बुधवार 3 अप्रैल 1996 की अव्यक्त मुरली

>

03-04-96 om shanti avyakt baapdaadaamdhuban

‘sevaaon ke saath-saath behad ki vairaagya vritti dvaara puraane va vyartha sanskaaron se mukta bano’’

aaj behad ka baap apne behad ke sada sahayogi saathiyon ko dekh rahe hain। chaaron or ke sada sahayogi bachche,sada baap ke dil par diltakhtansheen,niraakaar baap ko apna akaal takhta bhi nahin hai lekin tum bachchon ko kitne takhta hain? to baapdaada takhtansheen bachchon ko dekh sada harshit rehte hain-vaah mere takhtansheen bachche! bachche baap ko dekh khush hote hain,aap sabhi baapdaada ko dekh khush hote ho lekin baapdaada kitne bachchon ko dekh khush hote hain kyonki har ek bachcha vishesh aatma hai। chaahe last number bhi hai lekin phir bhi last hote bhi vishesh koto mein koi,koi mein koi ki list mein hai। isliye ek-ek bachche ko dekh baap ko jyaada khushi hai va aapko hai? (donon ko) baap ko kitne bachche hain! jitne bachche utni khushi aur aapko sirf double khushi hai,bas। aapko parivaar ki bhi khushi hai lekin baap ki khushi sadaakaal ki hai aur aapki khushi sadaakaal hai ya kabhi neeche oopar hoti hai?

baapdaada samajhte hain ki brahman jeevan ka shvaas khushi hai। khushi nahin to brahman jeevan nahin aur avinaashi khushi,kabhi-kabhi vaali nahin, percentage vaali nahin। khushi to khushi hai। aaj 50 percent khushi hai, kal100 percent hai,to jeevan ka shvaas neeche oopar hai na! baapdaada ne pahle bhi kaha hai ki shareer chala jaae lekin khushi nahin jaae। to yeh paath sada pakka hai ya thoda- thoda kachcha hai? sada underline hai?kabhi-kabhi vaale kya honge? sada khushi mein rahne vaale paas with honour aur kabhi-kabhi khushi mein rahne vaalon ko dharmaraajpuri paas karni padegi। paas with honour vaale ek second mein baap ke saath jaayenge, rookenge nahin। to aap sab kaun ho? saath chalne vaale ya rookne vaale? (saath chalne vaale) aisa chart hai? kyonki vishesh diamond jubilee ke varsha mein baapdaada ki har ek bachche ke prati kya shubh aasha hai,woh to jaante ho na?

baapdaada ne sabhi bachchon ka chart dekha। usmein kya dekha ki vartamaan samay ke pramaan ek baat ka vishesh aur attention chaahiye। jaise seva mein bahut umang- utsaah se aage badh rahe ho aur diamond jubilee mein vishesh seva ka umang- utsaah hai, ismen paas ho। har ek yatha shakti seva kar rahe hain aur karte rahenge। lekin ab vishesh kya chaahiye? samay sameep hai to samay ki sameepta ke anusaar ab kaun si lahar honi chaahiye? (vairaagya ki) kaun sa vairaagya - had ka ya behad ka? jitna seva ka umang-utsaah hai, utna samay ki aavashyakta pramaan sva-sthiti mein behad ka vairaagya kahaan tak hai? kyonki aapke seva ki saphalta hai jaldi se jaldi praja taiyaar ho jaae। isliye seva karte ho na?to jab tak aap nimitta aatmaon mein behad ki vairaagya vritti nahin hai, to anya aatmaon mein bhi vairaagya vritti nahin aa sakti aur jab tak vairaagya vritti nahin hogi to jo chaahte ho ki baap ka parichay sabko mile, woh nahin mil sakta। behad ka vairaagya sadaakaal ka vairaagya hai। agar samay pramaan va circumstance pramaan vairaagya aata hai to samay number one ho gaya aur aap number do ho gaye। paristhiti ya samay ne vairaagya dilaaya। paristhiti khatma, samay paas ho gaya to vairaagya paas ho gaya। to usko kya kahenge - behad ka vairaagya ya had ka? to abhi behad ka vairaagya chaahiye। agar vairaagya khandit ho jaata hai to uska mukhya kaaran hai - deh-bhaan। jab tak deh-bhaan ka vairaagya nahin hai tab tak koi bhi baat ka vairaagya sadaakaal nahin hota hai, alpakaal ka hota hai। sambandh se vairaagya - yeh badi baat nahin hai, woh to duniya mein bhi kaeeyon ko dil se vairaagya aa jaata hai lekin yahaan deh-bhaan ke jo bhinna-bhinna roop hain, un bhinnabhinna roopon ko to jaante ho na? kitne deh-bhaan ke roop hain, uska vistaar to jaante ho lekin is anek deh-bhaan ke roopon ko jaankar, behad ke vairaagya mein rehna। deh-bhaan,dehi-abhimaan mein badal jaae। jaise deh-bhaan ek natural ho gaya,aise dehi-abhimaan natural ho jaae kyonki har baat mein pahla shabd deh hi aata hai। chaahe sambandh hai to bhi deh ka hi sambandh hai,padaartha hain to deh ke padaartha hain। to mool aadhaar deh-bhaan hai। jab tak kisi bhi roop mein deh-bhaan hai to vairaagya vritti nahin ho sakti। aur baapdaada ne dekha ki vartamaan samay jo deh-bhaan ka vighna hai uska kaaran hai ki deh ke jo puraane sanskaar hain,usse vairaagya nahin hai। pahle deh ke puraane sanskaaron se vairaagya chaahiye। sanskaar sthiti se neeche le aate hain। sanskaar ke kaaran seva mein va sambandh-samparka mein vighna padte hain। to result mein dekha ki deh ke puraane sanskaar se jab tak vairaagya nahin aaya hai, tab tak behad ka vairaagya sada nahin rehta। sanskaar bhinna-bhinna roop se apne taraph aakarshit kar lete hain। to jahaan kisi bhi taraph aakarshan hai,vahaan vairaagya nahin ho sakta। to check karo ki main apne puraane va vyartha sanskaar se mukta hoon? kitni bhi koshish karenge,karte bhi hain ki vairaagya vritti mein rahen lekin sanskaar koi-koi ke paas ya majority ke paas kis na kis roop mein aise prabal hain jo apni taraph kheenchate hain। to pahle puraane sanskaar se vairaagya। sanskaar na chaahte bhi emerge ho jaate hain kyon? chaahte nahin ho lekin sookshm mein sanskaaron ko bhasma nahin kiya hai। kahaan na kahaan ansh maatra rahe hue hain, chhipe hue hain woh samay par na chaahte hue bhi emerge ho jaate hain। phir kehte hain - chaahte to nahin the lekin kya karen, ho gaya, ho jaata hai … yeh kaun bolta hai - deh-bhaan ya dehi-abhimaan?to baapdaada ne dekha ki sanskaaron se vairaagya vritti mein kamjori hai। khatma kiya hai lekin ansh bhi nahin ho,aisa khatma nahin kiya hai aur jahaan ansh hai to vansh to hoga hi। aaj ansh hai, samay pramaan vansh ka roop le leta hai। parvash kar deta hai। kahne mein to sabhi kya kehte hain ki jaise baap knowledgeful hai vaise ham bhi knowledgeful hain,lekin jab sanskaar ka vaar hota hai to knowledgeful hain ya knowledge pul hain? kya hain? knowledgeful ke bajaae knowledge pul ban jaate ho। us samay kisi se bhi poochho to kahenge - haan,samajhti to main bhi hoon,samajhta to main bhi hoon,hona nahin chaahiye, karna nahin chaahiye lekin ho jaata hai। to knowledgeful hue ya knowledge pul hue? (knowledgeful arthaat knowledge ko kheenchane vaale) jo knowledgeful hai use koi bhi sanskaar, sambandh,padaartha vaar nahin kar sakta।

to diamond jubilee mana rahe ho, diamond jubilee ka arth hai - diamond banna arthaat behad ke vairaagi banna। jitna seva ka umang hai utna vairaagyavritti ka attention nahin hai। ismen albelaapan hai। chalta hai… hota hai…ho jaayega…samay aayega to theek ho jaayega… to samay aapka shikshak hai ya baba shikshak hai? kaun hai? agar samay par parivartan karenge to aapka shikshak to samay ho gaya! aapki rachna aapka shikshak ho - ye theek hai?to jab aisi paristhiti aati hai to kya kehte ho?samay par theek kar loongi, ho jaayega। baap ko bhi dilaasa dete hain - phikar nahin karo,ho jaayega। samay par bilkul aage badh jaayenge। to samay ko shikshak banaana - yeh aap master rachayita ke liye shobhta hai? achha lagta hai? nahin। samay rachna hai,aap master rachayita ho। to rachna master rachayita ka shikshak banen yeh master rachayita ki shobha nahin। to abhi jo baapdaada ne samay diya hai, usmein vairaagya vritti ko emerge karo kyonki seva ki kheenchaataan mein vairaagyavritti khatma ho jaati hai। vaise seva mein khushi bhi milti hai, shakti bhi milti hai aur pratyakshaphal bhi milta hai lekin behad ka vairaagya khatma bhi seva mein hi hota hai। isliye ab apne andar is vairaagya vritti ko jagaao। kalpa pahle bhi bane to aap hi the ki aur the?aap hi hain na। sirf merge hai, usko emerge karo। jaise seva ke plan ko practical mein emerge karte ho, tab saphalta milti hai na। aise abhi behad ke vairaagya vritti ko emerge karo। chaahe kitne bhi saadhan praapta hain aur saadhan to aapko din pratidin jyaada hi milne hain lekin behad ke vairaagya vritti ki saadhna merge nahin ho, emerge ho। saadhan aur saadhna ka balance, kyonki aage chalkar ke prakriti aapki daasi hogi। satkaar milega, svamaan milega। lekin sab kuchh hote vairaagya vritti kam nahin ho। to behad ke vairaagya vritti ka vaayumandal svayan mein anubhav karte ho ki seva mein busy ho gaye ho? jaise duniya vaalon ko seva ka prabhaav dikhaai deta hai na! aise behad ke vairaagya vritti ka prabhaav dikhaai de। aadi mein aap sabhi ki sthiti kya thi? paakistaan mein jab the, seva nahin thi, saadhan the lekin behad ke vairaagyavritti ke vaayumandal ne seva ko badhaaya।

to jo bhi diamond jubilee vaale hain unhon mein aadi sanskaar hain,ab merge ho gaye hain। ab phir se is vritti ko emerge karo। aadi ratnon ke behad ke vairaagya vritti ne sthaapna ki,abhi nai duniya ki sthaapna ke liye phir se vahi vritti,vahi vaayumandal emerge karo। to suna kya zarurat hai? saadhan hi nahin hai aur kaho, hamko to vairaagya hai,to kaun maanega? saadhan ho aur vairaagya ho। pahle ke saadhan aur abhi ke saadhnon mein kitna antar hai? saadhna chhip gai hai aur saadhan pratyaksha ho gaye hain। achha hai saadhan bade dil se use karo kyonki saadhan aapke liye hi hain, lekin saadhna ko merge nahin karo। balance poora hona chaahiye। jaise duniya vaalon ko kehte ho ki kamal pushpa samaan bano to saadhan hote hue kamal pushpa samaan bano। saadhan bure nahin hain,saadhan to aapke karma ka,yog ka phal hain। lekin vritti ki baat hai। aise to nahin ki saadhan ke pravritti mein, saadhnon ke vash phans to nahin jaate? kamal pushpa samaan nyaare aur baap ke pyaare। use karte hue unhon ke prabhaav mein nahin aaye, nyaare। saadhan, behad ki vairaagya vritti ko merge nahin kare। abhi vishwa ati mein ja rahi hai to abhi aavashyakta hai - sachche vairaagya-vritti ki aur woh vaayumandal banaane vaale aap ho,pahle svayan mein, phir vishwa mein। to diamond jubilee vaale kya karenge?lahar phailaayenge na?aap log to anubhvi hain। shuru ka anubhav hai na! sab kuchh tha, deshi ghi khaao jitna kha sakte, phir bhi behad ki vairaagya vritti। duniya vaale to deshi ghi khaate hain lekin aap to peete the। ghi ki nadiyaan dekhi। to diamond jubilee vaalon ko vishesh kaam karna hai - aapas mein ikatthe hue ho to roohrihaan karna। jaise seva ki meeting karte ho vaise iski meeting karo। jo baapdaada kehte hain, chaahte hain second mein ashareeri ho jaayen - uska foundation yeh behad ki vairaagya vritti hai, nahin to kitni bhi koshish karenge lekin second mein nahin ho sakenge। yuddha mein hi chale jaayenge aur jahaan vairaagya hai to ye vairaagya hai yogya dharni,usmein jo bhi daalo uska phal phauran nikalta। to kya karna hai? sabhi ko feel ho ki bas hamko bhi abhi vairaagya vritti mein jaana hai। achha। samjha kya karna hai?sahaj hai ya mushkil hai?thoda-thoda aakarshan to hogi ya nahin?saadhan apne taraph nahin kheenchenge? abhi abhyaas chaahiye-jab chaahe,jahaan chaahe,jaisa chaahiye - vahaan sthiti ko second mein set kar sake। seva mein aana hai to seva mein aaye। seva se nyaare ho jaana hai to nyaare ho jaaen। aise nahin, seva hamko kheenche। seva ke bina rah nahin saken। jab chaahen, jaise chaahen, will power chaahiye। will power hai?stop to stop ho jaae। aise nahin lagaao stop aur ho jaae question mark। fullstop। stop bhi nahin fullstop। jo chaahen woh practical mein kar saken। chaahte hain lekin hona mushkil hai to isko kya kahenge? will power hai ki power hai? sankalp kiya - vyartha samaapta, to second mein samaapta ho jaae।

baapdaada ne sunaaya na ki kai bachche kehte hain - ham yog mein baithte hain lekin yog ke bajaae yuddha mein hote hain। yogi nahin hote, yoddhe hote hain aur yuddha karne ke agar sanskaar bahutkaal rahe to kya banenge?sooryavanshi va chandravanshi?socha aur hua। sochna aur hona, second ka kaam hai। isko kehte hain - will power। will power hai ki plan bahut achhe banaate lekin plan bante hain 10aur practical mein hote hain 5,aise to nahin hota? sochte bahut achha hain - yeh karenge, yeh hoga, yeh hoga lekin practical mein antar pad jaata hai। to abhi aisi will power ho, sankalp kiya aur karma mein practical mein hua pada hai, aise anubhav ho। nahin to dekha jaata hai amritvele jab baap se roohrihaan karte, bahut achhi-achhi baaten bolte hain, yeh karenge, yeh karenge…aur jab raat hoti to kya result hoti? baap ko khush bahut karte hain, baaten itni meethi-meethi karte hain, itni achhi-achhi karte hain, baap bhi khush ho jaata, vaah mere bachche! kehte hain - baba,bas aapne jo kaha na, hona hi hai। hua pada hai। bahut achhi-achhi baaten karte hain। kai to baap ko itna dilaasa dilaate hain ki baba ham nahin honge to kaun hoga। baba kalpa-kalpa ham hi to the, khush ho jaate।

(haal mein peechhe baithne vaalon se) peechhe baithne vaale achhi tarah se sun rahe ho na?

aage vaalon se pahle peechhe vaale karenge? baithe peechhe ho lekin sabse sameep dil par ho। kyon?doosre ko chance dena yeh seva ki na! to sevaadhaari sada baap ke dil par hain। kabhi bhi aise nahin sochna ki ham bhi agar daadiyaan hoti na to jara sa…lekin saamne to kya dil par ho। aur dil bhi saadhaaran dil nahin, takhta hai। to dilakhtansheen hain na। kahaan bhi baithe ho,chaahe is kone mein baithe ho, chaahe neeche baithe ho,chaahe cabin mein baithe ho… lekin baap ke dil par ho।

sabhi diamond jubilee manaane ke liye bhaage hain? to sirf daadiyaan diamond hain ya aap bhi diamond ho?aap bhi diamond ho na! nimitta shuru vaalon ki manaate hain lekin pahle aap। achha-diamond jubilee vaale haath uthaao। diamond jubilee inhon ki manaate ho lekin aap nahin hote to manaate kaun? shobha to manaane vaalon se hai। to sabhi ko manaane ki khushi hai kyonki samajhte hain ki inhon ki diamond jubilee hona arthaat hamaara number aa hi gaya। yeh nihsvaartha sevaadhaari hain। isliye dekhkarke khushi hoti hai, eershya nahin hoti hai ki kyon inhon ka manaate hain, hamaara kyon nahin? kya aisa sochte ho ki inhon ka hi kyon manaaya jaata? sochte ho? nahin। bahut khushi hai। yeh aadi kaal ke ratnon ke tyaag ka bhaagya hai, jo kisko eershya nahin hoti, khushi hoti hai। aur hamashreek honge na to kisko eershya bhi hogi, kyon ham bhi to hain,ham bhi to hain। lekin ye inhon ke tyaag ka bhaagya hai isliye kisko eershya nahin hoti। dekho,inhon ke tyaag ne aap sabko laaya hai। agar ye nimitta nahin bante, foreign mein bhi aadi ratna nimitta bane tab to aap paida hue। to achhi tarah se khoob dhoomdhaam se manaao। baapdaada bhi khush hai। achha।

10 varsha vaalon ka bhi manaate rehte hain। double foreigners ka manaaya tha na। abhi is group mein bhi bahut 10varsha vaale honge। to sabhi chaahe 10varsha vaale, chaahe 10varsha se bhi pahle vaale un sabhi ko baapdaada dil se mubaarak dekar mana rahe hain। (sabhi ne khoob taaliyaan bajaai) manaana arthaat sabki duaayen lena। yeh taaliyaan bajaana arthaat aap sabko sabhi ki duaayen mili। aur first time vaale bhi bahut hain, aap sab first time vaalon ko fast jaane ki duaayen। chaahe first time vaale hain,chaahe 10varsha, 20varsha vaale hain lekin har ek aatma is brahman parivaar ki vishesh shobha ho। ek ratna bhi kam hota hai to shobha nahin hoti hai। to baapdaada sabhi bachchon ko usi nazar se dekhte hain ki yeh har ek ratna is brahman parivaar ka shrringaar hai। shrringaar ho na? bahut vailyuebal shrringaar ho। isliye abhi tak aapke jad chitron ko kitna shrringaar karte rehte hain। abhi last janma tak bhi shrringaar hota rehta hai। aisi khushi hai?bhagwan ka shrringaar banna kam baat hai kya!

achha-jo aadi ratna hain,jinki diamond jubilee manaai ja rahi hai unse prashn poochhte hain ki aadi ratnon ko kaun si baat bahut sahaj hai?doosron ko thoda time lagta hai lekin aadi ratnon ko bahut sahaj aur natural hai, woh kaun si baat? uttar do। (baba ko apna banaana)

sabha se

aap logon ko apna banaana sahaj hai ya mushkil hai?achha apna bana liya hai ya bana rahe hain? bana liya-pakka?ya kabhi-kabhi aise (kaandh peechhe) kar lete ho? naaz-nakhre to nahin karte ho? kabhi-kabhi bahut khel dikhaate hain। to baap ko to apna banaaya। baap ko apna banaana arthaat sada saath aur haath ka anubhav karna। to aadi ratnon ko baap ke saath ka anubhav karna bahut sahaj hai। kyonki saakaar mein saath ka anubhav kiya hai। aapko phir bhi emerge karna padta hai lekin inhonne practical tumheen saath rehna, khaana,chalna, phirna…yeh practical saakaar mein anubhav kiya hai। to saakaar mein anubhav ki hui cheez sahaj yaad rehti hai। ye inhon ka luck hai ki baap ke saath ka anubhav ye jab chaahen tab kar sakte hain। aise hai? lekin drama mein aap logon ke liye khaas ek lift hai,jo avyakt roop mein aaye hain, saakaar roop mein draamaanusaar peechhe aaye hain, unhon ko extra lift hai, kaun si lift hai?jab chaaho tab baapdaada ki extra madad milti hai। sankalp ka ek kadam aapka aur sahayog ke bahut kadam baap ke। iseelie aapko extra lift hai। samjha? aap bhi kam nahin ho। achha-

aadi ratnon ko padmaguna baapdaada ki sarva sambandhon se mubaarak ho, mubaarak ho।

chaaron or ke takhtansheen shreshtha bhaagyavaan aatmaayen,sada behad ke vairaagya vritti se vaayumandal banaane vaale vishesh aatmaayen, sada apne shreshtha visheshtaaon ko kaarya mein lagaane vaale vishesh aatmaayen,sada ek baap ke saath aur shreemat ke haath ko anubhav karne vaale sameep aatmaon ko baapdaada ka yaadapyaar aur namaste।

daadiyon se

sabse jyaada duaayen aap longon ko milti hain। sabko in nimitta ratnon se pyaar kyon hai,kaaran kya?kyonki inhon ka baap se har shvaas mein pyaar hai,har shvaas mein baba-baba hai na? natural hai, mehnat nahin hai। mehnat karni nahin padti। to jitna inhon ka baap se pyaar hai, utna aap ka inhon se hai kyonki saakaar mein nimitta hain,baap samaan hain। chaahe kabhi kisi ko shiksha bhi deti hain, shiksha ke samay kisko dil mein lagta bhi hai lekin phir anubhav karte hain ki hamaare kalyaan ki bhaavna se shiksha di। to bhaavna shubh hai - isliye shiksha dil se lagti hai। aur nimitta banne vaalon ka vishesh backbone baap hai। chaahe bol inhon ke hain lekin backbone baap hai। kabhi bhi inhon ke mukh se ‘main’shabd nahin niklega। baba-baba niklega। to ye yaad ka proof hai। ‘main pan’ baba mein sama gaya। achha

(aaj bahut khushi ho rahi hai ki 60varsha aapki paalna mein beete hain)

khushi to aap ka shvaas hai,aap ki khushi koi chheen nahin sakta। kabhi khushi gum hoti hai?chaahe koi aadi ratna sthaapna ke hain aur koi aadi ratna seva ki sthaapna ke,donon ka apna-apna mahatva hai। ye sthaapna ke aadi ratna vo seva ke aadi ratna। aapne sthaapna ki lekin seva ki vriddhi to inhonne ki।

achha। om shanti।