शुक्रवार 22 मार्च 1996 की अव्यक्त मुरली

>

22-03-96 om shanti avyakt baapdaadaamdhuban

‘‘brahman jeevan ki personality - sab prashnon se paar sada prasannachitta rehna’’

aaj sarva praapti daata, baapdaada apne sarva praapti swaroop bachchon ko dekh rahe hain। baapdaada dvaara praaptiyaan to bahut hui hain, jiska agar varnan karo to bahut hain lekin lambi list bataane ke bajaae yahi varnan karte ho ki ‘apraapta nahin koi vastu is brahman jeevan mein।’ to baapdaada dekh rahe hain ki praaptiyaan to bahut hain,lambi list hai na! to jisko sarva praaptiyaan hain uski nishaani pratyaksha jeevan mein kya dikhaai degi-woh jaante ho na?sarva praaptiyon ki nishaani hai - sada uske chehre aur chalan mein prasannata ki personality dikhaai degi। personality hi kisi ko bhi aakarshit karti hai। to sarva praaptiyon ki nishaani - prasannata ki personality hai, jisko santushtata bhi kehte hain। lekin aajkal chehre par jo sada prasannata ki jhalak dekhne mein ave, woh nahin dikhaai deti। kabhi prasannachitta aur kabhi prashnachitta। do prakaar ke hain, ek hain - jaraasi paristhiti aai to prashnachitta - kyon, kya,kaise, kab … yeh prashnachitta। aur praapti swaroop sada prasannachitta honge। usko kabhi bhi kisi bhi baat mein question (prashn) nahin hoga। kyonki sarva praaptiyon se sampanna hai। to yeh kyon,kya jo hai woh halchal hai,jo sampanna hota hai usmein halchal nahin hoti hai। jo khaali hota hai, usmein halchal hoti hai। to apne aapse poochho ki main sada prasannachitta rehti va rehta hoon? kabhi-kabhi nahin sada? 10varsha vaale to sada honge ya nahin?haan nahin karte, soch rahe hain? prasannata agar kam hoti hai to uska kaaran praapti kam aur praapti kam ka kaaran,koi na koi ichchha hai। ichchha ka foundation eershya aur apraapti hai। bahut sookshm ichchhaayen apraapti ke taraph kheench leti hain,phir royal roop mein yahi kehte hain-ki meri ichchha nahin hai, lekin ho jaae to achha hai। lekin jahaan alpakaal ki ichchha hai, vahaan achha ho nahin sakta। to check karo-chaahe gyaan ke jeevan mein, gyaan ke royal roop ki ichchhaayen,chaahe mote roop ki ichchhaayen, abhi dekha jaata hai ki mote roop ki ichchhaayen samaapta hui hain lekin royal ichchhaayen gyaan ke baad sookshm roop mein rahi hui hain,woh check karo। kyonki baapdaada abhi sabhi bachchon ko baap samaan sampanna,sampoorn banaane chaahte hain। jisse pyaar hota hai,uske samaan banna koi mushkil baat nahin hoti hai।

to baapdaada se sabka bahut pyaar hai ya pyaar hai? (bahut pyaar hai) pakka? to pyaar ke peechhe tyaag karna ya parivartan karna kya badi baat hai? (nahin)। to poora tyaag kiya hai? jo baap kehta hai, jo baap chaahta hai woh kiya hai?sada kiya hai?kabhi-kabhi se kaam nahin chalega। sada ka raajya bhaagya praapta karna hai ya kabhi-kabhi ka? sada ka chaahiye na? to sada prasannata,aur koi bhi bhaav chehre par va chalan mein dikhaai nahin de। kabhi-kabhi kehte hain na aaj behen ji ya bhaai ji ka mood aur hai। aap bhi kehte ho aaj mera mood aur hai। to isko kya kahenge? sada prasannata hui? kai bachche prashansa ke aadhaar par prasannata anubhav karte hain lekin woh prasannata alpakaal ki hai। aaj hai kuchh samay ke baad samaapta ho jaayegi। to yeh bhi check karo ki meri prasannata prashansa ke aadhaar par to nahin hai? jaise aajkal makaan banaate hain na to cement ke saath ret ki maatra jyaada daal dete hain, mix karte hain। to yeh bhi aisa hi hai jo foundation mix hai। yathaartha nahin hai। to jaraasa paristhiti ka toofaan aata hai va kisi bhi prakaar ki halchal hoti hai to prasannata ko samaapta kar deti hai। to aisa foundation to nahin hai? baapdaada ne pahle bhi sunaaya hai, ab phir se underline kar rahe hain ki royal roop ki ichchha ka swaroop naam,maan aur shaan hai। aadhaar service ka lete hain, service mein naam ho। lekin jo naam ke peechhe seva karte hain, unka naam alpakaal ke liye to ho jaata hai ki bahut achha serviceable hai, bahut achha aakarshan karne vaale hain lekin naam ke aadhaar par seva karne vaale ka oonch pad mein naam peechhe ho jaata hai। kyonki kachcha phal kha liya, paka hi nahin। to pakka phal kahaan khaayenge, kachcha kha liya। abhi-abhi seva ki, abhi-abhi naam paaya to yeh kachcha phal hai, ya ichchha rakhi ki seva to mainne bahut ki, sabse jyaada seva ke nimitta main hoon, ye naam ke aadhaar par seva hui -ise kahenge kachcha phal khaane vaale। to kachche phal mein taakat hoti hai kya? va seva ki, to seva ke result mein mere ko maan milna chaahiye। yeh maan nahin hai lekin abhimaan hai। jahaan abhimaan hai vahaan prasannata rah nahin sakti। sabse bada shaan baapdaada ke dil mein shaan praapta karo। aatmaon ke dil mein agar shaan mil bhi gaya to aatma svayan hi lene vaali hai, master daata hai, daata nahin। to shaan chaahiye to sada baapdaada ke dil mein apna shaan praapta karo। ye sab royal ichchhaayen praapti swaroop banne nahin deti hain,isliye prasannata ki personality sada chehre aur chalan mein dikhaai nahin deti hai। kisi bhi paristhiti mein prasannata ki mood parivartan hoti hai to sadaakaal ki prasannata nahin kahenge। brahman jeevan ki mood sada cheerful aur careful। mood badalna nahin chaahiye। phir royal roop mein kehte hain aaj mujhe badi ekaanta chaahiye। kyon chaahiye? kyonki seva va parivaar se kinaara karna chaahte hain, aur kehte hain shanti chaahiye,ekaanta chaahiye। aaj mood mera aisa hai। to mood nahin badli karo। kaaran kuchh bhi ho, lekin aap kaaran ko nivaaran karne vaale ho, ki kaaran mein aane vaale ho? nivaaran karne vaale। theka kya liya hai? contractor ho na? to kya contract liya hai? ki prakriti ki mood bhi change karenge। prakriti ko bhi change karna hai na? to prakriti ko parivartan karne vaale apne mood ko nahin parivartan kar sakte? mood change hoti hai ki nahin? kabhi-kabhi hoti hai? phir kahenge saagar ke kinaare par jaakar baithte hain, gyaan saagar nahin, sthool saagar। foreigners aise karte hain na?ya kahenge aaj pata nahin akela, akela lagta hai। to baap ka combined roop kahaan gaya?alag kar diya?combined se akele ho gaye, kya isi ko pyaar kaha jaata hai?to kisi bhi prakaar ka mood,ek hota hai - mood oph, woh hai badi baat,lekin mood parivartan hona yeh bhi theek nahin। mood oph vaale to bahut bhinna-bhinna prakaar ke khel dikhaate hain,baapdaada dekhte hain, badon ko bahut khel dikhaate hain ya apne saathiyon ko bahut khel dikhaate hain। aisa khel nahin karo। kyonki baapdaada ka sabhi bachchon se pyaar hai। baapdaada yeh nahin chaahta ki jo vishesh nimitta hain,woh baap samaan ban jaaen aur baaki bane ya nahin banen, nahin। sabko samaan banaana hi hai, yahi baapdaada ka pyaar hai। to pyaar ka respond dene aata hai ki naaz-nakhre se return karte ho? kabhi naaz-nakhre dikhaate aur kabhi samaan banke dikhaate hain। abhi woh samay samaapta hua।

abhi diamond jubilee mana rahe ho na? to 60 saal ke baad vaise bhi vaanaprastha shuru hota hai। to abhi chhote bachche nahin ho,abhi vaanaprastha arthaat sab kuchh jaanne vaale,anubhvi aatmaayen ho,knowledgeful ho, powerful ho, successful ho। jaise sada knowledgeful ho aise powerful aur successful bhi ho na? kabheekbhi successful kyon nahin hote, uska kaaran kya hai?vaise saphalta aap sabka janma siddha adhikaar hai। kehte ho na? sirf kehte ho ya maante bhi ho?to kyon nahin saphalta hoti hai, kaaran kya hai? jab apna janma siddha adhikaar hai, to adhikaar praapta hone mein, anubhav hone mein kami kyon? kaaran kya? baapdaada ne dekha hai - majority apne kamjor sankalp pahle hi emerge karte hain, pata nahin hoga ya nahin! to yeh apna hi kamjor sankalp prasannachitta nahin lekin prashnachitta banaata hai। hoga, nahin hoga? kya hoga? pata nahin… yeh sankalp deevaar ban jaati hai aur saphalta us deevaar ke andar chhip jaati hai। nishchaybuddhi vijayi - yeh aapka slogan hai na! jab yeh slogan abhi ka hai, bhavishya ka nahin hai,vartamaan ka hai to sada prasannachitta rehna chaahiye ya prashnachitta?to maaya apne hi kamjor sankalp ki jaal bichha leti hai aur apne hi jaal mein phans jaate ho। vijayi hain hi - isse is kamjor jaal ko samaapta karo। phanso nahin, lekin samaapta karo। samaapta karne ki shakti hai?dheere-dheere nahin karo, phat se second mein is jaal ko badhne nahin do। agar ek baar bhi is jaal mein phans gaye na to nikalna bahut mushkil hai। vijay mera birthright hai,saphalta mera birthright hai। yeh birthright,parmaatma birthright hai,isko koi chheen nahin sakta-aisa nishchaybuddhi,sada prasannachitta sahaj aur svatah rahega। mehnat karne ki bhi zarurat nahin।

asphalta ka doosra kaaran kya hai? aap log doosron ko bhi kehte ho ki samay, sankalp,sampatti sab saphal karo। to saphal karna arthaat saphalta paana। saphal karna hi saphalta ka aadhaar hai। agar saphalta nahin milti to zaroor koi na koi khajaane ko saphal nahin kiya hai, tab saphalta nahin mili। khajaanon ki list to jaante ho na to check karo-kaun sa khajaana saphal nahin kiya, vyartha ganvaaya? to svatah hi saphalta praapta ho jaayegi। yeh varsa bhi hai to vardaan bhi hai - saphal karo aur saphalta paao। to saphal karna aata hai ki nahin?to saphalta milti hai? saphal karna hai beej aur saphalta hai phal। agar beej achha hai to phal nahin mile yeh ho nahin sakta। saphal karne ke beej mein kuchh kami hai tab saphalta ka phal nahin milta। to kya karna hai?sada prasannata ki personality mein raho। prasannachitta rahne se bahut achhe anubhav karenge। vaise bhi koi ko prasannachitta dekhte ho to kitna achha lagta hai! uske sang mein rehna,uske saath baat karna, baithna kitna achha lagta hai! aur koi prashnachitta vaala aa jaae to tang ho jaayenge। to yeh lakshya rakho - kya banna hai? prashnachitta nahin, prasannachitta।

aaj season ka last din hai, to last mein kya kiya jaata hai? koi yagya bhi rachte hain to last mein kya karte hain? svaaha karte hain। to aap kya karenge? prashnachitta ko svaaha karo। yeh kyon hota hai? yeh kya hota hai? … nahin। knowledgeful ho na to kyon,kya nahin। to aaj se yeh vyartha prashn svaaha। aapka bhi time bachega aur doosron ka bhi time bachega। daadiyon ka bhi time ismen jaata hai, yeh kyon, yeh kya, yeh kaise! to yeh samay bachaao, apna bhi aur doosron ka bhi। bachat ka khaata jama karo। phir 21 janma aaraam se khaao,piyo, mauj karo, vahaan jama nahin karna padega। to svaaha kiya ki sochenge?sochna hai,bhale soch lo। apne se poochh lo yeh kaise hoga, yeh kar sakenge ya nahin?yeh ek minute mein soch lo,pakka kaam kar lo। apne se jitne bhi prashn poochhne hon woh ek minute mein poochh lo। poochh liya? svaaha bhi kar liya ya sirf prashn poochh liya? aage ke liye prashn khatma। (ek minute silence ke baad) khatma kiya? (haan ji) aise hi nahin haan kar lena। jab bahutkaal ka anubhav hai ki prashnachitta arthaat pareshaan hona aur pareshaan karna। achhi tarah se anubhav hai na? to apne nishchay aur janma siddha adhikaar ki shaan mein raho to pareshaan nahin honge। jab is shaan se pare hote ho, tabhi pareshaan hote ho। samjha! achhi tarah se samjha ki abhi kahenge - haan samjha aur foreign mein jaayenge to kahenge mushkil hai? aise to nahin? achha।

(aaj baapdaada ke saamne 10varsha se gyaan mein chalne vaale baithe hain)yeh sabhi 10varsha vaale baithe hain, ceremony manaai? baapdaada10 varsha vaale mahaaveer aur mahaaveerniyaan bachchon ko dekh harshit hote hain। aur mubaarak dete hain, vardaan dete hain ‘‘sada nirvighna bhav।’’ jaise 10 varsha himmat rakh baap ke saath aur haath ke aadhaar par 10 varsha majboot rahe ho, aise sada hi himmat ko saathi banaakar rakhna। himmat ko nahin chhodna। jahaan himmat hai - vahaan baap hai hi hai। to baapdaada ko khushi hai ki double videshi bhinna-bhinna prakaar ke aakarshan ke sthaan par rehte hue bhinna dharma aur bhinna prakaar ki culture hote hue bhi brahman culture mein chalte rahe hain, yeh bahut himmat ka sample dikhaaya hai। aapke sample ko dekh anek aatmaayen laabh uthaayengi। isliye himmat ki bhi mubaarak aur himmat dvaara seva ki bhi mubaarak। baapdaada ko bhi khushi hai aap sabko dekh karke। achha।

kahaan-kahaan ke 10 saal vaale hain, haath uthaao। (baapdaada sabhi se alag-alag haath uthvaakar mil rahe hain) achha, Australia vaalon ki khushkhabri suni। himmat rakhi hai, seva ke plan bhi achhe banaaye hain aur saath-saath retreat house bhi le rahe hain। Australia ki bhujaayen kitni hain? (13)jo Australia ke sambandh mein eshiya hai woh haath uthaao। 13 bhujaayen hain, to bhujaayen kya karti hain? sahayog deti hain। to yeh13 bhujaayen kya karengi?sirf dekhkar, sunkar khush hongi? nahin। Australia nivaasiyon ki seva ka return sabhi bhujaaon ko yatha shakti dena hai। paalna lete ho na! to paalna ka return dena - yeh ek pharja hai। samjha। bhujaaon ne samjha? achhe hain। eshiya ka group to bahut achha hai। eshiya najdeek bhi hai na! india bhi eshiya mein aata hai। eshiya mein headquarter hai। to eshiya vaalon ko extra nasha hona chaahiye ki eshiya mein baapdaada aata hai। london, America mein nahin aata। baapdaada ko eshiya pyaara hai। dekho Europe ki mahima apni hai aur eshiya ki mahima apni hai। Europe sabhi double videshiyon ka foundation sthaan hai। seva ka aarambha Europe mein hua hai। chaahe yu.ke. kaho, chaahe Europe kaho, lekin baapdaada ka aana eshiya mein hua। achha।

achha10 varsha vaale haath uthaao। vaise to bahut honge lekin is group ko chance mila hai। yeh bhi luck hai। achha hai, paandav bhi kaaphi hain। to 10 varsha vaalon ko baapdaada aur sarva parivaar ki taraph se padmaguna mubaarak ho। achha।

abhi agli season kya hogi-yeh prashn hai?yeh kaam ka prashn hai isliye bhale poochho, phaaltu prashn nahin। to baapdaada ka drama-plan anusaar yeh plan hai ki yeh varsha diamond jubilee ka hai aur diamond jubilee ki seva ka umang- utsaah chaaron or desh-videsh mein achha hai aur achha rahega। achha hona hi hai। isliye yeh varsha jitna ji bhar karke seva karne chaaho utni karo, is varsha mein chaahe bhaarat, chaahe videsh mein kai bachchon ka umang-utsaah hai ki yathaashakti bade-bade programme karen। aur jab bade programme karte hain to badon ko bulaate hain। to baapdaada ka plan hai ki is varsha jo aise yogya programme honge, aise nahin makaan ki opaaning hai to daadi aave, aise nahin lekin diamond jubilee ke connection mein jo bhi, jahaan bhi, programme yogya hoga,vahaan daadiyaan ja sakti hain। lekin…lekin hai। daadiyon ki tabiyat se sabko pyaar hai na ki sirf seva se hai? seva se pyaar hai ya inki tabiyat se bhi pyaar hai? donon se hai na। isliye svayan bhi soch samajhkar nimantran do,aise nahin ki aana hi hai, nahin to ham naaraaj ho jaayenge। rona shuru kar dete hain, aisa nahin karo। dekho ek taraph yagya ke, ghar ke sabhi maalik ho। aise nahin ham to chhote hain, hamko kya maalum,ham to apne ghar mein the। nahin। vishwa ke jimmevaar ho। kal taaj pahna tha na? (kal 10 saal vaalon ko ceremony mein taaj pahnaaya gaya tha) to jimmevaari ka taaj tha ya gatte ka tha?sabhi ne jimmevaari ka taaj pahna na! to jab bhi koi programme banaate ho to yagya ko bhi dekho, kyonki aaj madhuban aapko aakarshan kyon karta hai? aapke centres bhi to gyaan yog vaale hain, lekin madhuban kyon aakarshit karta hai?kyonki brahma baap ki tapasya, uski sthiti ka sthaan hai। to jo nimitta badi daadiyaan hain, unhon ko yagya ka vaataavran, yagya ki kaarobaar - usko bhi dekhna hai aur aap bhi sab jimmevaar hain। nahin to madhuban mein jo bhi aate hain aur vaataavran se khush hokar jaate hain, uska kaaran kya hai?badon ki sthiti ka sthaan par prabhaav padta hai। to yeh bhi dekho, kyonki yagya (madhuban) ka vaataavran chaaron or phailta hai। aap sabko shakti madhuban ke sthaan se hi milti hai। to madhuban ki kaarobaar, sevaayen,vaataavran,saath-saath daadiyon ki tabiyat usko bhi dekho, phir programme banaao। jab aap kehte ho aao,aur phir kisi ka bhi programme cancel hota hai to thoda bahut sthitiyon mein bhi pharka padta hai isliye pahle se hi soch-samajhkar knowledgeful hokar, jimmevaar hokar phir programme banaao। samjha। iske liye baapdaada yeh poori season seva ke liye chhutti de rahe hain aur baapdaada ki season aur baahar ki seva ka bulaava-yeh donon mein kheenchaataan ho jaati hai isliye is season mein baapdaada, agar December mein neeche ka taiyaar ho jaata hai aur uska udghaatan hona hi hai, to December mein foreign aur india donon ke sangathan ka programme shaantivan ka aarambha karenge। foreign vaale oopar rahen, india vaale neeche rahen, double chance milega। aap double videshi neeche rahenge?pat mein sona padega? apne ataichiyon ko takiya banaana,jagah chaahiye na। to baapdaada is season mein arthaat doosri season jo shuru hogi usmein December mein aayenge aur December ke baad phir 18 January india vaalon ke liye aur teesra foreign vaalon ke liye shivraatri par aayenge। aur chautha agar prabandha theek raha to shiv raatri ke baad April ke aadi mein ek phir se mela rakhenge। jismen foreign vaale bhi hon aur indian bhi hon। to doosri season ka plan yeh hai। jisko jitni seva karni hai woh dil se karo। aur yogya attention rakhke daadiyaan bhi bhale chakkar lagaayen lekin pahle tabiyat phir seva। kheenchaataan nahin karo। abhi time kaaphi hai isliye us anusaar ek to chakkar lagaao aur doosra braahmanon ke rifreshment ki, jo baapdaada ne kaha ki karmaateet banne ka, ashareeri banne ka abhyaas karo-to iske liye group vaaiz braahmanon ka sangathan yahaan rakh sakte ho। har maas ka alag-alag programme banaao, jo seva bhi ho aur braahmanon ki rifreshment bhi ho। baaki ek hi varsha mein kheenchaataan se foreign mein jaana hi hai,aisi kheenchaataan nahin karo। aaraam se banaao, abhi aage ka samay bhi bahut hai isliye is varsha mein va is season mein ek chakkar foreign ka phir doosre samay mein doosra chakkar banaao to aaraam se, sneh se, seva aur daadiyon ke tabiyat ka balance rakho। samjha! to doosri season ka yahi plan hai,phir aage dekhenge। kyonki vartamaan samay chaahe desh mein,chaahe videsh mein halchal bhi honi hi hai। to jitna seva ka chance le sakte ho utna le lo। samjha! (drill)

ek second mein ashareeri banna-yeh paath pakka hai?abhi-abhi vistaar, abhi-abhi saar mein sama jaao। (baapdaada ne phir se drill karaai)achha-is abhyaas ko sada saath rakhna।

chaaron or ke sarva prashnachitta se parivartan hone vaale, sada prasannachitta ke personality vaale shreshtha aatmaayen, sada apne vijay aur janma siddha adhikaar ke smriti mein rahne vaale,smriti swaroop vishesh aatmaayen, sada saphal karne se sahaj saphalta ka anubhav karne vaale, baap ke sameep aatmaon ko baapdaada ka yaad pyaar aur namaste। jo double videsh ke chaaron or ke 10 varsha vaale bachche hain unhon ko vishesh mubaarak aur yaad-pyaar।

daadiyon se

baapdaada ko aap parivaar ke sirtaaj nimitta aatmaon ke liye’’ sada jeete raho, udte raho aur udaate raho’’-yeh sankalp sada rehta hai। apne yog ki tapasya ke shakti se shareeron ko chala to rahe ho lekin aapse jyaada baapdaada ko ona rehta hai। isliye samay pramaan fast chakkar nahin lagaao। aaraam se jaao aur aao kyonki duniya ki paristhitiyaan bhi fast badal rahi hain। isliye seva ki baapdaada mana nahin karte hain, lekin balance। sabhi ke praan aapke shareeron mein hain, tan theek hai to seva bhi achhi hoti jaayegi। isliye seva khoob karo lekin jyaada dhakka nahin lagaao,thoda dhakka lagaao। jyaada dhakka lagaane se kya hota hai? battery slow ho jaati hai। isliye balance abhi se rakhna aavashyak hai। aise nahin socho yeh varsha to kar len,doosra varsha pata nahin kya hai? nahin। jeena hai aur udaana hai। abhi to aapka part hai na? to apne part ko samajhkar dhakka lagaao lekin balance mein dhakka lagaao। theek hai। fast nahin banaao, do din yahaan hai to teesre din vahaan hain,nahin। abhi woh time nahin hai, jab aisa time aayega to ek din mein chaar-chaar sthaan par bhi jaana padega lekin abhi nahin।

(sabha se) aap sabka kya vichaar hai?theek hai na? (nirmala behen se) achha hai chaaron or eshiya ko achha sambhaala hai। part bhi seva ka achha bajaaya hai। chaahe Europe ne, chaahe Australia ne, chaahe aphreeka ne…sabhi ne bahut achha zimmevaari se part bajaaya hai aur jitna attention diya uska pratyakshaphal saphalta bhi mili। aise nahin ki Australia ki duty thi,unhon ne kiya। nahin,sabhi taraph ke double videshiyon ne achhi-achhi aatmaayen madhuban tak laai aur saphalta paai। backbone mein sabhi saathi rahe aur sada rehna hi hai। (is baar jarmani bahut aaya hai) achha hai jaise Australia vaalon ne pratyaksha parivartan ka swaroop dikhaaya, aise jarmani vaalon ko aisa pratyaksha swaroop dikhaana hai jo har ek centre sabse achha aur sankhya mein bhi sabse number one ho। abhi jarman ki kamaal dekhenge। saare brahman parivaar ki nazar jarmani par hai। kyonki bhavishya mein jarman bahut sahayogi banne vaali hai। abhi bhi madadgaar hai, mubaarak ho। abhi aisi kamaal karke dikhaana jo kisi ne nahin kiya ho,london ne bhi nahin kiya ho। (london vaalon ne tyaag kiya hai, sudesh behen ko vahaan seva par bheja hai) yeh tyaag nahin hai, bhaagya hai। london vaalon ne apna bhaagya banaaya hai ki tyaag kiya hai? jo padhaaya hai uska phal bhi to dena hai। to phal hai - doosron ko sahayog dena। yeh london ke hi to kamre hain। london hai haal aur baaki sab hain kamre। koi bade koi chhote। khush hain na?achha।

teachers haath uthaao,bahut hain। (aaj peechhe baithi hain) door hote bhi sameep ho। shareer se door ho lekin dil se bahut sameep ho। teachers achhi mehnat kar rahi hain। chaaron or ki teachers mehnat aur himmat ka pratyaksha roop dikha rahi hain। achha।

jayanti behen (london), mohini behen (America)

(baba ko thanks)bachchon ki himmat aur baap ki madad। pahla kadam - bachchon ki himmat aur padmaguna baap ki madad। achhi responsibility uthaai hai aur aage bhi badhta rahega। achha chal raha hai,plan achha banaaya hai। achha।