गुरुवार 24 सितंबर 1992 की अव्यक्त मुरली

> 24-09-92 om shanti avyakt baapdaadaamdhuban

satya aur asatya ka vishesh antar

sneh mein samaayi hui sarva shreshtha aatmaon ko yathaartha satya ki pahchaan dete hue avyakt baapdaada bole -

aaj dilaaraam baap apne sarva bachchon ke dil ki aash poorn karne ke liye milan manaane aaye hain। avyakt roop mein to sada sarva bachche milan manaate rehte hain। phir bhi vyakta shareer dvaara avyakt milan manaane ki shubh aash rakhte hain। isliye baap ko bhi avyakt se vyakta mein aana padta hai। baapdaada is samay chaaron or desh-videsh ke bachchon ko dekh rahe hain-man se madhuban mein hain। aap saakaar mein ho aur anek bachche avyakt roop se milan mana rahe hain। baapdaada bhi sarva bachchon ke sneh ka return de rahe hain। jahaan bhi hain lekin yaad dvaara baap ke sameep dil mein hain। sabke sneh ke saaz baapdaada sun rahe hain। baap jaante hain ki bachchon ke liye sivaae baap ke aur koi yaad karne vaala hai nahin aur baap ko bhi sivaae bachchon ke aur koi hai nahin। sada isi smriti mein rehte hain ki main baba ka aur baba mera। yahi smriti sahaj bhi hai aur samartha banaane vaali hai। aisa smritisvaroop snehi bachcha saakaar mein to kya lekin svapna mein bhi kabhi asmartha ho nahin sakta। asmartha hona arthaat ‘mera baba’ke bajaae koi aur ‘meraapan’aata hai। ek mera baba-yeh hai milan manaana। agar ‘ek’ ke bajaae ‘do’mera hua to kya ho jaata?woh hai milna aur woh hai jhamela।

kai bachche samajhte hain-baba to mera hai hi lekin aur bhi ek-do ko mera kehna hi padta hai। kehte hain-aur koi nahin, sirf ek aadhaar chaahiye। lekin vaayda kya hai-ek baap doosra na koi ya ek baap ek aur? bhole ban jaate ho। us ek mein anek samaaye hue hote hain,isliye jhamela ho jaata hai। is puraani duniya mein bhi aise khilaune milte hain jo baahar se ek dikhaai deta hai lekin ek mein ek hota hai। ek kholte jaao to doosra niklega,doosra kholenge to teesra niklega। yeh bhi aisa hi khilauna hai। dikhaai ek deta lekin andar samaaye hue anek hain। aur jab jhamele mein chale gaye to milan manaana kaise ho sakta? jhamele mein hi lage rahenge ya milan manaayenge? sirf vo nahin socho। sivaae ek baap ke sankalp mein bhi agar koi aatma ko va prakriti ke saadhan ko mera sahaara sveekaar kiya to yeh automatic eeshvareey machinery bahut fast gati se kaarya karti hai। jis second anya ko sahaara banaaya, usi second man-buddhi ka baap se kinaara ho jaata hai। satya baap se kinaara hone ke kaaran buddhi asatya ko satya, wrong ko right maanne lagti hai, ulti judgement dene lagti hai। kitna bhi koi samjhaayega ki yeh right nahin hai, lekin woh yathaartha ko,satya ko bhi asatya ki shakti se samjhaane vaale ko wrong siddha karega। yeh sada yaad rakho ki aajkal drama anusaar asatya ka raajya hai aur asatya ke raajya-adhikaari president raavan hai। uske kitne sheesh hain arthaat asatya ki shakti kitni mahaan hai! uske mantri-mahaamantri bhi bade mahaan hain। uske judge aur vakeel bhi bade hoshiyaar hain। isliye ulti judgement ki points bahut variety aur baahar se madhur roop ki dete hain। isliye satya ko asatya siddha karne mein bahut hoshiyaar hote hain।

lekin asatya aur satya mein vishesh antar kya hai?asatya ki jeet alpakaal ki hoti hai kyonki asatya ka raajya hi alpa-kaal ka hai। satyata ki haar alpakaal ki aur jeet sadaakaal ki hai। asatya ke alpakaal ke vijayi us samay khush hote hain। jitna thoda samay khushi manaate va apne ko right siddha karte, to samay aane par asatya ke alpakaal ka samay samaapta hone par jitni asatyata ke vash mauj manaai, utna hi sau guna satyata ki vijay pratyaksha hone par pashchaataap karna hi padta hai। kyonki baap se kinaara,sthool mein kinaara nahin hota, sthool mein to svayan ko gyaani samajhte hain lekin man aur buddhi se kinaara hota। aur baap se kinaara hona arthaat sadaakaal ki sarva praaptiyon ke adhikaar se sampanna ke bajaae adhoora adhikaar praapta hona। kai bachche samajhte hain ki asatya ke bal se asatya ke raajya mein vijay ki khushi va mauj is samay to mana len,bhavishya kisne dekha। kaun dekhega-ham bhi bhool jaayenge,sab bhool jaayenge। lekin yeh asatya ki judgement hai। bhavishya vartamaan ki parchhaai hai। bina vartamaan ke bhavishya nahin banta। asatya ke vasheebhoot aatma vartamaan samay bhi alpakaal ke sukh ke naam,maan, shaan ke sukhon ke jhoole mein jhool sakti hai aur jhoolti bhi hai,lekin ateendriy avinaashi sukh ke jhoole mein nahin jhool sakti। alpakaal ke shaan, maan aur naam ki mauj mana sakte hain lekin sarva aatmaon ke dil ke sneh ka, dil ki duaaon ka maan nahin praapta kar sakte। dikhaava maatra maan pa sakte hain lekin dil se maan nahin pa sakte। alpakaal ka shaan milta hai lekin baap se sada diltakhtansheen ka shaan anubhav nahin kar sakte। asatya ke saathiyon dvaara naam praapta kar sakte hain lekin baapdaada ke dil par naam nahin praapta kar sakte kyonki baapdaada se kinaara hai। bhavishya ki baat to chhodo, woh to understood hai। lekin vartamaan satyata aur asatyata ki praapti mein kitna antar hai? ek doosra mera banaaya arthaat asatya ka sahaara liya। kitna jhamela hua! kahne mein to kahenge - aur kuchh nahin, sirf kabhi-kabhi thoda sahaara chaahiye। lekin vaayda todna arthaat jhamele mein padna। kya aisa vaayda kiya hai - ek mera baba aur kabhi-kabhi doosra?doosra bhi allow hai? yeh likha tha kya?chaahe alpakaal ke naam-maan-shaan ka sahaara lo,chaahe vyakti ka lo,chaahe vaibhav ka lo, jab doosra na koi to phir doosra kahaan se aaya?yeh asatya ke raajya ke jhamele mein phansaane ki chaturaaiyaan hain। jaise baap kehte hain na - main jo hoon,jaisa hoon,vaisa mujhe nambarvaar jaante hain। aise asatya ke raajya-adhikaari‘raavan’ko bhi jo hai,jaisa hai, vaise sada nahin jaante ho। kabhi bhool jaate ho,kabhi jaante ho। raajya-adhikaari hai to yeh taakat kam hogi! chaahe jhootha ho, chaahe sachcha ho lekin raajya to hai na। isliye apne ko check karo, doosre ko nahin।

aajkal doosron ko check karne mein sab hoshiyaar ho gaye hain। baapdaada kehte hain-apna checker bano aur doosre ka maker bano। lekin karte kya ho?doosre ka checker ban jaate ho aur baaten banaane mein maker ban jaate ho। baapdaada roz ki har ek bachche ki kaun si kahaaniyaan sunte hain? bahut bada kitaab hai kahaaniyon ka। to apne ko check karo। doosre ko check karne lagte ho to lambi kathaayen ban jaati hain aur apne ko check karenge to sab kathaayen samaapta ho ek satya jeevan ki katha practical mein chalegi। sabhi kehte hain-baba, aap se bahut pyaar hai! sirf kehte ho va karte bhi ho,kya kahenge?kabhi kehte ho,kabhi karte ho। baap ke pyaar ka pratyaksha saboot baap ne de diya। jo ho, jaise ho-mere ho। lekin abhi bachchon ko saboot dena hai। kya saboot dena hai? baap kehte hain-jo ho, jaise ho-mere ho। aur aap kya kahenge? jo hai woh sab aap ho। aise nahin-thoda-thoda aur bhi hai। baap se pyaar hai lekin kabhi-kabhi asatya ke raajya ke prabhaav mein aa jaate hain। achha!

chaaron or ke yathaartha satya ko parakhne vaale, sachche baap ke sachche bachchon ko, sarva sneh mein samaae hue shreshtha aatmaon ko,sarva sada vaayde ko nibhaane vaali samartha aatmaon ko, sarva yathaartha parakhne vaali shaktishaali aatmaon ko,sarva yaad aur seva mein nirvighna rahne vaale, sada saath aur sameep rahne vaale bachchon ko yaad, pyaar aur namaste।

daadiyon se mulaakaat

jitna jo seva ke nimitta banta hai utna hi dil ka hajaar guna sneh seva ke saath anubhav hota hai। isliye jimmevaari,jimmevaari nahin lagti, khel lagta hai। khel to naya hi dekhna achha hota hai। puraana khel kya dekhenge। jab vriksha ka vistaar hota hai tabhi saar (beej) pratyaksha dikhaai padta hai। vistaar saar ko pratyaksha karta hai। maja aata hai na। vishwa ke takhtansheen hone ke pahle seva ke takhtansheen banna hota hai। jo jitni seva ke takhtansheen banta hai utna hi vishwa ke takhtansheen banta hai। behad ki seva ka takhta mila hai na। achha mekaap kiya hai। achha hai madhuban mein rehna। ye sabhi madhuban mein rahne vaale hain। madhuban ki seat mili hai na। to madhuban hai seva ka takhta, behad ki seva ka takhta। achha group hai। achhi seva chal rahi hai na।

paryaavran abhiyaan prati sandesh

seva ka pratyakshaphal hai aatmaon ko anubhooti karaana, sandesh ke saath anubhooti karaana। yahi seva ka pratyakshaphal hai। sandesh dena to kab bhi (bhavishya mein bhi) jaan sakte hain lekin ‘anubhooti’ pratyakshaphal hai। iski aavashyakta hai jo sivaae aap logon ke koi kara nahin sakta। sunaane vaale anek hain,anubhav karaane vaale sirf aap ho। achha!

avyakt baapdaada ki personal mulaakaat

group nan.1

duhkh ki lahar se mukta hone ke liye karmayogi bankar karma karo

sabhi apne ko shreemat par chalne vaali shreshtha aatmaayen anubhav karte ho?naam hi hai shreemat। shri ka arth hai shreshtha। to shreshtha mat par chalne vaale shreshtha hue na। yeh roohaani nasha,behad ka nasha rehta hai na। ya kabhi-kabhi had ka nasha bhi aa jaata hai? isliye sada apne ko dekho-chalte-phirte koi bhi kaarya karte behad ka roohaani nasha rehta hai? chaahe karma majdoori ka bhi ho, saadhaaran karma karte apne shreshtha nashe ko bhoolte to nahin ho? ghar mein rahne vaali,ghar ki seva karne vaali saadhaaran maataayen hain-yeh yaad rehta hai ya jagat maata hoon,jagat ka kalyaan karne ke nimitta yeh kaarya kar rahi hoon-yeh yaad rehta hai? jise yeh roohaani nasha hoga uski nishaani kya hogi? woh khushi mein rahega, koi bhi karma karega lekin karma ke bandhan mein nahin aayega, nyaara aur pyaara hoga। karma ke bandhan mein aana arthaat karma mein phansana aur jo nyaara-pyaara hota hai woh karma karte bhi karma ke bandhan mein nahin aata,karmayogi ban karma karta hai। agar karma ke bandhan mein aayenge to khushi gaayab ho jaayegi। kyonki karma achha nahin hoga। lekin karmayogi bankar karma karne se duhkh ki lahar se mukta ho jaayenge। sada nyaara hone ke kaaran pyaare rahenge। to samjha, kaise rehna hai? karmabandhan mukta। karma ka bandhan kheenche nahin,maalik hokar karma karaayen। maalik nyaara hota hai na। maalik hokar karma karaana-ise kaha jaata hai bandhan-mukta। aisi aatma sada svayan bhi khush rahegi aur doosron ko bhi khushi degi। aise rehte ho?sunte to bahut ho, abhi ja suna hai woh karna hai। karenge to paayenge। abhi-abhi karna,abhi-abhi paana।

maataaon ko kabhi duhkh ki lahar aati hai?kabhi man se roti ho? man ka rona to sabko aa sakta hai। to shreemat hai-sada khush raho। shreemat yeh nahin hai ki kabhi-kabhi ro lo। bahutkaal man se va aankhon se roya,raavan ne roolaaya na। lekin abhi baap ke bane ho khushi mein naachne ke liye, rone ke liye nahin। rona khatma ho gaya। duhkh ki lahar-yeh bhi rona hai। yeh man ka rona ho gaya। sukhdaata ke bachche sada sukh mein jhoolte raho। duhkh ki lahar aa nahin sakti। bhool jaate ho tab aati hai। isliye abhool bano। abhi jo bhi kamjori ho use mahaayagya mein svaaha karke jaana। saath mein lekar nahin jaana, yahaan hi svaaha karke jaao। svaaha karna aata hai na। dridh sankalp karna arthaat svaaha karna। achha! sabhi ki aash poori hui। yeh bhi bhaagyavaan ho jo aise milte rehte ho। aage chalkar kya hota hai…। yeh bhi bhaagya jitna milta hai utna lete chalo। udte jaao। yahi yaad rakhna ki mahaan hain aur mahaan banaana hai।

group nan.2

sarva shaktiyon ko samay par kaarya mein lagaana arthaat master sarvashaktivaan banna

shaktiyon ka poojan dekhkar kya smriti mein rehta hai?apne ko check karte ho-jaise shaktiyon ko ashta bhujaadhaari dikhaate hain to ham bhi ashta shaktivaan, master sarvashaktivaan aatma hoon। ye ashta to nishaani maatra hain lekin hain to sarva shaktiyaan। shaktiyon ka naam sunte, shaktiyon ka poojan dekhte sarva shaktiyon ki smriti aati hai ya sirf dekhkar ke khush ho? jad chitron mein kitni kamaal bhar dete hain! to chaitanya ka hi jad banta hai na। to chaitanya mein ham kitne kamaal ke bane hain arthaat shreshtha bane hain! to yeh khushi hoti hai ki yeh hamaara yaadgaar hai! ya deviyon ka hai?deviyon ke saath ganesh ki bhi pooja hoti hai na। to practical mein aise bane hain tab to yaadgaar bana hai। sadaiv apne ko check karo ki sarva shaktiyaan anubhav hoti hain? baap ne to di lekin mainne kitni li, dhaaran ki aur dhaaran karne ke baad samay par vo shakti kaam mein aati hai? agar samay par koi cheej kaam mein nahin aaye to woh hona, na hona, ek hi baat hai। koi bhi cheez rakhte hi hain samay par kaam mein aane ke liye। agar samay par kaam mein nahin aai to kya kahenge? hai va nahin hai, ek hi baat hui na। to baap ne di lekin hamne kitni li-yeh check karo। jab practical mein kaam mein aaye tab kahenge master sarvashaktivaan। shakti kaam mein nahin aave aur kahen master sarvashaktivaan, yeh shobhta nahin hai। ek bhi shakti kam hogi to samay par dhokha de degi। koi bhi samay usi shakti ka paper aa jaaye to paas honge ya fail honge?agar nahin hogi to fail honge, hogi to paas honge। maaya bhi jaanti hai-iske paas is shakti ki kami hai। to vahi paper aata hai। isliye ek bhi shakti kam nahin honi chaahiye। samjha?aise nahin-shaktiyaan to aa gai, ek kam hui to kya harja hai। ek mein hi harja hai। ek hi fail kar degi। sooryavanshi mein aana hai to full paas hona padega na। full paas hone ka arth hi hai master sarvashaktivaan banna।

maataaon mein sahan shakti hai? ya thoda-thoda krodh aa jaata hai? paandavon ko krodh ya rob aata hai?sahan shakti ki kami hai tab hi aayega na। sarva shaktiyon mein sahan shakti bhi to shakti hai na। ek bhi shakti kam hui to full paas honge ya adhoore paas honge? isliye sarva shaktiyon ko check karo। percentage bhi kam na ho। aise nahin-thoda krodh aaya, jyaada nahin aaya। yadi thoda bhi aa gaya to usko fail kahenge aur aadat pad jaayegi thoda-thoda fail hone ki to full paas kaise honge? isliye ek bhi shakti ki kami na ho। aise albele nahin rehna ki ek thodi kam hai,badh jaayegi। bahut samay ki kami samay par dhokha de degi। isliye master sarvashaktivaan arthaat sarva shaktiyon se sampanna bano। sarva shaktiyon ko kaarya mein lagaate chalo aur udte chalo। samjha?

group nan.3

tere ko mere mein badalna hi brahman jeevan hai

sabhi apne ko “ek bal ek bharosa” aise anubhav karte ho?“ek baba doosra na koi” yeh pakka hai na। ya baba bhi hai to bachche bhi hain, sambandhi bhi hain? jab bachche hain, pati hai, saasu-sasur hain-itne saare hain to ek kaise hua? saamne hain, dekh rahe hain, seva kar rahe hain,phir ek kaise hua? ye mere nahin hain lekin baap ne seva ke liye diye hain-aisi drishti-vritti rakhne se ek hi yaad rahega। chaahe kitne bhi hon, kaun bhi hon, lekin sabhi baap ke bachche hain aur hamko seva ke liye ye aatmaayen mili hain। saasu nahin hai lekin seva ke liye aatma hai-aisi vritti rehti hai? bachchi ko bachchi nahin samajhte, meri kanya hai, meri kanya ka kalyaan karo-aise nahin kehte ho। baap ne seva arth nimitta banaaya hai। ghar mein nahin rahe hue ho lekin seva-sthaan par rahe hue ho। mera sab tera ho gaya। mera kuchh nahin, shareer bhi mera nahin। jab mera hai hi nahin to body-conscious kaise ho sakta hai। mere mein hi aakarshan hoti hai। jab mera samaapta ho jaata hai to man aur buddhi ko apni taraph kheench nahin sakte hain। brahman jeevan arthaat mere ko tere mein badalna। to baar-baar yeh check karo ki tera, mera to nahin ban gaya। agar meraapan nahin hoga, tera hi hai to double light honge। agar thoda bhi bojh anubhav karte ho to samjho-meraapan mix ho gaya hai। bhakti mein kehte hain ki sab-kuchh tera। brahman jeevan mein kehna nahin hai, karna hai। yeh karna sahaj hai na। bojh dena sahaj hota hai ya lena sahaj hota hai? tera kehna maana bojh dena aur mera kehna maana bojh lena। to abhi ek bal ek bharosa। bas, ek hi ek। ek likhna sahaj hai na। to yeh tera-tera kahne vaala group hai। achha!

group nan.4

poojya woh jiski aankh baap ke sivaae kahaan bhi na doobe

sada yeh nasha rehta hai ki ham kalpa-kalpa ki sarvashreshtha poojya aatmaayen bante hain?kitni baar aapki pooja hui hai? poojya aatma hoon-yeh poojyapan ki anubhooti kya hoti hai? nishaani kya hai? nasha hai, khushi hai-woh to theek hai। lekin kaunsa sanskaar aisa hai jisse samajhte ho-main hi poojya tha?jo poojya aatmaayen hain unki visheshta kya hai? kis visheshta ke aadhaar par koi poojya banta hai?laukik mein bhi dekho-kisko kehte hain ki yeh to poojya hai। poojya aatma ki nishaani hai-woh kabhi bhi kisi bhi vastu ke peechhe, vyakti ke peechhe jhukega nahin। sab uske aage jhukenge lekin woh jhukega nahin। namrata se jhukna-woh alag cheej hai। lekin jhukna arthaat prabhaavit hona। poojya ke aage sab jhukte hain, poojya nahin jhukta hai। to kisi bhi prakaar ke vyakti ya vaibhav ki aakarshan jhuka leve-yeh poojya ki nishaani nahin hai। to yeh check karo ki kabhi bhi, kisi bhi aakarshan mein man aur buddhi jhukti to nahin hai, prabhaavit to nahin hote ho? sivaae ek baap ke aur kahaan bhi man aur buddhi ka jhukaav nahin। poojya arthaat jhukaane vaala,na ki jhukne vaala।

jo kalpa-kalpa ka poojya hoga uski nishaani kya hogi?sivaae baap ke, aur kahaan bhi aankh nahin doobegi। yeh bahut achha hai, yeh bahut achhi cheej hai-nahin। poojya aatmaon ke aage svayan sab vyakti aur vaibhav jhukte hain। jo ishta dev hote hain,bhakta log svayan badhiya te badhiya achhi cheej ishta ke aage bhent chadhaayenge। ishta un cheejon par prabhaavit nahin hoga lekin vo cheejen svayan uske aage jhukengi। to poojya ki nishaani hai-ek baap ke sivaae kahaan bhi man-buddhi ka jhukaav nahin। regard aur cheej hai, pyaar aur cheej hai, namrata aur cheej hai lekin prabhaavit hona aur cheej hai। to poojya aatma the aur baar-baar banenge। yeh nishaani apne andar check karo। kabhi bhi kisi bhi sanskaar ke vash aatma vasheebhoot ho jaati hai to yeh bhi jhukna hua। maano koi brahman aatma, poojya aatma kahe ki aaj krodh ke vash ho gai, lobh ke vash ho gai,abhimaan ke vash ho gai-to yeh jhukna hua ya jhukaana hua?to poojya kabhi jhukta nahin। poojya ke aage sab aakarshit hokar svayan aate hain, poojya kisi ke peechhe aakarshit nahin hota। to yeh nishaani dekho। agar kabhi-kabhi jhukaav ho jaata hai to pooja bhi kabhi-kabhi hogi, sada nahin hogi। poojya mein bhi number hote hain। vaira-yati hoti hai na। koi poojya sada pooje jaate hain aur koi-koi ki kabhi pooja hoti hai, koi ki vidhipoorvak hoti hai aur koi ki kaam-chalaau pooja hoti hai। mandiron mein bhi pharka hota hai na। to yahaan bhi aise hai। jo vidhipoorvak shreemat ko apnaate nahin,kaam-chalaau,chalo amritvele uthna hai, baithna hai, koi dekhe nahin, koi kahe nahin ki yeh utha nahin, phir chaahe baap se milan manaaye ya nidra se milan manaaye। yeh kaam-chalaau ho gaya na। amritvele utha,baitha lekin vidhipoorvak nahin। to moorti ko bhi bitha dete hain lekin pooja vidhipoorvak nahin hoti hai। lagaav tab hota hai jab jhukaav hota hai। bina lagaav ke jhukaav nahin hota। aaj ke bhakton ka bhi chaahe alpakaal ki praapti ki taraph lagaav ho, tabhi jhukaav hota hai। aajkal poojya ki taraph lagaav nahin hai,alpakaal ki praapti ke taraph lagaav hai। lekin praapti karaane vaali poojya aatmaayen hain,isliye jhukte unki taraph hi hain। to samjha, poojya ki nishaani kya hai? kalpa-kalpa ki shreshtha poojya aatmaayen sada svayan ko sampanna anubhav karengi। jo sampanna hota hai uski aankh kismen bhi nahin jaati। poojya aatma sampanna hone ke kaaran sada hi apne roohaani nashe mein rahegi। unke man-buddhi ka jhukaav kahaan bhi nahin hoga- na deh ke sambandh mein, na deh ke padaartha mein। sabse nyaara aur sabse pyaara। brahman jeevan ka maja jeevanmukta sthiti mein hai। nyaara arthaat mukta। sanskaar ke oopar bhi jhukaav nahin। jab kehte ho kya karoon,kaise karoon-to us samay jeevanmukta hue ya jeevan-bandha?karna nahin chaahte the lekin ho gaya-yeh hai jeevan-bandha banna। ichchha nahin thi lekin achha lag gaya,shiksha deni thi lekin krodh aa gaya-yeh hai jeevan-bandha sthiti। brahman arthaat jeevanmukta। kabhi bhi kisi bandhan mein bandh nahin sakte। achha!

group nan.5

sangathan mein rehte bhi nyaara aur pyaara rehna hi follow father karna hai

yeh variety group hai। sabse achhe te achha group kisko kaha jaayega, uski visheshta kya hogi? sabse achha group woh hai jo group mein rehte hue bhi nirvighna rahe, santushta rahe। koi akela nirvighna rehta hai, yeh koi badi baat nahin। lekin bade sangathan mein bhi ho aur nirvighna bhi ho। to aap sabhi sangathan mein rehte nirvighna rehte ho? kitna bhi hangaama ho lekin svayan achal ho-aise group ke ho? jaise baap akela to nahin hai na,parivaar vaala hai। sabse bade te bada parivaar baap ka hai aur jitna bada parivaar utna hi nyaara aur sarva ka pyaara hai। jitni seva utna nyaara। to follow father karne vaale ho na। iseeliye aap sabka yaadgaar yahaan achalghar bana hua hai। kitna bhi koi hilaave,hilenge nahin। ek taraph ek disturb kare, doosri taraph doosra disturb kare-to kya karenge? koi salvation nahin mile, phir halchal hogi? koi insult kar de, phir halchal hogi? achal arthaat chaaron or kitna bhi koi hilaane ki koshish kare lekin sankalp mein bhi achal।

dekho,achhe ho tab to baapdaada ne pasanda karke apna banaaya hai। achhe hain aur sada achhe rahenge। achha-achha samajhne se achhe ho hi jaate hain। baapdaada harek bachche mein visheshta hi dekhte hain। visheshta dekhte, varnan karte-karte vishesh ban hi jaayenge। kal the, aaj hain aur kal phir banenge। ‘aaj’aur ‘kal’mein saara drama aa gaya। jitna-jitna sampoorn bante jaayenge to yeh smriti spashta hoti jaayegi। jitni smriti spashta hoti hai utna natural nasha rehta hai। achha! chaaron or ke double videshi bachchon ko double nashe mein rahne ki mubaarak! ek yaad ka nasha,ek seva ka nasha-double nasha hai na। achha hai, himmat bachchon ki, madad baap ki। ostreliya ke bachche bhi jo chaahe vo kar sakte hain। sirf kabhi gupta ho jaate hain, kabhi pratyaksha ho jaate hain। lekin himmat aur madad ke bhi paatra hain। achha, sabhi ko yaad।

group nan.6

har brahman brahma baap ka darpan bane-yahi hai baap ki shreshtha aash

madhuban nivaasiyon ko kitne pratyakshaphal milte hain?madhuban ki visheshta kya hai jo aur kahaan nahin milti?shreshtha karmabhoomi par rahne vaale sada follow father karte hain। madhuban ki shreshthata to yeh hai ki brahma baap ki vishesh karmabhoomi hai। to madhuban nivaasi jo bhi karma karte hain vo follow father karte hain। karmabhoomi mein visheshta karma ki hai। to karma mein follow hai? jo bhi amritvele se lekar raat tak karma karte ho usmein follow father hai? madhuban nivaasiyon ko aur extra karmabhoomi ki yaad ka bal hai। woh karma mein dikhaai deta hai va dena hai,kya kahenge?aap apne mein dekhte ho? ek-ek kadam saamne laao-uthna-baithna,chalna, bolna,sambandh-samparka mein aana-sabmen brahma baap ke karma ko follow hai? karmabhoomi ka phaayda to yahi hai na। to itna laabh le rahe ho? shaktiyaan kya samajhti hain? karmabhoomi ka laabh jitna madhuban le sakta hai, utna auron ko lene aana padta hai aur aapko mila hua hai। vardaan-bhoomi hai,karmabhoomi hai। to har karma vardaan yogya hai jo koi bhi dekhe to mukh se vardaan nikle?isko kahenge vardaan-bhoomi ka vardaan lena। chaahe saadhaaran karma kar rahe hon lekin saadhaaran karma mein visheshta dikhaai de। yahi madhuban ki visheshta hai na। ismen certificate lena hai। aaj income-tax ka certificate mila hai na। to madhuban vaalon ne kaunsa certificate liya hai? lene vaale adhikaari to ho hi। vishesh brahma baap ki apne karmabhoomi mein rahne vaalon ke prati yeh vishesh shreshtha aash hai ki madhuban ka ek-ek brahman aatma, shreshtha aatma har karma mein brahma baap ke karma ka darpan ho। to darpan mein kya dikhaai deta hai? yahi dikhaai deta hai na। agar aap darpan mein khade honge to hu-ba-hu aap hi dikhaai denge ya doosra? to brahma baap ke karma aapke karma ke darpan mein dikhaai den। bhaagyavaan ho-yeh to sada sabhi kehte bhi hain aur hain bhi। lekin har karma mein brahma baap ke karma dikhaai den। yeh certificate kaun lega aur kab lenge? lena to hai na। ya le liya hai?jisne yeh certificate le liya hai ki har karma mein brahma baap ke karma dikhaai de rahe hain,unka bol,brahma ka bol samaan, uthna-baithna,dekhna,chalna-sab samaan। aisa certificate liya hai? jisko lena hai vo haath uthaao। yeh bhi achha hai। kahne se pahle karke dikhaayenge। lekin yeh lakshya rakho ki har karma baap samaan ho। brahma baap ko follow karna to sahaj hai na। niraakaari banna arthaat sada niraakaari sthiti mein sthit hona। uske bajaay karma mein follow karna usse sahaj hai। to brahma baap to sahaj kaam de raha hai, mushkil nahin। to sabhi lakshya rakho ki madhuban mein jahaan dekhen,jisko dekhen-brahma baap ke karma dikhaai den। karma mein sarvavyaapi brahma kar sakte ho। jahaan dekhen brahma samaan! ho sakta hai na।

madhuban ki mahima arthaat madhuban nivaasiyon ki mahima। madhuban ki deevaaron ki mahima nahin hai,madhuban nivaasiyon ki mahima hai। madhuban ki mahima chaaron or se roj sunte ho na। madhuban nivaasiyon ki mahima jo hoti hai woh kiski hai? aap sabki hai na। nasha to rehta hai ki ham madhuban nivaasi hain। jaise yeh nasha hai vaise yeh nasha bhi pratyaksha dikhaai de ki yeh brahma baap ke samaan follow father karne vaale hain। achha! sabhi santushta ho? kuchh salvation chaahiye? salvation ki bhoomi mein baithe ho। kitne bephikra baithe ho! shareer ki mehnat karte ho,aur to sab bana banaaya milta hai। jo shareer ki mehnat nahin karte hain unko exercise ki mehnat karaate hain। aap to lucky ho na jo exercise nahin karna pade। haath-paanv chalte rehte hain। jitna jo hard work (kathin parishram) karta hai utna woh safe hai-maaya se bhi aur shareer ki vyaadhiyon se bhi। buddhi to busy rehti hai na। aur phaaltu to kuchh nahin chalega। to jo sada busy rehte hain ve bahut lucky hain। isliye apne ko free nahin karna। chalo,bahut samay kar liya, ab free ho jaayen। busy rehna khushanseeb ki nishaani hai। khushanseeb ho na। apne ko sada busy rakhna। achha! madhuban nivaasiyon ko pahla chance mila hai। yeh bhi lakka hai। abhi baapdaada ko karke dikhaana। samjha?