सोमवार 28 जनवरी 1985 की अव्यक्त मुरली

>

28-01-85om shanti avyakt baapdaadaamdhuban

vishwa sevaadhaari ka sahaj saadhan mansa seva

vishwa-kalnyaankaari, sada par-upkaari baapdaada bole

aaj sarvashaktivaan baap apne shakti sena, paandav sena, roohaani sena ko dekh rahe hain। sena ke mahaaveer apni roohaani shakti se kahaan tak vijayi bane hain। vishesh teen shaktiyon ko dekh rahe hain। har ek mahaaveer aatma ki mansa shakti kahaan tak sva parivartan prati aur seva ke prati dhaaran hui hai? aise hi vaacha shakti,karmana shakti arthaat shreshtha karma ki shakti kahaan tak jama ki hai? vijayi ratna banne ke liye yeh teenon hi shaktiyaan aavashyak hain। teenon mein se ek shakti bhi kam hai to vartamaan praapti aur praalabdha kam ho jaati hai। vijayi ratna arthaat teenon shaktiyon se sampanna। vishwa-sevaadhaari so vishwa-raajya adhikaari banne ka aadhaar yeh teenon shaktiyon se sampannata hai। sevaadhaari banna aur vishvasevaadhaari banna, vishwa-raajan banna va satayugi raajan banna ismen bhi antar hai। sevaadhaari anek hain vishwa-sevaadhaari koi-koi hain। sevaadhaari arthaat teenon shaktiyon ki nambarvaar yathaashakti dhaarna। vishwa-sevaadhaari arthaat teenon shaktiyon ki sampannata। aaj harek ke teenon shaktiyon ki percentage dekh rahe the।

sarvashreshtha mansa shakti dvaara chaahe koi aatma sammukh ho, sameep ho va kitna bhi door ho - second mein us aatma ko praapti ki shakti ki anubhooti kara sakte hain। mansa shakti kisi aatma ki maansik halchal vaali sthiti ko bhi achal bana sakti hai। maansik shakti arthaat shubh bhaavna, shreshtha kaamna, is shreshtha bhaavna dvaara kisi bhi aatma ke sanshay buddhi ko bhaavnaatmak buddhi bana sakte hain। is shreshtha bhaavna se kisi bhi aatma ka vyartha bhaav parivartan kar samartha bhaav bana sakte hain। shreshtha bhaav dvaara kisi bhi aatma ke svabhaav ko bhi badal sakte hain। shreshtha bhaavna ki shakti dvaara aatma ko bhaavna ke phal ki anubhooti kara sakte hain। shreshtha bhaavna dvaara bhagwan ke sameep la sakte hain। shreshtha bhaavna kisi aatma ke bhaagya ki rekha badal sakti hai। shreshtha bhaavna himmatheen aatma ko himmatvaan bana deti hai। isi shreshtha bhaavna ki vidhi pramaan mansa seva kisi bhi aatma ki kar sakte ho। mansa seva vartamaan samay ke pramaan ati aavashyak hai। lekin mansa seva vahi kar sakta jiski svayan ki mansa arthaat sankalp sada sarva ke prati shreshtha ho,nihsvaartha ho। par-upkaar ki sada bhaavna ho। apkaari par bhi upkaar ki shreshtha shakti ho। sada daataapan ki bhaavna ho। sada sva parivartan, sva ke shreshtha karma dvaara auron ko shreshtha karma ki prerna dene vaale ho। yeh bhi karen,tab main karoongi, kuchh yeh karen kuchh main karoon va thoda to yeh bhi karen, is bhaavna se pare। main karoongi ya karoonga aur aavashyak karenge। kamzor hai, nahin kar sakta hai, phir bhi raham ki bhaavna, sada sahayog ki bhaavna, himmat badhaane ki bhaavna ho। isko kaha jaata hai - mansa sevaadhaari। mansa seva ek sthaan par sthit rahkar bhi chaaron or ki seva kar sakte ho। vaacha aur karma ke liye to jaana pade। mansa seva kahaan bhi baithe hue kar sakte ho।

‘mansa seva’ - roohaani wireless set hai। jis dvaara door ka sambandh sameep bana sakte ho। door baithe kisi bhi aatma ko baap ke banne ka,umang utsaah paida karne ka sandesh de sakte ho। jo woh aatma anubhav karegi ki mujhe koi mahaan shakti bula rahi hai। kuchh anmol prernaayen mujhe prer rahi hain। jaise koi ko sammukh sandesh de umang utsaah mein laate ho,aise mansa shakti dvaara bhi woh aatma aise hi anubhav karegi jaise koi sammukh bol raha hai। door hote bhi sammukh ka anubhav karegi। vishwa-sevaadhaari banne ka sahaj saadhan hi ‘mansa seva’ hai। jaise science vaale is saakaar srishti se, prithvi se oopar antariksha yaan dvaara apna kaarya shaktishaali banaane ka prayatna kar rahe hain। sthool se sookshm mein ja rahe hain। kyon?sookshm shaktishaali hota hai। mansa shakti bhi ‘antarmukhi yaan’ hai। jis dvaara jahaan bhi chaaho,jitna jaldi chaaho pahunch sakte ho। jaise science dvaara prithvi ki aakarshan se pare jaane vaale svatah hi light (halke) ban jaate hain। aise mansa shaktishaali aatma svatah hi double light swaroop sada anubhav karti hai। jaise antariksha yaan vaale oonche hone ke kaaran saare prithvi ke jahaan ke bhi chitra kheenchane chaahen kheench sakte hain aise silence ki shakti se antarmukhi yaan dvaara mansa shakti dvaara kisi bhi aatma ko charitravaan banne ki, shreshtha aatma banne ki prerna de sakte ho! science vaale to har cheez par samay aur sampatti khoob lagaate hain,lekin aap bina kharche thode samay mein bahut seva kar sakte ho। jaise aajkal kahaan-kahaan flying saasar (udan tashtari) dekhte hain। sunte ho na - samaachaar। woh bhi sirf light hi dekhne mein aati hai। aise aap mansa sevaadhaari aatmaon ka aage chal anubhav karenge ki koi light ki bindi aai,vichitra anubhav karaake gai। yeh kaun the? kahaan se aaye? kya dekar gaye! yeh charcha badhti jaayegi। jaise aakaash ke sitaaron ki taraph sabki najar jaati hai, aise dharti ke sitaare divya jyoti chaaro or anubhav karenge। aisi shakti mansa sevaadhaariyon ki hai। samjha?mahaanta to aur bhi bahut hai lekin aaj itna hi sunaate hain। mansa seva ko ab teevra karo tab 9 laakh taiyaar honge। abhi golden jubilee tak kitni sankhya bani hai?satayug ki diamond jubilee tak 9laakh to chaahiye na। nahin to vishwa raajan kis par raajya karega, 9laakh taare gaaye hue hain na। sitaara roopi aatma ka anubhav karenge tab 9 laakh sitaare gaaye jaayenge। isliye ab sitaaron ka anubhav karaao। achha - chaaron or ke aaye hue bachchon ko madhuban nivaasi banne ki mubaarak ho va milan mele ki mubaarak ho। isi avinaashi anubhav ki mubaarak sada saath rakhna। samjha!

sada mahaaveer ban mansa shakti ki mahaanta se shreshtha seva karne vaale, sada shreshtha bhaavna aur shreshtha kaamna ki vidhi se behad ke seva ki siddhi paane vaale, apni oonchi sthiti dvaara chaaron or ki aatmaon ko shreshtha prerna dene ke vishvasevaadhaari,sada apni shubh bhaavna dvaara anya aatmaon ko bhi bhaavna ka phal dene vaale, aise vishwa-kalyaankaari par-upkaari, vishwa-sevaadhaari bachchon ko baapdaada ka yaadapyaar aur namaste।

vidaai ke samay amritvele sabhi bachchon ko yaadapyaar di - har kaarya mangal ho। har kaarya sada saphal ho। uski sabhi bachchon ko badhaai। vaise to har din sangamayug ke shubh hain, shreshtha hain, umang utsaah dilaane vaale hain। isliye har din ka mahatva apna-apna hai। aaj ke din har sankalp bhi mangalmay ho arthaat shubhchintak roop vaala ho। kisi ke prati mangal kaamna arthaat shubh kaamna karne vaala sankalp ho। har sankalp mangalam arthaat khushi dilaane vaala ho। to aaj ke din ka yeh mahatva sankalp bol aur karma teenon mein vishesh smriti mein rakhna। aur yeh smriti rakhna hi har second baapdaada ki yaadapyaar sveekaar karna hai to sirf abhi yaadapyaar nahin de rahe hain lekin practical karna arthaat yaadapyaar lena। saara din aaj yaadapyaar lete rehna। arthaat yaad mein rah har sankalp bol dvaara pyaar ki lahar mein lahraate rehna। achha - sabhi ko vishesh yaad - good morning!