शुक्रवार 30 नवंबर 2018 की अव्यक्त मुरली

> om shanti 30-11-18 madhuban

praanapyaare avyakt baapdaada ke ati laadle, sada sarva avinaashi khajaanon se sampanna, richest in di kalpa, holiest aur highest sarva nimitta teachers bahinen tatha brahman kul bhooshan bhaai bahinen,

eeshvareey sneh sampanna madhur yaad sveekaar karna ji।

baad samaachaar - pyaare baapdaada ki sookshm shaktiyon aur vardaanon ka direct anubhav karte hue aap sab avyakt avatran divas par usi lagan aur umang-utsaah ke saath alaukik mangal milan ki anubhootiyaan karte rehte ho। yeh seva ka tarna karnaatak ka hai। kareeb 17-18 hajaar bhaai bahinen shaantivan mein pahunche hue hain। sabhi ko bahut achhi gyaan yog ki paalna ke saath, meethi daadi jaanki ji bhi khoob refresh kar rahi hain। chaaron or bahut achhe umang-utsaah ka vaataavran hai। aaj amritvele se hi sabhi bhaai bahinen avyakt sthiti dvaara avyakt anubhootiyaan kar rahe hain। chaaron or bahut shant avyakti vaataavran hai। shaam ke samay vidhivat diamond haal, conference haal, bageeche aadi mein veediyon dvaara murli sunte, usi prabhu pyaar mein samaaye hue hain। yeh bhi kamaal hai meethe baapdaada ki jo har bachche ko bhaavna anusaar poori bhaasna de rahe hain। koi ko bhi yeh mahsoos hone nahin dete ki mera baba se sammukh milan nahin hua। sabhi naye puraane baba ke bachche revise murli dvaara bhi apne aapko khoob bharpoor kar rahe hain। abhi hamaari meethi daadi guljaar ji ke aagman ki pratiksha hai। baba kab apne rath ko madhuban mein pahunchaate hain, iska to sab besabri se intajaar kar hi rahe hain। abhi avyakt baapdaada ke part ki golden jubilee sameep hai। 2019 mein ham sab baba ke avyakt milan ka 50vaan saal manaayenge। isi uplaksha mein chaaron or yog tapasya ke vishesh kaaryakram rakhte hue sabhi brahma baap samaan sampanna aur sampoorn sthiti ka anubhav karen। January maas ke sabhi directions madhuban se aap sabke paas aa jaayenge। zaroor aap sab bhi naya varsha, naye umang-utsaah ke saath manaane ki planning kar rahe honge। achha - aaj jo ham sabhi ne avyakt mahaavaakya sune hai, woh aapke paas bhej rahe hain, sabko refresh karna ji। sarva ko yaad… om shanti।

30-11-18 om shanti video dvaara revise 02-02-07 madhuban

''parmaatma praaptiyon se sampanna aatma ki nishaani - holiest, highest aur richest''

aaj vishwa parivartak baapdaada apne saathi bachchon se milne aaye hain। har ek bachche ke mastak mein teen parmaatma vishesh praaptiyaan dekh rahe hain। ek hai holiest, 2- highest aur 3- richest। is gyaan ka foundation hi hai holi arthaat pavitra banna। to har ek bachcha holiest hai, pavitrata sirf brahmacharya nahin lekin man-vaani-karma, sambandh-samparka mein pavitrata। aap dekho, aap parmaatma brahman aatmaayen aadi-madhya-ant teenon hi kaal mein holiest rehti ho। pahle-pahle aatma jab paramdham mein rehte ho to vahaan bhi holiest ho phir jab aadi mein aate ho to aadikaal mein bhi devta roop mein holiest aatma rahe। holiest arthaat pavitra aatma ki visheshta hai - pravritti mein rehte sampoorn pavitra rehna। aur bhi pavitra bante hain lekin aapki pavitrata ki visheshta hai - svapnamaatra bhi apvitrata man-buddhi mein touch nahin kare। satayug mein aatma bhi pavitra banti aur shareer bhi aapka pavitra banta। aatma aur shareer donon ki pavitrata jo dev aatma roop mein rehti hai, woh shreshtha pavitrata hai। jaise holiest bante ho, itna hi highest bhi bante ho। sabse oonche te oonche brahman aatmaayen aur oonche te oonche baap ke bachche bane ho। aadi mein paramdham mein bhi highest arthaat baap ke saath-saath rehte ho। madhya mein bhi poojya aatmaayen bante ho। kitne sundar mandir bante hain aur kitni vidhipoorvak pooja hoti hai। jitni vidhipoorvak aap devtaaon ke mandir mein pooja hoti hai utne auron ke mandir bante hain lekin vidhipoorvak pooja aapke devta roop ki hoti hai। to holiest bhi ho aur highest bhi ho, saath mein richest bhi ho। duniya mein kehte hain richest in di world lekin aap shreshtha aatmaayen richest in kalpa hain। saara kalpa richest ho। apne khazaane smriti mein aate hain, kitne khazaanon ke maalik ho! avinaashi khazaane jo is ek janma mein praapta karte ho woh anek janma chalte hain। aur koi ka bhi khazaana anek janma nahin chalte। lekin aapke khazaane aadhyaatmik hain। shaktiyon ka khazaana, gyaan ka khazaana, gunon ka khazaana, shreshtha sankalp ka khazaana aur vartamaan samay ka khazaana, yeh sarva khazaane janma-janma chalte hain। ek janma ke praapta hue khazaane saath chalte hain kyonki sarva khazaanon ke daata paramatma baap dvaara praapta hota hai। to yeh nasha hai ki hamaare khazaane avinaashi hain?

is aadhyaatmik khazaanon ko praapta karne ke liye sahajyogi bane ho। yaad ki shakti se khazaane jama karte ho। is samay bhi in sarva khazaanon se sampanna bephikra baadshaah ho, koi phikra hai? hai phikra? kyonki yeh khazaane jo hain isko na chor loot sakta, na raaja kha sakta, na paani dubo sakta, isliye bephikra baadshaah ho। to yeh khazaane sada smriti mein rehte hain na! aur yaad bhi sahaj kyon hai? kyonki sabse jyaada yaad ka aadhaar hota hai ek sambandh aur doosra praapti। jitna pyaara sambandh hota hai utni yaad svatah aati hai kyonki sambandh mein sneh hota hai aur jahaan sneh hota hai to snehi ki yaad karna mushkil nahin hota, lekin bhoolna mushkil hota hai। to baap ne sarva sambandh ka aadhaar bana diya hai। sabhi apne ko sahajyogi anubhav karte ho? va mushkil yogi hain? sahaj hai? ki kabhi sahaj hai, kabhi mushkil hai? jab baap ko sambandh aur sneh se yaad karte ho to yaad mushkil nahin hoti aur praaptiyon ko yaad karo। sarva praaptiyon ke daata ne sarva praaptiyaan kara di। to apne ko sarva khazaanon se sampanna anubhav karte ho? khazaanon ko jama karne ki sahaj vidhi bhi baapdaada ne sunaai - jo bhi avinaashi khazaane hain un sabhi khazaanon ki praapti karne ki vidhi hai- bindi। jaise vinaashi khazaanon mein bhi bindi lagaate jaao to badhta jaata hai na। to avinaashi khazaanon ki jamaakarne ki vidhi hai bindi lagaana। teen bindiyaan hain - ek main aatma bindi, baap bhi bindi aur drama mein jo bhi beet jaata woh fullstop arthaat bindi। to bindi lagaane aati hai? sabse jyaada sahaj maatra kaun si hai? bindi lagaana na! to aatma bindi hoon, baap bhi bindi hai, is smriti se svatah hi khazaane jama ho jaate hain। to bindi ko second mein yaad karne se kitni khushi hoti hai! yeh sarva khazaane aapke brahman jeevan ka adhikaar hain kyonki bachche banna arthaat adhikaari banna। aur vishesh teen sambandh ka adhikaar praapta hota hai - paramatma ko baap bhi banaaya hai, shikshak bhi banaaya hai aur satguru bhi banaaya hai। in teenon sambandh se paalna, padhaai se source aaph income aur satguru dvaara vardaan milta hai। kitna sahaj vardaan milta hai? kyonki bachche ka janma siddha adhikaar hai baap ke vardaan praapta karne ka।

baapdaada har bachche ka jama ka khaata check karte hain। aap sabhi bhi apne har samay ka jama ka khaata check karo। jama hua va nahin hua, uski vidhi hai jo bhi karma kiya, us karma mein svayan bhi santushta aur jiske saath karma kiya woh bhi santushta। agar donon mein santushtata hai to samjho karma ka khaata jama hua। agar svayan mein va jisse sambandh hai, usmein santushtata nahin aai to jama nahin hota।

baapdaada sabhi bachchon ko samay ki soochna bhi dete rehte hain। yeh vartamaan sangam ka samay saare kalpa mein shreshtha te shreshtha samay hai kyonki yeh sangam hi shreshtha karmo ke beej bone ka samay hai। pratyaksha phal praapta karne ka samay hai। is sangam samay mein ek ek second shreshtha te shreshtha hai। sabhi ek second mein ashareeri sthiti mein sthit ho sakte ho? baapdaada ne sahaj vidhi sunaai hai ki nirantar yaad ke liye ek vidhi banaao - saare din mein do shabd sabhi bolte ho aur anek baar bolte ho woh do shabd hain ‘‘main’’ aur ‘‘mera’’। to jab main shabd bolte ho to baap ne parichay de diya hai ki main aatma hoon। to jab bhi main shabd bolte ho to yeh yaad karo ki main aatma hoon। akela main nahin socho, main aatma hoon, yeh saath mein socho kyonki aap to jaante ho na ki main shreshtha aatma hoon, parmaatma paalna ke andar rahne vaali aatma hoon aur jab mera shabd bolte ho to mera kaun? mera baba arthaat baap paramatma। to jab bhi main aur mera shabd kehte ho us samay yeh addition karo, main aatma aur mera baba। jitna meraapan laayenge baap mein, utna yaad sahaj hoti jaayegi kyonki mera kabhi bhoolta nahin hai। saare din mein dekho mera hi yaad aata hai। to is vidhi se sahaj nirantar yogi ban sakte ho। baapdaada ne har bachche ko svamaan ki seat par bithaaya hai। svamaan ki list agar smriti mein laao to kitni lambi hai! kyonki svamaan mein sthit hain to deh abhimaan nahin aa sakta। ya deh abhimaan hoga ya svamaan hoga। sva maan ka arth hi hai - sva arthaat aatma ka shreshtha smriti ka sthaan। to sabhi apne svamaan mein sthit hain? jitna svamaan mein sthit honge utna doosre ko sammaan dena svatah hi ho jaata hai। to svamaan mein sthit rehna kitna sahaj hai!

to sabhi khushnuma rehte hain? kyonki khushnuma rahne vaala doosre ko bhi khushnuma bana deta hai। baapdaada sada kehte hain ki saare din mein khushi kabhi nahin ganvaao। kyon? khushi aisi cheez hai jo ek hi khushi mein health bhi hai, wealth bhi hai aur happy bhi hai। khushi nahin to jeevan neeras rehti hai। khushi ko hi kaha jaata hai - ‘‘khushi jaisa koi khazaana nahin।’’ kitne bhi khazaane ho lekin khushi nahin to khazaane se bhi praapti nahin kar sakte hain। khushi ke liye kaha jaata hai - khushi jaisi koi khuraak nahin। to wealth bhi hai khushi aur khushi health bhi hai aur naam hi khushi hai to happy to hai hi hai। to khushi mein teenon hi cheeje hain। aur baap ne avinaashi khushi ka khazaana diya hai, baap ka khazaana ganvaana nahin। to sada khush rehte?

baapdaada ne homework diya to khush rehna hai aur khushi baantani hai kyonki khushi aisi cheez hai jo jitni baantenge utni badhegi। anubhav karke dekha hai! kiya hai na anubhav? agar khushi baantate hain to baantane se pahle apne paas badhti hai। khush karne vaale se pahle svayan khush hote hain। to sabhi ne homework kiya hai? kiya hai? jisne kiya hai woh haath uthaao। jisne kiya hai - khush rehna hai, kaaran nahin nivaaran karna hai, samaadhaan swaroop banna hai। haath uthaao। abhi yeh to nahin kahenge na - yeh ho gaya! baapdaada ke paas kai bachchon ne apni result bhi likhi hai ki ham kitne percent O.ke. rahe hain। aur lakshya rakhenge to lakshya se lakshan svatah hi aate hain। achha।

seva ka tarna karnaatak ka hai:- karnaatak vaale utho। achha hai karnaatak vaalon ne seva ka golden chance le liya hai kyonki ab sangamayug mein pratyaksha phal milta hai। jama bhi hota hai lekin pratyakshaphal milta hai jo usi samay khushi praapta hoti hai। to jitna din bhi seva ki hai, to pratyakshaphal apne mein khushi anubhav kiya? khushi mili? haath uthaao। maaya aai? nahin aai? jisko maaya nahin aai woh haath uthaao। paandavon ko maaya aai? thodi-thodi aai hai? achha hai, yahaan ka vaayumandal bahut sahayog deta hai। jaise science vaale science ki shakti se vaayumandal ko parivartan kar dete hain na। garmi mein sardi, hava ka vaayumandal bana dete hain na! sardi mein garmi ka vaayumandal bana dete hain, to silence ki shakti aadhyaatmik smriti ka vaayumandal bana deta hai kyonki yahaan seva karte vritti mein kya rehta hai? yagya seva hai, yagya ka punya bahut bada hota hai। to is avinaashi yagya mein seva karne se vritti shreshtha ban jaati hai। to vaayumandal bhi shreshtha ban jaata hai। abhi karnaatak vaale kya visheshta dikhaayenge? koi naya kaarya karke dikhaao। dekho karnaatak mein sankhya bahut hai aur area bhi bahut hai। seva ki area bahut badi hai। karnaatak vaale bade te badi seva yahi kar sakte hain jo karnaatak ke koi bhi chhote bade koi sthaan nahin rahen jo aapko ulhana deven ki hamaara baap aaya aur humein aapne soochna nahin di, sandesh nahin diya। yeh ulhana nahin rah jaaye।

jo pahli baar aaye hain woh utho:- to aap sabhi ko brahman janma ki mubaarak ho। achha mithaai to milegi lekin baapdaada dilkhush mithaai khila rahe hain। pahle baari madhuban aane ki yeh dilkhush mithaai sada yaad rakhna। woh mithaai to mukh mein daala aur khatma ho jaayegi lekin yeh dilkhush mithaai sada saath rahegi।

baapdaada ki roohaani drill yaad hai na! abhi baapdaada har bachche se chaahe naye hain, chaahe puraane hain, chaahe chhote hain chaahe bade hain, chhote aur hi samaan baap jaldi ban sakte hain। to abhi second mein jahaan man ko lagaane chaaho vahaan man ekaagra ho jaae। yeh ekaagrata ki drill sada hi karte chalo। abhi ek second mein man ke maalik ban main aur mera baba sansaar hai, doosra na koi, is ekaagra smriti mein sthit ho jaao। achha।

chaaron or ke sarva teevra purooshaarthi bachchon ko sada umang-utsaah ke pankhon se udti la ke anubhvi moorta bachchon ko, sada apne svamaan ki seat par set rahne vaale bachchon ko, sada merciful ban vishwa ki aatmaon ko mansa shakti dvaara kuchh na kuchh anchali sukh-shanti ki dene vaale dayaalu, kripaalu bachchon ko, sada baap ke sneh mein samaaye hue diltakhtansheen bachchon ko, baapdaada ka yaadapyaar aur namaste।

daadi jaanki:- hamaara baba wonderful, guljaar daadi ka part bhi wonderful hai। guljaar daadi ne baba ke jo sandesh mere prati diye hain, woh aaj dekhen। saakaar baba ne ham bachchon ko achhi paalna di, baad mein avyakt roop se guljaar daadi dvaara baapdaada ne bhi bahut achhi paalna di hai। sabhi ko yaadapyaar mila, khaas karnaatak vaalon ko bhi baapdaada ne yaad kiya। jo baba mukh se bolta tha woh main padh rahi thi। yeh saadhan wonderful hai। draamaanusaar science ki bhi kamaal hai। ham silence mein rahne vaale baba ke bachche kya karte hain। baba jo hamko hukm karta hai woh automatically life mein aa jaata hai। O.ke.