रविवार 3 मार्च 2019 की दैनिक मुरली

03-03-19 praatahmurli om shanti ''avyakt-baapdaada'' revise 28-02-84 madhuban

'bindu aur boond ka rahasya"

aaj bholaanaath baap apne bhole bachchon se, bachchon ka so baap ka avatran divas arthaat alaukik ruhaani jayanti manaane aaye hain। bholaanaath baap ko sabse priy bhole bachche hain। bhole arthaat jo sada saral svabhaav, shubh bhaav aur svachchhata sampanna man aur karma donon mein sachchaai aur saphaai, aise bhole bachche bholaanaath baap ko bhi apne oopar aakarshit karte hain। bholaanaath baap aise saral svabhaav bhole bachchon ke gunon ki maala sada hi simran karte rehte hain। aap sabhi ne anke janmon mein baap ke naam ki maala simran ki aur baap abhi sangamayug par bachchon ko return de rahe hain। bachchon ki gun maala simran karte hain। kitne bhole bachche bholaanaath ko pyaare hain। jitna gyaan svarup, knowledgeful, powerful utna hi bholaapan। bhagwan ko bholaapan pyaara hai। aise apne shreshtha bhaagya ko jaante ho na, jo bhagwan ko moh liya। apna bana diya।

aaj bhakton aur bachchon donon ka vishesh manaane ka din hai। bhakta taiyaariyaan kar rahe hain, aahvaan kar rahe hain aur aap sammukh baithe ho। bhakton ki leela bhi baap dekh-dekh muskaraate hain aur bachchon ki milan leela dekh-dekh harshaate hain। ek taraph viyogi bhakta aatmaayen, doosre taraph sahaj yogi bachche। donon hi apni-apni lagan se priy hain। bhakta bhi koi kam nahin hain। kal ke din aakaari ishta rup mein chakra lagaakar dekhna। baap ke saath saaligraam bachchon ki bhi vishesh rup se pooja hogi। apna poojan baap ke saath bhakton ka dekhna। abhi ant tak bhi naudha bhakta koi-koi hain jo sachche sneh se bhakti kar bhakti ki bhaavna ka alpa samay ka phal anubhav karte hain। kal ka din bhakton ke bhakti ki vishesh lagan ka din hai। samjha!

aap sabhi baap ki jayanti manaayenge ya apni? saare kalpa mein baap aur bachchon ka ek hi birth-de ho, yeh ho sakta hai? bhal din vahi ho, varsha woh nahin ho sakta। baap aur bachche ka antar to hoga na। lekin alaukik jayanti baap aur bachchon ki saath-saath hai। aap kahenge ham baap ka birth de manaate hain aur baap kehte, bachchon ka birth de manaate hain। to wonderful birth-de ho gaya na। apna bhi manaate, baap ka bhi manaate। isse hi socho ki bholaanaath baap ka bachchon ke saath kitna sneh hai, jo janma din bhi ek hi hai। to itna moh liya na - bholaanaath ko। bhakta log apne bhakti ki masti mein masta ho jaate hain aur aap 'pa liya' isi khushi mein saath-saath manaate, gaate, naachte ho। yaadgaar jo banaaya hai usmein bhi bahut rahasya samaaya hua hai।

pooja mein, chitron mein do visheshtaayen vishesh hain। ek to hai bindu ki visheshta aur doosri hai - boond-boond ki visheshta। pooja ki vidhi mein boond-boond ka mahatva hai। is samay aap bachche bindu ke rahasya mein sthit hote ho। vishesh saare gyaan ka saar ek bindu shabd mein samaaya hua hai। baap bhi bindu, aap aatmaayen bhi bindu aur drama ka gyaan dhaaran karne ke liye jo hua - finish arthaat fullstop, bindu laga diya। param aatma, aatma aur yeh prakriti ka khel arthaat drama teenon ka gyaan practical life mein bindu hi anubhav karte ho na। isliye bhakti mein bhi pratima ke beech bindu ka mahatva hai। doosra hai - boond ka mahatva - aap sabhi yaad mein baithte ho ya kisi ko bhi yaad mein bithaate ho to kis vidhi se karaate ho? sankalpon ki boondon dvaara - main aatma hoon, yeh boond daali। baap ka bachcha hoon - yeh doosri boond। aise shuddh sankalp ki boond dvaara milan ki siddhi ka anubhav karte ho na। to ek hai shuddh sankalpon ki smriti ki boond। doosra jab ruh-rihaan karte ho, baap ki ek-ek mahima aur praapti ke shuddh sankalp ki boond daalte ho na। aap aise ho, aapne hamko yeh banaaya। yahi meethi-meethi sheetal boonde baap ke oopar daalte arthaat baap se ruh-rihaan karte ho। ek-ek baat karke sochte ho na, ikattha hi nahin। teesri baat - sabhi bachche apne tan-man-dhan se sahayog ki boond daalte। isliye aap log vishesh kehte ho phureephuri talaab। itna bada vishwa parivartan ka kaarya, sarva shaktimaan ka behad ka vishaal kaarya usmein aap harek jo bhi sahayog dete ho, boond samaan hi to sahayog hai। lekin sabhi ki boond-boond ke sahayog se, sahayog ka vishaal saagar ban jaata hai। isliye pooja ki vidhi mein bhi boond ka mahatva dikhaaya hai।

vishesh vrat ki vidhi dikhaate hain। vrat lete ho na। aap sabhi baap ke sahayogi banne mein vyartha sankalp ke bhojan ka vrat lete ho ki kabhi bhi buddhi mein ashuddha vyartha sankalp sveekaar nahin karenge। yeh vrat arthaat dridh sankalp lete ho aur bhakta log ashuddha bhojan ka vrat rakhte hain। aur saath-saath aap sada ke liye jaagti jyoti ban jaate ho aur woh uske yaad svarup mein jaagran karte hain। aap bachchon ke avinaashi ruhaani antarmukhi vidhiyon ko bhakton ne sthool baaharmukhi vidhiyaan bana di hain। lekin kaapi aap logon ko hi ki hai। jo kuchh touch hua, rajopradhaan buddhi hone kaaran aise hi vidhi bana di। vaise rajoguni number one bhakta aur bhakti ke hisaab se satoguni bhakta to brahma aur aap sabhi vishesh aatmaayen nimitta bante ho। lekin pahle mansa sneh aur mansa shakti hone ke kaaran maansik bhaav ki bhakti shuru hoti hai। yeh sthool vidhiyaan peechhe-peechhe dheere-dheere jyaada hoti hain। phir bhi rachayita baap apne bhakta aatmaayen rachna ko aur unhon ki vidhiyon ko dekh yahi kahenge ki in bhakton ke touching ki buddhi ki bhi kamaal hai। phir bhi in vidhiyon dvaara buddhi ko busy rakhne se, vikaaron mein jaane se kuchh na kuchh kinaara to kiya na। samjha - aapke yathaartha siddhi ki vidhi bhakti mein kya-kya chalti aa rahi hai। yeh hai yaadgaar ka mahatva।

double videshi bachche to bhakti dekhne se kinaare mein rehte hain। lekin aap sabke bhakta hain। to bhakton ki leela aap bachche anubhav karte ho ki ham poojya aatmaon ka abhi bhi bhakta aatmaayen kaise poojan bhi kar rahi hain aur aahvaan bhi kar rahi hain। aise mahsoos karte ho? kabhi anubhav hota hai - bhakton ki pukaar ka। raham aata hai bhakton par? bhakton ka gyaan bhi achhi tarah se hai na! bhakta pukaaren aur aap samjho nahin to bhakton ka kya hoga। isliye bhakta kya hain, pujaari kya hain, poojya kya hain, is raaz ko bhi achhi tarah se jaante ho। poojya aur pujaari ke raaz ko jaante ho na! achha। kabhi bhakton ki pukaar ka anubhav hota hai? paandavon ko bhi hota hai va sirf shaktiyon ko hota hai। saaleegraam to dher hote hain। laakhon ki andaaj mein। lekin devtaayen laakhon ki andaaj mein nahin hote। deviyaan va devtaayen hajaaron ki andaaj mein honge, laakhon ki andaaj mein nahin honge। achha - iska raaz bhi phir kabhi sunaayenge। double videshiyon mein bhi jo aadi mein aaye hain, jo shuru mein example bane hain chaahe shaktiyaan athva paandav, unhon ki bhi visheshta hai na। baap to sabse pahle bada videshi hai। sabse jyaada samay videsh mein kaun rehta hai? baap rehta hai na।

abhi din pratidin jitna aage samay aayega utna bhakton ke aahvaan ka aavaaj unhon ki bhaavnaayen sab aapke paas spashta rup mein anubhav hongi। kaun-si ishta devi va devta hai, vo bhi maaloom padega। thode pakke ho jaao phir yeh sab divya buddhi ki touching dvaara aise anubhav hoga jaise divya drishti se spashta dikhaai deta hai। abhi to saz rahe ho isliye pratyakshata ka parda nahin khul raha hai। jab saj jaayenge tab parda khulega aur svayan ko bhi dekhenge। phir sabke mukh se niklega ki yeh phalaani devi bhi aa gai। phalaana devta bhi aa gaya। achha!

sada bholenaath baap ke saralchit, sahaj svabhaav vaale sahaj yogi, bhole bachche, sada bindi aur boond ke rahasya ko jeevan mein dhaaran karne vaale, dhaarna svarup aatmaayen, sada man, vaani karma mein dridh sankalp ka vrat lene vaali gyaani tu aatmaayen, sada apne poojya svarup mein sthit rahne vaali poojya aatmaon ko bholaanaath, vardaata, vidhaata baap ka yaad-pyaar aur namaste।

jhanda lahraane ke pashchaat baapdaada ke madhur mahaavaakya

baap kehte hain bachchon ka jhanda sada mahaan hai। bachche nahin hote to baap bhi kya karte। aap kehte hain baap ka jhanda sada mahaan… (geet baj raha tha) aur baap kehte hain bachchon ka jhanda sada mahaan। sada sabhi bachchon ke mastak par vijay ka jhanda lahra raha hai। sabke naynon mein, sabke mastak mein vijay ka jhanda lahraaya hua hai। baapdaada dekh rahe hain - yeh ek jhanda nahin lahraaya lekin sabke mastak ke saath-saath vijay ka jhanda avinaashi lahraaya hua hai।

baap aur bachchon ke wonderful birth de ki mubaarak

chaaron or ke ati snehi, seva ke saathi, sada kadam mein kadam rakhne vaale bachchon ko is alaukik brahman jeevan ki birth de ki mubaarak ho। sada sabhi bachchon ko baapdaada yaadapyaar aur mubaarak ke return mein sneh bhari baanhon ki maala pahnaate hue mubaarak de rahe hain। sabhi bachchon ko yeh alaukik birth-de vishwa ki har aatma yaadgaar rup mein manaati hi aati hai kyonki baap ke saath bachchon ne bhi brahman jeevan mein sarva aatmaon ko bahut-bahut-bahut sukh-shanti, khushi aur shakti ka sahayog mila hai। is sahayog ke kaaran sab dil se shiv aur saaligraam donon ka birth-de shiv jayanti manaate hain। to aise saaleegraam bachchon ko shiv baap aur brahma baap donon ki sada padamguna badhaaeeyaan hon, badhaaeeyaan hon। sada badhaai ho, sada vriddhi ho aur sada vidhipoorvak siddhi ko praapta ho। achha।

vidaai ke samay:- good morning to sab karte hain lekin aapki god ke saath morning hai to godly morning ho gai na। god ke saath raat bitaai aur god ke saath morning mana rahe ho। to sada god aur good donon hi yaad rahen। god ki yaad hi good banaati hai। agar god ki yaad nahin to good nahin ban sakte। aap sabki sada hi godly life hai, isliye har second, har sankalp good hi good hai। to sirf good morning, good evening, good night nahin lekin har second, har sankalp god ki yaad ke kaaran good hai। aise anubhav karte ho। abhi jeevan hi good hai kyonki jeevan hi god ke saath hai। har karma baap ke saath karte ho na। akele to nahin karte? khaate ho to baap ke saath ya akele kha lete ho। sada god aur good donon ka sambandh yaad rakho aur jeevan mein laao। samjha - achha sabhi ko baapdaada ka vishesh amritvele ka amar yaadapyaar aur namaste।

vardaan:- mahaadaani ban phraakdili se khushi ka khajaana baantane vaale master merciful bhav

log alpakaal ki khushi praapta karne ke liye kitna samay va dhan kharcha karte hain phir bhi sachchi khushi nahin milti, aise aavashyakta ke samay aap aatmaon ko mahaadaani ban phraakdili se khushi ka daan dena hai। iske liye merciful ka gun emerge karo। aapke jad chitra vardaan de rahe hain to aap bhi chaitanya mein merciful ban baantate jaao, kyonki parvash aatmaayen hain। kabhi ye nahin socho ki ye to sunne vaale hi nahin hai, aap merciful ban dete jaao। aapki shubh bhaavna unhon ko phal avashya degi।

slogan:- yog ki shakti dvaara har karmendriy ko order mein chalaane vaale hi svaraajya adhikaari hain।