शुक्रवार 7 मार्च 1986 की अव्यक्त मुरली

>

07-03-86om shanti avyakt baapdaadaamdhuban

shivraatri par avyakt baapdaada ke madhur mahaavaakya

bholaanaath shiv baba bole

aaj gyaan daata, bhaagya vidhaata, sarvashaktiyon ke vardaata, sarva khazaanon se bharpoor karne vaale bholaanaath baap apne ati snehi, sada sahayogi, sameep bachchon se milne ke liye aaye hain। yeh milan hi sadaakaal ka utsav manaane ka yaadgaar ban jaata hai। jo bhi bhinna-bhinna naamon se samay prati samay utsav manaate hain - woh sabhi is samay baap aur bachchon ke madhur milan,utsaah bhara milan, bhavishya ke liye utsav ke roop mein ban jaata hai। is samay aap sarvashreshtha bachchon ka har din, har ghadi sada khushi mein rahne ki ghadiyaan va samay hai। to is chhote se sangamayug ke alaukik jeevan,alaukik praaptiyaan,alaukik anubhvon ko dvaapar se bhakton ne bhinna-bhinna naam se yaadgaar bana diye hain। ek janma ki aapki yeh jeevan,bhakti ke63 janmon ke liye yaad ka saadhan ban jaati hai। itni mahaan aatmaayen ho! is samay ki sabse wonderful baat yahi dekh rahe ho - jo practical bhi mana rahe ho aur nimitta us yaadgaar ko bhi mana rahe ho। chaitanya bhi ho aur chitra bhi saath-saath hain।

paanch hajaar varsha pahle har ek ne kya-kya praapta kiya, kya bane, kaise bane- yeh 5hajaar varsha ka poora apna yaadgaar chitra aur jeevan patri sabhi spashta roop mein jaan gaye ho। sun rahe ho aur dekh-dekh harshit ho rahe ho ki yeh hamaara hi gaayan-poojan hamaare jeevan ki kathaayen varnan kar rahe hain। double foreigners ne apna yaadgaar chitra dekha hai na! to chitron ko dekhkar aise anubhav karte ho ki yeh mera chitra hai! original aapka chitra to bana nahin sakte hain। isliye bhaavnaapoorvak jo bhi touch hua woh chitra bana diya hai। to aaj bhi aap sabhi ‘shivraatri’mana rahe ho। practical shiv-jayanti to roj manaate hi ho kyonki sangamayug hai hi avatran ka yug,shreshtha karttavya,shreshtha charitra karne ka yug। lekin behad yug ke beech me yeh yaadgaar din bhi mana rahe ho। aap sabka manaana hai - ‘milan manaana’aur unhon ka manaana hai - ‘aahvaahan karna’। unhon ka hai ‘pukaarna’ aur aapka hai ‘pa lena’। woh kahenge ‘aao’ aur aap kahenge ‘aa gaye’। mil gaye। yaadgaar aur practical mein kitna raat-din ka antar hai। vaastav mein yeh din bholaanaath baap ka din hai,bholaanaath arthaat bina hisaab ke anginat dene vaala। vaise jitna aur utne ka hisaab hota hai, jo karega woh paayega। utna hi paayega। yeh hisaab hai। lekin bholaanaath kyon kehte? kyonki is samay dene mein jitne aur utne ka hisaab nahin rakhta। ek ka padmaguna hisaab hai। to anginat ho gaya na। kahaan ek, kahaan padma। padma bhi last shabd hai isliye padma kehte hain। anginat dene vaale bhole bhandaari ka din yaadgaar roop mein manaate hain। aapko to itna mila hai jo ab to bharpoor ho hi lekin 21janma 21 peedhi sada bharpoor rahenge।

itne janmon ki guarantee aur koi nahin kar sakta। kitna bhi koi bada daata ho lekin anek janma ka bharpoor bhandaara hone ki guarantee koi bhi nahin kar sakta। to bholaanaath hua na! knowledgeful hote bhi bhola bante hain… isliye bholaanaath kaha jaata hai। vaise to hisaab karne mein - ek-ek sankalp ka bhi hisaab jaan sakte hain। lekin jaante hue bhi dene mein bholaanaath hi banta hai। to aap sabhi bholaanaath baap ke bholaanaath bachche ho na! ek taraph bholaanaath kehte doosre taraph bharpoor bhandaari kehte hain। yaadgaar bhi dekho kitna achha manaate hain। manaane vaalon ko pata nahin lekin aap jaante ho। jo mukhya is sangamayug ki padhaai hai, jiski vishesh 4subject hain,woh chaar hi subject yaadgaar divas par manaate aate hain। kaise? pahle bhi sunaaya tha ki vishesh is utsav ke din bindu ka aur boond ka mahatva hota hai। to bindu is samay ke yaad arthaat yog ke subject ki nishaani hai। yaad mein bindu sthiti mein hi sthit hote ho na! to ‘bindu’yaad ki nishaani aur boond - gyaan ki bhinna-bhinna boonden। is gyaan ke subject ki nishaani ‘boond’ ke roop mein dikhaai hai। dhaarna ki nishaani isi din vishesh vrat rakhte hain। to vrat dhaaran karna। dhaarna mein bhi aap dridh sankalp karte ho। to vrat rakhte ho ki aisa sahansheel va antarmukh avashya banke hi dikhaayenge। to yeh vrat dhaaran karte ho na! yeh ‘vrat’dhaarna ki nishaani hai। aur seva ki nishaani hai ‘jaagran’। seva karte hi ho - kisko jagaane ke liye?agyaan neend se jagaana,jaagran karaana, jaagriti dilaana yahi aapki seva hai। to yeh ‘jaagran’seva ki nishaani hai। to chaar hi subject aa gai na। lekin sirf rooprekha unhonne sthool roop mein badal di hai। guhya rahasya dhaaran karne ki divya buddhi to hain hi nahin। bhakta-buddhi,maheen buddhi nahin hoti। bhakta-buddhi ko baapdaada moti buddhi kehte hain। brahma baap ke bol sune hain na। to yeh bhi bhakta buddhi maheenta ko nahin grahan kar sakte। isliye sthool roop, saadhaaran roop de diya hai। phir bhi bhakton ke oopar bhi bhagwan khush hote hain, kyon?phir bhi thagat banne se to bach gaye na। thagat se bhakta banna achha hi hai। jo sachche bhakta hote hain woh thagat nahin hote hain। woh bhaavna vaale hote hain aur sada hi sachche bhakton ki yeh nishaani hogi ki jo sankalp karenge usmein dridh rahenge। isliye bhakton se bhi baap ka sneh hai। phir bhi aapke yaadgaar ki dvaapar se parampara to chala rahe hain aur vishesh is din jaise aap log yahaan sangamayug par baar-baar samarpan samaaroh manaate ho, alag-alag bhi manaate ho,aise hi aapke is function ka bhi yaadgaar woh svayan ko samarpan nahin karte lekin bakre ko karte hain। bali chadha dete hain। vaise to baapdaada bhi hansi mein kehte hain ki yeh ‘main-main-pan’ka samarpan ho tab samarpan arthaat sampoorn bano। baap samaan bano। jaise brahma baap ne pahla-pahla kadam kya uthaaya?main aur mera-pan ka samarpan samaaroh manaaya kisi bhi baat mein‘main’ ke bajaae sada natural bhaasha mein, saadhaaran bhaasha mein bhi ‘baap’ shabd hi suna। ‘main’shabd nahin।

main kar raha hoon, nahin। baba kara raha hai। baba chala raha hai, mai kehta hoon, nahin। baba kehta hai। had ke koi bhi vyakti ya vaibhav se lagaav yeh ‘meraapan’hai। to merepan ko aur main-pan ko samarpan karna isko hi kehte hain - ‘bali chadhna’। bali chadhna arthaat - mahaabli banna। to yeh samarpan hone ki nishaani hai। to banaaya achha hai na। bhakton ko aap bhi dil se shaabaas to dete ho na! phir bhi aap sabke bhakta hain। aise aata hai na ki yeh hamaare bhakta hain। ya samajhte ho ki yeh baapdaada ke bhakta hain। baap ke bhi hain, aapke bhi hain। jaise kehte ho hamaara raajya aane vaala hai। takhta par to ek lakshmi naaraayan baithenge! ek samay par to ek hi takhtansheen honge na। lekin phir bhi aap log kya kahenge? aadhaakalpa hamaara raajya hai। aise nahin kahenge ki lakshmi naaraayan ka raajya hai। hamaara kahenge na। aise hi jo baap ke bhakta woh aapke bhi bhakta hain। saakshi hokar dekho to bahut maja aayega। ham kya kar rahe hain aur hamaare bhakta kya kar rahe hain! practical kya hai aur yaadgaar kya hai! phir bhi baapdaada bhakton ko ek baat ki aaphreen dete hain। kisi bhi roop se bhaarat mein va har desh mein utsaah ki lahar phailaane ke liye utsav banaaye to achhe hain na। chaahe do din ke liye ho ya ek din ke liye ho lekin utsaah ki lahar to phail jaati hain na। isliye ‘utsav’ kehte hain। phir bhi alpakaal ke liye vishesh roop se baap ke taraph majority ka attention to jaata hai na। to suna ‘shivraatri’ka mahatva kya hai! yeh to hai din ka mahatva lekin aapko kya karna hai? vishesh din par kya vishesh karenge? jhanda lahrega woh to dekhenge, picnic karenge, geet gaayenge, bas। yahi karenge! manaana to achha hai। aaye hi ho mauj karne ke liye। aajkal to vrat bhi lete hain aur phir chhod bhi dete hain। jaise bhakti mein koi sadaakaal ke liye vrat leta hai aur koi mein himmat nahin hoti hai to ek maas ke liye,ek din ke liye ya thode samay ke liye lete hain। phir woh vrat chhod dete hain। aap to aise nahin karte ho na! madhuban mein to dharni par paanv nahin hai aur phir jab videsh mein jaayenge to dharni par aayenge ya oopar hi rahenge! sada oopar se neeche aakar karma karenge ya neeche rahkar karma karenge? oopar rehna arthaat oopar ki sthiti mein rehna। oopar koi chhat par nahin latakna hai। oonchi sthiti mein sthit ho koi bhi saadhaaran karma karna arthaat neeche aana, lekin saadhaaran karma karte bhi sthiti oopar arthaat oonchi ho। jaise baap bhi saadhaaran tan leta hai na। karma to saadhaaran hi karenge na jaise aap log bolenge vaise hi bolenge। vaise hi chalenge। to karma saadhaaran hai, tan hi saadhaaran hai, lekin saadhaaran karma karte bhi sthiti oonchi rehti। aise aap ki bhi sthiti sada oonchi ho।

jaise aaj ke din ko avatran ka din kehte ho na to roj amritvele aise hi socho ki nindra se nahi shantidham se karma karne ke liye avatrit hue hain। aur raat ko karma karke shantidham mein chale jaao। to avtaar avatrit hote hi hain - shreshtha karma karne ke liye। unko janma nahin kehte hain, avatran kehte hain। oopar ki sthiti se neeche aate hain - yeh hai avatran। to aisi sthiti mein rahkar karma karne se saadhaaran karma bhi alaukik karma mein badal jaate hain। jaise doosre log bhi bhojan khaate aur aap kehte ho ‘brahma bhojan’ khaate hain। pharka ho gaya na। chalte ho lekin aap pharishte ki chaal chalte, double light sthiti mein chalte। to alaukik chaal alaukik karma ho gaya। to sirf aaj ka din avatran ka din nahin lekin sangamayug hi avatran divas hai।

aaj ke din mubaarak to chaaron or se baapdaada ke saath-saath sabko bhi aa rahi hai। baapdaada sabhi bachchon ko mubaarak ki respond mein anginat mubaarak de rahe hain। pahli mubaarak, sabhi bachchon ko - baap ko pahchaanne ke visheshta ki mubaarak। baap ke sada varse ke adhikaari banne ki mubaarak। sada apne shreshtha heere tulya brahman jeevan ki mubaarak। sada baap samaan athak behad ke sevaadhaari banne ki mubaarak। sada baap samaan pharishta so devta banne ke dridh sankalp,shreshtha karma ki mubaarak। aise to mubaarak bahut hain, har kadam ki mubaarak hai। har ghadi ki mubaarak hai। har sankalp ki mubaarak hai। aap log baapdaada ko mubaarak dete ho lekin baapdaada kehte hain - ‘pahle aap’। agar bachche nahin hote to baap kaun kehta। bachche hi baap ko baap kehte hain। isliye pahle bachchon ko mubaarak। tab baap kahega - haan,main baap hoon,to mubaarak sveekaar ho। aap sab birth de ka geet gaate ho na - happy birthday to you… baapdaada bhi kehte hain - happy birthday to you। birth de ki mubaarak to bachchon ne baap ko di। baap ne bachchon ko di। aur mubaarak se hi pal rahe ho। aap sabki paalna hi kya hai? baap ki,parivaar ki badhaaiyon se hi pal rahe ho। badhaaiyon se hi naachte, gaate,palte, udte ja rahe ho। yeh paalna bhi wonderful hai। ek do ko har ghadi kya dete ho? badhaaeeyaan hain aur yahi paalna ki vidhi hai। koi kaisa bhi hai, woh to baapdaada bhi jaante hain, aap bhi jaante ho ki nambarvaar to honge hi। agar nambarvaar nahin bante phir to satayug mein kam se kam dedh laakh takhta banaane paden। isliye nambarvaar to hone hi hain। sankhya abhi dedh laakh tak pahunchi hai na! to itne takhta banaane pade। lekin banna ek hi hai। baaki saathi banne hain,royal family banni hai। mukhya ‘vishwa-mahaaraajan’to ek hi banega na। saath mein raajya karne vaalon ko lakshmi naaraayan to nahin kahenge। number bhi badli ho gaya। pahle janma vaale ko pahla number lakshmi naaraayan। phir second number lakshmi naaraayan to badal gaya na। royal family aur raajya ke saathi yeh vistaar ho jaata hai। royal family ko bhi raajya adhikaari to kahenge na। to nambarvaar hona hai lekin kabhi koi ko agar aap samajhte hain ki yeh wrong hai,yeh achha kaam nahin kar raha hai, to wrong ko right karne ki vidhi ya yathaartha karma nahi karne vaale ko yathaartha karma sikhaane ki vidhi - kabhi bhi usko seedha nahin kaho ki tum to wrong ho। yeh kahne se woh kabhi nahin badlega। jaise aag bujhaane ke liye aag nahin jalaai jaati hai। usko thanda paani daala jaata hai।

isliye kabhi bhi usko pahle hi kaha ki tum wrong ho, tum wrong ho to woh aur hi dilshikasta ho jaayega। pahle usko achha-achha kah karke thamaao to sahi, pahle paani to daalo phir usko sunaao ki aag kyon lagi! pahle yeh nahin kaho ki tum aise ho, tumne yeh kiya, yeh kiya। pahle thanda paani daalo। peechhe woh bhi mahsoos karega ki haan, aag lagne ka kaaran kya hai aur aag bujhaane ka saadhan kya hai! agar bure ko bura kah dete to aag mein tel daalte ho। iseelie bahut achha,bahut achha kah karke peechhe usko koi bhi baat do to usmein sunne ki, dhaaran karne ki himmat aa jaati hai। isliye suna rahe the ki ‘bahut achha, bahut achha’ yahi badhaaiyaan hain। jaise baapdaada bhi kabhi kisko direct wrong nahin kahega, murli mein suna dega - right kya hai,wrong kya hai। lekin agar koi seedha aakar poochhega bhi ki main wrong hoon?to kahega nahin tum to bahut right ho kyonki usmein us samay himmat nahin hoti hai। jaise patient ja bhi raha hota hai,aakhri saans hota hai to bhi doctor se agar poochhega ki main ja raha hoon to kabhi nahin kahega haan, ja rahe ho। kyonki us time himmat nahin hoti। kiski dil kamzor ho aur aap agar usko aisi baat kah do, woh to heartfail ho hi jaayega। arthaat purooshaartha mein parivartan karne ki shakti nahin aayegi। to sangamayug hai hi badhaaiyon se vriddhi ko paane ka yug। yeh badhaaiyaan hi shreshtha paalna hain। iseelie aapke is badhaaiyon ki paalna ka yaadgaar jab bhi koi devi devta ka din manaate hain to usko bada din kah dete hain। deepmaala hogi,shivraatri hogi to kahenge aaj bada din hai। jo bhi utsav honge usko bada din kahenge। kyonki aapki badi dil hai to unhonne bada din kah diya hai। to ek do ko badhaaiyaan dena yeh badi dil hai। samjha - aise nahin ki wrong ko wrong samjhaayenge nahin, lekin thoda dhairya rakho, ishaara to dena padega lekin time to dekho na। woh mar raha hai aur usko kaho mar jaao, mar jaao…। to time dekho,uski himmat dekho। bahut achha, ‘bahut achha’kahne se himmat aa jaati hai। lekin dil se kaho, aise nahin baahar se kaho to woh samjhe ki mere ko aise hi kah rahe hain। yeh bhaavna ki baat hai। dil ka bhaav ‘raham’ ka ho to uske dil ko raham ka bhaav lagega। iseelie sada badhaaiyaan dete raho। badhaaiyo lete raho। yeh badhaai vardaan hai। jaise aaj ke din ko gaayan karte hain - shiv ke bhandaare bharpoor,… to aapka gaayan hai,sirf baap ka nahin। sada bhandaara bharpoor ho। daata ke bachche daata ban dete jaao। sunaaya tha na - bhakta hain ‘levta’aur aap ho dene vaale ‘devta’ to daata maana dene vaale। kisi ko bhi kuchh thoda bhi dekar phir aap unse kuchh le lo to usko feel nahin hoga। phir kuchh bhi usko mana sakte ho। lekin pahle usko do। himmat do, umang dilaao,khushi dilaao phir usse kuchh bhi baat manaane chaaho to mana sakte ho, roj utsav manaate raho। roj baap se milan manaana yahi utsav manaana hai। to roj utsav hai। achha –

chaaron or ke bachchon ko, sangamayug ke har din ke avatran divas ki avinaashi mubaarak ho। sada baap samaan daata aur vardaata ban har aatma ko bharpoor karne vaale, master bholaanaath bachchon ko, sada yaad mein rah har karma ko yaadgaar banaane vaale bachchon ko, sada sva unnati aur seva ki unnati mein umang utsaah se aage badhne vaale shreshtha bachchon ko, vishesh aaj ke yaadgaar divas shiv jayanti so brahman jayanti, heere tulya jayanti,sada sarva ko sukhi banaane ki,sampanna banaane ki jayanti ki mubaarak aur yaadapyaar aur namaste।’’