शुक्रवार 28 जनवरी 2022 की दैनिक मुरली

28-01-2022 praatahmurli om shanti "baapdaada"' madhuban

“meethe bachche - ek eeshvar se sachchi muhabbat rakhni hai, is indra ki darbaar mein sapoot bachchon ko hi laana hai, kisi kapoot ko nahin''

prashn:- 21 janmon ki bade se badi lottery lene ke liye kaun sa purushaartha karte chalo?

uttar:- ek paarlaukik saajan ko yaad karne aur uski shreemat par chalne ka poora purushaartha karo। yadi kisi ke naam roop mein buddhi latki hui ho to vahaan se buddhiyog nikaalte jaao। raat mein jab phursat milti hai, pyaar se baap ko yaad karo, daiveegun dhaaran karo to 21 janmon ki lottery mil jaayegi।

geet:- na woh hamse juda hoge…

om shanti। duhkh to yahaan hi hai। baap aate hain duhkh se chhudaane kyonki bachchon ko yeh samjhaaya gaya hai ki krishna yahaan nahin aa sakta। unki puri mein duhkh nahin hota। duhkh hota hi hai - kansapuri mein। krishnapuri hui shreshthaachaari devtaaon ki puri। ham abhi daiveegun dhaaran karne vaale bane hain। agar aasuri gun rakhte rahenge to daivi sampradaay mein achha pad nahin milega। abhi pad nahin mila to kalpa-kalpaantar nahin milega। bada ghaata hai। woh ghaata-phaayda to ek janma ke liye hota hai। yeh to janma-janmaantar ki baat hai। achhe bure karma hote hain na। satayug mein sirf achhe karma hote hain। bure karma karaane vaala raavan vahaan hota nahin। yahaan jo jaisa karma karega, 21 janma ke liye unko phal paana hai। ya to chalna hai shreemat par ya to chalna hai aasuri mat par। bura kaam kiya goya aasuri mat par chala, jhat maaloom pad jaata hai। baba se pyaar to poora chaahiye na। eeshvar se pyaar nahin to goya asuron se pyaar hai। yahaan tumko eeshvar ka pyaar mila hai। kehte ho eeshvar baba। pratigya karte hain - ham ek tum se hi muhabbat rakhenge। phir koi se muhabbat rakhi to jaise asuron se rakhi। phir khud bhi asur ban jaayenge। ek kahaani bhi bataate hain na - indra ki darbaar thi, usmein koi pari vikaari ko saath le aai। woh sapoot bachcha nahin tha, kapoot vikaari tha to donon ko neeche phenk diya। gyaan poora na hone ke kaaran aise-aise ko le aate hain, jo pavitra nahin rah sakte hain। to jo bi.ke. unko le aate hain vo bhi shraapit ho jaate hain। woh to shraapit hai hi। yeh eeshvar ki gyaan indra sabha hai। gyaan varsha barsaane vaala ek hi baap hai। to yahaan bahut samajh kar kisko le aana chaahiye, nahin to le aane vaale bhi shraapit ho jaate hain। tum roohaani pande ho, tum le aate ho supreme rooh ke paas to bahut khabardaari se le aana chaahiye। yoon to milne ke liye bahut aate hain, kaiyon se milna bhi padta hai parantu woh bhi din aayega jo kitna bhi bada aadmi pavitra nahin hoga to saamne aa na sake। abhi aise karen to mushkil ho jaae। manzil bahut oonchi hai, itne jo bhi aashram va satsang hain kahaan bhi em object nahin, kuchh bhi jaante nahin ki inse hamko laabh kya hoga। yahaan to bade aksharon mein em object likhi jaati hai। manushya se devta banna hai। sikkha log gaate hain manushya se devta kiye... devta hote hain satayug mein। to zaroor manushya ko devta banaane vaala bhagwan hoga। bhagwan kya banaate hain? bhagwan aur bhagavti। parantu ham devi-devta kehte hain, kyonki bhagwan ek hai। brahma, vishnu, shankar bhi sookshm vatan vaasi hain। lakshmi-naaraayan bhi daivi gun vaale manushya hain। daivi gun vaale phir aasuri gunon mein zaroor aate hain। ab brahma dvaara sthaapna ho rahi hai। baba kehte hain main patit duniya aur patit shareer mein aata hoon। yeh poore 84 janma lete hain, apni dynasty sahit। patiton ko paavan banaane vaala woh hai, krishna kaise patiton ko paavan banaayega। krishna us naam roop se ek hi baar aayega। unka woh chitra phir paanch hajaar varsha baad milega। baaki janma to bhinna-bhinna hote hain। yahi lakshmi-naaraayan jo ab jagat-amba, jagat-pita hain, inko pata padta hai ki ham doosre janma mein yeh banenge। features jo abhi hain woh badal jaayenge। tum abhi vatan mein jaakar dekh sakte ho। to satayug mein lakshmi-naaraayan ke kaun se features honge। tum is samay saakshaatkaar kar sakte ho। yeh wonder hai aur kisko saakshaatkaar nahin hota। tum is ek ka accurate dekh sakte ho। parantu woh photo yahaan to nikal na sake। yeh photo to yahaan hi banaaye hain। tum jaante ho bhavishya mein yeh banenge। guru naanak ka accurate chitra jo tha woh 5 hajaar varsha baad hoga। yeh baaten tum hi jaante ho। aise baap ke saath yog bada achha chaahiye aur avyabhichaari yog chaahiye। koi ke naam roop se preet lagi to vyabhichaari ho gaye। shivbaaba ki bhakti shuru hoti hai to pahle unko avyabhichaari bhakti kahi jaati hai। shiv ko hi poojte hain। abhi phir ek shivbaaba ki hi yaad rahni chaahiye। baap kehte hain aisa na ho ki ant mein tumhaara buddhiyog vyabhichaari ho jaae। kahaan bhi naam roop mein phanse hue ho to buddhi ko nikaalte jaao। maaya aisi hai jo kab kahaan, kab kahaan dhakka khilaayegi। kabhi mitra-sambandhi yaad aayenge। phat se yog lag jaae, yeh ho nahin sakta। baba kehte hain abhi to koi complete nahin bane hain। yeh bahut bade te badi 21 janmon ki lottery hai, ismen purooshaartha bahut achha chaahiye। maaya badi prabal hai, jhat bhula deti hai। yeh bhi drama mein noondh hai isliye yaad karne ka purushaartha raat mein karo। din mein to phursat nahin milti hai, raat mein paarlaukik saajan ko yaad karo। shreemat par chalne se shreshtha banenge। ab jo shreshtaachaari krishna hai, unko geeta ka bhagwan kah diya aur shreshtha banaane vaale ko gum kar diya hai। krishna ke gun aur parampita paramatma ke gun varnan zaroor karne chaahiye। to sarvavyaapi ki baat ud jaaye। yeh hai sangam yug, inko suhaavna kalyaankaari yug kaha jaata hai। satayug ko va kaliyug ko auspicious nahin kahenge। auspicious unko kaha jaata hai, jo kalyaankaari hai। satayug to hai hi kalyaankaari, unke aage akalyaankaari yug tha। to mahima saari sangamayug ki hai jabki shivbaaba ka avatran hota hai। baba kehte hain main kalpa ke sangamayug par aata hoon। kalpa poora hota hai phir naya shuru hota hai। puraane kalpa mein kaliyug aur naye kalpa mein satayug। yeh hai kalpa ka sangamayug। unhone phir yuge-yuge kah diya hai। achha satayug aur treta ka sangam, treta aur dvaapar ka sangam, dvaapar aur kaliyug ka sangam.. phir kaliyug aur satayug ka sangam to chaar sangam ho gaye। to avtaar bhi chaar chaahiye। phir 24 avtaar kyon kehte hain? yeh sab baaten dhaaran karne ki hain।

baba ne bada sahaj reeti se likhvaaya hai ki parampita paramatma se aapka kya sambandh hai? parampita kehte hain to zaroor do baap hain। pradarshani mein sab samjhaate bahut hain parantu itna koi samajhte nahin hain। ek ko bhi nishchay nahin hota। bhal aayenge, murli sunenge parantu woh hamaara baba hai, unse varsa lena hai, shreemat par chalna hai। yeh baat buddhi mein nahin baithti hai। hajaaron aaye parantu ek ko bhi nishchay nahin hai ki woh hamaara pita hai, unki mat par chalna hai। pahle to maa baap ka mukhda dekhna chaahiye। parantu nishchay nahin, maaya badi prabal hai। is prabal maaya se chhudaane mein badi mehnat lagti hai। baap kehte hain satguru ka nindak thaur na paaye। agar badachlan hogi to thaur nahin paayenge। yahaan to em object clear hai। aadhaakalpa bhakti maarga chalta hai। woh hai utarti kala। gaate hain guru ka naam lene se chadhti kala hoti hai। parantu guru kaun sa? satguru। tum satguru ko jaante ho, woh hai shivbaaba, sat baba, sat teacher, satguru। shivbaaba ko yaad karne se chadhti kala ho jaati hai। 16 kala ban jaate hain। phir 16 kala se utarna hai। manushya kahenge ham to inse chhootna chaahte hain। parantu chhootna to hota nahin। chadhti kala, utarti kala phir chadhti kala, satopradhaan se sato, rajo, tamo phir tamo se sato... yeh chakra lagaana hai। is chakra mein harek ko aana hai। tum poore chakra mein aate ho, woh thode chakra mein aate hain। sato, rajo, tamo to hona hi hai। bachpan ko satopradhaan kaha jaata hai phir thoda bada hota hai to sato, javaan ko rajo, boodhe ko tamo kahenge। har ek ke sukh - duhkh ka part noondha hua hai। yeh naatak bada wonder full hai, jisko koi bhi jaante nahin। royal ghar ke bachchon ki chalan bahut achhi hoti hai। yahaan to shreemat par chalna hai। sabhi ekras to chal na saken। baba samjhaate hain daas-daasi banen, phir third class raaja-raani banna, isse to praja mein saahookaar banna achha hai। daan-punya kar saahookaar ban jaaen। daas-daasi ka naam to na pade। bhal woh daas daasi ban raajaai mein jaate hain parantu unse woh sukhi jaasti hain। woh naam daas-daasi nahin padta, praja mein bahut saahookaar banenge। yahaan rahkar agar shreemat par nahin chale to daas-daasi ban padte। yahaan rahkar koi kukarma karte hain to daasi ke bhi daasi ban padte hain। koi to achhi daasi hoti hai, koi respectless hoti hai। to purushaartha bahut achha karna chaahiye isliye baba likhte hain bachchon ka certificate bhej do। kai hain jo apne ko miya mitthu samajh baith jaate hain। phir report kaun kare jo saavdhaani mile। baba ka kaam hain samjhaana, em object to poora hai, jo chaahe purushaartha kar lo, vijay maala mein piro kar dikhaao। aath ki bhi maala hai। 108 ki bhi maala hai, 16108 ki bhi maala hai। viceless world ke raaja-raani thode hote hain। peechhe bahut ho jaate hain, yahaan bhaarat ke sabse jaasti honge। kitne gaanv hain, kitne raaja-raani phir unhon ke kitne prince-princess, kitne dher hain। badi list nikaalte hain। mahaaraaja, raaja phir unke kutumba vaale। directory mein mukhya naam daalte hain। vahaan to ek-ek bachcha hota hai। bada lamba chauda hisaab hai। phir bhi baap kehte hain behad ke baap ko yaad karo jisse varsa paana hai। grihastha vyavhaar mein bhi rehna hai, yeh hai pavitra pravritti maarga, koi manushya eeshvar ko na jaanne ke kaaran svayan ko hi eeshvar samajh baithe hain। janmamran mein aate rehte hain। akaale mrityu bhi hoti rehti hai aur eeshvar bhi kahlaate rehte hain। tum jaante ho devtaaen kabhi akaale nahin marte hain। jab time poora hota hai tab saakshaatkaar hota hai। ab puraana shareer chhod naya lena hai, bahut samajhne ki baaten hain। bas ek baba ko hi yaad karna hai aur koi ke naam roop mein dhakke nahi khaane hain, nahin to gir padege। baba ko to anek prakaar se uthaana padta hai। ismen to shiv-baba ki padhraamni hai, inse rees nahin karni hai। maaya toofaan bahut laati hai, hanumaan misal pakka banna hai, jo maaya raavan hila na sake। aadi dev ko mahaaveer hanumaan bhi kehte hain। naam rakh diye hain। bachchon mein koi mahaarthi bhi hain। baat practical mein yahaan ki hai। jisko gyaan ki maalis nahin hoti hai woh jaise murjhaaye hue dikhaai dete hain। gyaan ki maalis se lakshmi-naaraayan ko dekho kitne ramneek hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apni em object ko saamne rakh oonch pad paane ka purushaartha karna hai, chalan bahut royal rakhni hai aur shreemat par chalte rehna hai।

2) kisi bhi dehdhaari ke naam roop ko yaad nahin karna hai। ek baap ki avyabhichaari yaad mein rahne ka purushaartha karna hai।

vardaan:- apni shaktishaali mansa shakti va shubh bhaavna dvaara behad seva karne vaale vishwa parivartak bhav

vishwa parivartan ke liye sookshm shaktishaali sthiti vaali aatmaayen chaahiye। jo apni vritti dvaara shreshtha sankalp dvaara anek aatmaon ko parivartan kar saken। behad ki seva shaktishaali mansa shakti dvaara, shubh bhaavna aur shubh kaamna dvaara hoti hai। to sirf svayan ke prati bhaavuk nahin lekin auron ko bhi shubh bhaavna, shubh kaamna dvaara parivartit karo। behad ki seva va vishwa prati seva balance vaali aatmaayen kar sakti hain। to bhaavna aur gyaan, sneh aur yog ke balance dvaara vishwa parivartak bano।

slogan:- buddhi roopi haath baapdaada ke haath mein de do to pareekshaaon roopi saagar mein hilenge nahin।

lavleen sthiti ka anubhav karo

jab man hi baap ka hai to phir man kaise lagaayen! pyaar kaise karen! yeh prashn hi nahin uth sakta kyonki sada lavleen hain, pyaar swaroop, master pyaar ke saagar ban gaye, to pyaar karna nahin padta, pyaar ka swaroop ho gaye। jitna-jitna gyaan soorya ki kirnen va prakaash badhta hai, utna hi jyaada pyaar ki lahren uchhalti hain।