गुरुवार 23 नवंबर 1989 की अव्यक्त मुरली

>

23-11-89 om shanti avyakt baapdaadaamdhuban

vardaata ko raaji karne ki sahaj vidhi avyakt baapdaada apne bachchon prati bole

aaj vardaata baap apne vardaani bachchon ko dekh harshit ho rahe hain। vardaata ke bachche vardaani sab bachche hain lekin nambarvaar hain। vardaata sabhi bachchon ko vardaanon ki jholi bhar kar ke dete hain। phir number kyon?vardaata dene mein nambarvaar nahin dete hain kyonki vardaata ke paas akhut vardaan hain jo jitna lene chaahe khula bhandaar hai। aise khule bhandaar se kai bachche sarva vardaanon se sampanna bante hain aur koi bachche yatha-shakti tatha sampanna bante hain। sabse jyaada jholi bharkar dene mein bholaanaath, ‘vardaata'roop hi hai। pahle bhi sunaaya hai - daata, bhaagyavidhaata aur vardaata। teenon mein se ‘vardaata' roop se bhole bhagwan kaha jaata hai। kyonki vardaata bahut jaldi raaji ho jaate hain। sirf raaji karne ki vidhi jaan jaate ho to siddhi arthaat vardaanon ki jholi se sampanna rehna bahut sahaj hai। sabse sahaj vidhi vardaata ko raaji karne ki jaante ho? unko sabse priy kaun lagta hai?unko ‘ek'shabd sabse priy lagta,jo bachche ‘ekavrata' aadi se ab tak hain vahi vardaata ko ati priy hain।

ekavrata arthaat sirf pativrata nahin, sarva sambandh se ‘ekavrata'। sankalp mein bhi,svapna mein bhi dooja-vrata na ho। ek-vrata arthaat sada vritti mein ek ho। doosra - sada mera to ek doosra na koi - yeh pakka vrat liya hua ho। kai bachche ekavrata banne mein badi chaturaai karte hain। kaun-si chaturaai?baap ko hi meethi baaten sunaate ki baap,shikshak,satguru ka mukhya sambandh to aapke saath hai lekin saakaar shareerdhaari hone ke kaaran,saakaari duniya mein chalne ke kaaran koi saakaari sakha va sakhi sahayog ke liye,seva ke liye,raay-salaah ke liye saakaar mein zaroor chaahiye,kyonki baap to niraakaar aur aakaar hai, isliye seva saathi hai। aur to kuchh nahin hai। kyonki niraakaari,aakaari milan manaane ke liye svayan ko bhi aakaari, niraakaari sthiti mein sthit hona padta hai। woh kabhi-kabhi mushkil lagta hai। isliye samay ke liye saakaar saathi chaahiye। jab dimaag mein bahut baaten bhar jaayengi to kya karenge?sunne vaala to chaahiye na! ekavrata aatma ke paas aisi bojh ki baaten ikatthi nahin hoteen jo sunaani paden। ek taraph baap ko bahut khush karte ho - bas, aap hi sadaiv mere saath rehte ho, sada baap mere saath hai, saathi hai। phir us samay kahaan chala jaata hai? baap chala jaata ya aap kinaare ho jaate ho? har samay saath hai va 6-8 ghanta saath hai। vaayda kya hai?saath hai,saath rahenge, saath chalenge, yeh vaayda pakka hai na! brahma baap se to itna vaayda hai ki saare chakra mein saath part bajaayenge! jab aisa vaayda hai, phir bhi saakaar mein koi vishesh saathi chaahiye?

baapdaada ke paas sabki janmapatri rehti hai। baap ke aage to kahenge aap hi saathi ho। jab paristhiti aati hai phir baap ko hi samjhaane lagte ki yeh to hoga hi, itna to chaahiye hi…। isko ekavrata kahenge? saathi hain to sab saathi hain, koi vishesh nahin। isko kehte hain - ekavrata। to vardaata ko aise bachche ati priy hai। aise bachchon ki har samay ki sarva jimmevaariyaan vardaata baap svayan apne oopar uthaate hain। aisi vardaani aatmaayen har samay, har paristhiti mein vardaanon ke praapti sampanna sthiti anubhav karti hain aur sada sahaj paar karti hain aur paas with honour banti hain। jab vardaata sarva jimmevaariyaan uthaane ke liye ever ready hai phir apne oopar jimmevaari ka bojh kyon uthaate ho? apni jimmevaari samajhte ho tab paristhiti mein paas with honour nahin bante lekin dhakke se paas hote ho। ‘kisi ke saath' ka dhakka chaahiye। agar battery full charge nahin hoti to kaar ko dhakke se chalaate hain na। to dhakka akela to nahin denge, saath chaahiye। isliye vardaani nambarvaar ban jaate hain। to vardaata ko ek shabd pyaara hai - ‘ekavrata'। ek bal ek bharosa। ek ka bharosa dooje ka bal - aisa nahin kaha jaata। ‘ek bal ek bharosa' hi gaaya hua hai। saath-saath ekmat, na manmat na parmat,ekras - na aur koi vyakti,na vaibhav ka ras। aise hi ekta,ekaantapriy। to ‘ek' shabd hi priy hua na। aise aur bhi nikaalna।

baap itna bhola hai jo ek mein hi raaji ho jaata hai। aise bholaanaath vardaata ko raaji karna kya mushkil lagta hai? sirf ‘ek' ka paath pakka karo। 5-7 mein jaane ki jaroorat nahin hai। vardaata ko raaji karne vaale amritvele se raat tak har dincharya ke karma mein vardaanon se hi palte hain, chalte hain aur udte hain। aise vardaani aatmaon ko kabhi koi mushkil chaahe man se, chaahe sambandh-samparka se anubhav nahin hogi। har sankalp mein, har second, har karma mein, har kadam mein ‘vardaata'aur ‘vardaan'sada sameep,sammukh saakaar roop mein anubhav hoga। woh aise anubhav karega jaise saakaar mein baat kar rahe hain। unko mehnat anubhav nahin hogi। aisi vardaani aatma ko yeh vishesh vardaan praapta hota hai, jo woh,niraakaar-aakaar ko jaise saakaar anubhav kar sakte hain! aise vardaaniyon ke aage hajoor sada haajar hai, suna?vardaata ko raaji karne ki vidhi aur siddhi - second mein kar sakte ho? sirf ek mein do nahin milaana,bas। phir sunaayenge - ek ke paath ka vistaar।

baapdaada ke paas sabhi bachchon ke charitra bhi hain to chaturaai bhi hai। result to saari baapdaada ke paas hai na। chaturaai ki baaten bhi bahut ikatthi hain। nai-nai baaten sunaate hain। sunte rehte hain। sirf baapdaada naam nahin lete hain isliye samajhte hain baap ko maaloom nahin padta। phir bhi chance dete rehte hain। baap samjhaate hain bachche real samajh se bhole hain। to aise bhole nahin bano। achha।

videsh ka bhi chakra laga kar bachche pahunch gaye hain। (jaanki daadi, doctor nirmala aur jagdeesh bhaai videsh ka chakra lagaakar aaye hain) achhi result hai। aur sada hi seva ki saphalta mein vriddhi honi hi hai। yu.N. ka bhi vishesh seva ke kaarya mein sambandh hai। naam unhon ka,kaam to aapka hi ho raha hai। aatmaon ko sahaj sandesh pahunch jaae - yeh kaam aapka ho raha hai। to vahaan ka bhi programme achha hua। Russia bhi raha hua tha, unko bhi aana hi tha। baapdaada ne to pahle hi saphalta ka yaadapyaar de diya tha। bhaarat ke embasdar ban kar gaye to bhaarat ka naam baala hua na! chakravarti ban chakra lagaane mein maja aata hai na! kitni duaayen jama karke aaye! nirmal-aashram(do0nirmala) bhi chakra hi lagaati rehti hai। vaise to sab seva mein lage hue hain lekin samay ke pramaan vishesh seva hoti to vishesh seva ki mubaarak dete hain। seva ke bina to rah nahin sakte ho। landan, America,aphreeka aur Australia - aap logon ne yeh 4 zone banaaye hain na। paanchavaan hai bhaarat। bhaarat vaalon ko pahle chance mila hai milne ka। jo karke aaye aur jo aage karenge - sab achha hai aur sada hi achha rahega। chaaron hi zone ke sabhi double videshi bachchon ko aaj vishesh yaadapyaar de rahe hain। Russia bhi eshiya mein aa jaata hai। seva ka respond achha mil raha hai। himmat bhi achhi hai to madad bhi mil rahi hai aur milti rahegi। bhaarat mein bhi abhi vishaal programme karne ka plan bana rahe hain। ek-ek ko, visheshta aur seva ki lagan mein magan rahne ki mubaarak aur yaadapyaar। achha।

sarva bachchon ko sada sahaj chalne ki siddhi ko praapta karne ki sahaj yukti jo sunaai,isi vidhi ko sada prayog mein laane vaale prayogi aur sahajyogi, sada vardaata ke vardaanon se sampanna vardaani bachchon ko, sada ‘ek'ka paath har kadam mein saakaar swaroop mein laane vaale, sada niraakaar aakaar baap ke saath ki anubhooti se sada saakaar swaroop mein laane vaale,aise sada vardaani bachchon ko baapdaada ka daata, bhaagyavidhaata aur vardaata ka yaadapyaar aur namaste।

mulaakaat daadi jaanki ji se:- jitna sabhi ko baap ka pyaar baantate hain utna hi aur pyaar ka bhandaar badhta jaata hai। jaise har samay pyaar ki barsaat ho rahi hai - aise hi anubhav hota hai na! ek kadam mein pyaar do aur baar-baar pyaar lo। sabko pyaar hi chaahiye। gyaan to sun liya hai na! to ek aise bachche hain jinko pyaar chaahiye aur doosre hain jinko shakti chaahiye। to kya seva ki?yahi seva ki na - kisko pyaar diya baap dvaara aur kisko shakti baap se dilaai। gyaan ke raajon ko to jaan gaye hain। abhi chaahiye unhon mein umang-utsaah sada bana rahe,woh neeche-oopar hota hai। phir bhi baapdaada double videshi bachchon ko aaphreen (shaabaash) dete hain - bhinna dharma mein chale to gaye na! bhinna desh, bhinna rasma - phir bhi chal rahe hain aur kai to vaaris bhi nikle hain। achha!

mahaaraashtra-poona group:- sabhi mahaan aatmaayen ban gaye na! pahle sirf apne ko mahaaraashtra nivaasi kahlaate the, abhi svayan mahaan ban gaye। baap ne harek bachche ko mahaan bana diya। vishwa mein aapse mahaan aur koi hai? sabse neeche bhaaratvaasi gire aur usmein bhi jo 84janma lene vaali brahman aatmaayen hain,woh neeche giri। to jitna neeche gire utna abhi ooncha uth gaye। isliye kehte hain brahman arthaat oonchi choti। jo oonchaai ka sthaan hota hai usko choti kaha jaata hai। pahaadon ki oonchaai ko bhi choti kehte hain। to yeh khushi hai ki kya-se-kya ban gaye! paandavon ko jyaada khushi hai ya shaktiyon ko? (shaktiyon ko) kyonki shaktiyon ko bahut neeche gira diya tha। dvaapar se lekar puroosh tan ne hi koi-na-koi pad praapta kiya। dharma mein bhi abhi-abhi females bhi mahaamandaleshvariyaan bani hain। nahin to mahaamandaleshvar hi gaaye jaate the। jab se baap ne maataaon ko aage kiya hai tab se unhonne2-4 mandaleshvariyaan rakh di hain। nahin to dharma ke kaarya mein maataaon ko kabhi bhi aasan nahin dete the। iseelie maataaon ko jyaada khushi hai aur paandavon ka bhi gaayan hai। paandavon ne jeet praapta kar li। naam paandavon ka aata hai lekin poojan jyaada shaktiyon ka hota hai। pahle gurooon ka kar chuke hain,abhi shaktiyon ka karte hain। jaagran ganesh va hanumaan ka nahin karte, shaktiyon ka karte hain। kyonki shaktiyaan abhi khud jag gai hain। to shaktiyaan apne shakti roop mein rehti hain na! ya kabhi-kabhi kamzor ban jaati hain?maataaon ko deh ke sambandh ka moh kamzor karta hai। thoda-thoda baal bachchon mein,potre-dhotron mein moh hota hai। aur paandavon ko kaun-si baat kamzor karti hai? paandavon mein ahankaar ke kaaran krodh jaldi aata hai। lekin ab to jeet ho gai na! ab to shant swaroop paandav ho gaye aur maataayen nirmohi ho gaeen। duniya kahe ki maataaon mein moh hota hai aur aap challenge karo ki ham maataayen nirmohi hain। aise hi paandav bhi shant swaroop,koi bhi aaye to yeh kamaal ke geet gaaye ki yeh sab itne shant swaroop ban gaye hain jo krodh ka ansh maatra bhi dikhaai nahin deta। nain-chain tak bhi nahin aave। kai aise kehte hain - krodh to nahin hai, thoda josh aata hai। to woh kya hua woh bhi krodh ka hi ansh hua na। to paandav vijayi hain arthaat bilkul sankalp mein bhi shant, bol aur karma mein bhi shaantasvaroop। maataayen saare vishwa ke aage apna nirmohi roop dikhaao। log to samajhte hain yeh asambhav hai aur aap kehte ho - sambhav bhi hai aur bahut sahaj bhi hai। lakshya rakho to lakshan zaroor aayenge। jaisi smriti vaisi sthiti ho jaayegi। dharni mein maat-pita ke pyaar ka paani pada hua hai,isliye phal sahaj nikal raha hai। achha hai। baapdaada seva aur sva-unnati - donon ko dekhkar khush hote hain sirf seva ko dekh kar ke nahin। jitni seva mein vriddhi utni sva-unnati mein bhi - donon -saath-saath hon। koi ichchha nahin, jab aape hi sab milta hai to ichchha kya rakhen। bina kahe, bina maange itna mil gaya hai jo maangane ki ichchha ki aavashyakta nahin। to aise santushta ho na! yahi title apna smriti mein rakhna ki santushta hain aur sarva ko santushta kar praapti swaroop banaane vaale hain। to ‘santushta rehna aur santushta karna' - yeh hai vishesh vardaan। asantushtata ka naam nishaan nahin। achha।

gujraat-poona group:- sabhi drishti dvaara shaktiyon ki praapti ki anubhooti karne ke anubhvi ho na! jaise vaani dvaara shakti ki anubhooti karte ho। murli sunte ho to samajhte ho na shakti mili। aise drishti dvaara shaktiyon ki praapti ke anubhooti ke abhyaasi bane ho ya vaani dvaara anubhav hota hai, drishti dvaara kam। drishti dvaara shakti catch kar sakte ho? kyonki catch karne ke anubhvi honge to doosron ko bhi apne divya drishti dvaara anubhav kara sakte hain। aur aage chal kar vaani dvaara sabko parichay dene ka samay bhi nahin hoga aur circumstance bhi nahin honge,to kya karenge?vardaani drishti dvaara, mahaadaani drishti dvaara mahaadaan denge,vardaan denge। to pahle jab svayan mein anubhav hoga tab doosron ko kara sakenge। drishti dvaara shanti ki shakti, prem ki shakti, sukh va aananda ki shakti sab praapta hoti hai। jad moortiyon ke aage bhi jaate hain to jad moorti bolti to nahin hai na! phir bhi bhakta aatmaon ko kuchh-na-kuchh praapti hoti hai, tab to jaate hain। kaise praapti hoti hai? unki divyata ke vibration se aur divya naynon ki drishti ko dekh kar vibration lete hain। koi bhi devta ya devi ki moorti mein vishesh attention naynon ke taraph dekhenge। harek ka attention soorat ki taraph jaata hai। kyonki mastak ke dvaara vibration milte hain, naynon ke dvaara divyata ki anubhooti hoti hai। woh aap chaitanya moortiyon ki jad moortiyaan hain। aap sabne chaitanya mein yeh seva ki hai tab jad moortiyaan bani hain। to drishti dvaara shakti lena aur drishti dvaara shakti dena - yeh practice karo। shanti ke shakti ki anubhooti bahut shreshtha hai। jaise vartamaan samay science ki shakti ka prabhaav hai, har ek anubhav karte hain। lekin science ki shakti silence ki shakti se hi nikli hai na! jab science ki shakti alpakaal ke liye praapti kara rahi hai to silence ki shakti kitni praapti karaayegi। padmaguna to itni shakti jama karo। baap ki divya drishti dvaara svayan mein shakti jama karo। tab samay par de sakenge। apne liye hi jama kiya aur kaarya mein laga diya arthaat kamaaya aur khaaya। jo kamaate hain aur kha ke khatma kar dete hain unka kabhi jama ka khaata nahin rehta aur jiske paas jama ka khaata nahin hota hai usko samay par dhokha milta hai। dhokha milega to duhkh ki praapti hogi। agar silence ki shakti jama nahin hogi, drishti ke mahattva ka anubhav nahin hoga to last samay shreshtha pad praapta karne mein dhokha kha lenge phir duhkh hoga। pashchaataap hoga na। isliye abhi se baap ki drishti dvaara praapta hui shaktiyon ko anubhav karte jama karte raho।

sabhi ko jama karna aata hai na! jama ho raha hai,uski nishaani kya hai? use nasha hoga! jaise saahookaar logon ki saahookaari ki nishaani ka pata unke nashe se padta hai। unke chalne mein, baithne mein, uthne mein nasha dikhaai deta hai। aur jitna nasha hoga utni khushi hogi। to aap bhi sada khush rehte ho na! ‘khushi' janma-siddha adhikaar hai। to yahi vardaan sada smriti mein rakhna ki ham sada jama ke nashe mein rahne vaale, sada khushi ki jhalak se auron ko bhi roohaani jhalak dikhaane vaale hain। kuchh bhi ho jaae - khushi ke vardaan ko khona nahin। samasya aayegi aur jaayegi lekin khushi nahin jaaye। kyonki khushi hamaari cheez hai, samasya paristhiti hai,doosre ke taraph se aai hui hai। apni cheez ko sada saath rakhte hain। paraai cheez to aayegi bhi jaayegi bhi। paristhiti maaya ki hai, apni nahin hai। to khushi ko khona nahin। chaahe yeh shareer bhi chala jaae lekin khushi nahin jaae। khushi se shareer bhi jaayega to badhiya milega,puraana jaayega to naya milega। darna nahin ki pata nahin kya banenge। achhe-se-achha banenge। achha!

gujraat group:- brahman jeevan mein last janma hone ke kaaran shareer se chaahe kitne bhi kamzor hain ya beemaar hain, chal sakte hain va nahin bhi chal sakte hain lekin man ki udaan ke liye pankh de diye hain, shareer se chal nahin sakte lekin man se ud to sakte hain na! kyonki baapdaada jaante hain ki 63 janma bhatakte-bhatakte kamzor ho gaye। shareer tamoguni ho gaye hain। to kamzor ho gaye, beemaar ho gaye। lekin man sabka duroosta hai। shareer mein tanduroosta nahin bhi ho lekin man mein to beemaar koi nahin hai na। man sabka pankhon se udne vaala hai। powerful man ki nishaani hai - second mein jahaan chaahe vahaan pahunch jaaen। aise powerful ho ya kabhi kamzor ho jaate ho। man ko jab udna aa gaya, practice ho gai to second mein jahaan chaahe vahaan pahunch sakta hai। abhi-abhi saakaar vatan mein,abhi-abhi paramdham mein ek second ki raphtaar hai। to aisi tej raphtaar hai?sada apne bhaagya ke geet gaate udte raho। sadaiv amritvele apne bhaagya ki koi-na-koi baat smriti mein rakho, anek prakaar ke bhaagya mile hain, anek prakaar ki praaptiyaan hui hain, kabhi kisi praapti ko saamne rakho, kabhi kisi praapti ko rakho to bahut ramneek purooshaartha rahega। kabhi purooshaartha mein apne ko bor nahin samjhenge, naveenta anubhav karenge। nahin to kai bachche kehte hain। bas,aatma hoon,shivbaaba ka bachcha hoon, yeh to sadaiv kehte hi rehte hain। lekin mujh aatma ko baap ne kya-kya bhaagya diya hai,kya-kya title diye hain, kya-kya khazaana diya hai,aise bhinna-bhinna smritiyaan rakho। list nikaalo। smritiyon ki kitni badi list hai! kabhi khazaanon ki smritiyaan rakho, kabhi shaktiyon ki smritiyaan rakho, kabhi gunon ki rakho,kabhi gyaan ki rakho, kabhi title rakho। variety mein sadaiv manoranjan ho jaata hai। kahaan bhi manoranjan ka programme hoga to variety dance hogi, variety khaana hoga, variety logon se milna hoga। tab to manoranjan hota hai na! to yeh bhi sada manoranjan mein rahne ke liye variety prakaar ki baaten socho। achha!