शनिवार 11 दिसंबर 2021 की दैनिक मुरली

11-12-2021 praatahmurli om shanti "baapdaada"' madhuban

“meethe bachche - tum abhi wonderful roohaani yaatri ho, tumhein is yaatra se 21 janmon ke liye nirogi banna hai''

prashn:- satayug mein kaun si cheez kaam nahin aati hai jo bhakti maarga mein baap ke kaam aati hai?

uttar:- divya drishti ki chaabi। satayug mein is chaabi ki darkaar nahin rehti। jab bhaktimaarga shuru hota hai to bhakton ko khush karne ke liye saakshaatkaar karaana padta hai। us samay yeh chaabi baap ke kaam aati hai isliye baap ko divya drishti daata kaha jaata hai। baap tum bachchon ko vishwa ki baadshaahi dete hain, divya drishti ki chaabi nahin।

geet:- marna teri gali mein…

om shanti। meethe-meethe roohaani bachchon ne geet suna। roohaani bachchon ko angreji mein kaha jaata hai spiritual children। spiritual father aur spiritual children। ab yeh to roohaani bachche jaante hain ki ham aatmaon ko vahaan shareer to hai nahin isliye vahaan koi roohrihaan ho nahin sakti। rooh se roohrihaan arthaat vaartaalaap tab ho jab donon ko shareer ho। aatmaon ko yahaan to apna-apna shareer hai। baaki jo knowledgeful roohaani baap hai unko apna shareer nahin hai। woh hai hi niraakaar। bachche samajhte hain ki shantidham mein ham aatmaayen ashareeri rehti hain। jaise baap bhi ashareeri va vichitra hai, aise tum aatmaayen bhi bina shareer ke vahaan rehti ho। yeh samajhne ki baat hai। kehte bhi hain nange aaye hain, nanga jaana hai yaani yeh shareer roopi vastra vahaan nahin hoga। aatma jab shantidham mein rehti hai to ashareeri hai, shanti mein rehti hai। ab roohaani baap yeh knowledge dete hain। saari duniya mein roohaani baap aur koi hai nahin। aur sabhi hain jismaani baap। roohaani baap khud kehte hain main ashareeri hoon। baat karne samay shareer ka aadhaar lena padta hai। bhal shaastron mein akshar hain ki prakriti ka aadhaar lena padta hai। parantu baap samjhaate hain prakriti ka to shareer bana hua hai। main saadhaaran shareer ka aadhaar leta hoon।

roohaani baap ko roohaani surgeon kaha jaata hai kyonki yaad va yog sikhlaate hain, jisse hamaari aatma ever nirogi ban jaati hai। 21 janma kabhi rogi nahin bante। phir jab maaya ka raajya hota hai to ham rogi ban jaate hain। baap aakar hamko 21 janmon ke liye nirogi banaate hain। baap ko yaatra sikhlaane vaala panda bhi kaha jaata hai। ham wonderful roohaani yaatri hain। is roohaani yaatra ko aur koi manushya-maatra duniya mein nahin jaante hain। bhaarat khaas aur duniya aam, hamesha aise kaha jaata hai। khaas hamko yeh roohaani yaatra sikhlaai jaati hai। kaun sikhlaate hain? spiritual father। jismaani yaatraayen to manushya janma-janmaantar karte aaye hain। koi-koi to ek janma mein do chaar yaatraayen bhi karte hain। woh kahenge jeev aatmaon ki yaatra aur yeh hai aatmaon ki yaatra। yeh badi samajhne ki baaten hain। chalte phirte buddhi mein baba ko yaad rakhna hai to ant mati so gati ho jaayegi। baba ki yaad mein ham baba ke paas chale jaayenge। ab tum roohaani bachchon ko roohaani baap yeh yaatra sikhlaate hain। geeta mein manamnaabhav akshar hai parantu unka arth bhi koi samajhte nahin hain। baap kehte hain - mujhe yaad karo to tumhaare paap bhasma honge। phir kya hoga? tum bachche jaante ho ham yaad se tamopradhaan se satopradhaan ban jaayenge। is samay sab tamopradhaan hain। saara jhaad jadajdeebhoot ho gaya hai। ab aatma satopradhaan kaise bane? vaapis ghar mein kaise jaaye? vahaan to pavitra aatmaayen hi rehti hain। phir yahaan shareer dhaaran karte rajo tamo mein aati hai। har cheez ki stage hoti hai। gaate bhi hain duniya badal rahi hai। inko kahenge puraani duniya iron aged, nai duniya ko kaha jaata hai golden ej satayug। ab bachchon ki buddhi mein yeh hona chaahiye। jab satayug tha to aadi sanaatan devi-devta dharma tha। abhi woh dharma nahin hai। Deityism, Islamism, Buddhism, krishchiynijma.. yeh mukhya hain। yugon par bhi samjhaaya hai ki mukhya 4 yug hain। baaki yeh braahmanon ka sangamayug hai gupta। parampita paramatma hi aakar brahman devta kshatriy dharma sthaapan karte hain। yeh sab baaten bachchon ko yaad rakhni hai aur apna buddhiyog baap ke saath rakhna hai। mool baat hi hai vikarmaajeet banne ki। barobar ham satopradhaan pavitra the। asul mein 24 carat sona the। phir sato mein aaye 22 carat bane। phir rajo mein 18 carat, tamo mein 9 carat banen। sone ki degree hoti hai। yeh aatma ki hi baat hai। jaise bhramri chhi-chhi keedon ko le aati hai, unko baith aap samaan banaati hai। tum bhi bhoon-bhoon kar manushya se devta banaate ho। bhramri keede ko le aakar ghar mein ekaanta mein bithaati hai, unmein bhi kitna akla hai। tumhaari aatma mein bhi drama anusaar part noondha hua hai।

tum jaante ho kalpa pahle bhi roohaani baap se hamne roohaani gyaan suna tha। kalpa-kalpa sunte rahenge। nothing new। yeh bhi baap hi samjha sakte hain। jhaad ko jaanne vaala to beej hai na। baap aate hain tumko trikaaldarshi banaane। teenon kaalon ki knowledge dete hain na। tumko jeete ji adopt karte hain। jaise kanya ko bhi jeete ji adopt karte hain ki yeh hamaari stri hai। ab prajaapita brahma ki stri to hai nahin, to yeh adopt hote hain, parampita paramatma brahma dvaara adopt karte hain। tum bhi kehte ho yeh hamaara baba hai। parampita paramatma baap bhi kehte hain tum mere bachche ho। woh shivbaaba hai roohaani, prajaapita brahma daada hai jismaani। roohaani baap jab tak shareer mein na aaye to knowledge kaise sunaaye। parampita paramatma ko hi knowledgeful kaha jaata hai। koi bhi prakaar ki knowledge hamesha aatma mein hi rehti hai। jismaani knowledge bhi aatma hi padhti hai na। parantu tamopradhaan hone ke kaaran aatma-abhimaan koi ko rehta hi nahin। aatma-abhimaani tum abhi bante ho। satayug mein yeh baaten nahin samjhaai jaayengi। is samay baap kehte hain tum apne ko aatma samajh baap ko yaad karo kyonki paapon ka bojha is samay sir par hai, woh utaarna hai। baap ko bulaate bhi is samay hain ki aakar patiton ko paavan banaao। aatma hi impure tamopradhaan bani hai, isliye baap ko yaad karti hai। bhakta koi bhi nahin jaante ki parampita paramatma koi bindi hai। bindi ka to mandir bana na saken, shobha hi nahin hogi। ek to ling banaate hain phir saakshaatkaar ke liye kehte hain hajaaron soorya se tejomay hai। kya ling itna tejomay hai? jaise arjun ke liye dikhaaya hai na। unko saakshaatkaar hua tejomay roop ka, kaha ham tej sahan nahin kar sakte hain। yeh akshar suna hua hai na। yahaan bhi shuru mein bahuton ko saakshaatkaar hua tha। kehte the banda karo, ham sahan nahin kar sakte hain। aankhe laal ho jaati thi। woh samajhte hain hamne paramatma ka saakshaatkaar kiya। kisne karaaya? krishna ne to nahin karaaya। shivbaaba ne hi saakshaatkaar karaaya। unko divya drishti daata kaha jaata hai। baap kehte hain - chaabi main tum bachchon ko nahin de sakta hoon। yeh cheez mujhe hi bhakti maarga mein kaam aati hai। satayug mein iski darkaar nahin rehti hai। tum pujaari se poojya ban jaate ho। baap kehte hain - main tumko vishwa ka raajya bhaagya dekar apne paramdham mein jaakar baith jaata hoon। main poojya, pujaari nahin banta hoon।

tum bachche abhi sensible bane ho, chalan se bhi samjha jaata hai ki yeh kitna meetha hai, inko dhaarna bahut achhi hoti hai। kitne topics banaate hain। baba jo topic sunaate hain woh note rakhne chaahiye। aaj yaatra par samjhaayenge। yaatra do prakaar ki hoti hai। yeh hai number one topic। manushya sab jismaani yaatra karaate hain bhakti maarga mein। gyaan maarga mein jismaani yaatra hoti nahin। tumhaari hai roohaani yaatra। baap samjhaate hain tamopradhaan se satopradhaan tum is yaatra se banenge। aatma pavitra banne ke bina ghar ja nahin sakti hai। sab aatmaayen yahaan hi aati rehti hain। jaate koi bhi nahin। government ko bhi tum samjha sakte ho - satayug mein jab devi-devtaaon ka raajya tha to ek bachcha, ek bachchi hote the, so bhi yogbal se। ab khyaal karo satayug mein kitne thode manushya honge aur sampoorn nirvikaari, lakshmi-naaraayan ki gaddi chali hai। to zaroor bachcha bhi hoga। ham jab yogbal se vishwa ke maalik bante hain to kya yogbal se bachcha nahin paida kar sakte। yeh drama mein noondh hai। pavitra hone ke kaaran saakshaatkaar hota hai ki bachcha hone vaala hai। woh khushi rehti hai। vikaar ki koi baat nahin। tumse poochhte hain bachche kaise paida honge? bolo, papeete ka jhaad mel female ek do ke baaju mein hone se phal paida hota hai। agar donon ek do ke baaju mein nahin honge to phal nahin hoga। wonder hai na। to vahaan kyon nahin yogbal se bachcha ho sakta hai। mor del ka bhi misaal hai। unko kaha jaata hai national bird। prem ke aansu se garbha ho jaata hai। yeh vikaar nahin hua na। yeh bhaarat shivaalay tha, shivbaaba ne banaaya tha। ab raavan ne veshyaalay banaaya hai। yeh bhi kisko pata nahin hai shiv jayanti to manaate hain, raavan jayanti kahaan hai। raavan ka to kisko bhi pata nahin hai। unko banaakar phir dashahre ke din maar daalte hain। tum bachche jaante ho raavan 5 vikaaron ko in pataakon aadi se nahin jalaana hai। yogbal se un par vijay paani hai, jo yog baba hi aakar sikhlaate hain। kehte hain yogi bhav, holi bhav। geeta mein phir akshar hai manamnaabhav, mujhe yaad karo, is yaatra se hi tum shantidham mein chale jaayenge। phir amarlok mein aa jaayenge। manushya yaatra par jaate hain to pavitra rehte hain। kaashi mein jaane vaale pavitra rehte hain parantu kaashi mein rahne vaale koi pavitra nahin rehte। yahaan raavan raajya mein hai patiton ka vyavhaar patiton se। vahaan hai hi paavan ka vyavhaar paavan se। phir bhi neeche to utarna hi hai।

baba ne samjhaaya hai - aadhaakalpa hai din, aadhaakalpa hai raat। yeh bhi braahmanon ki baat hai। brahman hi phir devta bante hain। nai duniya mein lakshmi-naaraayan kahaan se aaye? koi ladaai to nahin ki। mahaabhaarat ladaai dikhaate hain phir unki result to kuchh bhi dikhaate nahin hain। kehte hain 5 paandav the। tum kitne paandav ho! tum ho roohaani pande। jaante ho ab sabko vaapis jaana hai। baba aate hi hain sabko le jaane। woh hai supreme panda athva guide, liberator, maaya se mukta kar saath le jaate hain। saath mein le jaane vaala guide to zaroor chaahiye। yeh baaten buddhi mein achhi reeti yaad rahni chaahiye। woh shaastra to chhape hue hote hain। koi bhi jaakar padh sakte hain। yeh gyaan to baap hi dete hain। phir shaastra padhne ki baat hi nahin। baap se sunkar dhaarna karni hai। number one hai yaad ki yaatra, unse hi pavitra banenge। history geography to koi bhi samjha na sake। yaatra mein bahut kachche hain। yaad mein hi vighna padenge। knowledge to bahut sahaj hai।

baap samjhaate hain yeh drama ka chakra hai। unke 4 bhaag hain equal। laakhon varsha aayu hoti to manushya kitne badh jaate। government bhi kitna kahegi ki birth na ho। yeh to baap ka kaam hai। woh sab to jismaani yuktiyaan nikaalte rehte hain। baba ki hai yeh roohaani yukti। baap kehte hain main aata hi hoon anek dharmon ka vinaash kar ek dharma ki sthaapna karne। ek mat satayug mein hi hoga, yahaan thode hi ho sakta hai। apne ko bhaai-bhaai koi samajhte hi nahin। baap bachchon ko bahut yuktiyaan samjhaate rehte hain। apne paas topics ki list rakhni chaahiye। ek-ek topic bahut first class hai। baba kehte hain - tum bachchon ko jaasti taan-taan nahin karni hai। sirf kehna hai shivbaaba kehte hain sab aatmaon ka baap main param aatma hoon, mujhe hi bhagwan kaha jaata hai। koi manushya ko bhagwan nahin kah sakte। roohaani yaatra aur jismaani yaatra ki topic bahut achhi hai। jismaani yaatra mrityulok mein hoti hai, yeh hai mrityulok, woh hai amarlok। tum bachche kalpa-kalpa baap ke saath madadgaar bante ho, isliye tum ho roohaani sweet children। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) khud sensible bankar doosron ko bhi banaana hai। apni chalan bahut royal aur meethi rakhni hai।

2) roohaani yaatra par tatpar rehna hai। apne paas achhi topics note rakhni hai। ek-ek topic par vichaar saagar manthan karna hai।

vardaan:- antar swaroop mein sthit rah apne va baap ke gupta roop ko pratyaksha karne vaale sachche snehi bhav

jo bachche sada antar ki sthiti mein athva antar swaroop mein sthit rah antarmukhi rehte hain, ve kabhi kisi baat mein lipta nahin ho sakte। puraani duniya, sambandh, sampatti, padaartha jo alpakaal aur dikhaava maatra hain unse dhokha nahin kha sakte। antar swaroop ki sthiti mein rahne se svayan ka shakti swaroop jo gupta hai woh pratyaksha ho jaata hai aur isi swaroop se baap ki pratyakshata hoti hai। to aisa shreshtha kartavya karne vaale hi sachche snehi hain।

slogan:- nishchay aur janma siddha adhikaar ki shaan mein raho to pareshaan nahin honge।