रविवार 27 फ़रवरी 2022 की दैनिक मुरली

27-02-22 praatahmurli om shanti ''avyakt-baapdaada'' revise 18-01-90 madhuban

svayan aur seva mein teevragti ke parivartan ka guhya raaz

aaj sarva bachchon ke snehi maat-pita apne snehi bachchon ke sneh ke dil ki aavaaj aur sneh mein anmol motiyon ki maalaayen dekh-dekh bachchon ko sneh ka return vishesh vardaan de rahe hain - “sada sameep bhav, samaan samartha bhav, sada sampanna santushta bhav।'' sabke dil ka sneh aapke dil mein sankalp uthte hi baapdaada ke paas ati teevragti se pahunch jaata hai। chaaron or ke desh-videsh ke bachche aaj pyaar ke saagar mein lavleen hain। baapdaada, usmein bhi vishesh brahma maa bachchon ko sneh mein lavleen dekh svayan bhi bachchon ke lav mein, sneh mein samaaye hue hain। bachche jaante hain ki brahma maa ka bachchon mein vishesh sneh raha aur ab bhi hai। paalna karne vaali maa ka svatah hi vishesh sneh rehta hi hai। to aaj brahma maa ek-ek bachche ko dekh harshit ho rahi hai ki bachchon ke man mein, buddhi mein, dil mein, naynon mein maat-pita ke sivaae aur koi nahin hai। sab bachche “ek bal ek bharose se aage badh rahe hain'' agar kahaan rukte bhi hain to maat-pita ke sneh ka haath phir se samartha banaae aage badha deta hai।

aaj maat-pita bachchon ke shreshtha bhaagya ke geet ga rahe the kyonki aaj ka din vishesh soorya, chandrama ka backbone hokar sitaaron ko vishwa ke aakaash mein pratyaksha karne ka din hai। jaise yagya ki sthaapna ke aadi mein brahma baap ne bachchon ke aage apna sab kuchh samarpit kiya arthaat will ki। aise aaj ke divas par brahma baap ne bachchon ko sarvashaktiyon ki will ki arthaat will powers di। aaj ke divas naynon dvaara aur sankalp dvaara baap ne bachchon ko vishesh “san shows father'' ki vishesh saugaat di। aaj ke divas baap ne pratyaksha saakaar roop mein karaavanhaar ka part bajaane ka pratyaksha roop dikhaaya। brahma baap bhi aaj ke din pratyaksha roop mein karaavanhaar baap ke saathi bane, karanhaar nimitta bachchon ko banaaya aur karaavanhaar maat-pita saathi bane। aaj ke din brahma baap ne apni seva ki reeti aur gati parivartan ki। aaj ke divas vishesh brahma baap deh se sookshm pharishta swaroop dhaaran kar oonche vatan, sookshm vatan nivaasi bane, kislie? bachchon ko teevragti se ooncha uthaane ke liye, bachchon ko pharishta roop se udaane ke liye। itna shreshtha mahatva ka yeh divas hai! sirf sneh ka divas nahin lekin vishwa ki aatmaon ka, brahman aatmaon ka aur seva ki gati ka parivartan drama mein noondha hua tha, jo bachche bhi dekh rahe hain। vishwa ki aatmaon ke prati buddhivaanon ki buddhi bane। buddhi ka parivartan hua, samparka mein aaye sahayogi bane। brahman aatmaon mein shreshtha sankalp dvaara teevragti se vriddhi hui। seva ke prati “san shows father'' ki gift se vihang-maarga ki seva aarambha ki। yeh gift seva ki lift ban gai। parivartan hua na! ab aage chal seva mein aur parivartan dekhenge।

abhi tak aap brahman-aatmaayen apne tan-man ki mehnat se programmes banaate ho, stage taiyaar karte ho, nimantran card chhapaate ho, koi vi.aai.pi. ko bulaate ho, radio, T.vi. vaalon ko sahayogi banaate ho, dhan bhi lagaate ho। lekin aage chal aap svayan vi.aai.pi. ho jaayenge। aapse bada koi dikhaai nahin dega। bani-banaai stage par doosre log aapko nimantran denge। apne tan-man-dhan ki sevaaon ki svayan offer karenge। aapki minnate (request) karenge। mehnat aap nahin karenge, woh request karenge ki aap hamaare paas aao, tab hi pratyakshata ki aavaaj bulanda hogi aur sabka attention aap bachchon dvaara baap taraph jaayega। yeh jyaada samay nahin chalega। sabki nazar baap taraph jaana arthaat pratyakshata hona aur jay-jaykaar ke chaaron or ghante bajenge। yeh drama ka sookshm raaz bana hua hai। pratyakshata ke baad anek aatmaayen pashchaataap karengi। aur bachchon ka pashchaataap baap dekh nahin sakta, isliye parivartan ho jaayega। abhi aap brahman-aatmaon ki oonchi stage sadaakaal ki ban rahi hai। aapki oonchi stage seva ki stage ke nimantran dilaayegi। aur behad vishwa ki stage par jay-jaykaar ka part bajaayenge। suna, seva ka parivartan।

baap ke avyakt banne ke drama mein gupta raaz bhare hue the। kai bachche sochte hain - kam se kam brahma baap chhutti to leke jaate। to kya aap chhutti dete? nahin dete na। to balvaan kaun hua? agar chhutti lete to karmaateet nahin ban sakte kyonki blood-connection se padmaguna jyaada aatmik connection hota hai। brahma ko to karmaateet hona tha ya sneh ke bandhan mein jaana tha? brahma baap bhi kehte hain - drama ne karmaateet banaane ke bandhan mein baandha। aur baandha kitne time mein! samay hota to aur part ho jaata isliye ghadi ka khel ho gaya। bachchon ko bhi anjaan bana diya, baap ko bhi anjaan bana diya। inko kehte hain - vaah, drama vaah! aisa hai na। jab “vaah drama vaah'' hai to aur koi sankalp uth nahin sakta। fullstop laga diya na! nahin to kam se kam bachche poochh to sakte the ki kya ho raha hai। lekin baap bhi chup, bachche bhi chup rahe। isko kehte hain drama ka fullstop। us ghadi to fullstop hi laga na। peechhe bhal question kitne bhi uthe lekin us ghadi nahin। to “vaah drama vaah'' kahenge na! baba-baba bulaaya bhi peechhe, pahle nahin bulaaya। yeh drama ki vichitra noondh honi hi thi aur honi hi hai। parivartansheel drama part ko bhi parivartan kar deta hai।

yeh sab teachers avyakt rachna hai majority। saakaar ki paalna lene vaali teachers bahut thodi hain। fast gati se paida hui ho kyonki sankalp ki gati sabse fast hai। aadi ratna hain mukh-vanshaavli, aur aap ho sankalp ki vanshaavli isliye brahma ki do rachna gaayi hui hai। ek mukh vanshaavli phir sankalp dvaara srishti rachi। ho to brahma ki rachna, tab to bi.ke. kahlaate ho। shivkumaari to nahin kahlaate ho na। double foreigners bhi sab sankalp ki rachna hai। aise teevragti se sab teachers aage badh rahi ho? jab rachna hi teevragti ki ho to purooshaartha bhi teevragti se hona chaahiye। sada yeh check karo ki sada teevra purooshaarthi hoon va kabhi-kabhi hoon? samjha! ab “kya'' “kyon'' ka geet khatma karo। “vaah-vaah'' ke geet gaao। achha!

chaaron or ke sarva sneh aur shakti sampanna shreshtha aatmaon ko, sada baap ke saath-saath teevragti se parivartan ke saathi sameep aatmaon ko, sada apni udti kala dvaara anya aatmaon ko bhi udaane vaale nirbandhan udte panchhi aatmaon ko, sada “san shows father'' ki gift dvaara svayan aur seva mein teevragti se parivartan laane vaale, aise sarva lavleen bachchon ko is mahatva divas ke mahatva ke saath maat-pita ka vishesh yaad-pyaar aur namaste।

hubli zone ke bhaai bahinon se avyakt baapdaada ki mulaakaat:- sada apne ko har kadam mein padmon ki kamaai karne vaale padmaapdam bhaagyavaan samajhte ho? yeh jo gaayan hai- har kadam mein padam… kiske liye gaayan hai? saare din mein kitne padam ikatthe karte ho? sangamayug bade-te-bade kamaai ke season ka yug hai। to season ke samay kya kiya jaata hai? itna attention rakhte ho? har samay yeh yaad rahe ki ab nahin to kab nahin। jo ghadi beet gai woh phir se nahin aayegi। ek ghadi vyartha jaana arthaat kitne kadam vyartha gaye? padam vyartha gaye! isliye har ghadi yeh slogan yaad rahe-“jo samay ke mahatva ko jaante hain woh svatah hi mahaan bante hain।'' svayan ko bhi jaanna hai aur samay ko bhi jaanna hai। donon hi vishesh hain। is smriti divas par vishesh sada samartha banne ka shreshtha sankalp kiya? vyartha sankalp, bol, sab roop se vyartha ko samaapta karne ka din hai। jab knowledge mil gai ki vyartha kya hai, samartha kya hai- to knowledgeful aatma kabhi bhi samartha ko chhod vyartha taraph nahin ja sakti। aur jitna svayan samartha banenge utna auron ko samartha bana sakenge। 63 janma ganvaaya aur samartha banne ka yeh ek janma hai। to is samay ko vyartha to nahin karna chaahiye na! amrit-vele se lekar raat tak apni dincharya ko check karo। aise nahin ki sirf raatri ko chart check karo lekin beech-beech mein check karo, baar-baar check karne se change kar sakenge। agar raat ko check karenge to jo vyartha gaya, woh vyartha ke khaate mein hi ho jaayega isliye baapdaada ne beech-beech mein traffic control ka time fix kiya hai। traffic control karte ho ya din mein busy rehte ho? apna niyam bana rehna chaahiye। chaahe time kuchh badli ho jaay lekin agar attention rahega to kamaai jama hogi। us samay agar koi kaam hai to aadhe ghante ke baad karo lekin kar to sakte ho। ghadi ke aadhaar par bhi kyon chalo। apni buddhi hi ghadi hai, divya buddhi ki ghadi ko yaad karo। jis baat ki aadat pad jaati hai to aadat aisi cheej hai jo na chaahte bhi apni taraph kheenchegi। jab buri aadat rahne nahin deti, apni taraph aakarshit karti hai to achhe sanskaar kyon nahin apna bana sakte। to sada check karo aur change karo to sada ke liye kamaai jama hoti rahegi। achha!

2) sada apne ko roop basant anubhav karte ho? roop arthaat gyaani tu aatma bhi hain aur yogi tu aatma bhi hain। jis samay chaahen roop ban jaayen aur jis samay chaahen basant ban jaaen isliye aap sabka slogan hai - “yogi bano aur pavitra bano maana gyaani bano''। auron ko yeh slogan yaad dilaate hain na। to donon sthiti second mein ban sakti hain। aise na ho ki banne chaahe roop aur yaad aati rahen gyaan ki baaten। second se bhi kam time mein fullstop lag jaaye। aise nahin, fullstop lagaao abhi aur lage paanch minute ke baad। ise powerful brake nahin kahenge। powerful brake ka kaam hai jahaan lagaao vahaan lage। second bhi der se lagi to accident ho jaayega। fullstop arthaat brake powerful ho। jahaan man-buddhi ko lagaana chaahe vahaan laga len। yeh man-buddhi-sanskaar aap aatmaon ki shaktiyaan hai isliye sada yeh practice karte raho ki jis samay, jis vidhi se man-buddhi ko lagaana chaahte hain vaisa lagta hai ya time lag jaata hai? check karte ho ya saara din beet jaata hai phir raat ko check karte ho? beech-beech mein check karo। jis samay bahut buddhi busy ho, us samay trial karke dekho ki abhi-abhi agar buddhi ko is taraph se hataakar baap ki taraph lagaana chaahen to second mein lagti hai? aise to second bhi bahut hai। isko kehte hain controlling power। jismen controlling power nahin woh ruling power ke adhikaari ban nahin sakte। svaraajya ke hisaab se abhi bhi ruler (shaasak) ho। svaraajya mila hai na! aise nahin aankh ko kaho yeh dekho aur woh dekhe kuchh aur, kaan ko kaho ki yeh nahin suno aur sunte hi rahen। isko controlling power nahin kehte। kabhi koi karmendriy dhokha na de - isko kehte hain svaraajya। to raajya chalaane aata hai na? agar raaja ko praja maane nahin to use naam ka raaja kahenge ya kaam ka? aatma ka anaadi swaroop hi raaja ka hai, maalik ka hai। yeh to peechhe partantra ban gai hai lekin aadi aur anaadi swaroop svatantra hai। to aadi aur anaadi swaroop svatantra hai। to aadi aur anaadi swaroop sahaj yaad aana chaahiye na। svatantra ho ya thoda-thoda partantra ho? man ka bhi bandhan nahin। agar man ka bandhan hoga to yeh bandhan aur bandhan ko le aayega। kitne janma bandhan mein rahkar dekh liya! abhi bhi bandhan achha lagta hai kya? bandhanmukta arthaat raaja, svaraajya adhikaari kyonki bandhan praaptiyon ka anubhav karne nahin deta isliye sada brake powerful rakho, tab ant mein paas with honour honge arthaat first division mein aayenge। first maana fast, dheele-dheele nahin। brake fast lage। kabhi bhi oonchaai ke raaste par jaate hain to pahle brake check karte hain। aap kitna oonche jaate ho! to brake powerful chaahiye na! baar-baar check karo। aisa na ho ki aap samjho brake bahut achhi hai lekin time par lage nahin, to dhokha ho jaayega isliye abhyaas karo - stop kaha aur stop ho jaaye। riddhi-siddhi vaale kya karte hain? siddhi dikhaate hain - chalti hui train ko stop kar diya...। lekin usse kya phaayda। aap sankalpon ki trephik ko stop karte ho। isse bahut phaayde hain। aapki hai “vidhi se siddhi aur unki hai riddhi-siddhi।'' woh alpakaal ki hai, yeh sadaakaal ki hai। to sabhi knowledgeful ban gaye। rachta aur rachna ki saari knowledge aa gai। duniya vaale samajhte hain - maataayen kya karengi! aur maataayen asambhav ko bhi sambhav bana deti hai। aisi shaktiyaan ho na? achha!

vardaan:- doosron ke liye remark dene ke bajaae sva ko parivartan karne vaale svachintak bhav

kai bachche chalte-chalte yeh bahut badi galti karte hain - jo doosron ke judge ban jaate hain aur apne vakeel ban jaate hain। kahenge isko yeh nahin karna chaahiye, inko badalna chaahiye aur apne liye kahenge - yeh baat bilkul sahi hai, main jo kehta hoon vahi right hai..। ab doosron ke liye aisi remark dene ke bajaae svayan ke judge bano। svachintak ban svayan ko dekho aur svayan ko parivartan karo tab vishwa parivartan hoga।

slogan:- sada harshit rehna hai to har drishya ko saakshi hokar dekho।