रविवार 16 अगस्त 2020 की दैनिक मुरली

16-08-20 praatahmurli om shanti ''avyakt-baapdaada'' revise 07-03-86 madhuban

“padhaai ki chaaron subject ka yathaartha yaadgaar - maha-shivraatri''

aaj gyaan daata, bhaagya vidhaata, sarvashaktiyon ke vardaata, sarva khajaanon se bharpoor karne vaale bholaanaath baap apne ati snehi sada sahayogi, sameep bachchon se milne ke liye aaye hain। yeh milan hi sadaakaal ka utsav manaane ka yaadgaar ban jaata hai। jo bhi bhinna-bhinna naamon se samay prati samay utsav manaate hain - woh sabhi is samay baap aur bachchon ke madhur milan, utsaah bhara milan, bhavishya ke liye utsav ke roop mein ban jaata hai। is samay aap sarvashreshtha bachchon ka har din, har ghadi sada khushi mein rahne ki ghadiyaan va samay hai। to is chhote se sangamayug ke alaukik jeevan, alaukik praaptiyaan, alaukik anubhvon ko dvaapar se bhakton ne bhinna-bhinna naam se yaadgaar bana diye hain। ek janma ki aapki yeh jeevan bhakti ke 63 janmon ke liye yaad ka saadhan ban jaati hai। itni mahaan aatmaayen ho! is samay ki sabse wonderful baat yahi dekh rahe ho - jo practical bhi mana rahe ho aur nimitta us yaadgaar ko bhi mana rahe ho। chaitanya bhi ho aur chitra bhi saath-saath hain।

5 hajaar varsha pahle har ek ne kya-kya praapta kiya, kya bane, kaise bane, yeh 5 hajaar varsha ka poora apna yaadgaar chitra aur janma-patri sabhi spashta roop mein jaan gaye ho। sun rahe ho aur dekh-dekh harshit ho rahe ho ki yeh hamaara hi gaayan poojan hamaare jeevan ki kathaayen varnan kar rahe hain। original aapka chitra to bana nahin sakte hain isliye bhaavnaapoorvak jo bhi touch hua woh chitra bana diya hai। to practical shiv-jayanti to roz manaate hi ho kyonki sangamayug hai hi avatran ka yug, shreshtha kartavya, shreshtha charitra karne ka yug। lekin behad yug ke beech me yeh yaadgaar din bhi mana rahe ho। aap sabka manaana hai - milan manaana aur unhon ka manaana hai aahvaan karna। unhon ka hai pukaarna aur aapka hai pa lena। woh kahenge “aao'' aur aap kahenge “aa gaye'', mil gaye। yaadgaar aur practical mein kitna raat-din ka antar hai। vaastav mein yeh din bholaanaath baap ka din hai, bholaanaath arthaat bina hisaab ke anginat dene vaala। vaise jitna aur utne ka hisaab hota hai, jo karega woh paayega। utna hi paayega। yeh hisaab hai। lekin bholaanaath kyon kehte? kyonki is samay dene mein jitne aur utne ka hisaab nahin rakhta। ek ka padam-guna hisaab hai। to anginat ho gaya na। kahaan ek kahaan padam। padam bhi last shabd hai isliye padam kehte hain। anginat dene vaale bhole bhandaari ka din yaadgaar roop mein manaate hain। aapko to itna mila hai jo ab to bharpoor ho hi lekin 21 janma, 21 peedhi sada bharpoor rahenge।

itne janmon ki guarantee aur koi nahin kar sakta। kitna bhi koi bada daata ho lekin anek janma ka bharpoor bhandaara hone ki guarantee koi bhi nahin kar sakta। to bholaanaath hua na। knowledgeful hote bhi bhola bante hain… isliye bholaanaath kaha jaata hai। vaise to hisaab karne mein, ek-ek sankalp ka bhi hisaab jaan sakte hain। lekin jaante hue bhi dene mein bholaanaath hi banta hai। to aap sabhi bholaanaath baap ke bholaanaath bachche ho na! ek taraph bholaanaath kehte doosre taraph bharpoor bhandaari kehte hain। yaadgaar bhi dekho kitna achha manaate hain। manaane vaalon ko pata nahin lekin aap jaante ho। jo mukhya is sangamayug ki padhaai hai, jiski vishesh 4 subject hain woh chaar hi subject yaadgaar divas par manaate aate hain। kaise? pahle bhi sunaaya tha ki vishesh is utsav ke din bindu ka aur boond ka mahatva hota hai। to bindu is samay ke yaad arthaat yog ke subject ki nishaani hai। yaad mein bindu sthiti mein hi sthit hote ho na! to bindu yaad ki nishaani aur boond - gyaan ki bhinna-bhinna boonde। is gyaan ke subject ki nishaani boond ke roop mein dikhaai hai। dhaarna ki nishaani isi din vishesh vrat rakhte hain। to vrat dhaaran karna। dhaarna mein bhi aap dridh sankalp karte ho। to vrat rakhte ho ki aisa sahansheel va antarmukh avashya banke hi dikhaayenge। to yeh vrat dhaaran karte ho na! yeh vrat dhaarna ki nishaani hai aur seva ki nishaani hai jaagran। seva karte hi ho kisko jagaane ke liye। agyaan neend se jagaana, jaagran karaana, jaagriti dilaana - yahi aapki seva hai। to yeh jaagran seva ki nishaani hai। to chaar hi subject aa gai na। lekin sirf roop-rekha unhonne sthool roop mein badal di hai। phir bhi bhakta bhaavna vaale hote hain aur sada hi sachche bhakton ki yeh nishaani hogi ki jo sankalp karenge usmein dridh rahenge, isliye bhakton se bhi baap ka sneh hai। phir bhi aapke yaadgaar ko dvaapar se parampara to chala rahe hain aur vishesh is din jaise aap log yahaan sangamayug par baar-baar samarpan samaaroh manaate ho, alag-alag bhi manaate ho, aise hi aapke is function ka bhi yaadgaar woh svayan ko samarpan nahin karte lekin bakre ko karte hain। bali chadha dete hain। vaise to baapdaada bhi hansi mein kehte hain ki yeh main-main-pan ka samarpan ho tab samarpan arthaat sampoorn bano। baap samaan bano। jaise brahma baap ne pahla-pahla kadam kya uthaaya? main aur mera-pan ka samarpan samaaroh maana kisi bhi baat mein main ke bajaae sada natural bhaasha mein saadhaaran bhaasha mein bhi baap shabd hi suna। main shabd nahin।

baba kara raha hai, main kar raha hoon, nahin। baba chala raha hai, mai kehta hoon, nahin। baba kehta hai। had ke koi bhi vyakti ya vaibhav se lagaav yeh meraapan hai। to merepan ko aur main-pan ko samarpan karna isko hi kehte hain bali chadhna। bali chadhna arthaat mahaabli banna। to yeh samarpan hone ki nishaani hai।

to baapdaada bhakton ko ek baat ki aaphreen dete hain - kisi bhi roop se bhaarat mein va har desh mein utsaah ki lahar phailaane ke liye utsav banaaye to achhe hain na। chaahe do din ke liye ho ya ek din ke liye ho lekin utsaah ki lahar to phail jaati hai na, isliye utsav kehte hain। phir bhi alpakaal ke liye vishesh roop se baap ke taraph majority ka attention to jaata hai na। to is vishesh din par kya vishesh karenge? jaise bhakti mein koi sadaakaal ke liye vrat leta hai aur koi mein himmat nahin hoti hai to ek maas ke liye, ek din ke liye ya thode samay ke liye lete hain। phir woh vrat chhod dete hain। aap to aise nahin karte ho na! madhuban mein to dharni par paanv nahin hai aur phir jab videsh mein jaayenge to dharni par aayenge ya oopar hi rahenge! sada oopar se neeche aakar karma karenge ya neeche rahkar karma karenge? oopar rehna arthaat oopar ki sthiti mein rehna। oopar koi chhat par nahin latakna hai। oonchi sthiti mein sthit ho koi bhi saadhaaran karma karna arthaat neeche aana, lekin saadhaaran karma karte bhi sthiti oopar arthaat oonchi ho। jaise baap bhi saadhaaran tan leta hai na। karma to saadhaaran hi karenge na, jaise aap log bolenge vaise hi bolenge। vaise hi chalenge। to karma saadhaaran hai, tan hi saadhaaran hai, lekin saadhaaran karma karte bhi sthiti oonchi rehti। aise aap ki bhi sthiti sada oonchi ho।

jaise is din ko avatran ka din kehte ho na, to roz amritvele aise hi socho ki nindra se nahi shantidham se karma karne ke liye avatrit hue hain। aur raat ko karma karke shantidham mein chale jaao। to avtaar avatrit hote hi hain shreshtha karma karne ke liye। unko janma nahin kehte hain, avatran kehte hain। oopar ki sthiti se neeche aate hain - yeh hai avatran। to aisi sthiti mein rahkar karma karne se saadhaaran karma bhi alaukik karma mein badal jaate hain। jaise doosre log bhi bhojan khaate aur aap kehte ho brahma bhojan khaate hain। pharka ho gaya na। chalte ho lekin aap pharishte ki chaal chalte, double light sthiti mein chalte। to alaukik chaal alaukik karma ho gaya। to sirf aaj ka din avatran ka din nahin lekin sangamayug hi avatran divas hai।

aaj ke din aap log baapdaada ko mubaarak dete ho lekin baapdaada kehte hain “pahle aap''। agar bachche nahin hote to baap kaun kehta। bachche hi baap ko baap kehte hain isliye pahle bachchon ko mubaarak। aap sab birth de ka geet gaate ho na- happy birthday to you... baapdaada bhi kehte hain happy birthday to you। birth de ki mubaarak to bachchon ne baap ko di। baap ne bachchon ko di। aur mubaarak se hi pal rahe ho। aap sabki paalna hi kya hai? baap ki, parivaar ki badhaaiyon se hi pal rahe ho। badhaaiyon se hi naachte, gaate, palte, udte ja rahe ho। yeh paalna bhi wonderful hai। ek do ko har ghadi kya dete ho? badhaaeeyaan hain aur yahi paalna ki vidhi hai। koi kaisa bhi hai, woh to baapdaada bhi jaante hain, aap bhi jaante ho ki nambarvaar to honge hi। agar nambarvaar nahin bante phir to satayug mein kam se kam dedh laakh takhta banaane pade isliye nambarvaar to hone hi hain। to nambarvaar hona hai lekin kabhi koi ko agar aap samajhte hain ki yeh wrong hai, yeh achha kaam nahin kar raha hai, to wrong ko right karne ki vidhi ya yathaartha karma nahin karne vaale ko yathaartha karma sikhaane ki vidhi - kabhi bhi usko seedha nahin kaho ki tum to wrong ho। yeh kahne se woh kabhi nahin badlega। jaise aag bujhaane ke liye aag nahin jalaai jaati hai, usko thanda paani daala jaata hai isliye kabhi bhi usko pahle hi kaha ki tum wrong ho, tum wrong ho to woh aur hi dilshikasta ho jaayega। pahle usko achha-achha kah karke thamaao to sahi, pahle paani to daalo phir usko sunaao ki aag kyon lagi। pahle yeh nahin kaho ki tum aise ho, tumne yeh kiya, yeh kiya। pahle thanda paani daalo। peechhe woh bhi mahsoos karega ki haan aag lagne ka kaaran kya hai aur aag bujhaane ka saadhan kya hai। agar bure ko bura kah dete to aag mein tel daalte ho। iseelie bahut achha, bahut achha kah karke peechhe usko koi bhi baat do to usmein sunne ki, dhaaran karne ki himmat aa jaati hai isliye suna rahe the ki bahut achha, bahut achha yahi badhaaiyaan hain। jaise baapdaada bhi kabhi kisko direct wrong nahin kahega, murli mein suna dega - right kya hai, wrong kya hai। lekin agar koi seedha aakar poochhega bhi ki main wrong hoon! to kahega nahin tum to bahut right ho kyonki usmein us samay himmat nahin hoti hai। jaise patient ja bhi raha hota hai, aakhri saans hota hai to bhi doctor se agar poochhega ki main ja raha hoon to kabhi nahin kahega haan ja rahe ho kyonki us time himmat nahin hoti। kiski dil kamjor ho aur aap agar usko aisi baat kah do woh to heartfail ho hi jaayega arthaat purooshaartha mein parivartan karne ki shakti nahin aayegi। to sangamayug hai hi badhaaeeyon se vriddhi ko paane ka yug। yeh badhaaeeyaan hi shreshtha paalna hain। iseelie aapke is badhaaeeyon ki paalna ka yaadgaar jab bhi koi devi devta ka din manaate hain to usko bada din kah dete hain। deepmaala hogi, shivraatri hogi to kahenge aaj bada din hai। jo bhi utsav honge usko bada din kahenge kyonki aapki badi dil hai to unhonne bada din kah diya hai। to ek do ko badhaaiyaan dena yeh badi dil hai। samjha - aise nahin ki wrong ko wrong samjhaayenge nahin, lekin thoda dhairya rakho, ishaara to dena padega lekin time to dekho na। woh mar raha hai aur usko kaho mar jaao, mar jaao...। to time dekho, uski himmat dekho। bahut achha, bahut achha kahne se himmat aa jaati hai। lekin dil se kaho - aise nahin baahar se kaho to woh samjhe ki mere ko aise hi kah rahe hain। yeh bhaavna ki baat hai। dil ka bhaav raham ka ho to uske dil ko raham ka bhaav lagega। iseelie sada badhaaeeyaan dete raho। badhaaeeyaan lete raho। yeh badhaai vardaan hai। jaise aaj ke din ko gaayan karte hain - shiv ke bhandaare bharpoor... to aapka gaayan hai, sirf baap ka nahin। sada bhandaara bharpoor ho। daata ke bachche daata ban jaao। sunaaya tha na - bhakta hai ‘levta'aur aap ho dene vaale ‘devta' to daata maana dene vaale। kisi ko bhi kuchh thoda bhi dekar phir aap unse kuchh le lo to usko feel nahin hoga। phir kuchh bhi usko mana sakte ho। lekin pahle usko do। himmat do, umang dilaao, khushi dilaao phir usse kuchh bhi baat manaane chaaho to mana sakte ho, roj utsav manaate raho। roj baap se milan manaana yahi utsav manaana hai। to roj utsav hai। achha!

chaaron or ke bachchon ko, sangamayug ke har din ke avatran divas ki avinaashi mubaarak ho। sada baap samaan daata aur vardaata ban har aatma ko bharpoor karne vaale, master bholaanaath bachchon ko, sada yaad mein rah har karma ko yaadgaar banaane vaale bachchon ko sada sva unnati aur seva ki unnati mein umang-utsaah se aage badhne vaale shreshtha bachchon ko, vishesh aaj ke yaadgaar divas shivjayanti so brahman jayanti heere tulya jayanti, sada sarva ko sukhi banaane ki, sampanna banaane ki jayanti ki mubaarak aur yaadapyaar aur namaste।

vardaan:- har shakti ko order pramaan chalaane vaale master rachayita bhav

karma shuru karne ke pahle jaisa karma vaisi shakti ka aahvaan karo। maalik bankar order karo kyonki yeh sarvashaktiyaan aapki bhuja samaan hain, aapki bhujaayen aapke order ke bina kuchh nahin kar sakti। order karo sahan shakti kaarya saphal karo to dekho saphalta hui padi hai। lekin order karne ke bajaae darte ho - kar sakenge va nahin kar sakenge। is prakaar ka dar hai to order chal nahin sakta isliye master rachayita ban har shakti ko order pramaan chalaane ke liye nirbhay bano।

slogan:- sahaaredaata baap ko pratyaksha kar sabko kinaare lagaao।

soochna:- aaj maas ka teesra ravivaar hai, sabhi raajayogi tapasvi bhaai bahinen saayan 6.30 se 7.30 baje tak, vishesh yog abhyaas ke samay apne poorvaj pan ke svamaan mein sthit ho, kalpa vriksha ki jadon mein baith poore vriksha ko shaktishaali yog ka daan dete hue, apni vanshaavli ki divya paalna karen।