शनिवार 21 नवंबर 1992 की अव्यक्त मुरली

>

21-11-92 om shanti avyakt baapdaadaamdhuban

karmon ki guhya gati ke gyaata bano

bephikra baadshaah banaane vaale baapdaada apne prasannachitta bachchon prati bole -

aaj sarva khazaanon ke dene vaale baap sarva bachchon ke jama ka khaata dekh rahe the। khazaane to sarva bachchon ko akhut mile hain aur sarva ko ek jaisa, ek dvaara sarva khazaane mile hain। ek khazaana nahin lekin anek khazaane praapta hue hain। phir bhi jama ka khaata har ek ka alag-alag hai। koi ne sarva khazaane achhi reeti jama kiye hain aur kaiyon ne yatha shakti jama kiya hai। aur jitna hi jama kiya hai utna hi chalan aur chehre mein woh roohaani nasha dikhaai deta hai,jama karne ka roohaani phakhur anubhav hota hai। roohaani phakhur ki pahli nishaani yahi hai ki jitna phakhur hai utna bephikra baadshaah ki jhalak unke har karma mein dikhaai deti hai। kyonki jahaan roohaani phakhur hai vahaan koi phikra nahin rah sakta। yeh phakhur aur phikra-donon ek samay, ek saath nahin rah sakte hain। jaise roshni aur andhakaar saath nahin rah sakte hain।

bephikra baadshaah ki visheshta-woh sada prashnachitta ke bajaae prasannachitta rehte hain। har karma mein-sva ke sambandh mein va sarva ke sambandh mein va prakriti ke bhi sambandh mein kisi bhi samay, kisi bhi baat mein sankalp-maatra bhi question mark nahin hoga ki ‘yeh aisa kyon’ va ‘yeh kya ho raha hai’, ‘aisa bhi hota hai kya’?prasannachitta aatma ke sankalp mein har karma ko karte,dekhte,sunte,sochte yahi rehta hai ki jo ho raha hai woh mere liye achha hai aur sada achha hi hona hai। prashnachitta aatma ‘kya’, ‘kyon’, ‘aisa’, ‘vaisa’-is uljhan mein svayan ko bephikra se phikra mein le aati hai। aur bephikra aatma buraai ko bhi achchhaai mein parivartan kar leti, isliye woh sada prasanna rehti।

aajkal ke science ke saadhan se bhi jo vesta-kharaab maal hota hai, usko parivartan kar achhi cheej bana dete hain। to prasannachitta aatma silence ki shakti se-chaahe baat buri ho,sambandh bure anubhav hote hon, lekin woh buraai ko achchhaai mein parivartan kar svayan mein bhi dhaaran karegi aur doosre ko bhi apni shubh bhaavna ke shreshtha sankalp se buraai ko badal achchhaai dhaaran karne ki shakti degi। kai bachche sochte hain, kehte hain ki-’’jab hai hi buri va galat baat, to galat ko galat to kehna hi padega na! va galat ko galat to samajhna hi padega na!’’lekin galat ko galat samajhna-yeh samajhne ke hisaab se samjha। woh right aur wrong-samajhna,jaanna alag baat hai lekin knowledgeful roop se jaanne vaale samajhne ke baad svayan mein kisi bhi aatma ki buraai ko buraai ke roop mein apni buddhi mein dhaaran nahin karenge। to samajhna alag cheej hai, samajhne tak right hai। lekin svayan mein va apni chitta par, apni buddhi mein,apni vritti mein, apni vaani mein doosre ki buraai ko buraai ke roop mein dhaaran nahin karna hai, samaana nahin hai। to samajhna aur dhaaran karna-ismen antar hai।

apne ko bachaane ke liye yeh kah dete hain ki yeh hai hi wrong, wrong ko to wrong kehna padega na। lekin samajhdaar ka kaam kya hota hai?samajhdaar agar samajhta hai ki yeh buri cheej hai, to kya buri samajhte hue apne paas jama karega? apne paas achhi reeti sambhaal kar rakhega? chhod dega na। ya jama karna hi samajhdaari hai?yeh samajhdaari hai? aur socho, agar buri baat va buri chalan ko svayan mein dhaaran kar liya,to kya aapki buddhi,vritti,vaani sada sampoorn svachchha maani jaayegi? agar jara bhi koi defect va daag rah jaata hai, kichda rah jaata hai-to defect vaala kabhi perfect nahin kahla sakta, prasannachitta nahin rah sakta। agar koi ki buraai chitta par hai, to uska chitta sada prasannachitta nahin rah sakta aur chitta par dhaaran ki hui baaten vaani mein zaroor aayengi-chaahe ek ke aage varnan kare, chaahe anek ke aage varnan kare।

lekin karmon ki gati ka guhya rahasya sada saamne rakho। agar kisi ki bhi buraai va galat baat chitta ke saath varnan karte ho-yeh vyartha varnan aisa hi hai jaise koi gumbaz mein aavaaz karta hai to woh apna hi aavaaz aur hi bade roop mein badal apne paas hi aata hai। gumbaz mein aavaaj karke dekha hai? to agar kisi ki buraai karne ke,galat ko galat phailaane ke sanskaar hain,jisko aap log aadat kehte ho, to aaj aap kiski glaani karte ho aur apne ko bada samajhdaar,galti se door samajhkar varnan karte ho, lekin yeh pakka niyam hai athva karmon ki philosophy hai ki aaj aapne kiski glaani ki aur kal aapki koi duguni glaani karega। kyonki yeh galat baaten itni fast gati se phailti hain jaise koi vishesh beemaari ke germs (jeevaanu) bahut jaldi phailte hain aur phailte hue germs jiski glaani ki vahaan tak pahunchte zaroor hain। aapne ek glaani ki hogi aur woh aapko galat siddha karne ke liye aapki das glaani karenge। to result kya hui? karmon ki gati kya hui? laut kar kahaan aai?agar aapko shubh bhaavna hai us aatma ko theek karne ki,to galat baat shubh bhaavna ke swaroop mein vishesh nimitta sthaan par de sakte ho, phailaana wrong hai। kai kehte hain-hamne kisko kaha nahin,lekin vo kah rahe the to mainne bhi haan mein haan kar diya, bola nahin। aapke bhakti-maarga ke shaastron mein bhi varnan hai ki bura kaam kiya nahin lekin dekha bhi,saath bhi diya to woh paap hai। ‘haan’ mein ‘haan’milaana-yeh bhi karmon ki gati ke pramaan paap mein bhaagi banna hai।

vartamaan samay karmon ki gati ke gyaan mein bahut easy ho gaye hain। lekin yeh chhote-chhote sookshm paap shreshtha sampoorn sthiti mein vighna roop bante hain। easy banne ki nishaaniyaan kya hain?woh sada aisa hi sochte-samajhte ki yeh to aur bhi karte hain, yeh to aajkal chalta hi hai। ya to apne aapko halka karne ke liye yahi kahenge ki-mainne hansi mein kaha, mera bhaav nahin tha,aise hi bol diya। yeh vidhi sampoorn siddhi ko praapta hone mein sookshm vighna ban jaata hai। isliye gyaan to bahut mil gaya hai,rachta aur rachna ke gyaan ko sunna, varnan karna bahut spashta ho gaya hai। lekin karmon ki guhya gati ka gyaan buddhi mein sada spashta nahin rehta, isliye easy ho jaate hain। kai bachchon ki roohrihaan karte apne prati bhi complain hoti hai ki jaise baap kehte hain, baap bachchon mein jo shreshtha aashaae rakhte hain, jo chaahte hain, jitna chaahte hain-utna nahin hai। iska kaaran kya hai? ye ati sookshm vyartha karma buddhi ko, man ko ooncha anubhav karne nahin dete। yog lagaane baithte hain lekin kaaphi samay yuddha mein chala jaata, vyartha ko mitaae samartha banne mein samay chala jaata hai। isliye kya karna chaahiye?jitna ooncha bante hain, to oonchaai mein attention bhi ooncha rakhna padta hai।

brahman jeevan ki mauj mein rehna hai। mauj mein rahne ka arth yeh nahin ki jo aaya woh kiya,masta raha। yeh alpakaal ke mukh ki mauj va alpakaal ke sambandh-samparka ki mauj sadaakaal ki prasannachitta sthiti se bhinna hai। isi ko mauj nahin samajhna। jo aaya woh bola, jo aaya woh kiya-ham to mauj mein rehte hain। alpakaal ke manmauji nahin bano। sadaakaal ki roohaani mauj mein raho। yahi yathaartha brahman jeevan hai। mauj mein bhi raho aur karmon ki gati ke gyaata bhi raho। tab hi jo chaahte ho, jaise chaahte ho vaise anubhav karte rahenge। samjha?karmon ki guhya gati ke gyaata bano। phir khazaanon ke jama ki result sunaayenge। achha!

chaaron or ke phikra se phaarig bephikra baadshaah aatmaon ko, sada prasannachitta vishesh aatmaon ko,sada svayan prati aur sarva aatmaon prati shreshtha parivartan shakti ko karma mein laane vaale karmayogi aatmaon ko,sada rachta-rachna ke gyaata aur karma-philosophi ke bhi gyaata-aise gyaan-swaroop aatmaon ko baapdaada ka yaad, pyaar aur namaste।

daadiyon ke saath mulaakaat

vartamaan samay kis baat ki aavashyakta hai? karmon ki guhya gati ka gyaan merge ho gaya hai, isliye albelaapan hai। purushaarthi bhi hain lekin purooshaartha mein albelaapan aa jaata hai। isliye abhi iski aavashyakta hai। baapdaada sabhi ki result ko dekhte hain। jo chal raha hai vo achha hai। lekin abhi achhe te achha banna hi hai। busy rehna padta hai na। jyaada samay busy kismen rehna padta hai?kis baat mein jyaada samay dena padta hai?chaahe aap logon ki apni sthiti nyaari aur pyaari hai, lekin samay to dena padta hai। to yahi samay powerful-shaktishaali light-house, might-house vibrations phailaane mein jaaye to kya ho jaayega? sangathit roop mein yahi vaataavran ho,aur koi baat hi nahin ho-to kya vibration vishwa mein ya prakriti tak pahunchega?abhi to sabhi log intajaar kar rahe hain ki kab hamaare rachta va master rachta sampanna ya sampoorn ban ham logon se apni svaagat karaate। prakriti bhi to svaagat karegi na। to woh saphalta ki maala se svaagat kare-vo din aana hi hai। jab saphalta ke baaje bajenge tab pratyakshata ke baaje bajenge। bajne to hain hi na। achha!

daadi chandramni ji seva par jaane ki chhutti le rahi hain

all-round banna hi shreshtha seva hai। achha hai,chakkar lagaate raho। chakkar lagaane ka part bachchon ka hi hai। baap to avyakt roop mein laga sakte hain। saakaar roop mein bhi chakkar lagaane ka part baap ka nahin raha, bachchon ka hi tha। achha!

avyakt baapdaada ki personal mulaakaat

group nan.1

vijayi maala mein aane ke liye teevra purushaarthi bano

sada teevra purushaarthi aatmaae hain-aise anubhav karte ho? jab brahman bane to purushaarthi to hain hi। teevra purushaarthi hain va sirf purushaarthi hain? sunne aur sunaane vaale ko purushaarthi kahenge ya teevra purushaarthi kahenge? sunna aur sunaana, uske baad kya hota hai?teevra purushaarthi kisko kahenge-sunne vaale ko ya banne vaale ko?jo maala ka16108vaan number hai woh bhi sunta aur sunaata to hai hi। nahin to maala mein kaise aayega। lekin108 ki maala mein kaun aayenge? 108 ki maala ka naam hai vijayi maala। 16000vaali maala ka naam vijayi maala nahin hai। to sunna aur sunaana-yeh majority karte hain। lekin suna aur bana-isko kaha jaata hai teevra purushaarthi। teevra purushaarthi 108 hain aur purushaarthi 16108 hain। to apne aapko check karo ki teevra purushaarthi hain ya purushaarthi hain? jo hain, jaisa hain-woh majority apne aapko jaan sakte hain। koi thode aise hain jo apne ko nahin bhi jaante hain, wrong ko right samajhkar bhi chal jaate hain। majority apne man mein apne aapko satya jaante hain ki-main kaun hoon? isliye sada apne ko dekho,doosre ko nahin।

apne purooshaartha ko check karo aur teevra purooshaartha mein change karo। nahin to final samay aane par change nahin kar sakenge। us samay padhaai ka samay samaapta hone par, imtahaan ke samay padhaai ka chance nahin milta। agar koi student samjhe-ek prashn ka uttar nahin aata hai, kitaab se padhkar uttar de den-to right hoga ya wrong hoga? to us samay apne ko change nahin kar sakenge। jo hai,jaisa hai,vaise hi praalabdha praapta kar lenge। lekin abhi chance hai। abhi tu let (Too Late) ka board nahin laga hai, let ka laga hai। let ho gaye lekin tu let nahin। isliye phir bhi margin hai। kai student6 maas mein bhi paas with honour ho jaate hain agar sahi purooshaartha karte hain to। lekin samay samaapta hone ke baad kuchh nahin kar sakte। baap bhi raham karna chaahe to bhi nahin kar sakte। chalo, yeh achha hai,isko marks de do-yeh baap kar sakta hai? isliye abhi se check karo aur change karo। albelaapan chhod do। theek hain,chal rahe hain,pahunch jaayenge-yeh albelaapan hai। albele ko is samay to mauj lagti hai। jo al-bela hota hai use koi phikra nahin hota hai, woh aaraam ko hi sab-kuchh samajhta hai। to albelaapan nahin rakhna। sada alert! paandav sena ho na। sena albeli rehti hai ya alert rehti hai? sena maana alert,saavdhaan, khabardaar rahne vaale। albela rahne vaale ko sena ka sainik nahin kaha jaayega। to albelaapan nahin, attention! lekin attention bhi natural vidhi ban jaaye। kai ate-nshan ka bhi tension rakhte hain। tension ki life sada to nahin chal sakti। tension ki life thoda samay chalegi, natural nahin chalegi। to attention rakhna hai lekin‘natural attention’ aadat ban jaaye। jaise vismriti ki aadat ban gai thi na। nahin chaahte bhi ho jaata hai। to yeh aadat ban gai na, natural ho gai na। aise smritisvaroop rahne ki aadat ho jaaye, attention ki aadat ho jaaye। isliye kaha jaata hai aadat se manushyaatma majboor ho jaati hai। na chaahte bhi ho jaata hai-isko kehte hain majboor। to aise teevra puru-shaartha bane ho? teevra purushaarthi arthaat vijayi। tabhi maala mein aa sakte hain।

bahutkaal ka abhyaas chaahiye। sadaiv alert maana sada ever ready! aapko kya nishchay hai-vinaash ke samay tak rahenge ya pahle bhi ja sakte hain?pahle bhi ja sakte hain na। isliye ever ready। vinaash aapka intajaar kare,aap vinaash ka intajaar nahin karo। woh rachna hai, aap rachta ho। sada ever ready। kya samjha? attention rakhna। jo bhi kami mahsoos ho use bahut jaldi se jaldi samaapta karo। sampanna banna arthaat kamjori ko khatma karna। aise nahin-yahaan aaye to yahaan ke, vahaan gaye to vahaan ke। sabhi teevra purushaarthi bankar jaana। achha!

group nan.2

sada safe rahne ka sthaan-dilaaraam baap ka diltakhta

sadaiv apne ko dilaaraam baap ki dil mein rahne vaale anubhav karte ho?dilaaraam ki dil takhta hai na। to diltakhtansheen aatmaae hain-aise apne ko samajhte ho?sada takhta par rehte ho ya kabhi utarte, kabhi chadhte ho?agar kisko takhta mil jaaye to takhta koi chhodega? yeh to shreshtha bhaagya hai jo bhagwan ke diltakhtansheen banne ka bhaagya mila hai। isse bada bhaagya koi ho sakta hai?aise praapta hue shreshtha bhaagya ko bhool to nahin jaate ho? to sadaiv takhtansheen aatmaae hain-is smriti mein raho। jo dil mein samaaya hua rahega, parmaatma-dil mein samaae hue ko aur koi hila sakta hai?diltakhtansheen aatmaae sada safe hain। maaya ke toofaan se bhi aur prakriti ke toofaan se bhi-donon toofaan se safe। na maaya ki halchal hila sakti hai aur na prakriti ki halchal hila sakti hai। aise achal ho? ya kabhi-kabhi achal,kabhi-kabhi hilte ho? yaadgaar achalghar hai। chanchal-ghar to bana hi nahin। anek baar achal bane ho। abhi bhi achal ho na। halchal mein nuksaan hota hai aur achal mein phaayda hai। koi cheej hilti rahe to toot jaayegi na।

sada yeh yaad rakho ki ham dilaaraam ke diltakhtansheen hain। yeh smriti hi tilak hai। tilak hai to takhtansheen bhi hain। iseelie jab takhta par baithte hain to pahle raajya-tilak dete hain। to yeh smriti ka tilak hi raajya-tilak hai। to tilak bhi laga hua hai। ya mit jaata hai kabhi? tilak kabhi aadha rah jaata hai aur kabhi mit bhi jaata hai-aise to nahin। yeh avinaashi tilak hai, sthool tilak nahin hai। jo takhtansheen hota hai, usko kitni khushi hoti hai, kitna nasha hota hai! aajkal ke netaaon ko takhta nahin milta, kursi milti hai। to bhi kitna nasha rehta hai-hamaari party ka raajya hai! vo to kursi hai,aapka to takhta hai। to smriti nasha dilaati hai। agar smriti nahin hai to nasha bhi nahin hai। tilak hai to takhta hai। to check karo ki smriti ka tilak sada laga hua hai arthaat sada smritisvaroop hain?

dilli vaale kya kar rahe ho? raajdhaani ki kya taiyaari kar rahe ho? raajdhaani ke liye kitni taiyaari chaahiye! prakriti bhi taiyaar chaahiye,raajya karne vaale bhi taiyaar chaahiye। to kya taiyaari ki hai? aadhi dilli ko taiyaar kiya hai?dilli ki sankhya kitni hai? (85 laakh) aur brahman kitne hain? (5 hajaar) yeh to kuchh bhi nahin hua। to taiyaar kab karenge? jab vinaash ka ghanta bajega tab? charity biginsa at hom (Charity Begins At Home)! to dilli vaalon ko taiyaar karo। pahle-pahle aadi ki sankhya bhi 9 laakh to hai na। vo bhi taiyaar nahin ki,abhi to hajaar mein hai। to kya karna padega? bani-banaayi raajdhaani mein aayenge ki taiyaar bhi karenge?jo karega so paayega। aise nahin samajhna-chalo, raajdhaani taiyaar hogi,aa jaayenge। nahin, yeh niyam hai-jo karta hai vo paata hai। to karna padega na। yeh to bahut slow (dheemi) gati hai। teevra gati kab hogi? (5 saal mein) 5saal mein vinaash ho jaaye to?taiyaari na ho aur vinaash ho jaaye to kya karenge? (aabaadi badhti jaati hai) yeh to khushkhabri hai। aapki seva mein bhi vriddhi hoti jaati hai। sevaadhaariyon ko seva ka chance mil raha hai। jaanvar badhte jaaven to shikaari ko khushi hogi na। to dilli vaalon ne apna kaam poora nahin kiya hai, abhi bahut raha hua hai। abhi fast gati karo।

ek ko das banaane hain। 12 maas mein das to bana sakte ho। ek maas mein ek-yeh to sahaj hai। aap logon ne ‘haan’kaha, to photo nikal raha hai, automatic camera mein nikal raha hai। dridh sankalp ka haath uthaana hai। dridh sankalp ka haath uthaaya to hua hi pada hai। dilli vaalon ko to sabhi ko nimantran dekar bulaana hai। halchal ki dharni par to raajya nahin karna hai, svarna dharni par raajya karna hai। to banaana padega na। abhi fast gati karo। kabhi bhi yeh nahin socho ki sunne vaale nahin milte hain। sunne vaale to bahut hain। thoda purooshaartha karo। apni sthiti roohaani aakarshanmay banaao। jab chumbak apni taraph kheench sakta hai, to kya aapki roohaani shakti aatmaon ko nahin kheench sakti? to roohaani aakarshan karne vaale chumbak bano। chumbak ko kehna nahin padta-sui aao। svatah hi kheenchati hai। roohaani aakarshanmay sthiti svayan aakarshit karti hai, mehnat nahin karni padti। brahman jeevan ka shreshtha karma ‘seva’hai na। aur to sab nimitta-maatra hai lekin brahman jeevan ka shreshtha karma‘seva’ hai। sevaadhaari ho na। achal bano aur achal banaao। sada santushta। programme karo। yeh bahut achha। programme arthaat progress।

group nan.3

sahjayog ka aadhaar-ek ki yaad

sada sahaj purooshaartha ki vidhi kya hai?sahaj purooshaartha ka anubhav hai? kya vidhi apnaai jo sahaj ho gaya? ‘ek’ ko yaad karna-yeh hai sahaj vidhi। kyonki ‘anekon’ko yaad karna mushkil hota hai। lekin ek ko yaad karna to sahaj hai। sahjayog ka arth hi hai-’ek’ ko yaad karna। ek baap, doosra na koi। aisa hai?ya baap ke saath aur bhi koi hai? kabhi-kabhi deh-abhimaan mein aa jaate ho। jab ‘mera shareer’ hai to yaad aata hai,lekin mera hai hi nahin to yaad nahin aata। to tan-man-dhan tera hai ya mera hai? jab mera hai hi nahin to yaad kya aata? dehbhaan mein aana, body-conscious mein aana arthaat mera shareer hai। lekin sadaiv yeh yaad rakho ki mera nahin, baap ka hai, seva arth baap ne trustee banaaya hai। nahin to seva kaise karenge?shareer to chaahiye na। lekin mera nahin, trustee hain। meraapan hai to grihasthi aur teraapan hai to trustee। trustee arthaat double light। grihasthi ko mere-mere ka kitna bojh hota hai-mera ghar, mere bachche, mere potre…! lambi list hoti hai। yeh bojh hai।

trustee ban gaye to bojh khatma। aise bane ho? ya badalte rehte ho? jab hai hi koi nahin, ek baap doosra na koi-to kya yaad aayega? sahaj vidhi kya hui? ‘ek’ko yaad karna, ‘ek’ mein sab-kuchh anubhav karna। isliye kehte ho na ki baap hi sansaar hai। sansaar mein sab-kuchh hota hai na। jab sansaar baap ho gaya to ‘ek’ki yaad sahaj ho gai na। mehnat ka kaam to nahin hai na। aadha kalpa mehnat ki। dhoondhana,bhatakna-yahi kiya na। to mehnat karni padi na। abhi baapdaada mehnat se chhudaate hain। agar kabhi kisi ko bhi mehnat karni padti hai,to uska kaaran hai apni kamjori। kamjor ko sahaj kaam bhi mushkil lagta hai aur jo bahaadur hota hai usko mushkil kaam bhi sahaj lagta hai। kamjori mushkil bana deti hai, hai sahaj। to baap kya chaahte hain? sada sahajyogi bankar chalo।

sada sahajyogi arthaat sada khush rahne vaale। sahajyogi jeevan arthaat brahman jeevan। pakke brahman ho na। sabse bhaagyavaan aatmaae hain-yeh khushi rehti hai?aap jaisa khush aur koi sansaar mein hoga? to sada kya geet gaate ho? ‘‘vaah mera shreshtha bhaagya!’’-yeh geet gaana sabhi ko aata hai। kyonki man ka geet hai na। to koi bhi ga sakta hai aur sada ga sakta hai। ‘‘vaah mera bhaagya!’’kahne se bhaagyavidhaata baap svatah hi yaad aata hai। to bhaagya aur bhaagyavidhaata-isi ko hi kaha jaata hai sahaj yaad। sahaj-sahaj karte manzil par pahunch jaayenge।

abhi aandhra vaalon ko sankhya badhaani hai। hamjinsa ko jagaayenge to duaae milengi। bhatakti hui aatmaon ko raasta dikhaana-yeh bada punya ka kaam hai। aandhra ki visheshta kya hai? ejyuketed (Educated-shikshit) log bahut hote hain। to aise ejyuketed log nikaalo jo seva mein aage badhen। aisa koi aandhra mein nimitta banaao jo anekon ko jagaae।

group nan.4

parmaatma-pyaar praapta karna hai to nyaare bano

sada apne ko roohaani roohe gulaab samajhte ho?roohaani roohe gulaab arthaat sada roohaaniyat ki khushbu se sampanna aatma। jo roohe gulaab hota hai uska kaam hai sada khushbu dena,khushbu phailaana। gulaab ka pushpa jitna khushboodaar hota hai utne kaante bhi hote hain, lekin kaanton ke prabhaav mein nahin aata। kabhi kaanton ke kaaran gulaab ka pushpa bigad nahin jaata hai,sada kaayam rehta hai। kaante hain lekin kaanton se nyaara aur sabhi ko pyaara lagta hai। svayan nyaara hai tab pyaara lagta hai। agar khud hi kaanton ke prabhaav mein aa jaae to use koi haath bhi nahin lagaayega। to roohaani gulaab ki visheshta hai,kisi bhi prakaar ke kaante hon-chhote hon ya bade hon,halke hon ya tej hon-lekin ho sada nyaara aur baap ka pyaara। pyaara banne ke liye kya karna pade? nyaaraapan pyaara banaata hai। agar kisi bhi prabhaav mein aa gaye to na baap ke pyaare aur na brahman parivaar ke। agar sachcha pyaar praapta karna hai to uske liye nyaara bano-sabhi had ki baaton se, apni deh se bhi nyaara। jo apni deh se nyaara ban sakta hai vahi sabse nyaara ban sakta hai।

kai sochte hain-hamko itna pyaar nahin milta, jitna milna chaahiye। kyon nahin milta? kyonki nyaare nahin hain। nahin to parmaatma-pyaar akhut hai, atal hai, itna hai jo sarva ko praapta ho sakta hai। lekin parmaatma-pyaar praapta karne ki vidhi hai-nyaara banna। vidhi nahin aati to siddhi bhi nahin milti। kai bachche kehte hain-baba se milan manaana chaahte hain lekin anubhav nahin hota hai,roohri-haan karte hain lekin javaab nahin milta hai। kaaran kya hai?pahle nyaare bane jo pyaar mile? pyaar praapta karne ka foundation agar pakka hai,to praapti ki manzil praapta na ho-yeh ho hi nahin sakta। kyonki baap ki guarantee hai। guarantee hai-ek baat aap karo, baaki sab main karoon। ek baat-mujhe dil se yaad karo, matlab se nahin। koi vighna aayega to 4 ghanta yog lagaayenge aur vighna khatma hua to yaad bhi khatma ho gai। to yeh matlab ki yaad hui na। ichchha poorn karne ke liye yaad nahin, achha bankar yaad karna hai। yeh kaam ho jaaye, iske liye yaad karoon-aise nahin। paatra ban parmaatma-pyaar ka anubhav kar sakte ho।

roohaani gulaab arthaat parmaatma-pyaar ki paatra aatmaae। parmaatma-pyaar ke aage aatmaon ka pyaar kya hai?kuchh bhi nahin। jab parmaatma-pyaar ke anubhvi bante ho to dil se kya nikalta hai? kaunsa geet gaate ho?pa liya, aur kuchh nahin raha। aise praapti ke adhikaari aatma bano। paatra ki nishaani hai-praapti hona। agar praapti nahin hoti, kam hoti hai-to samjho paatra kam hain। kyonki dene vaala to daata hai aur akhut khazaana hai। to kyon nahin milega? paatra yogya hai to praapti bhi sab hain। sada baba mera hai to praapti bhi sada hogi na। kabhi bhi,kisi bhi had ke prabhaav se nyaara rehna hi hai, kabhi prabhaav mein nahin aana। phir baar-baar paatra banne ka abhyaas maana mehnat karni padti hai। isliye had ke prabhaav mein na aakar sada behad ki praaptiyon mein magan raho। sada check karo ki-roohaani gulaab sada roohaaniyat ki khushbu mein rehta hoon, nyaara rehta hoon, pyaar ka paatra banta hoon? kyonki aatmaon dvaara praapti to 63 janma kar li,usse result kya nikli?ganva liya na। abhi paane ka samay hai । had ki praaptiyaan arthaat ganvaana, behad ki praapti arthaat jama hona। achha!

group nan.5

svaraajya ka tilak hi bhavishya ke raajtilak ka aadhaar hai

sabhi apne ko vijayi ratna anubhav karte ho?vijay praapta karna sahaj lagta hai ya mushkil lagta hai? mushkil hai ya mushkil bana dete ho,kya kahenge?hai sahaj lekin mushkil bana dete ho। jab maaya kamjor bana deti hai to mushkil lagta hai aur baap ka saath hota hai to sahaj hota hai। kyonki jo mushkil cheej hoti hai woh sada hi mushkil lagni chaahiye na। kabhi sahaj,kabhi mushkil-kyon?sada vijay ka nasha smriti mein rahe। kyonki vijay aap sab brahman aatmaon ka janmasiddha adhikaar hai। to janmasiddha adhikaar praapta karna mushkil hota hai ya sahaj hota hai? kitni baar vijayi bane ho! to kalpa-kalpa ki vijayi aatmaon ke liye phir se vijayi banna mushkil hota hai kya? amritvele sada apne mastak mein vijay ka tilak arthaat smriti ka tilak lagaao। bhakti-maarga mein tilak lagaate hain na। bhakti ki nishaani bhi tilak hai aur suhaag ki nishaani bhi tilak hai। raajya praapta karne ki nishaani bhi raajtilak hota hai। kabhi bhi koi shubh kaarya mein saphalta praapta karne chaahte hain to jaane ke pahle tilak dete hain। to aapko raajya praapti ka raajya-tilak bhi hai aur sada shreshtha kaarya aur saphalta hai, isliye bhi sada tilak hai। sada baap ke saath ka suhaag hai, isliye bhi tilak hai। to avinaashi tilak hai। kabhi mit to nahin jaata hai? jab avinaashi baap mila to avinaashi baap dvaara tilak bhi avinaashi mil gaya। sunaaya tha na-abhi svaraajya ka tilak hai aur bhavishya mein vishwa ke raajya ka tilak hai। svaraajya mila hai ki milna hai? kabhi ganva bhi dete ho? sadaiv phalak se kaho ki ham kalpa-kalpa ke adhikaari hain hi!

is samay svaraajya adhikaari aur bhavishya mein hain vishwa-raajya adhikaari aur phir dvaapar-kaliyug mein poojneey ke adhikaari banenge, isliye poojya adhikaari। aap sabki pooja hogi। apne mandir dekhe hain? double videshiyon ka mandir hai? dilvaala mandir mein aap baithe ho? kyonki jo brahman bante hain vo brahman devta banenge aur devtaaon ki pooja hogi। agar pakke brahman ho to pakka hi poojan hoga। kachche brahman hain to shaayad poojan hoga। double videshi sabhi pakke ho? pakke the, pakke hain aur pakke rahenge-aise hai na। achha! sabhi pakke ho?anubhvi ban gaye na। anubhvi kabhi dhokha nahin khaate। dekhne vaale, sunne vaale dhokha kha sakte hain lekin anubhav ki authority vaale dhokha nahin kha sakte। har kadam mein naya-naya anubhav karte rehte ho। roj naya anubhav। umang-utsaah vaale ho na। umang-utsaah-yahi udti kala ke pankh hain। kabhi umang-utsaah kam hua arthaat pankh kamjor ho gaye। achha,jo abhi tak kisi ne nahin kiya ho woh karke dikhaao,tab kahenge naveenta। centre kholna,function karna-yeh to sabhi karte hain। jaise baap ko raham aata hai ki bhatakti aatmaon ko thikaana den,to bachchon ke man mein bhi yeh raham aana chaahiye। to abhi aisa koi naya saadhan nikaalo jisse anek aatmaon ko sandesh mil jaaye।