सोमवार 31 दिसंबर 1984 की अव्यक्त मुरली

>

31-12-84om shanti avyakt baapdaadaamdhuban

nae varsha par avyakt baapdaada ke mahaavaakya

navayug parivartak, sada kalyaankaari shiv baba bole –

aaj chaaron or ke bachche saakaar roop mein va aakaar roop mein naya yug, naya gyaan,naya jeevan dene vaale baapdaada se naya varsha manaane ke liye is roohaani highest aur holiest nai darbaar mein upasthit hain। baapdaada ke paas sabhi bachchon ke dil ke umang utsaah aur parivartan karne ki pratigyaaon ka shubhsankalpa,shubh bhaavnaayen,shubh kaamnaayen pahunch gai hain। baapdaada bhi sarva naye vishwa ke nirmaataaon ko,vishwa parivartak vishesh aatmaon ko sada puraani duniya ke puraane sanskaar, puraani smritiyaan,puraani vrittiyaan,puraani deh ki smriti ke bhaan se pare rahne vaale sarva puraani baaton ko vidaai dene vaalon ko sada ke liye badhaai de rahe hain। beeti ko bindi lagaae,svaraajya ki bindi lagaane vaalon ko svaraajya ke tilak ki badhaai de rahe hain। sabhi bachchon ko is vidaai ki badhaai ke saath naye varsha ki vishesh saugaat –

‘‘sada saath raho’’, ‘‘sada samaan raho’’, ‘‘sada diltakhtansheen shreshtha roohaani nashe mein raho’’yahi vardaan ki saugaat de rahe hain।

yeh saara varsha yahi samartha smriti rahe - saath hain, baap samaan hain to svatah hi har sankalp mein vidaai ki badhaai ke anubhav karte rahenge। puraane ko vidaai nahin to naveenta ki badhaai anubhav nahin kar sakte hain। isliye jaise aaj puraane varsha ko vidaai de rahe ho vaise varsha ke saath jo sab puraani baaten sunaai us puraane-pan ko sada ke liye vidaai do। naya yug hai, naya braahmanon ka sundar sansaar hai, naya sambandh hai,naya parivaar hai। nai praaptiyaan hain। sab naya hi naya hai। dekhte ho to bhi roohaani najar se rooh ko dekhte ho। roohaani baaton ko hi sochte ho। to sab naya ho gaya na! reeti nai,preeti nai sab naya। to sada naveenta ki badhaai mein raho। isko kaha jaata hai - roohaani badhaai। jo ek din ke liye nahin lekin sada roohaani badhaaeeyon se vriddhi ko paate rehte ho। baapdaada aur sarva brahman parivaar ki badhaaeeyon va roohaani aasheervaadon se pal rahe ho,chal rahe ho - aise new year vishwa mein koi mana nahin sakte। woh alpakaal ka manaate hain। aap avinaashi sada ka manaate ho। woh manushya aatmaayen manushyon se hi manaate, aap shreshtha aatmaayen paramatma baap se manaate ho। vidhaata se vardaata se manaate ho। isliye manaana arthaat khazaanon se, vardaanon se sada ke liye jholi bharna। unhon ka hai manaana aur ganvaana। yeh hai jholi bharna। isliye hi baapdaada se manaate ho na। vo log happy new year kehte,aap ‘ever happy new year’kehte। aaj khushi aur kal dukh ki ghatna dukhi nahin banaati। kaisi bhi duhkh ki ghatna ho lekin aise samay par bhi sukh, shanti swaroop sthiti dvaara sarva ko sukh-shanti ki kirnen dene vaale master sukh ke saagar ban daata ka part bajaate ho। isliye ghatna ke prabhaav se pare ho jaate ho। aur ever happy ka sada anubhav karte ho। to is naye varsha mein naveenta kya karengen?conference karenge, mele karenge। abhi sab puraani reet rasmon se, puraani chaal chalan se thake hue to hain hi। sabhi samajhte hain -kuchh naya hona chaahiye। kya naya ho,kaise ho, woh samajh nahin sakte hain। aisi naveenta ki ichchha rakhne vaalon ko naye gyaan dvaara nai jeevan dvaara naveenta ki jhalak ka anubhav karaao। yeh achha hai, itna bhi samajhte hain,lekin naya hai, yahi naya gyaan naya yug la raha hai,yeh anubhav abhi gupta hai। hona chaahiye,yeh kehte hain। unhon ki chaahna poorn karne ke liye nai jeevan ka pratyaksha example unhon ke saamne pratyaksha roop mein laao। jisse nai jhalak unhon ko anubhav ho। to naya gyaan pratyaksha karo। har ek braahman ki jeevan se navneeta ka anubhav ho tab nai srishti ki jhalak unhon ko dikhaai de। koi bhi programme karo usmein laksha rakho - sabhi ko naveenta ka anubhav ho। yeh bhi achha kaarya ho raha, is remark dene ke bajaae yeh anubhav karen ki yeh naya gyaan, naya sansaar laane vaala hai। samjha। nai srishti ki sthaapna ke anubhav karaane ki lahar phailaao। nai srishti aai ki aai। arthaat ham sab ki shubh bhaavnaaon ka phal milne ka samay aa gaya hai, aisa umang-utsaah unhon ke man mein utpanna ho। sabhi ke man mein niraasha ke badle shubh bhaavnaaon ke deepak jaagaao। koi bhi bada din manaate hain to deepak bhi jagaate hain। aajkal to royal mombattiyaan ho gai hain। to sabhi ke man mein yeh deepak jagaao। aisa new year manaao। shreshtha bhaavnaaon ke phal ki saugaaten sabhi ko do। achha –

sada sarva ko nai jeevan, naye yug ki jhalak dikhaane vaale, naye umang-utsaah ki badhaai dene vaale,sarva ko ever happy banaane vaale, vishwa ko nai rachna ka anubhav karaane vaale, aise sarva shreshtha naye yug parivartak, vishwa-kalyaankaari,sada baap ke saath ka anubhav karne vaale, baap ke sada saathi bachchon ko baapdaada ka yaadapyaar aur namaste।’’

party se

1- naye varsha ka naya umang, naya utsaah sada ke liye rehna hai,aisa dridh sankalp sabhi ne kiya?naya yug hai,ismen har sankalp naye se naya ho। har karma naye se naya ho। isko kaha jaata hai - naya umang naya utsaah। aisa dridh sankalp kiya? jaise avinaashi baap hai, aise baap dvaara praapti bhi avinaashi hai। to avinaashi praapti dridh sankalp dvaara praapta kar sakte ho। to apne kaarya sthaan par jaakar is avinaashi dridh sankalp ko bhool nahin jaana। bhoolna arthaat apraapti aur dridh sankalp rehna arthaat sarva praapti।

sada apne ko padmaapadma bhaagyavaan aatma samjho। jo kadam yaad se uthaate ho us har kadam mein padmon ki kamaai bhari hui hai। to sada apne ko ek din mein anginat kamaai karne vaale padmaapadma bhaagyavaan aatma samajh isi khushi mein sada raho ki vaah mera shreshtha bhaagya! to aapko khush dekhkar auron ko bhi prerna milti rahegi। yahi seva ka sahaj saadhan hai। jo yaad aur seva mein sada masta rehte hain vahi safe rehte hain, vijayi rehte hain। yaad aur seva aisi shakti hai jisse sada aage se aage badhte rahenge। sirf yaad aur seva ka balance zaroor rakhna hai। balance hi blessing dilaayega। himmatvaan bachchon ko himmat ke kaaran sada hi madad milti hai। himmat ka ek kadam bachche uthaate to hajaar kadam baap ki madad mil jaati hai।

raat ke 12 bajne ke baad 1.1.85 ko videshi bhaai bahinon ne naye varsha ki khushi mein geet gaaye tatha baapdaada ne sabhi bachchon ko mubaarak di

jaise bachche baap ke sneh se yaad mein geet gaate aur lavleen ho jaate hain, aise baap bhi bachchon ke sneh mein samaaye hue hain। baap maashook bhi hai to aashik bhi hai। har ek bachche ki visheshta ke oopar baap bhi aashik hote hain। to apni visheshta ko jaante ho?baap aapke oopar kis visheshta se aashik hua, yeh apni visheshta harek jaante ho?

saare vishwa mein se kitne thode aise baap ke snehi bachche hain। to baapdaada sabhi snehi bachchon ko new year ki bahut-bahut dil va jaan, sik va prem se padmaguna badhaai de rahe hain। aap logon ne jaise geet gaaye to baapdaada bhi bachchon ki khushi ke geet gaate hain। baap ke geet man ke hain aur aapke mukh ke hain। aapka to sun liya,baap ka bhi suna na?

is naye varsha mein sada har karma mein koi na koi visheshta zaroor dikhaate rehna। har sankalp vishesh ho, saadhaaran nahin ho? kyon?vishesh aatmaon ka har sankalp, bol aur karma vishesh hi hota hai। sada umang-utsaah mein aage badhte raho। umang-utsaah yeh vishesh pankh hain, in pankhon dvaara jitna ooncha udna chaaho utna ud sakte ho। yahi pankh udti kala ka anubhav karaate hain। in pankhon se ud jaao to vighna vahaan pahunch nahin sakte hain। jaise space mein jaate hain to dharti ki aakarshan kheench nahin sakti। aise udti kala vaale ko vighna kuchh bhi kar nahin sakte। sada umang-utsaah se aage badhna aur badhaana yahi vishesh seva hai। sevaadhaariyon ko isi visheshta se sada aage badhte jaana hai। achha - omshaanti।