बुधवार 3 नवंबर 2021 की दैनिक मुरली

03-11-2021 praatahmurli om shanti "baapdaada"' madhuban

“meethe bachche - andar baahar saaph bano, koi bhi gandi aadat ab tumhaare mein nahin honi chaahiye''

prashn:- brahman bachchon ko baap se poora-poora varsa lene ke liye kin-kin dhaarnaaon par dhyaan rakhna hai?

uttar:- 1- is janma mein baap ka bankar aisa koi paap karma na ho jiski sauguna saja bhogni pade। 2- baap jo ati meetha hai woh tumhein aap samaan meetha banaate hain isliye mukh se koi kaduva bol na nikle jisse doosre ko duhkh ho। 3- duhkh harta sukh karta ke bachche ban sabke duhkh harne hain। mansa-vaacha-karmana sukh dena hai। 4- stuti-ninda mein samaan rehna hai।

om shanti। satguroovaar ko vrikshapti de bhi kaha jaata hai। vrikshapti de arthaat baap ka din। umaavas ke din andhiyaari raat poori hoti hai phir din shuru hota hai। chandrama uday hona shuru hota hai। aur aajkal jinka pitra hota hai usko khilaae-pilaae poora karte phir magaanna nahin hota hai। sabko tripta kiya jaata hai। din mein chale gaye phir raat mein laut aane ki darkaar hi kya hai। asul kaayda yeh hai - 12 maas ka samay jab poora hota hai to unko khilaakar, khalaas kar dena hota hai। phir andhiyaari raat mein kyon bulaaya jaata hai। parantu braahmanon ne yeh bhi rasam-rivaaj bana di hai, woh chali aati hai। dakshina aadi milti rahegi। woh hai had ki umaavas। ab baap aaya hai behad ki umaavas mein। baap aate hain to aadhaakalpa ka andhiyaara poora hota hai। phir satayug mein sojhra hi sojhra hota hai। vahaan kabhi koi pitra aadi nahin khilaayenge। yeh phir hai behad ki umaavas। brahma ki raat so braahmanon ki raat poori ho din aa jaata hai। phir koi pitra aadi khilaate nahin, vahaan brahman hi nahin hote। aise nahin ki koi marte nahin hain, parantu yeh rasam rivaaj nahin hota hai। yahaan to anek prakaar ke brahman bhi hain। ab chaahte hain ki ek world ho, ek nation ho। ab itne sabka ek nation to ho na sake। haan ek raajya, ek rasam rivaaj thi, jab satayug tha। woh to baap hi aakar sthaapan karte hain। vahaan sab bilkul meethe hote hain, duhkh ki baat nahin hoti। kab kaduva bolte nahin, paap karte nahin। ab jo jitna purushaartha karenge utna pad paayenge, nambarvaar। aise nahin ki koi vahaan chori aadi karenge। nahin। andar baahar saaph rehta hai। yahaan andar ek baahar doosre hote hain। kitna ek doosre ko nuksaan pahunchaate hain। yeh sab hai raavan raajya ki gandi chanchalta। baba ab isko ekdam khatma kara dete hain। sabki ekdam jhat se gandi aadten to khatma hoti nahin। time lagta hai, jitna-jitna yog mein rahenge, kadam-kadam par dekhte rahenge ki ham yog mein rehte hain! koi paap karma to nahin karte hain! khud meetha ban phir auron ko meetha banaata hoon? khud hi kaduva hoga to doosron ko meetha kaise banaayega। yahaan aise jhat pratyaksha ho jaate hain, chhip na saken। baap kehte hain - hamaara bachcha ban aur koi ulta-sulta kaam karenge to bahut kadi saja khaayenge। pad bhi bhrashta ho jaayega। bhagwan khud baith padhaate hain devta banaane ke liye, devtaaon ki mahima gaate hain - sarvagun sampanna… ahinsa parmodharma। hinsa do prakaar ki hoti hai - ek to kaam kataari ki hinsa se manushya aadi madhya ant duhkh paate hain। doosra phir krodh mein aakar ek do ko maarte duhkh dete, duhkhi hote hain। yahaan to bachchon ko kaha jaata hai mansa-vaacha-karmana aisa koi kaam nahin karna hai। koi ko duhkh nahin dena hai। ham hain hi duhkh harta sukh karta ke bachche। to sabko yahi yukti bataani hai - tum kaise duhkh harkar sukh do। kiye hue karmo ka hisaab-kitaab chuktu ho jaata hai। yahaan baap samjhaate hain is janma mein jo kuchh paap karma kiye hain, batlaane se aadha kat jaayenge। parantu anek janmon ke kiye hue paap karma to bahut hain na sir par। abhi baap samjhaate hain ki is janma mein bhi aisa karma nahin karna chaahiye jiska paap banen aur phir yogbal se anek janmon ke paap karma bhasma karne hain। is janma mein baap ka bankar koi bhi paap karma nahin karna chaahiye। brahman banne bigar varsa mil na sake। yeh baapdaada hai na। varsa tumko unse milta hai, inse nahin। yeh apne ko kuchh nahin kahlaata hai। yeh to sirf rath hai, inse tumko kuchh milta nahin। rath bhi to gaaya jaata hai। husain ka rath nikaalte hain na। ghode ko kitna sajaate hain। yeh to patit tan hai na। yeh bhi abhi saj raha hai। apne purushaartha se hi sajte hain। inki baba taraphdaari nahin karte hain। yeh to baba kabhi-kabhi hansi karte hain ki kiraaya to milega na। parantu purushaartha jaise tumhein karna hai vaise inko karna hota hai। yeh laalach nahin rehti ki hamko kiraaya denge। yeh to baba hansi karte hain। aatma ko yogbal se hi satopradhaan banna hai। jitna yog hoga utna paavan banenge aur phir aap samaan bhi banaana hai। tum bachche jaante ho jo achhe-achhe service karne vaale hain, woh naameegraami hain। baba service par bhej dete hain। bahut meetha bolna hota hai। koi se ladna-jhagadna nahin hai। brahman agar kaduva bolte hain to kahenge inmen to krodh ka bhoot hai। stuti-ninda mein samaan rehna chaahiye। bahuton mein krodh ka bhoot hai, usse bahut naaraaz hote hain। aisa nahin ki sabka krodh nikal gaya hai। jab tak sampoorn banne ka samay aaye tab tak dheere-dheere khaad nikalti rahegi। aise koi kah na sake ki hamaare mein krodh nahin hai। koi mein jaasti, koi mein kam hota hai। koi-koi ka aavaaj hi aisa hota hai jaise ladaai karte hain। bachchon ko bahut-bahut meetha banna hai। yahaan hi sarvagun sampanna banna hai। vikaar to anek prakaar ke hain na। krodh karna, jhooth bolna yeh sab vikaar hain।

baap kehte hain - bachche abhi koi vikarma karenge to bahut saza khaani padegi। vahaan to mere saath danda dene vaala dharmaraaj hai। yahaan saza milti hai pratyaksha, dharmaraaj ki saza milti hai gupta, garbha jel mein bhi sajaayen bhogte hain। koi ko beemaari aadi hoti hai - woh bhi karmabhog hai। dharmaraaj dvaara danda milta hai। aage ka bhi abhi milta hai। abhi ka abhi bhi mil sakta hai। phir garbhajel mein bhi milta hai। woh hai gupta, dharmaraaj vahaan to saja nahin denge na। yahaan phir shareer se bhogna bhogni padti hai। ab baap hamko inse chhuda rahe hain। parampita paramatma aur dharmaraaz baba donon haajir hain। abhi sabhi ke kayaamat ka samay hai। har ek ki judgement hoti hai। yeh bhi drama mein noondh hai। jabki tum bachche samajhte ho - sampoorn banna hai, to koi bhi paap karma nahin karo। apne kalyaan ke liye jitna ho sake utna poora purushaartha karna chaahiye। kalpa kalpaantar ki baat hai। woh padhaai hoti hai ek janma ke liye। doosre janma mein phir doosri padhaai, yeh hai 21 janmon ki। avinaashi baap avinaashi padhaai padhaate hain, jisse 21 janmon ke liye avinaashi pad bhi milta hai। baap se 21 janmon ke liye varsa milta hai। tum bachche jaante ho yeh puraani duniya hai, nai duniya mein bhaarat akela tha। ab phir yeh chakra phirna hai। nai srishti sthaapan ho puraani ka vinaash hoga। yeh to gaaya hua hai parampita paramatma brahma dvaara aakar nai duniya sthaapan karte hain। brahman to zaroor chaahiye। to zaroor pavitra bhi bante honge, raajayog bhi seekhte honge। ham brahmaakumaar kumaariyaan to pavitra ban rahe hain। baap yeh nahin kehte ki gharbaar chhodo। nahin, grihastha vyavhaar mein rehte kamal phool samaan raho। yeh baapdaada naam bahut achha hai। daade se varsa milta hai। woh hai oonch te oonch। brahma to patit tha na। yeh pahle-pahle shreshthaachaari poojya mahaaraaja tha। ab ant mein aakar patit ban gaya। yeh hai inka antim janma। is duniya mein koi paavan hai hi kahaan। paavan duniya mein koi yaad nahin karte। gaaya hua bhi hai aatma paramatma alag rahe bahukaal..... iska hisaab bhi tumne samjha। sooryavanshi jo hain woh pahle-pahle apna varsa lene aayenge। ab aatma shareer chhodkar gai। kehte hain svarga padhaara। phir unko narka mein mangaane ki darkaar hi kya hai। kuchh bhi samajhte nahin hain। saadhu-santa aadi bhi marte hain to unki bhi varsi manaate hain, bhog lagaate honge। jab kehte hain jyoti jyot samaaya phir bhog kyon lagaate। varsi kyon manaate? shareer to khalaas hua - aatma bhi gai phir aatma ko bulaane ki kya darkaar hai। jyoti mein leen ho gai phir aa kaise sakti। anekaanek mat hain। aise bhi kehte hain manushya moksha paata hai phir aata nahin। moksha ko paaya to aur hi khushi manaana chaahiye, part bajaane se chhoot gaya। phir to unko yaad bhi nahin karna chaahiye। yeh bhi tum jaante ho। sabhi manushya maatra ek baap ko yaad zaroor karte hain। maante bhi sab bhaai-bhaai hain। to bhaaiyon ko baap se varsa zaroor milna chaahiye। sarva aatmaon ka sadgati daata ek hai। sabhi aatmaon ko vaapis jaana hai। manushya, manushya ko sadgati kaise de sakte isliye ek hi sarva ke sadgati daata ka naam mashhoor hai। vahi gyaan ka saagar, patit-paavan hai। woh baap aakar raajayog sikhlaate hain। sabhi ko raavanraajya se chhudaate hain, inko behad ki umaavas kahenge। aadhaakalpa hai behad ki raat phir aadhaakalpa hai behad ka din। yeh khel hai। jab religious conference vaale bulaate hain - shanti kaise ho to vahaan bataana chaahiye - ek dharma, ek mat satayug mein hi hota hai। unko 5 hajaar varsha hue। vahaan sukh-shanti sab tha, baaki sab aatmaayen shanti-dhaam mein thi। nai duniya mein ek hi dharma tha। puraani duniya mein jhaad kitna badh jaata hai। anek dharma hain। ab anek dharmo ka vinaash aur ek dharma ki sthaapna yeh baap ka hi kaam hai। shivbaaba kehte hain - yeh hamaara kaam hai। ham kalpa-kalpa aakar yeh kaam karta hoon। satayugi raajdhaani ke liye raajayog zaroor sangam par hi sikhlaayenge। sabhi patiton ko paavan banaate hain। kehte hain main aata hoon bahut janmon ke ant ke janma ke ant mein। jisne poore 84 janma liye hain, unke rath mein hi aakar samjhaata hoon। nai duniya to hai hi nahin। puraani duniya mein hi aakar nai duniya banaata hoon। patit duniya ko paavan banaata hoon। mera naam hi hai duhkh harta, sukh karta। sukh mein mujhe koi yaad nahin karte, duhkh mein mujhe yaad karte hain। zaroor sukh mila hua tha। baap kehte hain main aaya hoon padhaane। ab padhna tumhaara kaam hai। manushya to ghor andhiyaare mein hain, tum bhi kuchh nahin jaante the। is samay saari duniya ka beda dooba hua hai, kitne duhkhi hain। tum sabka beda paar karte ho, sab shantidham mein chale jaayenge। yeh baaten tumhaari buddhi mein hain, so bhi nambarvaar। jo light house bane honge, woh doosron ko bhi raasta bataate rahenge। unka kaam hi hai raasta bataana। bachchon ko baap kaise padhaate hain, yeh to sthaai khushi rahni chaahiye। yahaan aakar bahut refresh ho jaate hain, baahar jaane se nasha hi gum ho jaata hai। baap se poora-poora varsa lene ki tamanna rakhni chaahiye। kadam-kadam par baap se raay lete rehna hai। aage teertho par paidal jaate the, bahut khabardaari se jaate the। is samay to bas train mein jaate hain। maaya ka is samay bhabhka bahut hai। satayug mein bhabhka tha phir dvaapar se girta gaya। ab phir pichhaadi mein shuru hua hai, inko maaya ka pomp kaha jaata hai। kisko kaho chalo svarga mein, to kehte humein yahaan hi sab sukh hain। motor, aeroplane aadi sab hain। hamaare liye svarga yahaan hi hai। dhan, maal, jevar aadi sab hain। lakshmi-naaraayan ko bhi jevar hain na। ham bhi pahan sakte hain। kitna bhi samjhaao phir bhi vish hi yaad rehta hai। vish (vikaar) bigar rah nahin sakte। baap kehte hain - tum meri baat maante nahin ho। paavan nahin bante ho to mujhe bulaate hi kyon ho ki he patit-paavan aao। yaad rakhna abhi nahin maanenge to dharmaraaz dvaara saza dilaayenge। daraate bhi hain। bahut bachche vikaar mein jaate hi rehte hain, dar hi nahin। woh kitne hantar khaayenge। baat mat poochho। pad bhi bhrashta ho jaayega। purushaartha kar oonch pad paana chaahiye na। sangadosh mein aisa gir padte hain jo ekdam apna pad ganva dete hain। tum jaante ho abhi heeron aadi ki khaaniyaan khaali hoti ja rahi hain phir bhar jaayengi। sone, heeron ke pahaad hote hain। heere jab khod kar nikaalte hain to pahle patthar hote hain phir unko saaph kar heera banaate hain। tumko bhi gyaan seeraan par chadhaate hain to tum kitne achhe ho jaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) abhi kayaamat ka samay hai isliye koi bhi paap karma nahin karna hai। apne kalyaan ka purushaartha karna hai, bahut meetha banna hai। krodh ko chhod dena hai।

2) baap se poora-poora varsa lene ki tamanna rakhni hai। kadam-kadam par baap ki raay leni hai। baap samaan duhkh harta sukh karta banna hai।

vardaan:- svayan ke sankalpon ki uljhan athva sajaaon se bhi pare rahne vaale paas with honour bhav

paas with honour arthaat man mein bhi sankalpon se saja na khaayen। dharmaraaj ke sajaaon ki baat to peechhe hai parantu apne sankalpon ki bhi uljhan athva sajaaon se pare rehna - yeh paas with honour hone vaalon ki nishaani hai।। vaani, karma, sambandh-samparka ki baat to moti hai lekin sankalpon mein bhi uljhan paida na ho, aisi pratigya karo tab paas with honour banenge।

slogan:- gyaan ghrit aur yog ki batti theek ho to khushi ka deepak jagta rahega।