रविवार 7 नवंबर 2021 की दैनिक मुरली

07-11-21 praatahmurli om shanti ''avyakt-baapdaada'' revise 19-11-89 madhuban

tan, man, dhan aur jan ka bhaagya

aaj sachche saaheb apne saahebjaade aur saahebjaadiyon ko dekh rahe hain। baap ko kehte hi hain satya, isliye baapdaada dvaara sthaapan kiye hue yug ka naam bhi satayug hai। baap ki mahima bhi sat baap, sat shikshak, satguru kehte hain। satya ki mahima sada hi shreshtha rahi hai। sat baap dvaara aap sabhi satya naaraayan banne ke liye sachchi katha sun rahe ho। aisa sachcha saaheb apne bachchon ko dekh rahe hain ki kitne bachchon ne sachche saaheb ko raazi kiya hai। sachche saaheb ki sabse badi visheshta hai - woh daata, vidhaata, vardaata hai। raazi rahne vaale bachchon ki nishaani-sada daata raazi hai, isliye aisi aatmaayen sada apne ko gyaan ke khajaane, shaktiyon ke khajaane, gunon ke khajaane, sab khajaanon se bharpoor anubhav karengi, kabhi bhi apne ko khajaanon se khaali nahin samjhengi। koi bhi gun va shakti va gyaan ke guhya raaz se vanchit nahin hongi। gunon ki va shaktiyon ki percentage ho sakti hai lekin koi gun va koi shakti aisi aatma mein ho hi nahin - yeh nahin ho sakta। jaise samay pramaan kai bachche kehte hain ki mere mein aur shaktiyaan to hain lekin yeh shakti va gun nahin hain। to ‘nahin' shabd nishedh hoga। aise daata ke bachche sada dhanvaan honge arthaat bharpoor va sampanna honge। doosri mahima hai ‘bhaagyavidhaata'। to bhaagya-vidhaata saaheb ke raazi ki nishaani - aise master bhaagya vidhaata bachchon ke mastak par sada bhaagya ka sitaara chamakta rehta hai arthaat unki moorta aur soorat se sada roohaani chamak dikhaai deti hai। moorta se sada raazi rahne ke features dikhaai denge, soorat se sada roohaani seerat anubhav hogi। isko kehte hain mastak mein chamakta hua bhaagya ka sitaara। har baat mein tan, man, dhan, jan - chaaron roop se apna bhaagya anubhav karenge। aise nahin ki inmen se koi ek bhaagya ke praapti ki kami mahsoos karenge। mere bhaagya mein teen baaten to theek hain, baaki ek baat ki kami hai - aise nahin।

tan ka bhaagya - tan ka hisaab-kitaab kabhi praapti va purooshaartha ke maarga mein vighna anubhav nahin hoga, tan kabhi bhi seva se vanchit hone nahin dega। karma-bhog ke samay bhi aise bhaagyavaan kisi na kisi prakaar se seva ke nimitta banenge। karmabhog ko chalaayega lekin karmabhog ke vash chillaayega nahin। chillaana arthaat karmabhog ka baar-baar varnan karna va baar-baar karmabhog ki taraph buddhi aur samay lagaate rehna। chhoti si baat ko bada vistaar karna - isko kehte hain chillaana aur badi baat ko gyaan ke saar se samaapta karna - isko kehte hain chalaana। to sada yeh baat yaad rakho - yogi jeevan ke liye chaahe chhota karmabhog ho, chaahe bada ho lekin uska varnan nahin karo, karma-bhog ki kahaani ka vistaar nahin karo kyonki varnan karne mein samay aur shakti usi taraph hone ke kaaran health kaanshiyas ho jaate hain, soul kaanshiyas nahin। yeh health kaanshiyasnes roohaani shakti se dheere-dheere narvas bana deti hai, isliye kabhi bhi jyaada varnan nahin karo। yogi jeevan karmabhog ko karmayog mein parivartan karne vaala hai। yeh hain tan ke bhaagya ki nishaaniyaan।

man ka bhaagya - man sada harshit rahega kyonki bhaagya ke praapti ki nishaani harshit rehna hi hai। jo bharpoor hota hai woh sada hi man se muskaraata rehta hai। man ke bhaagyavaan sada ichchha maatram avidya ki sthiti vaale hote hain। bhaagyavidhaata ke raazi hone ke kaaran sarva praapti sampanna anubhav karne ke kaaran man ka lagaav va jhukaav vyakti va vastu ke taraph nahin hoga। isko hi saar roop mein kehte ho “manamnaabhav''। man ko baap ke taraph lagaane mein mehnat nahin hogi lekin sahaj hi man baap ki muhabbat ke sansaar mein rahega। ek baap doosra na koi - isi anubhooti ko man ka bhaagya kehte hain।

dhan ka bhaagya - gyaan dhan to hai hi lekin sthool dhan ka bhi mahatva hai। dhan ke bhaagya ka arth yeh nahin ki brahman jeevan mein laakhompati va karodapti banenge lekin dhan ke bhaagya ki nishaani hai ki sangamayug par jitna aap brahman aatmaon ko khaane-peene aur aaraam se rahne ke liye aavashyakta hai, utna aaraam se milega। aur saath-saath dhan chaahiye seva ke liye। to seva ke liye bhi kabhi samay par kami va kheenchaataan anubhav nahin karenge। kaise bhi, kahaan se bhi seva ke samay par bhaagya vidhaata baap kisko nimitta bana hi dete hain। dhan ke bhaagyavaan kabhi bhi apne ‘naam' ki va ‘shaan' ki ichchha kaaran seva nahin karenge। agar naam-shaan ki ichchha hai to aise samay par bhaagya-vidhaata sahayog nahin dilaayega। aavashyakta aur ichchha mein raat-din ka antar hai। sachchi aavashyakta hai aur sachcha man hai to koi bhi seva ke kaarya mein, kaarya to saphal hoga hi lekin bhandaari mein aur hi bharpoor ho jaayega, bachega, isliye gaayan hai “shiv ke bhandaare aur bhandaari sada bharpoor''। to sachchi dil vaalon ki aur sachche saaheb ke raaji hone ki nishaani hai bhandaara bhi bharpoor, bhandaari bhi bharpoor। yeh hai dhan ke bhaagya ki nishaani। vistaar to bahut hai lekin saar mein suna rahe hain।

chauthi baat-jan ka bhaagya - jan arthaat brahman parivaar va laukik parivaar, laukik sambandh mein aane vaali aatmaayen va alaukik sambandh mein aane vaali aatmaayen। to jan dvaara bhaagyavaan ki pahli nishaani hai - jan ke bhaagyavaan aatma ko jan dvaara sada sneh aur sahayog ki praapti hoti rahegi। kam se kam 95 percent aatmaon se praapti ka anubhav avashya hoga। pahle bhi sunaaya tha ki 5 percent aatmaon ka hisaab-kitaab bhi chuktu hota hai isliye unhon dvaara kabhi sneh milega, kabhi pareeksha bhi hogi। lekin 5 percent se jyaada nahin hona chaahiye। aisi aatmaon se bhi dheere-dheere shubh bhaavna, shubh kaamna dvaara hisaab ko chuktu karte raho। jab hisaab chuktu ho jaayega to kitaab bhi khatma ho jaayega na! phir hisaab-kitaab rahega hi nahin। to bhaagyavaan aatma ki nishaani hai - jan ke rahe hue hisaab-kitaab ko sahaj chuktu karte rehna aur 95 percent aatmaon dvaara sada sneh aur sahayog ki anubhooti karna। jan ke bhaagyavaan aatmaayen, jan ke samparka-sambandh mein aate sada prasanna rahengi। prashnachit nahin lekin prasannachit - yeh aisa kyon karta va kyon kehta, yeh baat aise nahin, aise honi chaahiye। chit ke andar yeh prashn utpanna hone vaale ko prashnachit kaha jaata hai aur prashnachit kabhi sada prasanna nahin rah sakta। uske chit mein sada ‘kyon'ki queue lagi rehti hai isliye us queue ko samaapta karne mein hi samay chala jaata hai aur yeh queue phir aisi hoti hai jo aap chhodne chaaho to bhi nahin chhod sakte, samay dena hi padega। kyonki is queue ka rachta aap ho। jab rachna rach li to paalna karni padegi, paalna se bach nahin sakte। chaahe kitne bhi majboor ho jaao lekin samay, energy deni hi padegi isliye is vyartha rachna ko control karo। yeh birth control karo। samjha? himmat hai? jaise log kah dete hain na ki yeh to eeshvar ki den hai, hamaari galti thode hi hai। aise hi brahman aatmaayen phir kehti hain - drama ki noondh hai। lekin drama ke master creator, master knowledgeful ban har karma ko shreshtha banaate chalo। achha!

teachers ne suna! sachcha saaheb mere oopar kitna raazi hai, iska raaz to suna na! raaz sunne se sabhi teachers raazayukta baneen va dil mein aata hai ki is bhaagya ki mere mein kami hai? kabhi dhan ki kheenchaataan mein, kabhi jan ki kheenchaataan mein - aisi jeevan ka anubhav to nahin karti ho na? sunaaya tha ek hi slogan vishesh nimitta teachers prati, lekin hai sabhi ke prati। har baat mein baap ki shreemat pramaan “ ji hajoor-ji hajoor'' karte raho। bachchon ka “ji hajoor'' karna aur baap ka bachchon ke aage “haajir hajoor'' hona। jab hajoor haajir ho gaya to kisi bhi baat ki kami nahin rahegi, sada sampanna ho jaayenge। daata aur bhaagya-vidhaata - donon ki praaptiyon ke bhaagya ka sitaara mastak par chamakne lagega। teachers ko to drama anusaar bahut bhaagya mila hua hai। saara din sivaae baap aur seva ke aur kaam hi kya hai! dhandha hi yeh hai। pravritti vaalon ko to kitna nibhaana padta hai। aap logon ko to ek hi kaam hai, kai baaton se svatantra panchhi ho। samajhte ho apne bhaagya ko? koi sone ka pinjara, heeron ka pinjara to nahin bana dete? banaate bhi khud hain, phansate bhi khud hain। baap ne to svatantra panchhi banaaya, udta panchhi banaaya। bahut-bahut-bahut lucky ho। samjha? har ek ko bhaagya ki visheshta avashya mili hui hai। pravritti maarga vaalon ki visheshta apni, teachers ki visheshta apni, geeta paathshaala vaalon ki visheshta apni, bhinna-bhinna visheshtaaon se sabhi vishesh aatmaayen ho। lekin sevaakendra par rahne vaali nimitta teachers ko bahut achha chance hai। achha!

sada sarva prakaar ke bhaagya ko anubhav karne vaale, anubhvi aatmaon ko, sada har kadam mein “ji hajoor'' karne vaale baap ke madad ke adhikaari shreshtha aatmaon ko, sada prashnachit ke badle prasannachit rahne vaale - aise prashansa ke yogya, yogi aatmaon ko baapdaada ka yaadapyaar aur namaste।

panjaab, hariyaana, himaachal group:- sabhi apne ko mahaaveer aur mahaaveerniyaan samajhte ho? mahaaveer to ho lekin sada mahaaveer ho? ya kabhi mahaaveer, kabhi thoda kamjor ho jaate ho? sada ke mahaaveer arthaat sada light house aur might house। gyaan hai light aur yog hai might। to mahaaveer arthaat gyaani tu aatma bhi aur yogi tu aatma bhi। gyaan aur yog - donon shaktiyaan - light aur might sampanna ho - isko kehte hain mahaaveer। kisi bhi paristhiti mein gyaan arthaat light ki kami nahin ho aur might arthaat yog ki kami nahin ho। agar ek ki bhi kami hai to paristhiti mein second mein paas nahin ho sakenge, time lag jaayega। paas to ho jaayenge lekin samay par paas nahin hue to woh paas kya hue! jaise sthool padhaai mein bhi agar ek subject mein bhi fail ho jaate hain to phir se ek varsha padhna padta hai। saal ke baad phir paas hote hain to samay gaya na! aise jo gyaani aur yogi tu aatma, light aur might donon swaroop nahin hain। usko bhi paristhiti se paas hone mein samay lag jaata hai। agar samay par paas na hone ke sanskaar pad jaate hain to final mein bhi woh sanskaar full paas hone nahin dete। to paas hone vaale to hain lekin samay par paas hone vaale nahin। jo sada samay par full paas hota hai, usko kehte hain paas with honour। paas with honour arthaat dharmaraaj bhi usko honour dega। dharmaraajpuri mein bhi sajaayen nahin hongi, honour hoga। gaayan hoga ki yeh paas with honour hai।

to paas with honour hone ke liye vishesh apne ko koi baat mein, koi bhi sanskaar mein, svabhaav mein, gunon mein, shakti mein kami nahin rakhna। sab baaton mein complete banna arthaat paas with honour banna। to sabhi aise bane ho ya ban rahe ho? (ban rahe hain) iseelie hi vinaash rooka hua hai। aapne roka hai। vishwa ke vinaash arthaat parivartan ke pahle braahmanon ki kamiyon ka vinaash chaahiye। agar braahmanon ki kamiyon ka vinaash nahin hua to vishwa ka vinaash arthaat parivartan kaise hoga। to parivartan ke aadhaarmoorta aap brahman hain।

panjaab, hariyaana, himaachal vaalon ko to pahle taiyaar hona chaahiye। aap ant laane vaale taiyaar nahin ho, isliye aatankavaadi taiyaar ho gaye hain। to sabhi pahla number lene vaale ho ya jo bhi mile usmein raazi rahenge? anekon se to achhe hain hi - aisa to nahin sochte ho? achhe to ho hi lekin achhe se achha banna hai। koto mein koi ban gaye - yeh badi baat nahin hai, lekin koi mein bhi koi banna hai isliye sada ever ready। ant mein ready - nahin, ever ready maana sada ready rahne vaale। agar kahenge ban rahe hain to purooshaartha teevra nahin hoga।

baap ki nazar pahle panjaab par padi na। to jab baap ki nazar pahle padi to aana bhi pahle number mein hai। foundation vaale ho। to foundation sadaiv pakka rehta hai, agar kachcha hua to saari building kachchi ho jaati hai। to sada isi vardaan ko yaad rakhna ki har paristhiti mein paas with honour banne vaale hain। inki vidhi hai ever ready rehna। achha।

sabse bada zone to madhuban hi hai। sab brahmaakumaar aur brahmaakumaariyon ka asli ghar madhuban hi hai na। aatmaon ka ghar paramdham hai lekin braahmanon ka ghar madhuban hai। to amritsar ya ludhiyaana ke nahin ho, panjaab ya hariyaana ke nahin ho lekin aapki permanent address madhuban hai। baaki sab seva sthaan hain। chaahe pravritti mein rehte ho to bhi sevaasthaan hai, ghar nahin hai। sweet hom madhuban hai। aise samajhte ho na! ya vahi ghar yaad aata hai? achha!

vardaan:- samaane ki shakti dvaara ekmat ka vaataavran banaane vaale drishtaanta roop bhav

jo ek jaise manke hain, ek ki hi lagan aur ekras sthiti mein sthit, ek ki mat par chalne vaale hain, aapas mein sankalpon mein bhi ekmat hain, vahi maala mein piroye jaate hain। lekin ekmat ka vaataavran tab banega jab samaane ki shakti hogi। yadi koi baat mein bhinnata ho jaati hai to us bhinnata ko samaao tab aapas mein ekta se sameep aayenge aur sabke aage drishtaanta roop banenge।

slogan:- har sankalp, vaani aur karma mein roohaaniyat dhaaran karo tab service mein raunak aayegi।