ka aavaaz kaanon aur mukh tak rah jaata। sirf vaani se varnan shakti aur man se manan shakti,magan swaroop ki shakti donon ki praapti hoti hai। woh sunne vaale aur woh banne vaale ban jaate, donon mein antar ho jaata hai to sada vaacha aur mansa donon saath-saath seva mein rahen। vartamaan samay vishesh bhaaratvaasiyon ka kya haalchaal dekha?abhi shamshaani vairaag ki vritti mein hain। aise shamshaani vairaag vritti vaalon ko behad ki vairaag vritti dilaane ke liye - svayan behad ke vairaag vritti vaale bano।

apne aapko check karo। kabhi raag kabhi vairaag, donon mein chalte hain va sada behad ke vairaagi bane ho? behad ke vairaagi arthaat deh roopi ghar se bhi beghar। deh bhi baap ki hai na ki meri। itna deh ke bhaan se pare। behad ke vairaagi kabhi bhi sanskaar, svabhaav,saadhan kisi ke bhi vasheebhoot nahin honge। nyaara ban, maalik ban saadhnon dvaara siddhi swaroop banenge। saadhan ko vidhi banaayenge। vidhi dvaara sva-unnati ki vriddhi ki siddhi paayenge। seva se vriddhi ki siddhi praapta karenge। nimitta aadhaar hoga lekin adheen nahin honge। aadhaar ke adheen hona arthaat vasheebhoot hona। vasheebhoot shabd ka arth hi hai, jaise bhoot aatma parvash aur pareshaan karti hai, aise kisi bhi saadhan va sanskaar va svabhaav va samparka ke vasheebhoot ho jaate to bhoot samaan pareshaan aur parvash ho jaate hain। behad ke vairaagi, sada karaavanhaar kara rahe hain, isi masti mein ramta yogi se bhi oopar - udta yogi hoga। jaise had ke hathayog ki vidhiyon se dharni, aag,paani sabse ooncha aasandhaari dikhaate hain। usko yog ke siddhi swaroop maante hain। woh hai alpakaal ke hathayog ki vidhi ki siddhi। aise behad ke vairaag vriti vaale is vidhi dvaara deh bhaan ki dharni se oopar, maaya ke bhinna-bhinna vikaaron ki agni se oopar,bhinna-bhinna prakaar ke saadhnon dvaara sang ke bahaav mein aane se nyaare ban jaate hain। jaise paani ka bahaav apna bana deta hai, apni taraph kheench leta hai। aise kisi bhi prakaar ke alpakaal ke bahaav apne taraph aakarshit na karen। aise paani ke bahaav se bhi oopar isko kaha jaata - ‘udta yogi’। yeh sab siddhiyaan behad ke vairaag ki vidhi se praapta hoti hain।

behad ke vairaagi arthaat har sankalp, bol aur seva mein behad ki vritti, smriti,bhaavna aur kaamna ho। har sankalp behad ki seva mein samarpit ho। har bol mein nihsvaartha bhaavna ho। har karma mein karaavanhaar kara rahe hain - yeh vibration sarva ko anubhav ho। isko kaha jaata hai - ‘behad ke vairaagi’। behad ke vairaagi arthaat apnaapan mit jaae। baba-pan aa jaae। jaise anhad jaap japte hain,aise anhad smriti swaroop hon। har sankalp mein,har shvaas mein behad aur baba samaaya hua ho। to had ke vairaagi, shamshaani vairaagi aatmaon ko vartamaan samay shanti aur shakti deva ban behad ke vairaagi banaao।

to vartamaan samay ke pramaan bachchon ki result kya rahi - yeh T.vi. baapdaada ne dekhi aur bachchon ne indira gaandhi ki T.vi. dekhi। samay par dekhi, knowledge ke liye dekhi,samaachaar ke liye dekhi ismen koi harja nahin। lekin kya hua,kya hoga is roop se nahin dekhna। knowledgeful ban har drishya ko kalpa pahle ki smriti se dekho। to baapdaada ne bachchon ka kya dekha! bachchon ka drishya bhi ramneek tha। teen prakaar ki result dekhi।

ek the - chalte-chalte albelepan ki neend mein soi hui aatmaayen। jaise koi jor se aavaaz hota hai va koi hilaata hai to soya hua jaag jaata hai lekin kya hua! is sankalp se kuchh samay jaage aur phir dheere-dheere vahi albelepan ki neend। yeh to hota hi hai, is chaadar ko odh ke so gae। abhi to rehearsal hai। final to aage hona hai। isse aur munh tak chaadar odh li।

doosre the - aalasya ki neend mein soye hue। yeh to sab hona hi tha woh hua, purooshaartha to kar hi rahe hain। aur aage bhi kar hi lenge! sangamayug mein to purooshaartha karna hi hai। kuchh kiya hai, kuchh aage kar lenge। doosron ko jaagkar dekhte rehte। jaise chaadar se munh nikaal ek do ko (soye hue ko) dekhte hain na। jo naameegraami hain woh bhi itna hi raphtaar se chal rahe hain। ham bhi chal rahe hain। aise doosron ki kamzoriyon ko dekh follow father ke bajaae sisters aur brothers ko follow kar lete hain aur unhon ki bhi kamzoriyon ko follow karte hain। aise sankalp karne vaale aalasya ki neend mein soye hue woh bhi jaage zaroor। umang aur utsaah ke aadhaar se aalasya ki neend ko kaeeyon ne tyaag bhi kiya। sva-unnati aur seva ki unnati mein aage kadam bhi badhaaya। halchal ne hilaaya aur aage badhe। lekin aalasya ke sanskaar beech-beech mein phir bhi apni taraph kheenchate rehte hain। phir bhi halchal ne hilaaya, aage badhaaya।

teesre the - halchal ko dekh achal rahne vaale। seva ke shreshtha sankalp mein seva ke bhinna-bhinna plan sochna aur karna। saari vishwa ko shanti aur shakti ki sahaayta dene vaale, saahas rakhne vaale। auron ko bhi himmat dilaane vaale। aise bhi bachche dekhe। lekin shamshaani umang-utsaah va shamshaani teevra purooshaartha va kamzoriyon se vairaag vritti, isi lahar mein nahin chalna। sada paristhiti ko svasthiti ki shakti se parivartan karne vaale, vishwa-parivartak ki smriti mein raho। paristhiti sthiti ko aage badhaave va vaayumandal master sarvashaktivaan ko chalaave। manushya aatmaon ka shamshaani vairaag,alpakaal ke liye behad ka vairaagi banaave yeh poorvaj aatmaon ka karma nahin। samay rachna, master rachta ko aage badhaave yeh master rachta ki kamzori hai। aapke shreshtha sankalp - samay ko parivartan karne vaale hain। samay aap vishwa-parivartak aatmaon ka sahayogi hai। samjha! samay ko dekhkar,samay ke hilaane se aage badhne vaale nahin। lekin svayan aage badh samay ko sameep laao। question bhi bahuton ka utha ki ab kya hoga?lekin question ko fullstop ke roop mein parivartan karo। arthaat apne ko sabhi subject mein full karo। yeh hai ‘fullstop’। aise samay par kya hoga? yeh question nahin uthta lekin kya karna hai, mera karttavya aise samay par kya hai, us seva mein lag jaao। jaise aag bujhaane vaale aag ko bujhaane mein lag gae। question nahin kiya ki yeh kya hua। apni seva mein lag gaye na। aise roohaani sevaadhaari ka karttavya hai apni roohaani seva mein lag jaana। duniya vaalon ko bhi nyaaraapan anubhav ho। samjha! phir bhi samay pramaan pahunch to gae ho na। paristhiti kya bhi ho lekin drama ne phir bhi milan mela mana liya। aur hi lucky ho gaye na jo pahunch to gaye ho na। khush ho rahe ho na ki hamaara bhaagya hai jo pahunch gae। bhale aaye। madhuban ki raunak aap sab bachche hain। madhuban ka shringaar madhuban mein pahuncha। sirf madhuban vaale baba nahin, madhuban vaale bachche bhi hain। achha –

chaaron or ke sankalp dvaara, sneh dvaara, aakaari roop dvaara pahunche hue sarva bachchon ko baapdaada sada achal bhav,sada behad ke vairaagi, sada udte yogi bhav ka varsa aur vardaan de rahe hain। sada anhad smriti swaroop, albele aur aalasya ke nidraajeet,sada behad ke smriti swaroop aise poorvaj aur poojya aatmaon ko baapdaada ka yaad pyaar aur namaste।’’

daadi ji tatha jagdeesh bhaai ne videsh yaatra ka samaachaar sunaaya tatha yaad pyaar di

sabhi ko sandesh de anubhav karaaya। sneh aur sambandh badhaaya। abhi adhikaar lene ke liye aage aayenge। har kadam mein anek aatmaon ke kalyaan ka part noondha hua hai। isi noondh se sabhi ke dil mein umang-utsaah dilaaya। bahut achha - seva aur sneh ka part bajaaya। baapdaada karaavanhaar bhi hain aur saakshi ho dekhne vaale bhi hain। karaaya bhi aur dekha bhi। bachchon ke umang-utsaah aur himmat par baapdaada ko naaz hai। aage bhi aur aavaaz bulanda hoga। aisa aavaaz bulanda hoga jo sabhi kumbhakran aankh kholkar dekhenge ki yeh kya hua! kaeeyon ke bhaagya parivartan honge। dharni banaakar aaye। beej daalkar aaye। abhi jaldi beej ka phal bhi niklega। pratyakshata ka phal nikalne vaala hi hai। samay sameep aa raha hai। abhi to aap log gaye lekin jo seva karke aaye - us seva ke phal swaroop woh svayan bhaagte hue aayenge। aise anubhav karenge jaise chumbak door se kheenchata hai na। aise koi kheench raha hai। jaise aadi mein anek aatmaon ko yeh roohaani kheench hui ki koi kheench raha hai, kahaan jaayen। aise yeh bhi kheenche hue aayenge। aisa anubhav kiya na ki roohaani kheench badh rahi hai। badhte-badhte kheenche hue udkar pahunch jaayenge woh bhi abhi drishya hone vaala hi hai। abhi yahi raha hua hai। sandesh vaahak jaate hain lekin woh svayan satya teertha par pahunche yeh hai last scene। iske liye abhi dharni taiyaar ho gai hai, beej bhi pad gaya hai ab phir nikla ki nikla। achha - donon taraph gaye। baapdaada ke paas sabhi ke himmat ullaas umang ka pahunchta hai। majority seva ke umang utsaah hone ke kaaran maayaajeet banne mein bhi sahaj hi aage badh rahe hain। phursat hoti hai to maaya ka vaar bhi hota hai lekin busy rehte hain - dil se, duty se nahin। jo dil se seva mein busy rehte hain, woh sahaj hi maayaajeet ho jaate hain। to baapdaada bachchon ke umang-utsaah ko dekh khush hain। vahaan saadhan bhi sahaj hai aur inhon ko praapta bhi ho jaate hain। lakshya hai, mehnat hai aur saadhan bhi sahaj praapta hain, teenon baaton ke kaaran achhi race mein aage number le rahe hain। achha hai। lekin desh mein bhi koi kam nahin। sabhi apne-apne umang-utsaah ke aadhaar par badh rahe hain। naam to desh se hi nikalna hai। videshon ki saphalta bhi desh se hi nikalni hai। yeh achhi smriti unhon ko rehti hai aur apni duty samajhte hain ki hamko naam baala karna hai। videsh ke aavaaz se bhaarat ko jagaana hai। yeh lakshya pakka hai aur nibha bhi rahe hain। taiyaar kar rahe hain lekin abhi videsh tak aavaaz hai। videsh ka desh tak pahunche,woh udte-udte aa raha hai। abhi ud raha hai। abhi saphar kar raha hai aavaaz। udte-udte yahaan pahunch jaayega। abhi videsh mein achha phail raha hai lekin videsh ka desh mein pahunche yeh bhi hona hi hai। achha - jo bhi part bajaaya achha bajaaya। sada aage badhne ka sahayog aur vardaan hai। har aatma ka apna-apna part hai। jitna anubhvi bante jaate hain utna aur bhi anubhvon ke aadhaar se aage badhte rahenge। karaavanhaar ne jo jisse karaaya woh drama anusaar achhe se achha karaaya। nimitta bhaav seva kara hi leta hai। to seva karaai, nimitta bane,jama hua aur aage bhi jama hota rahega। achha–

party se

sada milan mele mein rahne vaale ho na? yeh milan ka mela avinaashi milan mele ka anubhav kara deta hai। kahaan bhi rehte lekin mele mein rehte ho। mele se door nahin hote। mela arthaat milan। to sada milan mela hai hi। to aisa bhaagyavaan kaun hoga jo sada mele mein rahe! vaise to mela lagta aur khatma ho jaata hai lekin sada mele mein koi nahin rehta। aap bhaagyavaan aatmaayen sada mele mein rehti ho। sada milan mela। mele mein kya hota? - milna aur jhoolna। jhoolna bhi hota hai na! to sada praaptiyon ke jhoole mein jhoolne vaale। ek jhoola nahin hai anek praaptiyon ke anek jhoole hain। kabhi kis jhoole mein jhoolte, kabhi kis jhoole mein। lekin hain mele mein। aisa jhoola hai jo sada hi sukh aur sarva praaptiyon ka anubhav karaane vaala hai। aisi koton mein koi bhaagyavaan aatmaayen ho। pahle mahima sunte the abhi mahaan ban gae। achha-