सोमवार 17 अगस्त 2020 की दैनिक मुरली

17-08-2020 praatahmurli om shanti "baapdaada"' madhuban

“meethe bachche - gyaan saagar baap aaye hain gyaan varsha kar is dharti ko sabja banaane, abhi svarga ki sthaapna ho rahi hai, usmein chalne ke liye daivi sampradaay ka banna hai''

prashn:- sarvottam kul vaale bachchon ka mukhya kartavya kya hai?

uttar:- sada oonchi roohaani seva karna। yahaan baithe va chalte-phirte khaas bhaarat aur aam saare vishwa ko paavan banaana, shreemat par baap ke madadgaar banna - yahi sarvottam braahmanon ka kartavya hai।

geet:- jo piya ke saath hai…

om shanti। meethe-meethe roohaani bachchon prati roohaani baap samjha rahe hain jo roohaani baap ke saath hain kyonki baap hai gyaan ka saagar। kaun sa baap? shivbaaba। brahma baba ko gyaan ka saagar nahin kahenge। shivbaaba jisko hi parampita paramatma kaha jaata hai। ek hai laukik jismaani pita, doosra hai paarlaukik roohaani pita। woh shareer ka pita, woh aatmaon ka pita। yeh badi achhi reeti samajhne ki baaten hain aur yeh gyaan sunaane vaala hai gyaan saagar। jaise bhagwan sabka ek hai, vaise gyaan bhi ek de sakte hain। baaki jo shaastra geeta aadi padhte hain, bhakti karte hain woh koi gyaan nahin, unse gyaan varsha nahin hoti hai, isliye bhaarat bilkul hi sookh gaya hai। kangaal ho gaya hai। woh barsaat bhi nahin padti hai to jameen aadi sab sookh jaati hai। woh hai bhakti maarga। usko gyaan maarga nahin kahenge। gyaan se svarga ki sthaapna hoti hai। vahaan hamesha dharni sabja rehti hai, kabhi sookhti nahin। yeh hai gyaan ki padhaai। eeshvar baap gyaan dekar daivi sampradaay banaate hain। baap ne samjhaaya hai main tum sabhi aatmaon ka baap hoon। parantu mujhe aur mere kartavya ko na jaanne kaaran hi manushya itne patit duhkhi nidhanke ban gaye hain। aapas mein ladte rehte hain। ghar mein baap nahin hota hai, bachche ladte hain to kehte hain na ki tumhaara baap hai ya nahin hai? is samay bhi saari duniya baap ko jaanti nahin। na jaanne kaaran itni durgati hui hai। jaanne se sadgati hoti hai। sarva ka sadgati daata ek hai। unko baba kaha jaata hai। unka naam shiv hi hai। unka naam kabhi badal nahin sakta। jab sanyaas karte hain to naam badalte hain na। shaadi mein bhi kumaari ka naam badalte hain। yeh yahaan bhaarat mein rivaaj hai। baahar mein aisa nahin hota hai। yeh shivbaaba sabhi ka maai baap hai। gaate bhi hain tum maat pita...... bhaarat mein hi pukaarte hain - tumhari kripa te sukh ghanere। aise nahin ki bhakti maarga mein bhagwan kripa karte aaye hain। nahin, bhakti mein sukh ghanere hote hi nahin। bachche jaante hain svarga mein bahut sukh hain। woh nai duniya hai। puraani duniya mein duhkh hi hota hai। jo jeete ji achhi reeti mare hue hain unke naam badal sakte hain। parantu maaya jeet leti hai to brahman se badal shoodra ban jaate hain isliye baba naam nahin rakhte hain। braahmanon ki maala to hoti nahin। tum bachche sarvottam oonch kul vaale ho। oonch roohaani seva karte ho। yahaan baithe va chalte phirte tum bhaarat ki khaas aur vishwa ki aam seva karte ho। vishwa ko tum pavitra banaate ho। tum ho baap ke madadgaar। baap ki shreemat par chal tum madad karte ho। yeh bhaarat hi paavan banne ka hai। tum kahenge ham kalpa-kalpa is bhaarat ko pavitra banaae pavitra bhaarat par raajya karte hain। brahman se phir ham bhavishya devi-devta bante hain। viraat roop ka chitra bhi hai। prajaapita brahma ke bachche brahman hi thahre। brahman tab honge jab prajaapita sammukh hoga। abhi tum sammukh ho। tum har ek prajaapita brahma ki aulaad apne ko samajhte ho। yeh yukti hai। aulaad samajhne se bhaai-behen ho jaate hain। bhaai-behen ki kabhi criminal aankh nahin honi chaahiye। abhi baap ordinance nikaalte hain ki tum 63 janma patit rahe ho, ab paavan duniya svarga mein chalna chaahte ho to pavitra bano। vahaan patit aatma ja nahin sakti isliye hi mujh behad ke baap ko tum bulaate ho। yeh aatma shareer dvaara baat karti hai। shivbaaba bhi kehte hain main is shareer dvaara baat karta hoon। nahin to main kaise aaoon? mera janma divya hai। satayug mein hain daiveegunon vaale devtaayen। is samay hain aasuri gunon vaale manushya। yahaan ke manushyon ko devta nahin kahenge। phir bhal koi bhi ho naam to bahut bade-bade rakh dete hain। saadhu apne ko shri shri kehte hain aur manushyon ko shri kehte hain kyonki khud pavitra hain isliye shri shri kehte hain। hain to manushya। bhal vikaar mein nahin jaate parantu vikaari duniya mein to hain na। tum bhavishya mein nirvikaari daivi duniya mein raajya karenge। honge vahaan bhi manushya parantu daivi gunon vaale honge। is samay manushya aasuri gunon vaale patit hain। guru naanak ne bhi kaha hai moot paleeti kapad dhoe...... guru naanak bhi baap ki mahima karte hain।

ab baap aaye hain sthaapna aur vinaash karne। aur jo bhi dharma sthaapak hain woh sirf dharma sthaapan karte hain aur dharmon ka vinaash nahin karte hain, unhon ki to vriddhi hoti rehti hai। abhi baap vriddhi ko banda karte hain। ek dharma ki sthaapna aur anek dharmon ka vinaash kara dete hain। drama anusaar yeh hona hi hai। baap kehte hain main aadi sanaatan devi-devta dharma ki sthaapna karaata hoon, jiske liye tumko padha raha hoon। satayug mein anek dharma hote hi nahin। drama mein in sabke vaapis jaane ki noondh hai। is vinaash ko koi taal nahin sakte। vishwa mein shanti tab hoti hai jab vinaash hota hai। is ladaai dvaara hi svarga ke get khulte hain। yeh bhi tum likh sakte ho ki yeh mahaabhaari ladaai kalpa pahle bhi lagi thi। tum pradarshani ka udghaatan karaate ho to yeh likho। baap paramdham se aaye hain - heaven ka udghaatan karne। baap kehte hain main heavenly god father heaven ka udghaatan karne aaya hoon। bachchon ki hi madad leta hoon, svargavaasi banaane ke liye। itni sab aatmaon ko paavan nahin to kaun banaaye। dher aatmaayen hain। ghar-ghar mein tum yeh samjha sakte ho। bhaaratvaasi tum satopradhaan the phir 84 janmon baad tamopradhaan bane ho। ab phir satopradhaan bano। manamna-bhav। aise mat kaho ki ham shaastron ko nahin maante hain। bolo, shaastron ko aur bhaktimaarga ko to ham maante the parantu abhi yeh bhaktimaarga ki raat poori hoti hai। gyaan se din shuru hota hai। baap aaye hain sadgati karne। samjhaane ki badi yukti chaahiye। koi achhi reeti dhaarna karte hain, koi kam karte hain। pradarshani mein bhi jo achhe-achhe bachche hain - woh achha samjhaate hain। jaise baap teacher hai to bachchon ko bhi teacher banna pade। gaaya bhi jaata hai satguru taare, baap ko kaha jaata hai sachkhanda ki sthaapna karne vaala sachcha baba। jhooth khanda sthaapan karne vaala hai raavan। ab jabki sadgati karne vaala mila hai to phir ham bhakti kaise karenge? bhakti sikhlaane vaale hain anek guru log। satguru to ek hi hai। kehte bhi hain satguru akaal...... phir bhi anek guru bante rehte hain। sanyaasi, udaasi bahut prakaar ke guru log hote hain। sikkha log khud hi kehte hain satguru akaal..... arthaat jisko kaal nahin khaata। manushya ko to kaal kha jaata hai। baap samjhaate hain manamnaabhav। unka phir hai jap saaheb ko to sukh mile...... mukhya do akshar hain। baap kehte hain mujhe yaad karo - jap saaheb ko। saaheb to ek hai। guroonaanak ne bhi unke liye ishaara kiya hai ki unko japo। vaastav mein tumko japna nahin hai, yaad karna hai। yeh hai ajpaajaap। mukh se kuchh bolo nahin। shiv-shiv bhi kehna nahin hai। tumko to jaana hai shantidham। ab baap ko yaad karo। ajpaajaap bhi ek hi hota hai jo baap sikhlaate hain। woh kitne ghante bajaate, aavaaz karte, mahima karte। kehte hain achtam keshvam...... lekin ek bhi akshar ko samajhte nahin। sukh dene vaala to ek hi baap hai। vyaas bhi unko hi kahenge। unmein knowledge hai jo dete hain। sukh bhi vahi dete hain। tum bachche samajhte ho - ab hamaari chadhti kala hoti hai। seedhi mein kalaaon ko bhi dikhaaya hai। is samay koi kala nahin hai। main nirgun haare mein......। ek nirgun sanstha bhi hai। ab baap kehte hain - baalak to mahaatma misal hota hai। unmein koi avgun nahin hai। unka phir naam rakh dete hain nirgun baalak। agar baalak mein gun nahin to baap mein bhi nahin। sabmen avgun hain। gunvaan sirf devtaayen bante hain। number one avgun hai jo baap ko nahin jaante। doosra avgun hai jo vishay saagar mein gota khaate hain। baap kehte hain aadhaakalpa tumne gota khaaya hai। ab main gyaan saagar tumko ksheersaagar mein le jaata hoon। main to ksheer saagar mein jaane ke liye tumko shiksha deta hoon। main inke baaju mein aakar baithta hoon, jahaan aatma rehti hai। main svatantra hoon। kahaan bhi ja aa sakta hoon। tum pitron ko khilaate ho to aatma ko khilaate ho na। shareer to bhasma ho jaata hai। unko dekh bhi nahin sakte। samajhte ho phalaane ki aatma ka shraadh hai। aatma ko bulaaya jaata hai - yeh bhi drama mein part hai। kabhi aati hai, kabhi nahin bhi aati hai। koi bataate hain, koi nahin bhi bataate hain। yahaan bhi aatma ko bulaate hain, aakar bolti hai। parantu aise nahin bataati ki phalaani jagah janma liya hai। sirf itna kahegi ki ham bahut sukhi hain, achhe ghar mein janma liya hai। achhe gyaan vaale bachche achhe ghar mein jaayenge। kam gyaan vaale kam pad paayenge। baaki sukh to hai। raaja banna achha hai ya daasi banna achha? raaja banna hai to is padhaai mein lag jaao। duniya to bahut gandi hai। duniya ke sang ko kahenge kusang। ek sat ka sang hi paar karta hai, baaki sab dubote hain। baap to sabki janmapatri jaante hain na। yeh paap ki duniya hai, tab to pukaarte hain - aur kahin le chalo। ab baap kehte hain - meethe-meethe bachchon, mera bankar phir meri mat par chalo। yeh bahut gandi duniya hai। corruption hai। laakhon-karodon roopayon ki thagi hoti hai। ab baap aaye hain bachchon ko svarga ka maalik banaane to athaah khushi honi chaahiye na। vaastav mein yeh hai sachchi geeta। phir yeh gyaan praayah lop ho jaayega। abhi tumko yeh gyaan hai phir doosra janma lenge to gyaan khalaas। phir hai praalabdha। tumko purooshottam banaane ke liye baap padhaate hain। abhi tumne baap ko jaana hai। ab amarnaath ki yaatra hoti hai। bolo, jinko sookshm vatan mein dikhaate ho woh phir sthool vatan mein kahaan se aaya? pahaad aadi to yahaan hain na। vahaan patit ho kaise sakte? jo paarvati ko gyaan dete hain। barpha ka ling baith haath se banaate hain। woh to kahaan bhi bana sakte hain। manushya kitne dhakke khaate hain। samajhte nahin ki shankar ke paas paarvati kahaan se aai jo unko paavan banaayenge। shankar koi paramatma nahin, woh bhi devta hai। manushyon ko kitna samjhaaya jaata hai phir bhi samajhte nahin। paarasbuddhi ban nahin sakte। pradarshani mein kitne aate hain। kahenge knowledge to bahut achhi hai। sabko leni chaahiye। are tum to lo। kahenge hamko phursat nahin। pradarshani mein yeh bhi likhna chaahiye ki is ladaai ke pahle baap svarga ka udghaatan kar rahe hain। vinaash ke baad svarga ke dvaar khul jaayenge। baba ne kaha tha har ek chitra mein likho - paarlaukik parampita paramatma trimoorti shiv bhagvaanuvaach। trimoorti na likhne se kahenge shiv to niraakaar hai, woh kaise gyaan denge? samjhaaya jaata hai yahi pahle gora tha, krishna tha phir ab saanvara manushya bana hai। ab tumko manushya se devta banaate hain। phir history repeat honi hai। gaayan bhi hai manushya se devta kiye........ phir seedhi utar manushya bante hain। phir baap aakar devta banaate hain। baap kehte hain mujhe aana padta hai। kalpa-kalpa, kalpa ke sangamayuge aata hoon। yuge-yuge kehna wrong hai। main sangamayug par aakar tumko punya aatma banaata hoon। phir raavan tumko paap aatma banaate hain। baap hi puraani duniya ko nai duniya banaate hain। yeh samajhne ki baaten hain। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ke samaan teacher banna hai, badi yukti se sabko is jhoothkhanda se nikaal sachkhanda mein chalne ke laayak banaana hai।

2) duniya ka sang kusang hai, isliye kusang se kinaara kar ek sat ka sang karna hai। oonch pad ke liye is padhaai mein lag jaana hai। ek baap ki mat par hi chalna hai।

vardaan:- santushtata dvaara sarva se prashansa praapta karne vaale sada prasannachit bhav

santushtata ki nishaani pratyaksha roop mein prasannata dikhaai degi। aur jo sada santushta va prasanna rehte hain unki har ek prashansa avashya karte hain। to prashansa, prasannata se hi praapta kar sakte ho isliye sada santushta aur prasanna rahne ka vishesh vardaan svayan bhi lo aur auron ko bhi do kyonki is yagya ki antim aahuti - sarva braahmanon ki sada prasannata hai। jab sabhi sada prasanna rahenge tab pratyakshata ka aavaaj goonjega arthaat vijay ka jhanda lahraayega।

slogan:- diamond ban diamond banne ka message dena hi diamond jubilee manaana hai।