बुधवार 23 जनवरी 1985 की अव्यक्त मुरली

>

23-01-85om shanti avyakt baapdaadaamdhuban

divya janma ki gift - ‘‘divya netra’’

divya buddhi divya drishti vidhaata trikaaldarshi baapdaada bole

aaj trikaaldarshi baap apne trikaaldarshi, trinetri bachchon ko dekh rahe hain। baapdaada,divya buddhi aur divya netra jisko teesra netra bhi kehte hain, woh netra kahaan tak spashta aur shaktishaali hai,har ek bachche ke divya netra ke shakti ki percentage dekh rahe hain। baapdaada ne sabhi ko 100pratishat shaktishaali divya netra janma ki gift di hai। baapdaada ne nambarvaar shaktishaali netra nahin diya lekin is divya netra ko har ek bachche ne apne-apne kaayde pramaan, parhej pramaan, attention dene pramaan practical kaarya mein lagaaya hai। isliye divya netra ki shakti kisi ki sampoorn shaktishaali hai,kisi ki shakti percentage mein rah gai hai। baapdaada dvaara yeh teesra netra divya netra mila hai, jaise aajkal science ka saadhan doorbeen hai jo door ki vastu ko sameep aur spashta anubhav karaati hai, aise yeh divya netra bhi divya doorbeen ka kaam karte hain। second mein paramdham, kitna door hai। jiske mile ginti nahin kar sakte,science ka saadhan is saakaar srishti ke soorya chaand sitaaro tak dekh sakte hain। lekin yeh divya netra teenon lokon ko, teenon kaalon ko dekh sakte hain। is divya netra ko anubhav ka netra bhi kehte hain। anubhav ki aankh, jis aankh dvaara 5000 varsha ki baat itni spashta dekhte jaise ki kal ki baat hai। haan, 5 hajaar varsha aur kahaan kal! to door ki baat sameep aur spashta dekhte ho na। anubhav karte ho - kal main poojya dev aatma thi aur kal phir banengi। aaj brahman kal devta। to aaj aur kal ki baat sahaj ho gai na। shaktishaali netra vaale bachche apne double taajdhaari sahaj sajaaye swaroop ko sada saamne spashta dekhte rehte hain। jaise sthool chola saja sajaaya saamne dikhaai deta aur samajhte ho abhi ka abhi dhaaran kiya ki kiya। aise yeh devtaai shareer roopi chola saamne dekh rahe ho na। bas kal dhaaran karna hi hai। dikhaai deta hai na। abhi taiyaar ho raha hai va saamne taiyaar hua dikhaai de raha hai? jaise brahma baap ko dekha, apna bhavishya chola shreekrishna swaroop sada saamne spashta raha। aise aap sabhi ko bhi shaktishaali netra se spashta aur saamne dikhaai deta hai?abhi-abhi pharishta so devta। nasha bhi hai aur saakshaat devta banne ka divya netra dvaara saakshaatkaar bhi hai। to aisa shaktishaali netra hai? va kuchh dekhne ki shakti kam ho gai hai? jaise sthool netra ki shakti kam ho jaati hai to spashta cheez bhi jaise parde ke andar va baadlon ke beech dikhaai deti hai। aise aapko bhi devta banna to hai, bana to tha lekin kya tha, kaisa tha is ‘tha’ke parde ke andar to nahin dikhaai deta?spashta hai?nishchay ka parda aur smriti ka manka donon shaktishaali hain na। va manka theek hai aur parda kamzor hai! ek bhi kamzor raha to spashta nahin hoga। to check karo va check karaao ki kahaan netra ki shakti kam to nahin hui hai?agar janma se shreemat roopi parhej karte aaye ho to netra sada shaktishaali hai। shreemat ki parhej mein kami hai tab shakti bhi kam hai। phir se shreemat ki dua kaho, dava kaho, parhej kaho, woh karo to phir shaktishaali ho jaayenge। to yeh netra hai divya doorbeen।

yeh netra shaktishaali yantra bhi hai। jis dvaara jo jaisa hai, aatmik roop ko aatma ki visheshta ko sahaj aur spashta dekh sakte ho। shareer ke andar viraajmaan gupta aatma ko aise dekh sakte jaise sthool netron dvaara sthool shareer ko dekhte ho। aise spashta aatma dikhaai deti hai na va shareer dikhaai deta hai?divya netra dvaara divya sookshm aatma hi dikhaai degi। jaise netra divya hai to visheshta arthaat gun bhi divya hai। avgun kamzori hai। kamzor netra kamzori ko dekhte hain। jaise sthool netra kamzor hota hai to kaale-kaale daag dikhaai dete hain। aise kamzor netra avgun ke kaalepan ko dekhte hain। baapdaada ne kamzor netra nahin diya hai। svayan ne hi kamzor banaaya hai। vaastav mein yeh shaktishaali yantra roopi netra chalte-phirte natural roop mein sada aatmik roop ko hi dekhte। mehnat nahin karni padti ki yeh shareer hai ya aatma hai। yeh hai ya woh hai। yeh kamzor netra ki nishaani hai jaise science vaale shaktishaali glaasej dvaara sabhi jarmas ko spashta dekh sakte hain। aise yeh shaktishaali divya netra maaya ki beemaari ko pahle se hi jaan samaapta kar sada nirogi rehte hain।

aisa shaktishaali divya netra hai। yeh divya netra divya T.vi. bhi hai। aajkal T.vi. sabhi ko achhi lagti hai na। isko T.vi. kaho va doordarshan kaho ismen apne svarga ke sarva janmon ko arthaat apne 21 janmon ke divya film ko dekh sakte ho। apne raajya ke sundar najaare dekh sakte ho। har janma ki aatma-kahaani ko dekh sakte ho। apne taaj takhta raajya-bhaagya ko dekh sakte ho। divya darshan kaho va doordarshan kaho। divya darshan ka netra shaktishaali hai na। jab free ho to yeh film dekho,aajkal ki dance nahin dekhna woh denjar dance hai। pharishton ki dance, devtaaon ki dance dekho। smriti ka switch to theek hai na। agar switch theek nahin hoga to chalaane se bhi kuchh dikhaai nahin dega। samjha - yeh netra kitna shreshtha hai। aajkal majority koi bhi cheez ki invention karte hain to lakshya rakhte hain ki ek vastu bhinna-bhinna kaarya mein aave। aise yeh divya netra anek kaarya siddha karne vaala hai। baapdaada bachchon ke kamzori ki kabhi-kabhi complain sun yahi kehte, divya buddhi mili,divya netra mila,isko vidhipoorvak sada use karte raho to na sochne ki phursat, na dekhne ki phursat rahegi। na aur sochenge na dekhenge। to koi bhi complain rah nahin sakti। sochna aur dekhna yeh donon vishesh aadhaar hain complete hone ke va complain karne ke। dekhte hue, sunte hue sada socho jaisa sochna vaisa karna haaeta hai। isliye in donon divya praaptiyon ko sada saath rakho। sahaj hai na। ho samartha lekin ban kya jaate ho? jab sthaapna hui to chhote-chhote bachche dialogue karte the, bhola bhaai ka। to hain samartha lekin bhola bhaai ban jaate hain। to bhola bhaai nahin bano। sada samartha bano। aur auron ko bhi samartha banaao। samjha - achha।

sada divya buddhi aur divya netra ko kaarya mein lagaane vaale, sada divya buddhi dvaara shreshtha manan,divya netra dvaara divya drishya dekhne mein magan rahne vaale, sada apne bhavishya dev swaroop ko spashta anubhav karne vaale, sada aaj aur kal itna sameep anubhav karne vaale, aise shaktishaali divya netra vaale trinetri,trikaaldarshi bachchon ko baapdaada ka yaadapyaar aur namaste!”

personal mulaakaat - 1- sahajyogi banne ki vidhi - sabhi sahajyogi aatmaayen ho na। sada baap ke sarva sambandhon ke sneh mein samaaye hue। sarva sambandhon ka sneh hi sahaj kar deta hai। jahaan sneh ka sambandh hai vahaan sahaj hai। aur jo sahaj hai woh nirantar hai। to aise sahajyogi aatma baap ke sarva snehi sambandh ki anubhooti karte ho? oodhav ke samaan ho ya gopiyon ke samaan? oodhav sirf gyaan ka varnan karta raha। gopgopi yaan prabhu pyaar ka anubhav karne vaali। to sarva sambandhon ka anubhav yeh hai visheshta। is sangamayug mein yeh vishesh anubhav karna hi vardaan praapta karna hai। gyaan sunna sunaana alag baat hai। sambandh nibhaana,sambandh ki shakti se nirantar lagan mein magan rehna woh alag baat hai। to sada sarva sambandhon ke aadhaar par sahayogi bhav। isi anubhav ko badhaate chalo। yeh magan avastha gop-gopiyon ki vishesh hain। lagan lagaana aur cheez hai lekin lagan mein magan rehna yahi shreshtha anubhav hain।

2. oonchi sthiti vighnon ke prabhaav se pare hai - kabhi kisi bhi vighna ke prabhaav mein to nahin aate ho?jitni oonchi sthiti hogi to oonchi sthiti vighnon ke prabhaav se pare ho jaati hai। jaise space mein jaate hain to ooncha jaate hain,dharni ke prabhaav se pare ho jaate। aise kisi bhi vighnon ke prabhaav se sada safe rehte। kisi bhi prakaar ki mehnat ka anubhav unhein karna padta - jo muhabbat mein nahin rehte। to sarva sambandhon se sneh ki anubhooti mein raho। sneh hai lekin use emerge karo। sirf amritevele yaad kiya phir kaarya mein busy ho gaye to merge ho jaata। emerge roop mein rakho to sada shaktishaali rahenge।