गुरुवार 30 दिसंबर 2021 की दैनिक मुरली

30-12-2021 praatahmurli om shanti "baapdaada"' madhuban

“meethe bachche - sachche baap ke saath sachche bano, agar sach nahin batlaate ho to paap vriddhi ko paate jaate hain''

prashn:- jab tum bachche karmaateet avastha ke sameep pahunchenge to kaunsi anubhooti karenge?

uttar:- aisa anubhav hoga jaise maaya ke toofaan sab samaapta ho gaye hain। kisi bhi vighna mein ghabraayenge nahin। avastha badi nidar rahegi। jab tak woh avastha door hai tab tak maaya ke toofaan bahut hairaan karte hain। baba kehte - meethe bachche jitna tum roostam bante ho, utna maaya bhi roostam hokar aati hai lekin tumhein vijay praapta karni hai, darna nahin hai। sachche baap ke saath sachchaai-saphaai se chalte raho। kabhi koi baat chhipaana nahin।

geet:- jaag sajniyaan jaag…

om shanti। yahaan vaale bachche to yeh geet roz sunte hain। centres par bhi jo bi.ke. rehte hain woh sunte hain। baahar vaale to sunte nahin hain। vaastav mein yeh geet to ananya bachchon ke ghar mein sabko rakhna chaahiye। sabko jagaana chaahiye kyonki is geet ka raaz bahut achha hai। naya yug aa raha hai। naya yug arthaat satayug। yeh hai kaliyug। kaliyug ka vinaash hona hai। satayug mein raajdhaani hoti hi hai bhaaratvaasiyon ki। unko golden aged world kaha jaata hai। golden aged world mein golden aged bhaarat। iron aged duniya mein iron aged bhaarat। yeh bhi tum hi jaante ho। to golden ej mein aur koi khanda athva dharma hota nahin। abhi hai iron ej, ismen sab dharma hain। bhaarat ka bhi dharma hai zaroor। parantu woh devi-devta nahin hain। to phir hona zaroor chaahiye। to baap kehte hain main aakar sthaapna karta hoon। pahle-pahle baap ka parichay dena hai। shaastron ki jab koi baat kare to unko kehna chaahiye, yeh to bhakti maarga ke shaastra hain। gyaan maarga ka shaastra hota nahin। gyaan ka saagar to parampita paramatma ko kaha jaata hai। jab woh aakar gyaan deve tab sadgati ho। yeh geeta aadi bhi bhakti maarga ke liye hain। main to aakar tum bachchon ko gyaan aur yog sikhlaata hoon। phir baad mein woh shaastra banaate hain, jo phir bhakti maarga mein kaam aate hain। abhi tumhaari hai chadhti kala। tumhein baap aakar gyaan sunaate hain। baap khud kehte hain main jo tumko sadgati ke liye gyaan deta hoon, woh praayahlop ho jaata hai। abhi baap kehte hain tum koi bhi shaastra aadi nahin suno। woh roohaani baap to sabka ek hi hai। sadgati ka varsa bhi unse milta hai। yeh to hai hi durgati dhaam, sadgati dhaam satayug ko kaha jaata hai। jab koi bhi shaastron ki, vedon ki athva geeta ki baat kare, bolo ham jaante sabko hain। parantu yeh hain bhakti ke। ham unka naam leven hi kyon! jabki abhi gyaan saagar parampita paramatma hamko padha rahe hain। baap kehte hain - apne ko aatma samajh mujh baap ko yaad karo, to is yog agni se tumhaare vikarma vinaash ho jaayenge। bhakti maarga mein to aur hi vikarma hote aaye hain। hamko baap ne kaha hai manamnaabhav। vahi gyaan ka saagar, patit-paavan hai। patit-paavan krishna ko nahin kaha jaata hai। abhi ham ek baap ki hi sunte hain। unko kehte hain shiv parmaatmaae namah, baaki sabko kahenge devtaae namah ... is samay to sab tamopradhaan hain। satopradhaan banne ka raasta ek baap hi aakar batlaate hain। ab us ek baap ko hi yaad karna hai। brahm ko yaad nahin karna hai, vo to ghar hai। ghar ko yaad karne se vikarma vinaash nahin honge। parantu ghar mein rahne vaale parampita paramatma ko yaad karo to vikarma vinaash ho jaaen। aur aatma satopradhaan ban apne ghar chali jaayegi phir aayegi part bajaane। chakra ka raaz samjhaana chaahiye। pahle to yeh samjhen ki inhon ko gyaan sunaane vaala niraakaar parampita paramatma hai। koi kahe tum to brahma se sunte ho, bolo nahin, ham manushya se nahin sunte। in dvaara hamko parampita paramatma samjhaate hain। ham inko (brahma ko) paramatma nahin maante hain। sabka baap shiv hi hai, varsa bhi unse milta hai। yeh hai through। brahma se kuchh milta nahin hai। unki mahima kya hai? mahima saari ek shiv ki hai। vo agar ismen nahin aata to tum kaise aate। shivbaaba ne brahma dvaara tumko adopt kiya hai, tab tum bi.ke. kahlaate ho। brahman kul chaahiye na। koi manushya athva shaastra aadi mukti-jeevanmukti ka raasta bata na saken। niraakaar parampita paramatma sadgati daata hi raasta bataate hain। bahut baat nahin karni chaahiye। phat se kehna chaahiye hamne janma-janmaantar bhakti ki hai। ab hamko baap kehte hain yeh antim janma grihastha vyavhaar mein rehte kamal phool samaan pavitra raho aur mujhe yaad karo, to tumhaare is antim janma ke athva past janmon ke jo paap hain, woh bhasma ho jaayenge aur tum apne ghar chale jaayenge। pavitra hone bina to koi ja nahin sakte। pahli-pahli baat hi ek samjhaao to niraakaar shivbaaba kehte hain he aatmaayen, main brahma tan mein pravesh hokar knowledge deta hoon। brahma dvaara sthaapna karta hoon। braahmanon ko shiksha deta hoon। gyaan yagya ko sambhaalne vaale bhi brahman chaahiye na। tum ab brahman bane ho। tum jaante ho yeh mrityulok ab khatma hona hai। kaliyug ko mrityulok aur satayug ko amarlok kaha jaata hai। bhakti ki raat ab poori hoti hai। brahma ka din shuru hota hai। brahma so vishnu yeh bhi koi samajhte nahin। samjhen tab jab poore 7 roz aakar sunen। pradarshani mein kiski buddhi mein baithta nahin। sirf itna kehte hain raasta achha hai। samajhne laayak hai। mukhya baat samjhaani hai ki geeta ka bhagwan niraakaar shiv hai। woh kehte hain mujhe yaad karo। baaki yeh sab janma-janmaantar padhte utarte hi aaye ho। phir seedhi se jhaad par le jaana chaahiye। tum ho nivritti maarga vaale। ham hain pravritti maarga vaale। hamaara hai behad ka sannyaas। jab bhakti poori ho jaati hai to saari duniya se vairaagya ho jaata hai aur bhakti se bhi vairaagya ho jaata hai। bhakti hoti hai raavan raajya mein। ab shivbaaba shivaalay sthaapan kar rahe hain। shiv jayanti bhi bhaarat mein hi manaai jaati hai, to yeh pakka ho jaae ki shivbaaba ne aakar bhaarat ko svarga banaaya hai aur narka ka vinaash kiya hai। nai duniya mein aane vaale hi yeh raajayog seekh rahe hain। svarga mein purity, pees, prosperity sab kuchh hai। yahaan jo sannyaasi aadi hain, woh aadha purity mein hai, woh janma grihasthi, vikaari ghar mein le phir sannyaas karte hain। yeh samjhaana hota hai। shivbaaba patit-paavan hamko brahma dvaara samjhaate hain। brahma dvaara raajayog sikhlaakar yeh bana rahe hain। raajayog dvaara hi raajaai sthaapan ho rahi hai। yeh geeta episode ab repeat ho raha hai। tumko bhi raajayog seekhna ho to aakar seekho। yeh gyaan pravritti maarga ka hai।

bhagvaanuvaach - grihastha vyavhaar mein rehte pavitra ban mujhe yaad karo to vikarma vinaash hon, aur koi upaay hi nahin hai - paavan banne ka। thodi baat karni chaahiye। moonjhana nahin chaahiye। baba ne samjhaaya hai raat ko baith vichaar karo aaj ke saare din mein jo past hua, jo service honi thi, drama plan anusaar hua। purooshaartha to chalna hai na। pradarshani mein bachche kitni mehnat karte hain। yeh bhi jaante ho - maaya ke toofaan bahut kade hain, kai bachche kehte hain baba inko banda karo। hamko koi vikalpa na aayen। baba kehte hain - ismen darte kyon ho? ham to maaya ko kahenge aur jor se toofaan laao। boxing mein ek do ko kehte hain kya ki hamko jor se ulta-sulta nahin lagaana jo ham gir paden। tum bhi yuddha ke maidaan mein ho na। baap ko bhoolenge to maaya thappad lagaayegi। maaya ke toofaan to ant tak aate rahenge। jab karmaateet avastha hogi tab yeh khalaas honge। toofaan bahut aayenge, darne ki koi baat nahin। baba se sachcha hokar chalna hai। sachcha chart bhejna chaahiye। kai bachche savere uthkar yaad mein baithte nahin hain, soye rehte hain। yeh nahin samajhte agar ham shreemat par nahin chalte to ham apni kalpa-kalpaantar ke liye satyaanaash karte hain। badi bhaari chot kha rahe hain। aise bhi bachche hain jo kabhi sach nahin bolte hain phir unki kya gati hogi। gir padenge। maaya thappad bada jor se lagaati hai। pata nahin padta hai। saara din jharmui jhagmui karte rehte hain। sach na batlaane se phir vriddhi hoti jaati hai। nahin to sach bataana chaahiye। aaj yeh bhool ki, jhooth bola। agar sach nahin bataayenge to vriddhi hoti jaayegi phir kab sachche banenge nahin। batlaana chaahiye hamne yeh-yeh disservice ki। hamko kshama karna। sach na batlaane se phir dil par chadhte nahin। sachchaai kheenchati hai। bachche khud bhi jaante hain - kaun-kaun achhi service karte hain। achhe-achhe bachche bahut thode hain। chaahta hoon gaanvadon mein bhi achhi-achhi bachchiyon ko bhej doon to sab khush honge, baba ne hamaare paas bambai ki head, kalkatte ki head bheji hai। koi bhi mile to unko seedhi baat sunaani hai ki patit-paavan parampita paramatma sangam par aakar yeh mahaamantra dete hain ki maamekam yaad karo। raajayog to baba tumko hi sikhlaate hain। tumhaara kaam hai auron ko bhi raasta dikhlaana। bachche kehte hain - kalkatte chalo। ab baba bachchon ke bina koi se baat kar na sake। phir kahenge yeh to koi se milte nahin hain। ham kaise samjhen to yeh kaun hain? kyonki unhon ki to hai bhakti ki baaten। aatmaon ka baap kaun hai, yeh to koi bata hi nahin sakte। shivbaaba to aate hi bhaarat mein hain। aisi-aisi baaten samjhaane mein ghanta lag jaaye। baba to koi se milta nahin। bachchon ko hi maatha maarna hai। yahaan bhi dekho bachchon ke saath kitni mehnat karni padti hai - sudhaarne ke liye। baba ko sachcha samaachaar koi dete nahin hain। baba hamne sannyaasi se baat ki, phalaane prashn ka ham javaab de na sake। hamne yeh bhool ki। saara din kya-kya karte hain, likhna chaahiye। baba ne bachchon ko samjhaaya hai - mere se poochhe bina kisi ko chitthi nahin likho। baba se poochhenge to baba aisi mat denge jisse kiska kalyaan ho jaae। baba ke paas likhkar bhej do to baba correct kar de। baba to yukti bataayenge। dehi-abhimaani hokar likhenge to woh padhkar gad-gad ho jaayenge। shiksha to bahut achhi di jaati hai। tumhaari em object hai lakshmi-naaraayan banne ki। yeh tumhaara baap-teacher-guru, bhaai aadi sab kuchh hai। har baat mein raay dete rahenge phir javaabdaari tumse utar jaayegi kyonki shreemat par chale na। dhandhe aadi ke liye bhi samjhaayenge ki kahaan laachaari mein kiske haath ka khaana hota hai। nahin to dhandha aadi chhoot jaayega। chaay nahin pi to minister rooth jaayega। yukti se kehna chaahiye ham chaay is samay nahin peete hain। hamko takleeph ho jaayegi। kahaan shaadi muraadi hai, nahin jaayenge to naaraaz ho jaayenge। to baba kahenge aise-aise karo। sab yuktiyaan bataayenge। achha!

meethe meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap se sada sachcha rehna hai। diltakhtansheen banne ke liye shreemat par poora-poora chalna hai।

2) yuddha ke maidaan mein maaya ke vikalpon se, vighnon se darna nahin hai। apna sachcha chart rakhna hai। jharmui jhagmui nahin karni hai।

vardaan:- sva-sthiti dvaara sarva paristhitiyon ka saamna karne vaale avyakt sthiti ke abhyaasi bhav

jab avyakt sthiti ke abhyaas ki aadat ban jaayegi tab sva sthiti dvaara har paristhiti ka saamna kar sakenge। aur yeh aadat adaalat mein jaane se bacha degi isliye is abhyaas ko jab natural aur nature banaao tab natural calamities ho kyonki jab saamna karne vaale sva sthiti se har paristhiti ko paar karne ki shakti dhaaran kar lenge tab parda khulega। iske liye puraani aadton se, puraane sanskaaron se, puraani baaton se...poora vairaagya chaahiye।

slogan:- svayan ko nimitta karanhaar samjho to kisi bhi karma mein thakaavat nahin ho sakti।