गुरुवार 8 अक्टूबर 2020 की दैनिक मुरली

08-10-2020 praatahmurli om shanti "baapdaada"' madhuban

“meethe bachche - baba aaye hain tumhein bahut ruchi se padhaane, tum bhi ruchi se padho - nasha rahe hamko padhaane vaala svayan bhagwan hai''

prashn:- tum brahmaakumaar-kumaariyon ka uddeshya va shuddh bhaavna kaunsi hai?

uttar:- tumhaara uddeshya hai - kalpa 5 hazaar varsha pahle ki tarah phir se shreemat par vishwa mein sukh aur shanti ka raajya sthaapan karna। tumhaari shuddh bhaavna hai ki shreemat par ham saare vishwa ki sadgati karenge। tum nashe se kehte ho ham sabko sadgati dene vaale hain। tumhein baap se pees prize milti hai। narkavaasi se svargavaasi banna hi prize lena hai।

om shanti। student jab padhte hain to khushi se padhte hain। teacher bhi bahut khushi se, ruchi se padhaate hain। roohaani bachche yeh jaante hain ki behad ka baap jo teacher bhi hai, hamko bahut ruchi se padhaate hain। us padhaai mein to baap alag hota hai, teacher alag hota hai, jo padhaate hain। koi-koi ka baap hi teacher hota hai jo padhaate hain to bahut ruchi se padhaate hain kyonki phir bhi blood connection hota hai na। apna samajhkar bahut ruchi se padhaate hain। yeh baap tumhein kitna ruchi se padhaate honge to bachchon ko bhi kitna ruchi se padhna chaahiye।। direct baap padhaate hain aur yeh ek hi baar aakar padhaate hain। bachchon ko ruchi bahut chaahiye। baba bhagwan hamko padhaate hain aur har baat achhi reeti samjhaate rehte hain। koi-koi bachchon ko padhte-padhte vichaar aate hain yeh kya hai, drama mein yeh aavaagman ka chakra hai। parantu yeh naatak racha hi kyon? isse kya phaayda? bas sirf aise chakra hi lagaate rahenge, isse to chhoot jaaen to achha hai। jab dekhte hain yeh to 84 ka chakra lagaate hi rehna hai to aise-aise khyaalaat aate hain। bhagwan ne aisa khel kyon racha hai, jo aavaagman ke chakra se chhoot hi nahin sakte, isse to moksha mil jaae। aise-aise khyaalaat kai bachchon ko aate hain। is aavaagman se, duhkh sukh se chhoot jaayen। baap kehte hain yeh kabhi ho nahin sakta। moksha paane ke liye koshish karna hi vesta ho jaata hai। baap ne samjhaaya hai ek bhi aatma part se chhoot nahin sakti। aatma mein avinaashi part bhara hai। woh hai hi anaadi avinaashi, bilkul accurate actors hain। ek bhi kam jaasti nahin ho sakte। tum bachchon ko saari knowledge hai। is drama ke part se koi chhoot nahin sakta। na koi moksha pa sakta hai। sab dharma vaalon ko nambarvaar aana hi hai। baap samjhaate hain yeh bana banaaya avinaashi drama hai। tum bhi kehte ho baba ab jaan gaye, kaise ham 84 ka chakra lagaate hain। yeh bhi samajhte ho pahle-pahle jo aate honge, woh 84 janma lete honge। peechhe aane vaale ke zaroor kam janma honge। yahaan to purooshaartha karne ka hai। puraani duniya se nai duniya zaroor banni hai। baba har ek baat baar-baar samjhaate rehte hain kyonki naye-naye bachche aate rehte hain। unko aage ki padhaai kaun padhaaye। to baap naye-naye ko dekh phir puraani points hi repeat karte hain।

tumhaari buddhi mein saari knowledge hai। jaante ho shuru se lekar kaise ham part bajaate aaye hain। tum yathaartha reeti jaante ho, kaise nambarvaar aate hain, kitne janma lete hain। is samay hi baap aakar gyaan ki baaten sunaate hain। satayug mein to hai hi praalabdha। yeh is samay tumko hi samjhaaya jaata hai। geeta mein bhi shuru mein phir pichhaadi mein yeh baat aati hai - manamnaabhav। padhaaya jaata hai status paane ke liye। tum raaja banne ke liye ab purooshaartha karte ho। aur dharma vaalon ka to samjhaaya hai - ki woh nambarvaar aate hain, dharma sthaapak ke pichhaadi sabko aana padta hai। raajaai ki baat nahin। ek hi geeta shaastra hai jiski bahut mahima hai। bhaarat mein hi baap aakar sunaate hain aur sabki sadgati karte hain। woh dharma sthaapak jo aate hain, vo jab marte hain to bade-bade teertha bana dete hain। vaastav mein sabka teertha yeh bhaarat hi hai jahaan behad ka baap aate hain। baap ne bhaarat mein hi aakar sarva ki sadgati ki hai। baap kehte hain mujhe liberator, guide kehte ho na। ham tumko is puraani duniya, duhkh ki duniya se liberate kar shantidham, sukhdhaam mein le jaate hain। bachche jaante hain baba humein shantidham, sukhdhaam le jaayenge। baaki sab shantidham jaayenge। duhkh se baap aakar liberate karte hain। unka janma-maran to hai nahin। baap aaya phir chala jaayega। unke liye aise thode hi kahenge ki mar gaya। jaise shivaanand ke liye kahenge shareer chhod diya phir kriyaakarma karte hain। yeh baap chala jaayega to inka kriyaakarma, ceremony aadi kuchh bhi nahin karna hota। unke to aane ka bhi nahin pata padta। kriyaakarma aadi ki to baat hi nahin hai। aur sab manushyon ka kriyaakarma karte hain। baap ka kriyaakarma hota nahin, unko shareer hi nahin। satayug mein yeh gyaan bhakti ki baaten hoti nahin। yeh abhi hi chalti hain aur sab bhakti hi sikhlaate hain। aadhaakalpa hai bhakti phir aadhaakalpa ke baad baap aakar gyaan ka varsa dete hain। gyaan koi vahaan saath nahin chalta। vahaan baap ko yaad karne ki darkaar hi nahin rehti। mukti mein hain। vahaan yaad karna hota hai kya? duhkh ki phariyaad vahaan hoti hi nahin। bhakti bhi pahle avyabhichaari phir vyabhichaari। is samay to ati vyabhichaari bhakti hai, isko raurav narka kaha jaata hai। ekdam teekhe mein teekha narka hai phir baap aakar teekha svarga banaate hain। is samay hai 100 pratishat duhkh, phir 100 prati-shat sukh-shanti hogi। aatma jaakar apne ghar vishraam paayegi। samjhaane mein bada sahaj hai। baap kehte hain main aata hi tab hoon jab nai duniya ki sthaapna kar puraani ka vinaash karna hota hai। itna kaarya sirf ek to nahin karenge। khidmatgaar bahut chaahiye। is samay tum baap ke khidmatgaar bachche bane ho। bhaarat ki khaas sachchi seva karte ho। sachcha baap sachchi seva sikhlaate hain। apna bhi, bhaarat ka bhi aur vishwa ka bhi kalyaan karte ho। to kitna ruchi se karna chaahiye। baba kitni ruchi se sarva ki sadgati karte hain। abhi bhi sarva ki sadgati honi hai zaroor। yeh hai shuddh ahankaar, shuddh bhaavna।

tum sachchi-sachchi seva karte ho - parantu gupta। aatma karti hai shareer dvaara। tum se bahut poochhte hain - bi.ke. ka uddeshya kya hai? bolo bi.ke. ka uddeshya hai vishwa mein satayugi sukh-shanti ka svaraajya sthaapan karna। ham har 5 hazaar varsha baad shreemat par vishwa mein shanti sthaapan kar vishwa shanti ki prize lete hain। yatha raaja-raani tatha praja prize lete hain। narkavaasi se svargavaasi banna kam prize hai kya! woh pees prize lekar khush hote rehte hain, milta kuchh bhi nahin। sachchi-sachchi prize to abhi ham baap se le rahe hain, vishwa ke baadshaahi ki। kehte hain na bhaarat hamaara oonch desh hai। kitni mahima karte hain। sab samajhte hain ham bhaarat ke maalik hain, parantu maalik hain kahaan। abhi tum bachche baba ki shreemat se raajya sthaapan karte ho। hathiyaar panvaar to kuchh nahin hain। daiveegun dhaaran karte hain isliye tumhaara hi gaayan poojan hai। amba ki dekho kitni pooja hoti hai। parantu amba kaun hai, brahman hai va devta… yeh bhi pata nahin। amba, kaali, durga, sarasvati aadi...... aise bahut naam hain। yahaan bhi neeche amba ka chhota-sa mandir hai। amba ko bahut bhujaayen de dete hain। aise to hai nahin। isko kaha jaata hai blind faith। Christ buddha aadi aaye, unhonne apna-apna dharma sthaapan kiya, tithi-taareekh sab bataate hain। vahaan blind faith ki to baat hi nahin। yahaan bhaaratvaasiyon ko kuchh pata nahin hai - hamaara dharma kab aur kisne sthaapan kiya? isliye kaha jaata hai blind faith। abhi tum pujaari ho phir poojya bante ho। tumhaari aatma bhi poojya to shareer bhi poojya banta hai। tumhaari aatma ki bhi pooja hoti hai phir devta bante ho to bhi pooja hoti hai। baap to hai hi niraakaar। woh sadaiv poojya hai। woh kabhi pujaari nahin bante hain। tum bachchon ke liye kaha jaata hai aapehi poojya aapehi pujaari। baap to ever poojya hai, yahaan aakar baap sachchi seva karte hain। sabko sadgati dete hain। baap kehte hain - ab maamekam yaad karo। doosre koi dehdhaari ko yaad nahin karna hai। yahaan to bade-bade lakhapti, karo-dapti jaakar allaah-allaah kehte hain। kitni andhashraddha hai। baap ne tumko ham so ka arth bhi samjhaaya hai। woh to kah dete shivoham, aatma so paramatma। ab baap ne correct kar bataaya hai। ab judge karo, bhaktimaarga mein right suna hai ya ham right bataate hain? ham so ka arth bahut lamba-chauda hai। ham so brahman, devta, kshatriy। ab ham so ka arth kaunsa right hai? ham aatma chakra mein aise aati hain। viraat roop ka chitra bhi hai, ismen choti brahman aur baap ko dikhaaya nahin hai। devtaayen kahaan se aaye? paida kahaan se hue? kaliyug mein to hai shoodra varna। satayug mein phat se devta varna kaise hua? kuchh bhi samajhte nahin। bhakti maarga mein manushya kitna phanse rehte hain। koi ne granth padh liya, khyaal aaya, mandir bana liya bas granth baith sunaayenge। bahut manushya aa jaate, bahut followers ban jaate hain। phaayda to kuchh bhi nahin hota। bahut dukaan nikal gaye hain। ab yeh sab dukaan khatma ho jaayenge। yeh dukaandaari saari bhakti maarga mein hai, inse bahut dhan kamaate hain। sannyaasi kehte hain ham brahm yogi, tatva yogi hain। jaise bhaaratvaasi vaastav mein hain devi-devta dharma ke parantu hindu dharma kah dete hain। vaise brahm to tatva hai, jahaan aatmaayen rehti hain। unhonne phir brahm gyaani tatva gyaani naam rakh diya hai। nahin to brahm tatva hai rahne ka sthaan। to baap samjhaate hain kitni bhaari bhool kar di hai। yeh sab hai bhram। main aakar sab bhram door kar deta hoon। bhakti maarga mein kehte bhi hain he prabhu teri gati mat nyaari hai। gati to koi kar na sake। maten to anekaanek ki milti hain। yahaan ki mat kitni kamaal kar deti hai। saare vishwa ko change kar deti hai।

abhi tum bachchon ki buddhi mein hai, itne sab dharma kaise aate hain! phir aatmaayen kaise apne-apne section mein jaakar rehti hain। yeh sab drama me noondh hai। yeh bhi bachche jaante hain - divya drishti daata ek baap hi hai। baba ko kaha - yeh divya drishti ki chaabi hamko de do to ham koi ko saakshaatkaar kara den। bola - nahin, yeh chaabi kisko mil nahin sakti। unke evaj mein tumko phir vishwa ki baadshaahi deta hoon। main nahin leta hoon। mera hi part hai saakshaatkaar karaane ka। saakshaatkaar hone se kitna khush ho jaate hain। milta kuchh bhi nahin। aise nahin ki saakshaatkaar se koi nirogi ban jaate hain ya dhan mil jaata hai। nahin, meera ko saakshaatkaar hua parantu mukti ko thode hi paaya। manushya samajhte hain woh rehti hi vaikuntha mein thi। parantu vaikuntha krishnapuri hai kahaan। yeh sab hain saakshaatkaar। baap baith sab baaten samjhaate hain। inko bhi pahle-pahle vishnu ka saakshaatkaar hua to bahut khush ho gaya। woh bhi jab dekha ki main mahaaraaja banta hoon। vinaash bhi dekha phir raajaai ka bhi dekha tab nishchay baitha oho! main to vishwa ka maalik banta hoon। baba ki praveshta ho gai। bas baba yeh sab aap le lo, hamko to vishwa ki baadshaahi chaahiye। tum bhi yeh sauda karne aaye ho na। jo gyaan uthaate hain unki phir bhakti chhoot jaati hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) daiveegun dhaaran kar shreemat par bhaarat ki sachchi seva karni hai। apna, bhaarat ka aur saare vishwa ka kalyaan bahut-bahut ruchi se karna hai।

2) drama ki anaadi avinaashi noondh ko yathaartha samajh koi bhi time vesta karne vaala purooshaartha nahin karna hai। vyartha khyaalaat bhi nahin chalaane hain।

vardaan:- ekaagrata ke abhyaas dvaara ekras sthiti banaane vaale sarva siddhi swaroop bhav

jahaan ekaagrata hai vahaan svatah ekras sthiti hai। ekaagrata se sankalp, bol aur karma ka vyartha pan samaapta ho jaata hai aur samartha pan aa jaata hai। ekaagrata arthaat ek hi shreshtha sankalp mein sthit rehna। jis ek beej roopi sankalp mein saara vriksha roopi vistaar samaaya hua hai। ekaagrata ko badhaao to sarva prakaar ki halchal samaapta ho jaayegi। sab sankalp, bol aur karma sahaj sidva ho jaayenge। iske liye ekaantavaasi bano।

slogan:- ek baar ki hui galti ko baar-baar sochna arthaat daag par daag lagaana isliye beeti ko bindi lagaao।