सोमवार 27 नवंबर 1989 की अव्यक्त मुरली

>

27-11-89 om shanti avyakt baapdaadaamdhuban

shubhbhaavna aur shubhkaamna ki sookshm seva

avyakt baapdaada apne bachchon prati bole

aaj vishwa-kalyaankaari baapdaada apne vishwa-kalyaankaari saathiyon ko dekh rahe hain। sabhi bachche baap ke vishwa-kalyaan ke kaarya mein nimitta bane hue saathi hain। sabhi ke man mein sada yahi ek sankalp hai ki vishwa ki pareshaan aatmaon ka kalyaan ho jaaye। chalte-phirte,koi bhi kaarya karte man mein yahi shubhbhaavna hai। bhakti-maarga mein bhi bhaavna hoti hai। lekin bhakta aatmaon ki vishesh alpakaal ke kalyaan prati bhaavna hoti hai। aap gyaani tu aatma bachchon ki gyaanayukta kalyaan ki bhaavna aatmaon ke prati sadaakaal aur sarvakalyaankaari bhaavna hai। aapki bhaavna vartamaan aur bhavishya ke liye hai ki har aatma anek janma sukhi ho jaae, praaptiyon se sampanna ho jaae। kyonki avinaashi baap dvaara aap aatmaon ko bhi avinaashi varsa mila hai। aapki bhaavna ka phal vishwa ki aatmaon ko parivartan kar raha hai aur aage chal prakriti sahit parivartan ho jaayega। aap aatmaon ki shreshtha bhaavna itna shreshtha phal praapta karaane vaali hai! isliye vishwa-kalyaankaari aatmaaen gaai jaati ho। itna apni shubhbhaavna ka mahattva jaante ho? apni shubhbhaavna ko saadhaaran reeti se kaarya mein lagaate chal rahe ho va mahattva jaankar chalte ho?duniya vaale bhi shubhbhaavna shabd kehte hain। lekin aapki shubhbhaavna sirf shubh nahin lekin shaktishaali bhi hai। kyonki aap sangamayugi shreshtha aatmaaen ho,sangamayug ka drama anusaar pratyaksha phal praapta hota hai। isliye aapki bhaavna ka pratyaksha phal aatmaon ko praapta hota hai। jo bhi aatmaaen aapke sambandh-samparka mein aati hain,woh usi samay hi shanti va sneh ke phal ki anubhooti karti hain।

shubhbhaavna,shubhkaamna ke bina ho nahin sakti। har aatma ke prati sadaiv raham ki kaamna rehti hai ki yeh aatma bhi varse ki adhikaari ban jaae। har aatma ke prati taras padta hai ki yeh hamaare hi eeshvareey parivaar ke hain, to isse vanchit kyon rahen?shubhkaamna rehti hai na! shubhkaamna aur shubhbhaavna - yeh seva ka foundation hai। koi bhi aatmaon ki seva karte ho,agar aapke andar shubhbhaavna, shubhkaamna aa nahin hai to aatmaon ko pratyaksha phal ki praapti nahin ho sakti। ek seva hoti hai neeti pramaan, reeti pramaan - jo suna hai woh sunaana hai। doosri seva hai apni shubhbhaavna,shubhkaamna dvaara। aapki shubhbhaavna baap mein bhi bhaavna bithaati hai aur baap dvaara phal ki praapti karaane ke nimitta ban jaati hai। ‘shubhbhaavna' - kahaan door baithi hui kisi aatma ko bhi phal ki praapti karaane ke nimitta ban sakti hai। jaise science ke saadhan door baithe aatmaon se sameep ka sambandh karaane ke nimitta ban jaate hain, aapki aavaaj pahunch jaati hai, aapka sandesh pahunch jaata hai, drishya pahunch jaata hai। to jab science ki shakti alpakaal ke liye sameepta ka phal de sakti hai to aapke silence ki shaktishaali shubhbhaavna door baithe bhi aatmaon ko phal nahin de sakegi?lekin iska aadhaar hai - apne andar itni shanti ki shakti jama ho! silence ki shakti yeh alaukik anubhav kara sakti hai। aage chal kar yeh pratyaksha pramaan anubhav karte rahenge।

shubhbhaavna arthaat shaktishaali sankalp। sab shaktiyon se sankalp ki gati teevra hai। jitne bhi science ne teevragti ke saadhan banaaye hain, un sabse teevragti sankalp ki hai। kisi aatma ke prati va behad vishwa ki aatmaon ke prati shubhbhaavna rakhte ho arthaat shaktishaali shubh aur shuddh sankalp karte ho ki is aatma ka kalyaan ho jaae। aapka sankalp va bhaavna utpanna hona aur us aatma ko anubhooti hogi ki mujh aatma ko koi vishesh sahayog se shanti va shakti mil rahi hai। jaise - abhi bhi kai bachche anubhav karte hain ki kai kaaryon mein meri himmat va yogyata itni nahin thi lekin baapdaada ki extra madad se yeh kaarya sahaj hi saphal ho gaya va yeh vighna samaapta ho gaya। aise master vishwa-kalyaankaari aatmaon ki sookshm seva pratyaksha roop mein anubhav karenge। samay bhi kam aur saadhan bhi kam, sampatti bhi kam lagegi। iske liye man aur buddhi sada free chaahiye। chhoti-chhoti baaton mein man aur buddhi ko busy rakhte ho,isliye seva ke sookshm gati ki line clear nahin rehti hai। saadhaaran baaton mein bhi apne man aur buddhi ki line ko ingej (vyasta) bahut rakhte ho, isliye yeh sookshm seva teevragti se nahin chal rahi hai। iske liye vishesh attention - ‘‘ekaanta aur ekaagrata'' |

ekaantapriy aatmaaen kitna bhi busy hote phir bhi beech-beech mein ek ghadi, do ghadi nikaal ekaanta ka anubhav kar sakti hai। ekaantapriy aatma aisi shaktishaali ban jaati hai jo apni sookshm shaktiyaan - man-buddhi ko jis samay chaahe,jahaan chaahe ekaagra kar sakti hai। chaahe baahar ki paristhiti halchal ki ho lekin ekaantapriy aatma ek ke ant mein second mein ekaagra ho jaayegi। jaise saagar ke oopar lahron ki kitni aavaaj hoti hai, kitni halchal hoti hai,lekin saagar ke ant mein halchal nahin hoti। to jab ek ke ant mein, gyaan-saagar ke ant mein chale jaayenge to halchal samaapta ho ekaagra ban jaayenge। suna,sookshm seva kya hai! ‘shubhbhaavna',‘shubhkaamna'shabd sabhi bolte rehte hain lekin iske mahattva ko jaan pratyaksha roop mein aane se anek aatmaon ko pratyakshaphal ki anubhooti karaane ke nimitta bano। achha!

teachers ka to kaam hi hai - ‘seva'। teachers ka mahattva hi seva hai। agar seva ka pratyaksha pramaan nahin dikhaai deta hai to unko yogya teacher ki list mein ginti nahin kiya jaata। teacher ki mahaanta seva hui na। to seva ka maheen roop sunaaya। mukh ki seva to karte rehte ho lekin mukh aur man ki shubhbhaavna ki seva saath-saath ho। bol aur bhaavna double kaam karenge। is sookshm seva ka abhyaas bahutkaal arthaat abhi se chaahiye। kyonki aage chalkar seva ki rooprekha badalni hi hai। phir us samay sookshm seva mein apne ko busy nahin kar sakenge, baahar ki paristhitiyaan buddhi ko aakarshit kar lengi। result kya hogi? yaad aur seva ka balance nahin rakh sakenge। isliye abhi se apne man-buddhi ke seva ki line ko check karo। teachers ko check karna aata hai na। teachers auron ko sikhaati hain,to zaroor svayan jaanti hain tab to sikhaati hain na। abhi yogya teachers ho na! yogya teacher ki visheshta yeh hai - jo nirantar chaahe mansa,chaahe vaacha,chaahe karmana seva mein sada busy rahe। to aur baaton se svatah hi khaali ho jaayenge। achha! kumaariyaan bhi aaeen hain।

kumaariyaan arthaat hovanhaar teachers। tab to kahenge brahmaakumaariyaan hain। agar hovanhaar sevaadhaari nahin to paai paise vaali kumaari hai। kumaariyaan kya karti hain?naukri ki tokri uthaati hain na paai paise ke peechhe। baapdaada ko hansi aati hai kumaariyon ke oopar - tokri ka bojh uthaane ke liye taiyaar ho jaati hain lekin bhagwan ke ghar mein arthaat seva-sthaanon mein rahne ki himmat nahin rakhti hain। aisi kamzor kumaariyaan to nahin ho na! chaahe padh bhi rahi hain, to bhi lakshya to pahle se rakha jaata hai ki naukri karni hai ya vishwa-seva karni hai। naukri karna arthaat apne ko paalna। baal-bachche to hain nahin, jisko paalna pade। naukri isliye karte hain ki aaraam se apne ko paalte rahen,chalte rahen,vishwa ki aatmaon ko baap ki paalna den - yeh lakshya rakho। jab anek aatmaon ke nimitta ban sakte hain,to sirf apni aatma ko paalna - uske aage kya hua?anekon ki duaayen lena - yeh kamaai kitni badi hai! us kamaai mein paanch hajaar, paanch laakh bhi ho jaae,lekin yeh anek aatmaon ki duaayen - yeh kitni badi kamaai hai! aur yeh saath jaayengi anek janmon ke liye। woh paanch laakh kahaan jaayenge? ya ghar mein ya bank mein rah jaayenge। lakshya sadaiv ooncha rakha jaata hai, saadhaaran nahin। sangamayug par is ek abhi ke janma mein itna golden chance milta hai - behad ki seva mein nimitta banne ka! satayug mein bhi offer nahin milegi। naukri ke liye bhi akhbaar dekhte rehte hain na ki koi offer mile। baap svayan seva ki offer kar rahe hain। to yogya right hand bano। saadhaaran brahmaakumaari bhi nahin banna। yogya sevaadhaari nahin bante to seva karne ke bajaay seva lete rehte hain। yogya sevaadhaari banna koi mushkil nahin। jab yogya sevaadhaari nahin bante ho tab darte ho - kaise hoga, chal sakenge va nahin। yogyata nahin hoti hai to dar lagta hai। jo yogya hota woh‘beparvaah baadshaah'hota hai। chaahe sthool yogyata, chaahe gyaan ki yogyata manushya ko vailyoobal banaati hai। yogyata nahin to value nahin rehti। seva ki yogyata sabse badi hai। aisi yogya aatma ko koi baat rok nahin sakti। yogya banna maana mera to ek baba। bas,aur koi baat nahin। suna kumaariyon ne! achha!

kumaar bhi bahut aaye hain। kumaar daud bahut lagaate hain। seva mein bhi achhe umang se daud lagaate rehte hain। lekin kumaaron ki visheshta aur mahaanta yahi hai ki aadi se ab tak nirvighna kumaar ho। agar kumaar nirvighna kumaar hain,to aise kumaar bahut mahaan gaaye jaate hain। kyonki duniya vaale bhi kumaariyon ke bajaay kumaaron ke liye samajhte hain ki kumaar yogya ban jaaen - yeh mushkil hai। lekin kumaar hi vishwa ko challenge karen ki aap to asambhav kehte ho lekin ham nirvighna kumaar hain। aise vishwa ko sample dikhaane vaale kumaar mahaan kumaar hain। baapdaada aise kumaaron ko sada hi dil se mubaarak dete hain। samjha! abhi-abhi bahut achhe hain, abhi-abhi koi vighna aaya to neeche-oopar ho gaye - aise nahin। kumaar arthaat na to samasya banna hai aur na samasya mein haar khaani hai। kumaar, kumaariyon se bhi number aage ja sakte hain lekin nirvighna kumaar hon। kyonki kumaaron ko bahut karke yahi vighna aata hai ki koi saathi nahin hai, koi saathi chaahiye,companion chaahiye। to kisi-na-kisi reeti se apni company bana lete hain। koi-koi kumaar to companion bhi bana lete hain aur koi company mein aate hain - baatcheet karna,baithna,phir companion banaane ka bhi sankalp aata hai। lekin aise bhi kumaar hain jo baap ke sivaae na company banaane vaale hain, na companion banaane vaale hain। sada baap ki company mein rahne vaale kumaar sada sukhi rehte hain। to aap log kaun-se kumaar ho? thodi-thodi company chaahiye?saara parivaar company hai?phir to theek lekin do-teen ya ek koi company chaahiye,woh wrong hai। to aap sabhi kaun ho?nirvighna ho na। naye kumaar bhi kamaal karke dikhaayenge। aakhir to vishwa ko apne aage,baap ke aage jhukaana to hai na! to yeh kumaaron ki kamaal vishwa ko jhukaayegi। vishwa aapke gun-gaayan karega ki kamaal hai kumaaron ki! kumaari majority phir bhi seva mein company mein rehti hain। lekin kumaaron ko thoda-sa company ka sankalp aata hai to paandav bhavan bana kar saphal rahen, aisa koi karke dikhaao। lekin aaj paandav bhavan banaao aur paandav ek east mein chala jaae, ek vesta mein chala jaae - aisa paandav bhavan nahin banaana।

baapdaada ko kumaaron ke oopar vishesh naaz hai ki akele rehte bhi purooshaartha mein chal rahe hain। kumaar aapas mein do-teen saathi bankar kyon nahin chalte! saathi sirf female hi nahin chaahiye, do kumaar bhi rah sakte hain। lekin ek-do ke nirvighna saathi hokar rahen। abhi woh jalva nahin dikhaaya hai। samay par ek-do ke sahayogi banen to kya nahin ho sakta hai? aur baaten aa jaati hain, isliye baapdaada paandav bhavan banaane ke liye mana kar deta hai। lekin sample koi karke dikhaaye। aisa nahin paandav bhavan bana kar phir jo nimitta daadi-deediyaan hain, unka time lete raho। nirvighna hon, ek-doosre se yogya kumaar hon phir dekho kitna achha naam hota hai। suna kumaaron ne?yogya kumaar bano, nirvighna kumaar bano। seva ke kshetra par khud samasya nahin bano lekin samasya ko mitaane vaale bano,phir dekho kumaaron ki bahut value hogi। kyonki kumaaron ke bina bhi seva nahin ho sakti hai। to kumaar kya karenge?sab bolo - ‘‘nirvighna kumaar bankar dikhaayenge।'' (kumaaron ne baapdaada ke saamne khade hokar vaayda kiya) abhi sabhi ka photo nikal gaya hai। aise nahin samajhna ki ham uthe to kisi ne dekha nahin। photo nikal gaya। achha hai - ‘‘himmate bachche madde baap' aur saara parivaar aapke saath hai। achha!

chaaron or ke sarva bachchon ko sada baapdaada apne sneh ke, sahayog ke chhatrachhaaya sahit dil se seva ki mubaarak de rahe hain। desh-videsh ke seva ke samaachaar milte rehte hain। har ek bachcha apne dil ka sachcha samaachaar bhi dete rehte hain। khaas videsh ke patra jyaada aate rehte hain। to seva ke samaachaar dene vaale bachchon ko mubaarak bhi aur saath mein sada sva-seva aur vishwa-seva mein ‘saphalta bhav' ka vardaan de rahe hain। sva-purooshaartha ke samaachaar dene vaalon ko baapdaada yahi vardaan de rahe hain ki jaise sachchi dil se baap ko raaji karte rehte ho,aise sada svayan ko bhi svayan ke sanskaaron se,sangathan se raazayukta arthaat raaji raho। ek-do ke sanskaaron ke raaz ko bhi jaanna,paristhitiyon ko jaanna - yahi raazayukta sthiti hai। baaki sachche dil se apna potaamel dena aur sneh ki rooh-roohaan ke patra likhna arthaat pichhla samaapta karna aur sneh ki rooh-roohaan sada sameepta ka anubhav karaati rahegi। yeh hai patron ka respond।

patra likhne mein videshi bahut hoshiyaar hain। jaldi-jaldi likhte hain। bhaaratvaasi bhi lambe-lambe patra bhejna nahin shuru karna। baapdaada ne kah diya hai do shabdon ka patra likho - ‘O.ke.' (bilkul theek hain)। service samaachaar hai to likho baaki ‘O.ke.'। ismen sab-kuchh aa jaata hai। yeh patra padhna bhi sahaj hai to likhna bhi sahaj hai। lekin agar‘O.ke.'nahin ho to phir ‘O.ke.'nahin likhna। jab O.ke. ho jaao tab likhna। post padhne mein bhi to time lagta hai na! koi bhi kaarya karo, sada short bhi ho aur sweet bhi ho। koi bhi padhe to usko khushi to ho। isliye raam kathaaen likhkar nahin bhejna। samjha! samaachaar dena bhi hai lekin samaachaar dena seekhna bhi hai। achha!

sarva shubhbhaavna aur shubhkaamna ki sookshm seva ke mahattva ko jaanne vaale mahaan aatmaon ko baapdaada ka yaadapyaar aur namaste।

udeesa-bhopaal group:- sada baap ke sneh mein sada samaaye hue rehte ho?jo samaaya hua hota hai usko koi sudh-budh nahin rehti। aap sabhi ko bhi sab-kuchh bhool gaya hai na! sneh mein samaaya hua sada hi baap ka pyaara aur duniya se nyaara rehta hai। sabhi log aapko kehte hain na ki aap to nyaare ban gaye! nyaara banna hi baap ka pyaara banna hai। saare vishwa ko baap pyaara kyon lagta hai? kyonki sabse nyaara hai। sabse nyaara ek hi hai, aur koi ho nahin sakta। to aap bhi kaun hain?nyaare aur pyaare। aapka yeh nyaara jeevan saare vishwa ko priy lagta he। isliye brahman jeevan ko alaukik jeevan kehte hain। alaukik ka arth kya hai?lok jaise nahin। alaukik arthaat lok jaisa jeevan nahin hai। aapki drishti, smriti,vritti sab badal gai। smriti va vritti mein kya rehta hai?tyaag vritti rehti hai! aatma bhaai-bhaai ki vritti va bhaai-behen ki vritti rehti hai। ham sab aapas mein ek parivaar ke hain - yeh vritti rehti hai। aur drishti se bhi aatma ko hi dekhte, shareer ko nahin। to sab badal gaya na! kabhi galti se shareer ko to nahin dekhte ho?agar aatma nahin hoti to shareer kuchh kar sakta hai? to pyaari cheez kaun-si hai? aatma hai। jab aatma nikal jaati hai to shareer ko rakhne ke liye bhi taiyaar nahin hote। to pyaari cheez aatma hai na! isliye vritti,drishti,smriti sab badal jaati hai। to yeh check karo ki sada alaukik jeevan mein hoon ya saadhaaran jeevan mein hoon?kyonki naya janma ho gaya! janma naya hai to sab-kuchh naya hai aur sabhi ko priy bhi naya lagta hai, na ki puraana। to nai jeevan mein nai baaten hain। puraana samaapta ho gaya। samaapta hua hai ya aadhe vahaan jinda ho,aadhe yahaan jinda ho? aadha shudra taraph, aadha brahman taraph - aise to nahin hai na? shreshtha jeevan ko bhool kar saadhaaran jeevan ko kaun yaad karega! koi ko raajaai mil jaae aur phir bhi gareebi ko yaad karta rahe, to use kya kahenge?bhaagyavaan kahenge?to svapna mein bhi puraana jeevan yaad nahin aaye। jab mar gaye to yaad kahaan se aayega! aadha to nahin mare ho? poora mar gaye hona! jo aadha mar jaata hai, poora nahin marta, to achha nahin lagta hai na! jab aisi badhiya jeevan mil gai to puraani jeevan yaad aa nahin sakti। to aise marjeeva bane ho ya aadha mare ho?achha!

sevaadhaariyon ne seva karte vartamaan aur bhavishya - donon bana liya। pratyakshaphal bhi mila। madhuban mein rahne ka bhaagya mila - yeh pratyakshaphal mila aur bhavishya bhi jama kar liya, to double praapti ho gai na! aise hi sada apne bhaagya ko oonche-te- ooncha banaate jaao। aise nahin - madhuban se gaye to bhaagya kam ho gaya! bhaagyavidhaata ke bachche hain, bhaagya badhta rahega। kuchh bhi ho jaae, maaya kitni bhi koshish kare lekin bhaagya nahin ganva sakte। vahaan jaakar aise patra nahin likhna ki ho gaya, kya karen…। sada anubhav ke patra likhna,aur kuchh nahin likhna। abhi to vishwa ki sarva aatmaon ko jagaana hai, shreshtha banaana hai to svayan kaise neeche rahenge! oonche rahenge tabhi auron ko bhi ooncha le jaayenge। sada jaise baap vaise bachche। samaan banna hai aur sameep rehna hai। achha!