मंगलवार 30 नवंबर 2021 की दैनिक मुरली

30-11-2021 praatahmurli om shanti "baapdaada"' madhuban

“meethe bachche - savere-savere uth baap ko yaad karo to satopradhaan ban jaayenge, amritvele ka samay bahut achha hai''

prashn:- aagyaakaari bachchon ki nishaaniyaan kya hongi?

uttar:- aagyaakaari bachche - oonche te oonche baap ke mahaavaakyon ko sir par rakhenge arthaat apne jeevan mein dhaaran karenge। unki chalan badi royal hogi। ve bade dhairyavat honge। unhein vishwa ke maalikpan ka gupta nasha hoga। aagyaakaari bachche apne kisi bhi karma se baapdaada ki insult nahin hone denge। insult karne vaale arthaat avagya karne vaale bachche bahut disservice karte hain। aagyaakaari bachche sada follow father karte, kabhi ulta kaam nahin karte।

geet:- chhod bhi de aakaash sinhaasan…

om shanti। meethe-meethe roohaani bachchon ne do akshar sune। ab bachche to inka arth samajh hi gaye hain ki baap yahaan hai। baap baith right baat samjhaate hain kyonki har ek baat manushya jo kehte hain gyaan ke baare va eeshvar ke saath milne ke baare mein, woh hai wrong। ab geet ke akshar sune - chhod bhi de aakaash sinhaasan... lekin aakaash sinhaasan kya hai, yeh koi ko pata nahin hai। patit-paavan ko to aana hi hai। koi kehte hain bhagwan hai nahin। koi kehte sab bhagwan hi bhagwan hain। aayega kyon? yeh to tum bachchon ne jaana hai ki baap aaya hai phir yeh gaayan aadi sab bhakti maarga ka sunna achha nahin lagta। patit-paavan aakar apna parichay dekar, rachna ke aadi-madhya-ant ka raaz samjhaate hain। baaki duniya mein yeh baaten koi samajh nahin sakte। yahaan bhi kitni mat ke aadmi hain। kehte hain manushya pavitra banen, yeh ho nahin sakta। so zaroor jab tak bhagwan na aaye tab tak pavitra kaise ban sakte। paramatma hi aakar shiksha dete hain aur temptation bhi dete hain ki ismen praapti kitni bhaari hai। tum jaante ho baap kehte hain - mera bankar shreemat par nahin chalenge to saja khaani padegi। jaise baap sageer bachchon ki chalan theek nahin dekhte hain to chamaat maar dete hain, yeh baap chamaat to nahin maarte। sirf samjhaate hain - pratigya blood se bhi likhkar dete hain, phir bhi haar jaate hain। manushyon ko pata hi nahin to pavitra banne se kya milta hai। patit kisko kaha jaata hai। baap samjhaate hain jo vikaar mein jaate hain - woh hain patit। manushya samajhte hain vikaar chhodna impossible hai। bolo, devi-devtaayen to sampoorn nirvikaari the। chitra dikhaane chaahiye। yeh nirvikaari duniya thi na। pavitrata thi to bhaarat kitna saahookaar tha, shivaalay tha। manushyon ko yeh phurna rehta hai ki vikaar bigar duniya kaise badhegi। are government tang ho gai hai ki duniya badhe nahin phir bhi har varsha kitne manushya badhte rehte hain। kam hona to bahut mushkil hai। yahaan behad ka baap kehte hain agar tum pavitra banenge to ham tumko svarga ka maalik banaayenge। aamadni bahut bhaari hai। bachche jaante hain barobar maaya jeet banne se ham jagat jeet banenge। raavan ko jeet raamraajya paayenge। vahaan yeh vikaar ho nahin sakte। unhon ko tumne jeet liya na। yeh baaten koi mushkil samajhte hain, kehte hain iske bigar duniya kaise chalegi! aisi-aisi jo baaten kare to samajhna chaahiye yeh aadi sanaatan dharma ka nahin hai। jahaan bhi tum bhaashan karte ho - to bolo bhagvaanuvaach, bhagwan kehte hain kaam mahaashatru hai, un par jeet pahanne se tum jagatjeet banenge। samjhaani badi seedhi hai। parantu phir bhi woh samajhte nahin, ya samjhaane vaalon mein akla nahin hai। baba to samajhte hain bachche roopaye mein 5 aana bhi mushkil seekhe hain ya to khud poore yogi nahin bane hain to taakat nahin milti। yaad se hi taakat milti hai, baba sarvashaktimaan authority hai na। yog ho to shakti bhi mile। yog to bahut bachchon ka bilkul kam hai। sach bhi koi likhte nahin। yaad ka chart note karen so bhi mushkil hai। teachers hi chart nahin rakhti to student kaise rakhenge। bahut student yog mein bahut teekhe hain। mukhya baat hai baap ko yaad karna hai। yog akshar shaastron ka hai। manushya sunkar moonjh jaate hain। kehte hain yog sikhaao। are yog koi seekhne ka thode hi hai। subah savere-savere uth aapehi yaad karna hai, ismen teacher ki kya darkaar hai jo baith sikhaave isliye yaad akshar theek hai। yog seekhne ki baat nahin। yeh aadat nahin daalni chaahiye। baap kehte hain - apne ko aatma samajh baap ko yaad karo to satopradhaan ban jaayenge। amritvele yaad karna achha hai। bhakti bhi savere uthkar karte hain। yeh bhi to baap ko yaad karta hai। yaad kyon karte hain? kyonki baap se varsa milna hai। bhal bhakti maarga mein shiv ko yaad karte hain parantu unko yeh maaloom nahin ki shiv se kya milna hai। yeh sirf tum bachche hi jaante ho। ab baap shreemat dete hain ki apna kalyaan karne ke liye mujhe yaad karo। yaad se hi shakti aati hai। shakti se vikarma vinaash honge। gyaan se vikarma vinaash nahin honge। gyaan se pad milega। patit se paavan bante hain yaad se। bahut bachche ismen failure hain। bahut achhe mahaarthi 5 aana bhi mushkil yaad karte hain। koi to ek paisa bhi yaad nahin karte, ismen badi mehnat hai। samjhaani to jhat seekh jaate hain parantu beda paar tab ho jab yaad mein rahe। tab hi janma-janmaantar ke vikarma vinaash hon, phir punya aatma ban jaayenge। baap ko bulaate hain - aakar humein patit se paavan banaao। paavan to dher bante hain parantu oonch varsa woh paayenge jo yaad mein achhi reeti rahenge। tumhaare se, jo baandheliyaan hain woh jaasti yaad karti hain। yaad se hi vikarma vinaash ho sakte hain। to jab koi kahe ki pavitra rehna impossible hai to phir unse baat bhi nahin karni chaahiye। nirvikaari bhaarat tha to satopradhaan tha, parantu saahookaaron ki buddhi mein yeh gyaan baithna hi mushkil hai kyonki yaad mein hi mehnat hai।

baap kehte hain - grihastha vyavhaar mein rehte unse bhi tod nibhaao। vaastav mein kaayde bahut kade hain। tum janma-janmaantar to paap aatmaon ko daan dete paap aatma bante rahe। abhi tum paap aatma ko paisa de nahin sakte, parantu daade ka varsa hai to dena padta hai isliye baap kehte hain pahle sab (laukik ke) kaam utaar phir surrender ho jaao। aisa bhi koton mein koi nikalta hai। badi bhaari manzil hai। follow father karna hai। nashtomoha hona koi maasi ka ghar nahin hai, badi mehnat hai। vishwa ka maalik banna; praapti kitni bhaari hai। kalpa-kalpa jo vishwa ka maalik banen, vahi phir bhi bante hain। drama ka raaz bhi thodon ki buddhi mein baithta hai। saahookaar to mushkil uth sakte hain। gareeb to jhat kah dete hain - baba yeh sab kuchh aapka hai phir unhon ko service bhi karni hai। paavan banne ke liye yaad bhi chaahiye। nahin to bahut saja khaani padegi। saja khaai to pad bhi kam ho jaayega। saja khaate woh hain jo yaad nahin karte hain। gyaan kitna bhi uthaayen, usse vikarma vinaash nahin honge। mochra khaakar phir thoda pad paana - woh koi varsa thode hi hai। baap se to poora varsa lene ke liye baap ka aagyaakaari banna chaahiye। oonch te oonch baap ke mahaavaakya sir par rakhne chaahiye। krishna ki aatma bhi is samay varsa le rahi hai। in lakshmi-naaraayan ke bahut janmon ke ant mein ham phir se unhon ko padhaakar varsa dete hain। tumhaare mein bhi prince princess banne vaale honge na। royal gharaane vaalon ki chalan bahut dhairyavat hoti hai। gupta nasha rehta hai। baba kitna saadhaaran rehta hai। jaante hain baaki thoda samay hai। mere ko to jaakar vishwa mahaaraajan banna hai। yeh bhi patit the। yeh to baba ka rath hai, tab yahaan sandali par baithna padta hai। nahin to baba kahaan baithe। yeh bhi tumhaare jaisa student hai। padhte hain। bahut bachche hain - baap ko pahchaante nahin hain। baap ke saath dharmaraaj bhi hai। baap kehte hain meri aagya nahin maani, meri insult ki to dharmaraaj bahut sajaayen dega। direct hamaari athva hamaare bachche ki tum avagya karte ho। baap ka ek hi sikeeldha bachcha hai। pyaar to hai na। inki insult karte to kitni sajaayen khaani padengi। thodi aaphten aane do phir dekho kitne bhaagte hain। tum sab bhaage ho, isne jaadu aadi kuchh nahin kiya। jaadoogar shivbaaba hai। bahut hain - jinko yeh bhi dhyaan nahin aata hai ki inmen shivbaaba aate hain। shivbaaba ke aage ham kuchh ulta kar denge to baap kahega yeh naalaayak bachcha hai। ismen double hai na isliye taar mein likhte hain - baapdaada। parantu is par bhi bachche samajhte nahin hain ki baapdaada ikattha kaise hain। baap, daada dvaara varsa dete hain। aapehi baat chhedni chaahiye। tum jaante ho baapdaada kaun hai? bhal koi poochhe ki tum baapdaada kisko kehte ho? baap-daada ek ka naam ho na sake। to bachchon ko yukti se samjhaana chaahiye। jab tum kisko samjhaao tab unki buddhi mein baithe ki shivbaaba daada dvaara varsa dete hain। ab vinaash to hona hai। unse pahle raajayog sikha rahe hain, aap bhi seekho। aadhaakalpa jis baap ko pukaara hai woh aaya hai knowledge dene। phir bhi kehte hai - phursat nahin hai samajhne ki। to kahenge aap devi-devta dharma ke nahin ho। aapki takdeer mein svarga ke sukh nahin hain। baaki yahaan koi maatha aadi to tekna nahin hai। sannyaasiyon ke aage charnon mein zaroor girenge। yeh to gupta hai na। aage chalkar bahut prabhaav niklega। us samay bheed bahut hogi। bheedbhaad mein kitne manushya mar jaate hain। prime-minister aadi ka darshan karne kitni bheed khadi ho jaati hai। yahaan kitna gupta baithe hain, bachchon ke saath। yahaan dekhenge kisko? inke liye to jaante hain jauhri tha। shaastron mein bhi hai - brahma dvaara manushya srishti rachi kaise? baap kehte hain - main inmen pravesh kar rachta hoon। yeh bhi likha hua hai parantu pattharbuddhi samajhte nahin। baap aakar bachchon ko patit se paavan banaae transfer karte hain। baaki koi nai rachna thode hi rachte hain। yeh hai patiton ko paavan banaane ki yukti। viraat roop ka chitra zaroor hona chaahiye। chitra bada hoga to samjhaane mein bhi sahaj hoga। pattharbuddhi se paarasbuddhi banaana, koi sahaj baat thode hi hai। koi to bilkul aise tavaai misal dekhkar chale jaate hain। praja banne vaala hoga to bhi kuchh na kuchh buddhi mein baithega। ham so brahman, so ham devta, ham so ka arth baba ne kitna achha samjhaaya hai। woh kehte aatma so paramatma। bas। yahaan tum jaante ho ham aatma hain hi। ham aatma pahle brahman phir ham so devta, ham so kshatriy... bante hain। ham kitne varno vaale bante hain! 84 ka chakra lagaate hain। baaki jo baad mein aate hain - unke lagbhag kitne janma honge! hisaab nikaal sakte ho। chitra bahut achhe baba ki dilapsanda banne chaahiye। do chaar achhe bachche hone chaahiye, jo chitra banaane mein madad karen। baba kharcha dene ke liye taiyaar hain, phir hundi aapehi baba bharaayega। baba kehte hain mukhya chitra translight ke banne chaahiye। manushya dekh khush honge। saari pradarshani aisi banni chaahiye। parantu bachchon ko khada karne ke liye baba ko meh-nat karni padti hai।

baap ki yaad hai mukhya। yaad se hi tum patit se paavan srishti ke maalik ban jaayenge। aur koi upaay nahin। chalte-phirte baba ko yaad karo। chakra ko yaad karna hai। tumhaara svabhaav bada royal chaahiye। chalte-chalte koi ko lobh, koi ko moh pakad leta hai। koi dilapsanda cheez par hire huai hain, nahin milegi to beemaar ho jaayenge। is kaaran aadat koi bhi rakhni nahin chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apna kalyaan karne liye baap ki aagya maanni hai। baapdaada ki kabhi bhi avagya nahin karni hai। koi bhi lobh, moh ki aadat nahin rakhni hai।

2) apna svabhaav bahut royal banaana hai। savere-savere amritvele uth baap ko yaad karne ka abhyaas karna hai।

vardaan:- apni moorta se baap aur shikshak ki soorat ko pratyaksha karne vaale anubhvi moorta bhav

apne asli position mein thaharna - yahi yaad ki yaatra hai, jo hoon, jiska hoon - usmein sthit raho, isi asli swaroop ke nishchay aur anek baar ke vijay ki smriti se sada nashe ki sthiti ke saagar mein lahraate rahenge। jab sukh daata ke bachche hain to duhkh ki lahar aa kaise sakti, sarvashaktivaan ke bachche shaktiheen ho kaise sakte! isi position ke anubhvon mein raho to aapki moorta se baap va shikshak ki soorat svatah pratyaksha hogi।

slogan:- satyavaadi woh hai jiske chehre aur chalan mein divyata ho।