गुरुवार 29 अक्टूबर 1987 की अव्यक्त मुरली

>

29-10-87om shanti avyakt baapdaadaamdhuban

tan, man,dhan aur sambandh ki shakti

‘sada svastha bhav' ka vardaan dene vaale, sarvashaktivaan shivbaaba apne vatson prati bole

aaj sarvashaktivaan baap apne shaktishaali bachchon ko dekh rahe hain। har ek brahman aatma shaktishaali bani hai lekin nambarvaar hai। sarva shaktiyaan baap ka varsa aur vardaata ka vardaan hain। baap aur vardaata - in double sambandh se harek bachche ko yeh shreshtha praapti janma se hi hoti hai। janma se hi baap sarva shaktiyon ka arthaat janma-siddha adhikaar ka adhikaari bana deta hai, saath-saath vardaata ke naate se janma hote hi master sarvashaktivaan banaae ‘sarva shakti bhav' ka vardaan de dete hain। sabhi bachchon ko ek dvaara ek jaisa hi double adhikaar milta hai lekin dhaaran karne ki shakti nambarvaar bana deti hai। baap sabhi ko sada aur sarva shaktishaali banaate hain lekin bachche yatha-shakti ban jaate hain। vaise laukik jeevan mein va alaukik jeevan mein saphalta ka aadhaar shaktiyaan hi hain। jitni shaktiyaan, utni saphalta। mukhya shaktiyaan hain - tan ki, man ki, dhan ki aur sambandh ki। chaaron hi aavashyak hain। agar chaar mein se ek bhi shakti kam hai to jeevan mein sada va sarva saphalta nahin hoti। alaukik jeevan mein bhi chaaron hi shaktiyaan aavashyak hai।

is alaukik jeevan mein aatma aur prakriti donon ki tandaroosti aavashyak hai। jab aatma svastha hai to tan ka hisaab-kitaab va tan ka rog sooli se kaanta banne ke kaaran, sva-sthiti ke kaaran svastha anubhav karta hai। unke mukh par, chehre par beemaari ke kashta ke chinha nahin rehte। mukh par kabhi beemaari ka varnan nahin hota,karmabhog ke varnan ke badle karmayog ki sthiti ka varnan karte hain। kyonki beemaari ka varnan bhi beemaari ki vriddhi karne ka kaaran ban jaata hai। woh kabhi bhi beemaari ke kashta ka anubhav nahin karega, na doosre ko kashta sunaakar kashta ki lahar phailaayega। aur hi parivartan ki shakti se kashta ko santushtata mein parivartan kar santushta rah auron mein bhi santushtata ki lahar phailaayega। arthaat master sarvashaktivaan ban shaktiyon ke vardaan mein se samay pramaan sahan shakti, samaane ki shakti prayog karega aur samay par shaktiyon ka vardaan va varsa kaarya mein laana - yahi uske liye vardaan arthaat dua davaai ka kaam kar deti hai। kyonki sarvashaktivaan baap dvaara jo sarvashaktiyaan praapta hain woh jaisi paristhiti,jaisa samay aur jis vidhi se aap kaarya mein lagaana chaaho,vaise hi roop se yeh shaktiyaan aapki sahayogi ban sakti hain। in shaktiyon ko va prabhu-vardaan ko jis roop mein chaahe woh roop dhaaran kar sakte hain। abhi-abhi sheetalta ke roop mein, abhi-abhi jalaane ke roop mein। paani ki sheetalta ka bhi anubhav kara sakte to aag ke jalaane ka bhi anubhav kara sakte; davaai ka bhi kaam kar sakta aur shaktishaali banaane ka maajoon ka bhi kaam kar sakta। sirf samay par kaarya mein lagaane ki authority bano। yeh sarvashaktiyaan aap master sarvashaktivaan ki sevaadhaari hain। jab jisko order karo, woh ‘haajar hajoor' kah sahayogi banegi lekin seva lene vaale bhi itne chatur-sujaan chaahiye। to tan ki shakti aatmik shikta ke aadhaar par sada anubhav kar sakte ho arthaat sada svastha rahne ka anubhav kar sakte ho।

yeh alaukik brahman jeevan hai hi sada svastha jeevan। vardaata se ‘sada svastha bhav' ka vardaan mila hua hai। baapdaada dekhte hain ki praapta hue vardaanon ko kai bachche samay par kaarya mein lagaakar laabh nahin le sakte hain va yeh kahen ki shaktiyon arthaat sevaadhaariyon se apni vishaalta aur vishaal buddhi dvaara seva nahin le paate hain। ‘master sarvashaktivaan' - yeh sthiti koi kam nahin hai! yeh shreshtha sthiti bhi hai, saath-saath direct paramatma dvaara ‘param title' bhi hai। title ka nasha kitna rakhte hain! title kitne kaarya saphal kar deta hai! to yeh parmaatma-title hai, ismen kitni khushi aur shakti bhari hui hai! agar isi ek title ki sthiti roopi seat par set raho to yeh sarvashaktiyaan seva ke liye sada haajar anubhav hongi, aapke order ki intajaar mein hogi। to vardaan ko va varse ko kaarya mein lagaao। agar master sarvashaktivaan ke svamaan mein sthit nahin hote to shaktiyon ko order mein chalaane ke bajaae baar-baar baap ko arja daalte rehte ki yeh shakti de do,yeh hamaara kaarya kara do,yeh ho jaae,aisa ho jaae। to arja daalne vaale kabhi bhi sada raaji nahin rah sakte hain। ek baat poori hogi, doosri shuru ho jaayegi। isliye maalik ban, yogayukta ban yuktiyukta seva sevaadhaariyon se lo to sada svastha ka svatah hi anubhav karenge। isko kehte hain - tan ke shakti ki praapti।

aise hi man ki shakti arthaat shreshtha sankalp shakti। master sarvashaktivaan ke har sankalp mein itni shakti hai jo jis samay jo chaahe woh kar sakta hai aur kara bhi sakta hai kyonki unke sankalp sada shubh, shreshtha aur kalyaankaari honge। to yahaan shreshtha kalyaan ka sankalp hai, woh siddha zaroor hota hai aur master sarvashaktivaan hone ke kaaran man kabhi maalik ko dhokha nahin de sakta hai,duhkh nahin anubhav kara sakta hai। man ekaagra arthaat ek thikaane par sthit rehta hai,bhatakta nahin hai। jahaan chaaho,jab chaaho man ko vahaan sthit kar sakte ho। kabhi man udaas nahin ho sakta hai,yeh hai man ki shakti jo alaukik jeevan mein varse va vardaan mein praapta hai।

isi prakaar teesri hai dhan ki shakti arthaat gyaan-dhan ki shakti। gyaan-dhan sthool dhan ki praapti svatah hi karaata hai। jahaan gyaan dhan hai, vahaan prakriti svatah hi daasi ban jaati hai। yeh sthool dhan prakriti ke saadhan ke liye hai। gyaan-dhan se prakriti ke sarva saadhan svatah praapta hote hain। isliye gyaan-dhan sab dhan ka raaja hai। jahaan raaja hai, vahaan sarva padaartha svatah hi praapta hote hain, mehnat nahin karni padti। agar koi bhi laukik padaartha praapta karne mein mehnat karni padti hai to iska kaaran gyaan-dhan ki kami hai। vaastav mein,gyaan-dhan padmaapadmapti banaane vaala hai। parmaartha vyavhaar ko svatah hi siddha karta hai। to parmaatma-dhan vaale parmaarthi ban jaate hain। sankalp karne ki bhi aavashyakta nahin, svatah hi sarva aavashyaktaayen poorn hoti rahteen। dhan ki itni shakti hai jo anek janma yeh gyaan-dhan raajaaon ka bhi raaja bana deta hai। to dhan ki bhi shakti sahaj praapta ho jaati hai।

isi prakaar - sambandh ki shakti। sambandh ki shakti ke praapti ki shubh ichchha isliye hoti hai kyonki sambandh mein sneh aur sahayog ki praapti hoti hai। is alaukik jeevan mein sambandh ki shakti double roop mein praapta hoti hai। jaante ho, double sambandh ki shakti kaise praapta hoti hai? ek - baap dvaara sarva sambandh, doosra - daivi parivaar dvaara sambandh। to double sambandh ho gaya na - baap se bhi aur aapas mein bhi। to sambandh dvaara sada nihsvaartha sneh, avinaashi sneh aur avinaashi sahayog sada hi praapta hota rehta hai। to sambandh ki bhi shakti hai na। vaise bhi baap, bachcha kyon chaahta hai athva bachcha,baap kyon chaahta hai? sahayog ke liye, samay par sahayog mile। to is alaukik jeevan mein chaaron shaktiyon ki praapti vardaan roop mein,varse ke roop mein hai। jahaan chaaron prakaar ki shaktiyaan praapta hain,uski har samay ki sthiti kaisi hogi? sada master sarvashaktivaan। isi sthiti ki seat par sada sthit ho? isi ko hi doosre shabdon mein sva ke raaje va raajayogi kaha jaata hai। raajaaon ke bhandaar sada bharpoor rehte hain। to raajayogi arthaat sada shaktiyon ke bhandaar bharpoor rehte,samjha? isko kaha jaata hai - shreshtha brahman alaukik jeevan। sada maalik ban sarva shaktiyon ko kaarya mein lagaao। yathaashakti ke bajaae sada shaktishaali bano। arja karne vaale nahin, sada raaji rahne vaale bano। achha।

madhuban aane ka chance to sabhi ko mil raha hai na। is praapta hue bhaagya ko sada saath rakho। bhaagyavidhaata ko saath rakhna arthaat bhaagya ko saath rakhna hai। teen zone ke aaye hain। alag-alag sthaan ki 3nadiyaan aakar ikatthi hui - isko triveni ka sangam kehte hain। baapdaada to vardaata ban sabko vardaan dete hain। vardaanon ko kaarya mein lagaana, woh har ek ke oopar hai। achha।

chaaron or ke sarva varse aur vardaanon ke adhikaari shreshtha aatmaon ko, sarva master sarvashaktivaan shreshtha aatmaon ko,sarva sada santushtata ki lahar phailaane vaale santushta aatmaon ko,sada parmaartha dvaara vyavhaar mein siddhi praapta karne vaali mahaan aatmaon ko baapdaada ka sneh aur shakti sampanna yaadapyaar aur namaste।