सोमवार 4 दिसंबर 1995 की अव्यक्त मुरली

>

04-12-95 om shanti avyakt baapdaadaamdhuban

‘‘yathaartha nishchay ke foundation dvaara sampoorn pavitrata ko dhaaran karo’’

aaj baapdaada desh-videsh chaaron or ke naye-naye bachchon ko dekh rahe the। chaahe madhuban mein saakaar roop mein aaye hain, chaahe aakaar roop mein apne- apne seva-sthaan mein aaye hue hain, to nayon-nayon ko dekh baapdaada sabhi ke nishchay ko dekh rahe the। kyonki nishchay is brahman jeevan ke sampannata ka foundation hai aur foundation mazboot hai to sahaj aur teevra gati se sampoornata tak pahunchna nishchit hai। to baapdaada dekh rahe the ki nishchay bhi bhinnabhinna prakaar ka hai। jo yathaartha nishchay hai ki main paramatma baap ka ban gaya,svayan ko bhi aatma-swaroop mein jaanna, maanna, chalna aur baap ko bhi jo hai vaise jaanna - ye hai yathaartha nishchay।

doosra nishchay hai -yog dvaara thode samay ke liye ashaanti se shanti ka anubhav karte hain aur sthaan ka shaktishaali shant vaayumandal aakarshit karta hai va brahman parivaar, brahman aatmaon ka aatmik pyaar aur pavitrata ki jeevan ka prabhaav padta hai, company achhi lagti hai,duniya ke vaayumandal ke contrast mein ye sang achha lagta hai,gyaan bhi achha, parivaar bhi achha, vaayumandal bhi achha … to vo achha lagna,us foundation ke aadhaar par chalte rehte hain। ye hai doosra number। pahla number sunaaya‘yathaartha nishchay’ aur doosra number ‘achha lagta hai’ aur teesra number - duniya ke sambandhiyon ke duhkhamay vaataavran se bachkar jitna samay bhi sevaakendra par aate hain utna samay duhkh se kinaara hokar shanti ka anubhav karte hain। gyaan ki guhyata mein nahin jaayenge lekin shanti ki praapti ke kaaran kabhi aate hain aur kabhi nahin bhi aate hain। lekin yathaartha nishchay buddhi vijayi hote hain। aur dekha jaata hai ki jab shuru- shuru mein aate hain to ashaanti se tang hote hain,shanti ke ichchhuk hote hain। to jaise pyaase ko ek boond bhi agar paani ki mil jaaye to vo bahut badi baat anubhav karta hai। to apraapti se praapti hoti hai, parivaar mein, gyaan mein, yog mein, vaayumandal mein antar dikhaai deta hai। to pahla samay bahut achhe umang- utsaah se chalte hain,bahut nasha rehta hai, khushi bhi hoti hai। lekin agar pahle number ke yathaartha nishchay ka foundation pakka nahin hai, doosre ya teesre number ka nishchay hai to dheere-dheere jo shuru ki khushi,shuru ka josh hai, usmein pharka aa jaata hai।

is season mein naye-naye bahut aaye hain aur chance bhi mila hai, yeh to bahut achha hai। baapdaada ko bhi naye-naye bachchon ko dekh khushi hoti hai ki ye phir se apne parivaar mein pahunch gaye। lekin ye check karo ki nishchay ka foundation pakka hai? hamaara nishchay number one hai va number tu hai?agar number one nishchay hai to chalte-chalte mukhya pavitrata dhaaran karne mein mushkil nahin lagega। agar pavitrata svapna maatra bhi hilaati hai,halchal mein aati hai, to samjho number one foundation kachcha hai। kyonki aatma ka svadharma pavitrata hai। apvitrata pardharma hai aur pavitrata svadharma hai। to jab svadharma ka nishchay ho gaya to pardharma hila nahin sakta। kai bachche kehte hain ki pahle to bahut achhe aate the, abhi pata nahin kya ho gaya? to kya ho jaata hai ki baap jo hai, jaisa hai, vaise anubhav mein nahin laate। agar poochhenge ki baap saath hai?to haath sab uthaayenge। haath uthaana to bahut sahaj hai। lekin baap saath hai to baap ki pahli-pahli jo mahima karte ho ki vo sarvashaktimaan hai - ye maante ho ya sirf jaante ho? to jab sarvashaktimaan baap saath hai to sarvashaktimaan ke aage apvitrata aa sakti hai? nahin aa sakti। lekin aati to hai, to aati phir kahaan se hai? koi aur jagah hai? chor log jo hote hain vo apna special get bana lete hain। chor get hota hai। to aapke paas bhi chhipa hua chor get to nahin hai?check karo। nahin to maaya aai kahaan se?oopar se aa gai?agar oopar se bhi aa gai to oopar hi khatma ho jaani chaahiye। koi chhipe hue get se aati hai jo aapko pata nahin padta hai to check karo ki maaya ne koi chor get to nahin banaakar rakha hai?aur get banaati bhi kaise hai, maaloom hai? aapke jo vishesh svabhaav ya sanskaar kamzor honge to wahin maaya apna get bana deti hai। kyonki jab koi bhi svabhaav ya sanskaar kamzor hai to aap kitna bhi get banda karo,lekin kamzor get hai, to maaya to jaaneejaananhaar hai, usko pata pad jaata hai ki ye get kamzor hai, isse raasta mil sakta hai aur milta bhi hai। chalte- chalte apvitrata ke sankalp bhi aate hain, bol bhi hota, karma bhi ho jaata hai। to get khula hua hai na, tabhi to maaya aai। phir saath kaise hua?kahne mein to kehte ho ki sarvashaktimaan saath hai to ye kamzori phir kahaan se aai?kamzori rah sakti hai? nahin na? to kyon rah jaati hai? chaahe pavitrata mein koi bhi vikaar ho, maano lobh hai, lobh sirf khaane-peene ka nahin hota। kai samajhte hain hamaare mein pahanne, khaane ya rahne ka aisa to koi aakarshan nahin hai, jo milta hai, jo banta hai, usmein chalte hain। lekin jaise aage badhte hain to maaya lobh bhi royal aur sookshm roop mein laati hai। vo royal lobh kya hai? chaahe student ho,chaahe teacher ho, maaya donon mein royal lobh laane ka full purooshaartha karti hai। maano student hai,bahut achha nishchaybuddhi,sevaadhaari hai, sabmen achha hai lekin jab aage badhte hain to ye royal lobh aata hai ki main itna kuchh karta hoon, sab roop (tarah) se madadgaar hoon,tan se, man se, dhan se aur jis samay chaahiye us samay seva mein haazar ho jaata hoon phir bhi mera naam kabhi bhi teacher varnan nahin karti ki ye jigyaasu bahut achha hai। agar maanon ye bhi nahin aave to phir doosra roop kya hota hai? achha,naam le bhi liya to naam sunte-sunte-main hi hoon, main hi karta hoon,main hi kar sakta hoon, vo aabhimaan ke roop mein aa jaayega। ya bahut kaam karke aaye aur kisi ne aapko poochha bhi nahin,ek gilaas paani bhi nahin pilaaya, dekha hi nahin, apne aaraam mein ya apne kaam mein busy rahe, to ye bhi aata hai ki karo bhi aur poochhe bhi koi nahin। to karna hi kya hai,karna ya na karna ek hi baat hai। poochhne vaala to koi hai nahin, isse aaraam se ghar mein baitho, jab hoga tab seva karenge। to ye bhinna-bhinna prakaar ka vikaaron ka royal roop aata hai। aur ek bhi vikaar aa gaya na,maano lobh nahin aaya lekin abhimaan aa gaya ya apne maanne tak ka,hamaari maanyata ho - uska bhaan aa gaya to jahaan ek vikaar hota hai vahaan unke chaar saathi chhipe hue roop mein hote hain। aur ek ko aapne chance de diya to vo chhipe hue jo hain vo bhi samay pramaan apna chance lete rehte hain। phir kehte hain ki pahle jaisa nasha abhi nahin hai, pahle bahut achha tha,pahle avastha badi achhi thi, abhi pata nahin kya ho gaya hai। maaya chor get se aa gai - ye hai pata, ye nahin kaho pata nahin।

aur teacher ko bhi aata hai। teacher ko kya chaahiye? centre achha ho, kapde bhale kaise bhi ho lekin centre thoda rahne laayak to achha ho। aur jo saathi ho vo achhe ho, student achhe ho, baba ki bhandaari achhi ho। agar achha student change ho jaaye to dil thoda dhadakta hai। phir samajhte hain ki kya karen, ye madadgaar tha na,abhi vo chala gaya। madadgaar jigyaasu tha va baap hai? to us samay kaun dikhaai deta hai?jigyaasu ya baap? to ye royal maaya foundation ko hilaane ki koshish karti hai। agar aapko nishchay hai-sarvashaktimaan saath hai to baap kisi na kisi ko nimitta bana hi deta hai। kai phir sochte hain humein kam se kam ek baar aabu ki conference mein ya kisi badi conference mein chance milna chaahiye,chalo aur nahin,yog shivir to kara len,ye bhi to chance hona chaahiye na, chalo bhaashan nahin kare, stage par to aaven,aakhir vinaash ho jaayega, kya vinaash tak bhi hamaara number nahin aayega, number to aana chaahiye na! lekin pahle bhi baapdaada ne sunaaya ki agar yogya hain, chance milta hai to khushi se karo lekin ye sankalp karna ki humein chance milna chaahiye… yeh bhi maangana hai। chaahiye-chaahiye ye hai royal maangana। ye hona chaahiye… ye humein pahchaante nahin hain, daadi-deediyaan bhi sabhi ko pahchaanti nahin hain, jo aage aate hain usko aage kar lete hain-to ye sankalp aana yeh bhi ek sookshm maangana hai। lekin baapdaada ne suna diya hai ki maanon aap stage par aa gai ya aapki koi bhi visheshta ke kaaran, yog nahin bhi hai,avastha itni achhi nahin hai lekin bol mein,catching power mein visheshta hai to chance mil jaata hai, kyonki kisi ki vaani mein mithaas hota hai, spashtata hoti hai aur catching power hoti hai to yahaan ke vahaan ke misaal vagairah catch karke sunaate hain iseelie unhon ka naam bhi ho jaata hai। kaun chaahiye? phalaani chaahiye। kaun aave? phalaani aave, chaahe yog mein kachchi bhi ho… to is par number final nahin hone hain। jo final number milenge vo ye nahin hoga ki isne kitne bhaashan kiye ya isne kitne student va centre banaaye hain, lekin yogya kitnon ko banaaya hai?centre banaana badi baat nahin hai lekin yogya kitni aatmaon ko banaaya? naam ho gaya-30centre ki inchaarja hai aur30 mein se 15 hil rahe hain, 15 theek hain to phaayda hua ya sirf naam hua? sirf naam hota hai ki phalaani ke 30sevaakendra hain। lekin number isse nahin milega। final number jitnon ko sukh diya, jitna svayan shaktishaali rahe, usi pramaan milenge। iseeliye ye bhi chaahiye-chaahiye khatma kar do। nahin to yog nahin lagega। roz yahi dekhte rahenge ki phalaani jagah programme hua mere ko phir bhi nahin bulaaya, abhi parson yahaan hua,kal vahaan hua,aaj yahaan hua! to yog lagega ya ginti hoti rahegi?

to mukhya baat - jo yathaartha nishchay hai usko pakka karo। kahne mein to kah dete ho main aatma hoon aur baap sarvashaktimaan hai lekin practical mein, karma mein aana chaahiye। baap sarvashaktimaan hai lekin mere ko maaya hila rahi hai to kaun maanega aapka baap sarvashaktimaan hai! kyonki usse oopar to koi hai nahin। to baapdaada aaj nishchay ke foundation ko dekh rahe hain। chaahe naye hain,chaahe puraane hain lekin is nishchay ke foundation ko practical mein laao aur samay par use karo। samay beet jaata hai phir baap ke aage pashchaataap ke roop mein aate ho-kya karen, baba ho gaya, aap to merciful ho,raham kar do…to ye kya hua? ye bhi royal pashchaataap hai। saath hai to kisi ki himmat nahin hai, nishchaybuddhi ka arth hi hai vijayi। agar koi hisaab-kitaab aata bhi hai to man ko nahin hilaao। sthiti ko neeche-oopar nahin karo। chalo aaya aur phat se usko door se hi khatma kar do। abhi yoddhe nahin bano। kai abhi nirantar yogi nahin hain। kuchh samay yogi hain aur kuchh samay yuddha karne vaale yoddhe hain। lekin apne ko kahlaate kya ho? yoddhe ki yogi? kahlaate to sahajyogi ho। to naye jo bhi aaye hain unko baapdaada phir se bhaagya praapta karne ki mubaarak dete hain। lekin mubaarak ke saath ye check bhi karna ki foundation number one hai ya number do ka hai?

kai kehte hain gyaan-yog bahut achha lagta hai, achha hai vo to theek hai lekin karma mein laate ho?gyaan maana aatma, paramatma,drama…yeh kehna nahin। gyaan ka arth hai samajh। samajhdaar jaisa samay hota hai vaise samajhdaari se sada saphal hota hai। kabhi bhi dekho jeevan mein duhkh aate hain to kya sochte ho? pata nahin,mujhe yeh kyon nahin samajh mein aaya - yahin kahenge। to samajhdaar ho?gyaani ho?bolo haan ya na? (haan ji) haan to bahut achhi bolte hain। samajhdaar ki nishaani hai kabhi dhokha nahin khaana - ye hai gyaani ki nishaani, aur yogi ki nishaani hai - sada clean aur clear buddhi। clean bhi ho aur clear bhi ho। yogi kabhi nahin kahega-pata nahin, pata nahin। unki buddhi sada hi clear hai। aur dhaarna swaroop ki nishaani hai sada svayan bhi double light। kitni bhi zimmevaari ho lekin dhaarnaamoorta,sada double light। chaahe mela ho, chaahe jhamela ho-donon mein double light। aur sevaadhaari ki nishaani hai-sada nimitta aur nirmaan bhaav। to ye sabhi apne mein check karo। kahne mein to sabhi kehte ho na ki chaaron hi subject ke godly student hain। to nishaani dikhaai deni chaahiye।

to naye-naye kya karenge? apne nishchay ko aur pakka karna। nahin to phir kya hota hai do saal chalenge,teen saal chalenge phir vaapas puraani duniya mein chale jaayenge। aur phir jo vaapas jaate hain vo us duniya mein bhi set nahin ho sakte hain। na is duniya ke rehte, na us duniya ke। isliye apna foundation bahut pakka karo। anubhav karo-sarvashaktimaan baap saath hai। bas ek baat bhi anubhav kiya to sabmen paas ho jaayenge। rivaazi prime minister hai,minister hai uske saath ka bhi nasha rehta hai। ye to sarvashaktimaan hai! achha!

jo is kalpa mein pahle baari aaye hain vo haath uthaao। jo pahli baar aaye hain vo sada khush rehna aur sada aabaad rehna। achha-teachers bhi bahut aati hain। ek saal mein kitne chance milte hain?ek hi milta hai। 12 maas ko 13 maas to kar nahin sakte। baapdaada ko to dil hoti hai teachers aise refresh ho jaayen,shaktishaali ban jaayen jo kisi bhi centre par koi bhi jaaye to ek aatma bhi kamzor nahin dikhaai de। nirvighna sevaakendra,usko hi marks milti hain। baapdaada ismen khush nahin hote ki is zone mein hazaar centre hain, hazaar geeta paathshaalaayen hain। baapdaada khush hote hain jis zone mein koi khitkhit nahin ho, koi kamplent nahin ho। kyonki vaastav mein maano teacher mehnat kar rahi hai aur kamzor sanskaar hi maaya ke aane ka chor get hai। 52 khitkhit bhi ho rahi hai,vaataavran vaise ka vaisa hai to kya vo seva hai? ki jhamela hai? to aaye kislie?brahmaakumaar ya brahmaakumaariyaan kislie banen?jhamele ke liye? agar jhamele hi chaahiyen to duniya mein bahut jagah hain। baapdaada vahaan ka address bhi de sakte hain। lekin brahmaakumaar aur brahmaakumaariyaan banna maana milan mela manaana, na ki jhamela। dekho abhi aaye ho to kis lakshya se aaye ho? jhamele ke liye aaye ho?milan manaane aaye ho to achha lagta hai na! to kabhi bhi,koi bhi student ho va teacher ho,hain to sabhi student-kabhi bhi jhamela nahin karo। jhamela karna arthaat kya kahen! baapdaada ko kehna bhi achha nahin lagta। isliye chaahe teacher, chaahe madhuban,chaahe madhuban ke up sevaakendra,geeta paathshaalaayen ya aapke zone ke upsevaakendra ya kendra,jo bhi apne ko brahman aatma kahlaate hain, nahin to apne ko brahman nahin kahlaao,kshatriy kahlaao, brahman naam ko kharaab nahin karo। brahman maana vijayi। agar jhamela karte hain to kshatriy hain,na ki brahman।

to aaj ka paath kya pakka karenge? kaun sa sankalp karenge? har ek ko man, vaani,karma, sambandh,samparka mein jhamela mukta banna hai। jhamela nahin hona chaahiye। roz check karo। ye vyartha sankalp ka bhi jhamela hai। doosre ke saath nahin hai lekin apne man mein to jhamela hai। to sabhi kya sankalp karenge? kya banenge? bolo,jhamela mukta। kyonki diamond jubilee aa rahi hai to diamond jubilee mein jhamela vaala diamond chaahiye kya?aap log pasanda karenge?ya bahut sundar diamond ke beech mein do-chaar jhamele vaale diamond hon to pasanda karenge? nahin karenge। lekin iski bahut sahaj vidhi hai, mehnat karne ki bhi zarurat nahin। jhamela mukta hone ki vidhi sabse sahaj hai ki pahle svayan ko jhamele mukta karo। doosre ke peechhe nahin pado। ye student aisa hai, ye saathi aisa hai,ye circumstance aise hain-usko nahin dekho lekin apne ko jhamela mukta karo। jahaan jhamela ho vahaan apne man ko, buddhi ko kinaare kar lo। aap sochte ho-ye jhamela poora hoga to bahut achha ho jaayega, hamaari seva bhi achhi,hamaari avastha bhi achhi ho jaayegi। lekin jhamele pahaad ke samaan hain। kya pahaad se maatha takraana hai? pahaad hatega kya? svayan kinaara kar lo ya udti kala se jhamele ke pahaad ke bhi oopar chale jaao। to pahaad bhi aapko ekdam sahaj anubhav hoga। mujhe banna hai। amritvele se ye svayan se sankalp karo ki mujhe jhamela mukta banna hai। baaki to hai hi jhamelon ki duniya, jhamele to aayenge hi। aapki duniya aapka sevaakendra hai to aapki duniya hi vo hai, to vahaan hi aayenge na। aap paper dene ke liye America,london jaayengi kya?centre par hi dengi na! to jhamela nahin aave-yeh nahin socho। jhamela mukta banna hai-ye socho। ho sakta hai?ki vahaan centre par ya ghar mein jaayenge to kahenge ki ye jhamela to mere se nahin hoga। aise to nahin? jab baap ne kaha hai ki puraani duniya se, puraani duniya ke praaptiyon se abhi apne man aur buddhi ko ooncha karo। puraani duniya se langar utha liya ki abhi laga hua hai? bandha hua to nahin hai? vo kahaani sunaate hain na to anjaan rehna ye bhi andhakaar hai। vo andhakaar nahin lekin anjaan rehna bhi andhakaar hai। to andhakaar mein nahin rah jaana। achhi tarah se check karo। dekhenge, ye jhamela mukta number one kaun sa sevaakendra ya madhuban banta hai?

madhuban vaalon ko bhi banna hai। aise nahin jo group aaya hai unko hi banna hai। madhuban vaale neeche baithe hain na। (om shanti bhavan ka haal full hone ke kaaran sabhi paandav bhavan mein murli sun rahe hain)chaahe yahaan baithe hain,chaahe neeche baithe hain, lekin baapdaada ke to saamne hain। aap T.vi. ke saamne ho, baapdaada aapke saamne hai। to madhuban vaale ya jo bhi desh-videsh sabhi ismen number one bano phir diamond jubilee bahut dhoomdhaam se manaayenge। abhi baapdaada ko thoda- thoda hota hai ki kya sabhi mukta ho jaayenge! lekin ye baapdaada ka sankalp theek nahin hai, aise na? baap ko to bachchon par nishchay hai na! lekin thoda-thoda aata hai - kya karenge! baaki hai hi kya?ek maas। diamond jubilee to January se shuru hai। diamond jubilee ke beech mein karenge,aarambha mein karenge, kya karenge? bataao,raay bataao ki diamond jubilee ke aarambha mein mukta ho jaayenge ya samaapti mein mukta honge? jo samajhte hain thoda samay to chaahiye, itne mein kaise ho jaayenge, 63janma ke sanskaar hain,ek maas mein khatma ho jaayenge-mushkil lagta hai…! time chaahiye? 2maas, 6 maas,kya samajhte ho? jo samajhte hain kuchh time chaahiye vo haath uthaao। achha, jinhonne haath uthaaya vo khade ho jaao। sachche to hain na। inhon ka photo nikaalo,inhon ko time denge। ghabraao nahin। jinhonne bhi haath uthaaya hai vo apni chitki mein centre aur apna naam ye parichay likh karke shaantaamni ko dena। koi harja nahin hai,aap logon ne sach bola - to jaldi ho jaayenge। baaki itne sabhi agar mukta ho gaye to ye thode to aapki poonchh pakadkar bhi mukta ho jaayenge। achha, post vaali ishu kahaan hai? iske paas post aati hai। to ek maas ke baad koi aisi jhamele ki post nahin aani chaahiye। agar aave to aap baapdaada ko bataana। theek hai na। pakka kaam karna chaahiye। inko pahchaante ho na। isse sabka kaam padta hai। bhavishya banaane ke nimitta to rakha hua hai na! sabhi jama yahin aa karke karte hain।

achha,double videshiyon ne kya kaha? zone to bahut aaye hain। (sabhi zone vaalon se baapdaada ne haath uthvaaye)

achha,sabhi zone, chaahe dilli, chaahe gujraat, chaahe taamilnaadu jo bhi hain baapdaada ne dekha ki sabhi ke man mein diamond jubilee ka umang-utsaah bahut achha hai। aur sabhi samajhte hain ki ye diamond jubilee, yagya ki sthaapna nirvighna60 saal chali hai aur aage bhi chalti rahegi। to 60 saal vriddhi hoti rahi hai, khatma nahin ho jaaye sanstha ya khitkhit mein bigad nahin jaaye… yeh is vishvavidyaalay ki duniya ke liye bahut badi shaan hai। to diamond jubilee manaana arthaat har brahman ka ye shaan hai ki ham aise vishvavidyaalay ke ya aise shreshtha kaarya ke saathi hain। 60 saal koi kam nahin hain, duniya ke liye to asambhav baat hai। lekin aap jaante ho ki parmaatma kaarya sada achal, avinaashi hai। to sanstha ki shaan arthaat har brahman aatma ki shaan hai। falak se kah sakte ho ki hamaare kaarya ki diamond jubilee hai। duniya vaale to samajhte hain ki koi bhi bada guru gaya to sanstha bhi gai। inhon ka brahma baba gaya to sab kuchh gaya… lekin aap jaante ho ki brahma baap dvaara bhi chalaane vaala avinaashi baap hai। to ye diamond jubilee - ek kaarya ke saphalta ki nishaani hai। ismen chaahe yuva ho chaahe pravritti vaale ho, sabhi ko diamond ban aur anya diamond ki maala banaani hai। agar svayan nirvighna shreshtha diamond hain to auron ko bhi aise hi banaayenge।

yuvkon se

yuva haath uthaao। majority desh-videsh mein dekha jaata hai ki jo naye-naye aate hain vo majority yuva aate hain,yuva varga ka aana ye sanstha ki shaan hai। kyonki government to haar gai, vo to saaph kehti hai hamaari himmat nahin। to aap yuva varga aisi kamaal karke dikhaao jo baap ka naam har yuva ke chalan se,parivartan se dikhaai de। iske liye har ek yuva ko apne ko kya banaana hai? divya darpan। darpan mein shakla dikhaai deti hai na। to aapke chehre se auron ko pharishta ya divya gundhaareemoortta dikhaai de।

(ejukeshan wing ki or se gujraat mein chale abhiyaan ka samaachaar baapdaada ko sunaaya)achha hai,kitni aatmaon ko parichay mil gaya na! to seva kiya arthaat apne punya ka khaata jama kiya। abhi ejukeshan department ya varga vaalon ne chakkar to lagaaya, bahut achha kiya lekin ejukeshan department ya varga government ko yeh siddha karke dikhaave ki sachmuch jo naam hai vishvavidyaalay vo real vishvavidyaalay yahi hai। abhi maanyata nahin dilaai hai। to ye kaam abhi raha hua hai,adhoora hai abhi। to aisa plan banaao jo government svayan bole ki hamaare vishvavidyaalay is vidyaalay ke aage kuchh nahin hain। agar hai to ye hai। yahi hai, yahi hai - ye bole,tab ejukeshan vaalon ko inaam denge। abhi to yuddha chal rahi hai - ejukeshan hai ya nahin hai?to jo real hai, jo satya hai vo siddha to hona hai na। to thodi aur mehnat karo। hona to hai lekin vo bichaare itne bhatak rahe hain,jaldi se bach jaaven। achha, yuva arthaat divya darpan। samjha?

pravritti vaalon se

pravritti vaale kya karenge? baapdaada pravritti vaalon ki sada kis pushpa se tulna karte hain? (kamalpushpa se)

achha to aap pravritti vaale kamal pushpa ho?kabhi-kabhi koi boond to nahin lag jaati? koi mitti ka prabhaav to nahin pad jaata?to pravritti vaale is saari puraani duniya ko, kamal pushpa ka taalaab bana do। taalaab ke beech mein kamal pushpa bahut achhe lagte hain। to is puraani duniya ko kamal pushpa ka bade se bada taalaab banaao,jo jahaan bhi dekhe na to kamal hi kamal dikhaai den। itni himmat hai? diamond jubilee tak banaayenge? ek maas mein nahin kehte lekin ek varsha mein to banaao। bichaare aatmaon ki haalten dekho to sachmuch raham aata hai। duniya ki haalat dekho aur apne ko dekho-kitna antar hai! kitni baaton se, duhkhon se, dardon se chhoot gaye ho। samajhte ho - duniya ki aisi haalat hai? kisi se bhi poochho kya haalchaal hai to kahenge ki duniya ka to behaal hai। aur aapse poochhe kya haal hai?khushhaal hai। to duniya behaal aur aap sabhi khushhaal। pakka hai ya kabhi-kabhi khushi kam hoti hai?kam nahin hone dena। to sabhi pravritti vaale kamal ho na! pakka yaad rakho ki ham kamal hain। nyaare aur baap ke pyaare। achha!

kumaariyon se

kumaariyon ki to mahima sada baapdaada karte hain। kyonki kumaari saadhaaran kumaari se vishwa ki sevaadhaari kumaari ban gai। kahaan ghar ki chaar deevaaron mein rahne vaali aur kahaan vishwa ke sevaadhaari ban gaye ya ban rahe hain। to kumaariyaan apne ko aise yogya samajhti ho? aise yogya ho ya tokri uthaane vaali ho? tokri uthaate-uthaate to sirdarda karta hai। abhi kumaariyon ko tokri vaali banna hai ya taaj vaali banna hai?tokri chhod dengi? ki tokri uthaana zaroori hai? kumaariyaan kya samajhti hain? jo samajhti hain ki naukri karni hi padegi, majboori hai, vo haath uthaao। majboori vaali koi nahin hai। to gharon mein kyon baithe ho? jab naukri ki aavashyakta nahin to kyon baithe ho? kyon nahin aate ho maidaan mein? ghar achha lagta hai? chhota sa ghar hai, koi khitkhit nahin hai, maa-baap ka pyaar mil raha hai, theek hai। sevaakendra par pata nahin kya-kya hoga, kaise chalenge, chal sakenge ya nahin sakenge,iseelie chaar deevaari theek hai… aise samajhti ho? kumaariyon par to sab yugon mein se sangamayug par vishesh parmaatma-kripa hai। agar sangam par parmaatma kripa ke adhikaari nahin bane to saare kalpa mein nahin banenge। to kumaariyon ko parmaatma vardaan hai ya parmaatma-kripa hai, vo kabhi bhi chhodni nahin chaahiye, leni chaahiye। samjha kumaariyon ne?daro nahin। aajkal samaachaar suna hai, kai kumaariyaan darti hain-pata nahin, pata nahin, pata nahin! lekin sabhi sevaakendra ek jaise nahin hote hain। agar koi baat hai bhi to badon ko de sakte hain। uske liye koi ko mana nahin hai। agar teacher mana bhi karti hai to baapdaada ki chhutti hai ki kahaan se bhi patra daal sakte ho। sirf kya hota hai-baapdaada patra ke liye to kehte hain lekin lamba bahut likh dete hain। thode mein hi samajh mein aa jaata hai, lekin lambi kahaani hogi to jo charge vaali dekhegi na, vo bhi kinaare rakh degi। jab time milega tab padhegi। aur badon tak bhi nahin jaayega। unhon ko bhi time mile na,tab to aapka raamaayan padhenge। isliye lamba nahin likho। shortakat mein likho ki ye takleeph hai aur iski ye salvation chaahiye। phir spashteekran lena hoga to bade aapko aapehi bulaayenge। aur hi madhuban mein aane ka chance milega। to lamba nahin likhna। baaki sabko chhutti hai, agar koi aisi aythaartha baat hai to suna sakte hain। daro nahin। darne ke kaaran apni parmaatma-kripa ka bhaagya nahin ganvaao। samjha kumaariyon ne?na apne ko tang karo, na doosre ko tang karo। bhaagya achha hai। kumaariyaan himmat rakhti hain tabhi centre khul sakte hain। agar kumaariyaan himmat nahin rakhteen to centre bhi nahin khulte। to lucky to ho na। sabhi deedi ji, daadi ji to kehte hain। yahin title mil jaata hai। achha।

baaki madhuban vaale ya jo bhi samparka mein geeta paathshaalaayen kaho, upsevaakendra kaho, jo bhi hain sabhi ko baapdaada abhi apne samaan sampanna aur master sarvashaktimaan dekhna chaahte hain। sabse bade te bada model madhuban hai। madhuban kaun sa model banaata hai,woh dekhenge। jo sachchi dil se seva karte hain usko baapdaada bhi padmaguna mubaarak dete hain। madhuban vaale khaatiri to karte hain na। chaahe gyaan sarovar mein, chaahe yahaan paandav bhavan mein, khaatiri to karte hain। to khaatiri karne vaalon ko aap sabhi bhi mubaarak de rahe ho na। to saari sabha ki taraph se mubaarak।

achha,chaaron or ke sada shreshtha bhaagyavaan bhaagya vidhaata ko apna banaane vaale aisi shreshtha aatmaon ko,sada baapdaada ke shreemat ko suna aur kiya aise sarva sapoot bachchon ko, sada seva mein achal rahne vaale jhamela mukta aur parmaatma-milan mela manaane vaale sabhi bachchon ko baapdaada ka yaad-pyaar aur namaste।

achha-double videshiyon ko double nasha hai na?double videshi arthaat double light, double nasha aur double baapdaada aur parivaar ke pyaare। samjha?

achha! health mela karne vaalon ko bhi mubaarak। vaise result achhi hai aur rahegi।

(daadiyaan baapdaada ke saamne baithi hain)teachers ko achha chance mil jaata hai। mehnat bhi karti hain, yahaan thakaavat utar jaati hai। yahaan refresh hote ho ya yahaan bhi party ki chinta rehti hai? vaise to madhuban ki dincharya aisi set hai jo time bhi nahin hai। busy rahne chaahe, classes ka laabh uthaana chaahe to student ko phursat milti hai? madhuban mein free hote ho? paandavon se poochhte hain ki classes mein busy rehte ho,kya hota hai? madhuban mein yahaan vahaan ki baaten karne ka free time milta hai? classes mein busy rehte ho? sabhi classes atenda karte ho? classes zarur atenda karna chaahiye kyonki har ek ratna mein baapdaada va draamaanusaar koi na koi visheshta bhari hui hai। to class koi bhi karaave। aise nahin phalaane ka class hai to sabhi bhaago aur koi doosre ka hai to aadha ghoomna…। koi bhi class karaata hai usmein visheshta hoti hai। aur aap logon ke paas sabhi to pahunch bhi nahin sakte। yahin milte hain। to jinhon ne sabhi class atenda kiye hain, ek bhi miss nahin kiya hai, woh haath uthaao। achha,teachers apne kaam utaarti hain। aap ek to official round lagaane jaate ho vo to achhi baat hai,lekin class ke time jo class chhod karke aur kahaan ghoomne gaye hain vo haath uthaao। to abhi aise nahin karna। class ki kai baaten samay par barobar kaam mein aayengi। abhi sunte ho, to samajhte ho bahut sun liya। lekin koi-koi point aise time mein kaam par aati hain jo aap andar hi andar shukriya maanenge, isliye busy raho। madhuban maana padhaai mein busy। baaki khaao piyo mauj karo, vo bhale karo lekin time par। achha hai, nayon-nayon ko to nai baaten milti hain। padhaai mein attention bahut zaroori hai। padhaai maana sirf sunna nahin। padhaai ka arth hai sunna aur karna। achha,sab khushhaal to hain hi। behaal nahin,khushhaal ho। achha। (ejukeshan abhiyaan ke bhaai-bahnen baapdaada ke saamne khade hue) achha hai, seva ka phal, madhuban mein aane ki chhutti mil gai। lekin inaam tabhi denge jab government se kahalvaayenge। kahne se bhi kuchh nahin hota। ye to official likha-padhi ho। kahne mein to prime minister bhi kahkar gaya-bahut achha hai, bahut achha hai। to chaahe doctors, ejukeshan vaale va injeeniyarsa aadi, jo bhi seva arth rally nikaalte hain vo achha hai। to mubaarak ho।

achha! om shanti।