सोमवार 23 नवंबर 2020 की दैनिक मुरली

23-11-2020 praatahmurli om shanti "baapdaada"' madhuban

“meethe bachche - tum dehi-abhimaani bano to sab beemaariyaan khatma ho jaayengi aur tum double sirtaaj vishwa ke maalik ban jaayenge''

prashn:- baap ke sammukh kin bachchon ko baithna chaahiye?

uttar:- jinhen gyaan dance karna aata hai। gyaan dance karne vaale bachche jab baap ke sammukh hote hain to baba ki murli bhi aisi chalti hai। agar koi saamne baith idhar-udhar dekhte to baba samajhte yeh bachcha kuchh bhi samajhta nahin hai। baba braahmaniyon ko bhi kahenge tumne yeh kisko laaya hai, jo baba ke saamne bhi ubaasi dete hain। bachchon ko to aisa baap mila hai, jo khushi mein dance karni chaahiye।

geet:- doordesh ka rahne vaala…

om shanti। meethe-meethe bachchon ne geet suna। roohaani bachche samajhte hain ki roohaani baba jisko ham yaad karte aaye hain, duhkh harta, sukh karta va tum maat-pita..... phir se aakar hamko sukh ghanere do, ham duhkhi hain, yeh saari duniya duhkhi hai kyonki yeh hai kaliyugi puraani duniya। puraani duniya athva puraane ghar mein itna sukh nahin ho sakta, jitna nai duniya, naye ghar mein hota hai। tum bachche samajhte ho ham vishwa ke maalik aadi sanaatan devi-devta the, hamne hi 84 janma liye hain। baap kehte hain bachchon tum apne janmon ko nahin jaante ho ki kitne janma part bajaaya hai। manushya samajhte hain 84 laakh punarjanma hain। ek-ek punarjanma kitne varsha ka hota hai। 84 laakh ke hisaab se to srishti chakra bahut bada ho jaae। tum bachche jaante ho ham aatmaon ka baap hamko padhaane aaye hain। ham bhi doordesh ke rahne vaale hain। ham koi yahaan ke rahne vaale nahin hain। yahaan ham part bajaane aaye hain। baap ko bhi ham paramdham mein yaad karte hain। abhi is paraaye desh mein aaye hain। shiv ko baba kahenge। raavan ko baba nahin kahenge। bhagwan ko baba kahenge। baap ki mahima alag hai, 5 vikaaron ki koi mahima karenge kya! deh-abhimaan to bahut badi beemaari hai। ham dehi-abhimaani banenge to koi beemaari nahin rahegi aur ham vishwa ke maalik ban jaayenge। yeh baaten tumhaari buddhi mein hain। tum jaante ho shivbaaba ham aatmaon ko padhaate hain। jo bhi aur itne satsang aadi hain, kahaan bhi aise nahin samjhenge ki hamko baba aakar raajayog sikhlaayenge। raajaai ke liye padhaayenge। raaja banaane vaala to raaja hi chaahiye na। surgeon padhaakar aap samaan surgeon banaayenge। achha, double sirtaaj banaane vaala kahaan se aayega, jo hamko double sirtaaj banaaye isliye manushyon ne phir double sirtaaj krishna ko rakh diya hai। parantu krishna kaise padhaayenge! zaroor baap sangam par aaye honge, aakar raajaai sthaapan ki hogi। baap kaise aate hain, yeh tumhaare sivaae aur koi ki buddhi mein nahin hoga। doordesh se baap aakar hamko padhaate hain, raajayog sikhlaate hain। baap kehte hain mujhe koi light va ratna jadit taaj hai nahin। woh kabhi raajaai paate nahin। double sirtaaj bante nahin, auron ko banaate hain। baap kehte hain ham agar raaja banta to phir rank bhi banna padta। bhaaratvaasi raav the, ab rank hain। tum bhi double sirtaaj bante ho to tumko banaane vaala bhi double sirtaaj hona chaahiye, jo phir tumhaara yog bhi lage। jo jaisa hoga aisa aap samaan banaayega। sannyaasi koshish kar sannyaasi banaayenge। tum grihasthi, woh sannyaasi to phir tum followers to thahre nahin। kehte hain phalaana shivaanand ka follower hai। parantu woh sannyaasi maatha mudaane vaale hain, tum to follow karte nahin! to tum phir follower kyon kehte ho! follower to woh jo jhat kapda utaar kaphni pahan len। tum to grihastha mein vikaaron aadi mein rehte ho phir shivaananda ka followers kaise kahlaate ho। guru ka to kaam hai sadgati karna। guru aise to nahin kahenge phalaane ko yaad karo। phir to khud guru nahin hua। muktidhaam mein jaane liye bhi yukti chaahiye।

tum bachchon ko samjhaaya jaata hai, tumhaara ghar hai muktidhaam athva niraakaari duniya। aatma ko kaha jaata hai niraakaari soul। shareer hai 5 tatvon ka bana hua। aatmaayen kahaan se aati hain? paramdham niraakaari duniya se। vahaan bahut aatmaayen rehti hain। unko kahenge sweet silence hom। vahaan aatmaayen duhkh-sukh se nyaari rehti hain। yeh achhi reeti pakka karna hai। ham hain sweet silence hom ke rahne vaale। yahaan yeh naatakshaala hai, jahaan ham part bajaane aate hain। is naatakshaala mein soorya, chaand, stars aadi battiyaan hain। koi ginti kar na sake ki yeh naatakshaala kitne miles ki hai। aeroplane mein oopar jaate hain lekin usmein petrol aadi itna nahin daal sakte jo jaakar phir laut bhi aayen। itna door nahin ja sakte। woh samajhte hain itne miles tak hai, lautenge nahin to gir padenge। samudra ka va aakaash tatva ka ant pa nahin sakte। abhi baap tumko apna ant dete hain। aatma is aakaash tatva se paar chali jaati hai। kitna bada rocket hai। tum aatmaayen jab pavitra ban jaayengi to phir rocket misal tum udne lag padenge। kitna chhota rocket hai। soorya-chaand se bhi us paar mool vatan mein chale jaayenge। soorya-chaand ka ant paane ki bahut koshish karte hain। door ke stars aadi kitne chhote dekhne mein aate hain। hain to bahut bade। jaise tum patang udaate ho to oopar mein kitni chhoti-chhoti dikhaai padti hai। baap kehte hain tumhaari aatma to sabse teekhi hai। second mein ek shareer se nikal doosre garbha mein jaae pravesh karti hai। kiska karmon ka hisaab-kitaab london mein hai to second mein london jaakar janma legi। second mein jeevanmukti bhi gaai hui hai na। bachcha garbha se nikla aur maalik bana, vaaris ho hi gaya। tum bachchon ne bhi baap ko jaana goya vishwa ke maalik ban gaye। behad ka baap hi aakar tumko vishwa ka maalik banaate hain। school mein bairistari padhte to barrister banenge। yahaan tum double sirtaaj banne ke liye padhte ho। agar paas honge to double sirtaaj zaroor banenge। phir bhi svarga mein to zaroor aayenge। tum jaante ho baap to sadaiv vahaan hi rehte hain। O god father kahenge to bhi drishti zaroor oopar jaayegi। god father hai to zaroor kuchh to unka part hoga na। abhi part baja rahe hain। unko baagvaan bhi kehte hain। koton se aakar phool banaate hain। to tum bachchon ko khushi honi chaahiye। baba aaya hua hai is desh paraaye। door desh ka rahne vaala aaye desh paraaye। door desh ka rahne vaala to baap hi hai। aur aatmaayen bhi vahaan rehti hain। yahaan phir part bajaane aati hain। desh paraaye - yeh arth koi nahin jaante hain। manushya to bhaktimaarga mein jo sunte hain woh sat-sat kehte rehte hain। tum bachchon ko baap kitna achhi reeti samjhaate hain। aatma impure hone se ud nahin sakti hai। pure banne bigar vaapis ja nahin sakti। patit-paavan ek hi baap ko kaha jaata hai। unko aana bhi hai sangam par। tumko kitni khushi honi chaahiye। baba hamko double sirtaaj bana rahe hain, isse oonch darja koi ka hota nahin। baap kehte hain main double sirtaaj banta nahin hoon। main aata hi hoon ek baar। paraaye desh, paraaye shareer mein। yeh daada bhi kehte hain main shiv thode hi hoon। mujhe to lakheeraaj kehte the phir surrender hua to baba ne brahma naam rakha। ismen pravesh kar inko kaha ki tum apne janmon ko nahin jaante ho। 84 janmon ka bhi hisaab hona chaahiye na। vo log to 84 laakh kah dete hain jo bilkul hi impossible hai। 84 laakh janmon ka raaz samjhaane mein hi saikdon varsha lag jaayen। yaad bhi pad na sake। 84 laakh yoniyon mein to pashu-pakshi aadi sab aa jaate hain। manushya ka hi janma durlabh gaaya jaata hai। jaanvar thode hi knowledge samajh sakenge। tumko baap aakar knowledge padhaate hain। khud kehte hain main aata hoon raavan raajya mein। maaya ne tumko kitna pattharbuddhi bana diya hai। ab phir baap tumko paarasbuddhi banaate hain। utarti kala mein tum pattharbuddhi ban gaye। ab phir baap chadhti kala mein le jaate hain, nambarvaar to hote hain na। har ek ko apne purushaartha se samajhna hai। mukhya baat hai yaad ki। raat ko jab sote ho to bhi yeh khyaal karo। baba ham aapki yaad mein so jaate hain। goya ham is shareer ko chhod dete hain। aapke paas aa jaate hain। aise baba ko yaad karte-karte so jaao to phir dekho kitna maza aata hai। ho sakta hai saakshaatkaar bhi ho jaae। parantu is saakshaatkaar aadi mein khush nahin hona hai। baba ham to aapko hi yaad karte hain। aapke paas aane chaahte hain। baap ko tum yaad karte-karte bade aaraam se chale jaayenge। ho sakta hai sookshm vatan mein bhi chale jaao। mool vatan mein to ja nahin sakenge। abhi vaapis jaane ka samay kahaan aaya hai। haan, saakshaatkaar hua bindi ka phir chhoti-chhoti aatmaon ka jhaad dikhaai padega। jaise tumko baikuntha ka saakshaatkaar hota hai na। aise nahin, saakshaatkaar hua to tum baikuntha mein chale jaayenge। nahin, uske liye to phir mehnat karni pade। tumko samjhaaya jaata hai tum pahle-pahle jaayenge sweet hom। sab aatmaae part bajaane se mukta ho jaayengi। jab tak aatma pavitra nahin bani hai tab tak ja na sake। baaki saakshaatkaar se milta kuchh bhi nahin hai। meera ko saakshaatkaar hua, baikuntha mein chali thode hi gai। baikuntha to satayug mein hi hota hai। abhi tum taiyaari kar rahe ho baikuntha ka maalik banne ke liye। baba dhyaan aadi mein itna jaane nahin dete hain kyonki tumko to padhna hai na। baap aakar padhaate hain, sarva ki sadgati karte hain। vinaash bhi saamne khada hai। baaki asuron aur devtaaon ki ladaai to hai nahin। woh aapas mein ladte hain tumhaare liye kyonki tumhaare liye nai duniya chaahiye। baaki tumhaari ladaai hai maaya ke saath। tum bahut naameegraami warriors ho। parantu koi jaante nahin ki deviyaan itna kyon gaai jaati hain। abhi tum bhaarat ko yogbal se svarga banaate ho। tumko ab baap mil gaya hai। tumko samjhaate rehte hain-gyaan se nai duniya jindaabaad hoti hai। yeh lakshmi-naaraayan nai duniya ke maalik the na। ab puraani duniya hai। puraani duniya ka vinaash aage bhi mooslon dvaara hua tha। mahaabhaarat ladaai lagi thi। us samay baap raajayog bhi sikha rahe the। ab practical mein baap raajayog sikha rahe hain na। baap hi tumko sach bataate hain। sachcha baba aate hain to tum sadaiv khushi mein dance karte ho। yeh hai gyaan dance। to jo gyaan dance ke shaukeen hain, unko hi saamne baithna chaahiye। jo nahin samajhne vaale honge, unko ubaasi aayegi। samajh jaate hain, yeh kuchh bhi samajhte nahin hain। gyaan ko kuchh bhi samjhenge nahin to idhar-udhar dekhte rahenge। baba bhi braahmani ko kahenge tumne kisko laaya hai। jo seekhte hain aur sikhlaate hain unko saamne baithna chaahiye। unko khushi hoti rahegi। hamko bhi dance karna hai। yeh hai gyaan dance। krishna ne to na gyaan sunaaya, na dance kiya। murli to yeh gyaan ki hai na। to baap ne samjhaaya hai-raatri ko sote samay baba ko yaad karte, chakra ko buddhi mein yaad karte raho। baba ham ab is shareer ko chhod aapke paas aate hain। aise yaad karte-karte so jaao phir dekho kya hota hai। aage kabristaan banaate the phir koi shant mein chale jaate the, koi raas karne lagte the। jo baap ko jaante hi nahin, to woh yaad kaise kar sakenge। manushya-maatra baap ko jaante hi nahin to baap ko yaad kaise karen, tab baap kehte hain main jo hoon, jaisa hoon, mujhe koi bhi nahin jaante।

abhi tumko kitni samajh aai hai। tum ho gupta warriors। warriors naam sunkar deviyon ko phir talvaar baan aadi de diye hain। tum warriors ho yogbal ke। yogbal se vishwa ke maalik bante ho। baahubal se bhal koi kitni bhi koshish kare parantu jeet pa nahin sakte। bhaarat ka yog mashhoor hai। yeh baap hi aakar sikhlaate hain। yeh bhi kisko pata nahin hai। uthte-baithte baap ko hi yaad karte raho। kehte hain yog nahin lagta hai। yog akshar uda do। bachche to baap ko yaad karte hain na। shivbaaba kehte hain maamekam yaad karo। main hi sarvashaktimaan hoon, mujhe yaad karne se tum satopradhaan ban jaayenge। jab satopradhaan ban jaayenge tab phir aatmaon ki baraat niklegi। jaise makkhiyon ki baraat hoti hai na। yeh hai shivbaaba ki baaraat। shiv-baba ke pichhaadi sab aatmaayen machchharon sadrishya bhaagengi। baaki shareer sab khatma ho jaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) raat ko sone se pahle baba se meethi-meethi baaten karni hain। baba ham is shareer ko chhod aapke paas aate hain, aise yaad karke sona hai। yaad hi mukhya hai, yaad se hi paarasbuddhi banenge।

2) 5 vikaaron ki beemaari se bachne ke liye dehi-abhimaani rahne ka purooshaartha karna hai। athaah khushi mein rehna hai, gyaan dance karna hai। class mein susti nahin phailaana hai।

vardaan:- trikaaldarshi stage dvaara vyartha ka khaata samaapta karne vaale sada saphaltaamoorta bhav

trikaaldarshi stage par sthit hona arthaat har sankalp, bol va karma karne ke pahle check karna ki yeh vyartha hai ya samartha hai! vyartha ek second mein padmon ka nuksaan karta hai, samartha ek second mein padmon ki kamaai karta hai। second ka vyartha bhi kamaai mein bahut ghaata daal deta hai jisse ki hui kamaai bhi chhip jaati hai isliye ek kaal darshi ho karma karne ke bajaae trikaaldarshi sthiti par sthit hokar karo to vyartha samaapta ho jaayega aur sada saphaltaamoorta ban jaayenge।

slogan:- slogan:- maan, shaan aur saadhnon ka tyaag hi mahaan tyaag hai।