रविवार 6 मार्च 2022 की दैनिक मुरली

06-03-22 praatahmurli om shanti ''avyakt-baapdaada'' revise 22-02-90 madhuban

“saare khel ka aadhaar - light aur bindu (vishesh shivjayanti ke avsar par)

aaj trimoorti shiv baap har ek bachche ke mastak par teen tilak dekh rahe hain। sabhi bachche dil ke umang-utsaah se trimoorti shivjayanti manaane aaye hain। to trimoorti shiv baap arthaat jyotirbindu baap bachchon ke mastak par teen bindiyon ka tilak dekh harshit ho rahe hain। yeh tilak saare gyaan ka saar hai। in teen bindiyon mein saara gyaan-saagar ka saar bhara hua hai। saare gyaan ka saar teen baaton mein hain - paramatma, aatma aur drama arthaat rachna। aaj ka yaadgaar divas bhi shiv arthaat bindu ka hai। baap bhi bindu, aap bhi bindu aur rachna arthaat drama bhi bindu। to aap sabhi bindu, bindu ki jayanti mana rahe ho। bindu ban mana rahe ho na! saara prakriti ka khel bhi do baaton ka hai - ek bindu ka aur doosra light, jyoti ka। baap ko sirf bindu nahin lekin jyortibindu kehte hain। rachta bhi jyortibindu hai aur aap bhi hero paartadhaari jyortibindu ho, na ki sirf bindu ho। aur saara khel bhi dekho - jo bhi kaarya karte hain, uska aadhaar light hai। aaj sansaar mein agar light fail ho jaae to ek second mein sansaar, sansaar nahin lagega। jo bhi sukh ke saadhan hai un sabka aadhaar kya hai? light। rachayita svayan bhi light hai lekin prakriti ki light avinaashi nahin hai। to saara khel bindu aur light par hai। aaj ke yaadgaar divas ko vishesh niraakaar rup se manaate hain। lekin aap kaise manaayenge? aap vishesh aatmaon ko manaana bhi vishesh hai na। aisa kabhi socha tha ki ham aatmaaen aise padmaapdam bhaagyavaan hain jo direct trimoorti shiv baap ke saath saakaar rup mein jayanti manaayenge? kabhi svapna mein bhi sankalp nahin tha। duniya vaale yaadgaar chitra se jayanti manaate aur aap chaitanya mein baap ko avatrit kar jayanti manaate ho। to shaktishaali kaun hua - baap ya aap? baap kehte hain, pahle aap। agar bachche nahin hote to baap aakar kya karte! isliye pahle baap bachchon ko mubaarak dete hain man ke muhabbat ki mubaarak। baap ko dil mein pratyaksha kar liya hai, to dil mein baap ke pratyaksha karne ki mubaarak। saath-saath vishwa ki sarva aatmaon prati raham-dil vishwa kalyaankaari ki shubhbhaavna-shubhkaamna se vishwa ke aage baap ko pratyaksha karne ki seva ke umang-utsaah ki mubaarak।

baapdaada sabhi bachchon ke utsaah ka utsav dekh raha tha। seva karna arthaat utsaah se utsav manaana। jitni badi seva karte ho behad ki, utna hi behad ka utsav manaate ho। seva ka arth hi kya hai? seva kyon karte ho? aatmaon mein baap ke parichay dvaara utsaah badhaane ke liye। jab seva ke plan banaate to yahi utsaah rehta hai na ki jaldi-se-jaldi vanchit aatmaon ko baap se varsa dilaayen, aatmaon ko khushi ki jhalak ka anubhav karaayen। abhi kisi bhi aatma ko dekhte ho - chaahe aaj ke sansaar mein kitna bhi bada ho, lekin har aatma ke prati dekhte hi pahle sankalp kya uthta hai? yeh prime minister hai, yeh raaja hai - yeh dikhaai deta hai ya aatma se milte ho va dekhte ho? shubhbhaavna uthti hai na ki yeh aatma bhi baap se praapti ki anchali le leven। is sankalp se milte ho na। ab yeh shubhbhaavna utpanna hoti hai tab hi aapki shubhbhaavna ka phal us aatma ko anubhav karne ka bal milta hai। shubh bhaavna aapki hai lekin aapki bhaavna ka phal unko mil jaata hai kyonki aap shreshtha aatmaon ki shubh bhaavna ke sankalp mein bahut shakti hai। aap ek-ek shreshtha aatma ka ek-ek shubhsankalpa vaayumandal ki srishti rachta hai। sankalp se srishti kehte hain na! yeh shubhbhaavna ka shubhsankalpa chaaron or ke vaataavran arthaat srishti ko badal deta haiislie aane vaali aatma ko sab achhe-te-achha anubhav hota hai, nyaara sansaar anubhav hota hai। thode samay ke liye aapke shubh sankalp ki bhaavna ke phal mein woh samajhte hain ki yeh nyaara aur pyaara sthaan hai, nyaare aur pyaare pharishte aatmaaen hain। kaisi bhi aatma ho lekin thode samay ke liye utsaah mein aa jaate hain। seva ka arth kya hua? utsav manaana arthaat utsaah mein laana। koi bhi chaahe sthool karma karte ho, chaahe vaani dvaara, chaahe sankalp, har bol utsav hain kyonki utsaah se karte ho aur utsaah dilaate ho। is smriti se kabhi bhi thakaavat nahin hogi, bojh nahin lagega। maatha bhaari nahin hoga, dilshikasta nahin honge। jab kisko thakaavat hoti hai va dil susta hoti hai to duniya mein kya karte hain। koi-na-koi manoranjan ke sthaan par chale jaate hain। kehte hain - aaj maatha bahut bhari hai isliye thoda manoranjan chaahiye। utsav ka arth hi hota hai mauj manaana। khaao-piyo mauj karo - yeh utsav hai। braahmanon ka to har ghadi utsav hai, har karma hi utsav hai। utsav manaane mein thakaavat hoti hai kya? yahaan madhuban mein jab manorjann ka programme karte ho - bhal 11 baj jaate hain to bhi baithe rehte ho। class mein 11 baj jaaen to aadha class chala jaata hai। manoranjan achha lagta hai na? to seva bhi utsav hai - is vidhi se seva karo। svayan bhi utsaah mein raho, seva bhi utsaah se karo aur aatmaon mein bhi utsaah laao to kya hoga? jo bhi seva karenge us dvaara anya aatmaon ka bhi utsaah badhta rahega। aisa utsaah hai? va sirf madhuban tak hai? vahaan jaane se phir circumstance dikhaai denge? utsaah aisi cheez hai jo uske aage paristhiti kuchh bhi nahin hai। jab utsaah kam ho jaata hai tab paristhiti vaar karti hai। utsaah hai to paristhiti vaar nahin karegi, aapke oopar balihaar jaayegi।

aaj utsav manaane aaye ho na। shiv jayanti ko utsav kehte hain। utsav manaane nahin aaye ho lekin ''har ghadi utsav“ hai - yeh underline karne aaye ho। taakat bhi na ho, maano shareer mein shakti nahin hai va dhan ki shakti ki kami ke kaaran man mein feel hota hai ki yeh nahin ho sakta lekin utsaah aisi cheez hai jo aap mein agar utsaah hai to doosre bhi utsaah mein aage badhkar ke aapke sahayogi ban jaayenge। dhan ki kami bhi hogi to kahaan na kahaan se dhan ko bhi utsaah kheenchakar laayega। utsaah aisa chumbak hai jo dhan ko bhi kheenchakar laayenga। jaise bhakti mein kehte hain na - himmat, utsaah dhool ko bhi dhan bana deta hai। itna parivartan ho jaata hai! utsaah aisi anubhooti hai jo kisi bhi aatma ki kamjori ke sanskaar ka prabhaav nahin pad sakta। aapka prabhaav us par padega, uska prabhaav aapke oopar nahin aayega। jo khyaal-khvaab mein bhi nahin hoga woh sahaj saakaar ho jaayega। yeh baapdaada ka sabhi sevaadhaariyon ko guarantee ka vardaan hai। samjha?

baapdaada khush hain, achhi lagan se seva ke plans bana rahe ho। sanskaaron ko milaana arthaat sampoornata ko sameep laana aur samay ko sameep laana। baapdaada bhi dekh rahe hain - sanskaar milan ki raas achhi kar rahe the, achhi khushbu aa rahi thi! to sada kaise rehna? utsav manaana hai, utsaah mein rehna hai। khud na bhi kar sako to doosron ko utsaah dilaao to doosre ka utsaah aapko bhi utsaah mein laayega। nimitta bane hue bade yahi kaam karte hain na। doosron ko utsaah dilaana arthaat svayan ko utsaah mein laana। kabhi by chance 14 aana utsaah ho to doosron ko 16 aana utsaah dilaao to aapka bhi 2 aana utsaah badh jaayega। brahma baap ki visheshta kya rahi? koyle uthaane honge to bhi utsaah se uthvaayenge, manoranjan karenge। (koyle ke 35 wagons aane the। baapdaada murli mein koyle ki baat kar rahe the aur thode samay baad samaachaar mila ki aabu road mein koyle ki wagons pahunch gai hai।) achha!

sabhi paandav kya karenge? sada utsaah mein rahenge na। utsaah kabhi nahin chhodna। abhi ka utsaah aapke jad-chitron ke aage jaakar pahle utsaah himmat lekar phir kaarya shuru karte hain। itni utsaah bhari aatmaayen ho jo aapke jad-chitra bhi auron ko utsaah himmat dila rahe hain! paandavon ka mahaaveer ka chitra kitna prasiddha hai! kamjor shakti lene ke liye mahaaveer ke paas jaate hain! achha!

chaaron or ke sarva ati shreshtha bhaagyavaan bachchon ko, sada jyortibindu ban jyotirbindu aap ko pratyaksha karne ke umang-utsaah mein rahne vaale, sada dil mein baap ki pratyakshata ka jhanda lahraane vaale, sada vishwa mein baap ki pratyakshata ka jhanda lahraane vaale - aise heere tulya baap ki jayanti so bachchon ki jayanti ki mubaarak ho। sada mubaarak se udne vaale hain aur sada rahenge - aise utsaah mein rahne vaale, har samay utsav manaane vaale aur sarva ko utsaah dilaane vaale, mahaan shaktishaali aatmaon ko trimoorti shiv baap ki yaad-pyaar, mubaarak aur namaste।

double videshi bhaai-bahnon ke group se mulaakaat - baap aur bachchon ko itna dil ka sookshm connection hai jo koi ki taakat nahin jo alag kar sake। sabse bade-te-bada nasha bachchon ko sada yahi rehta hai ki duniya baap ko yaad karti lekin baap kisko yaad karta! baap ko to phir bhi aatmaayen yaad karti lekin aap aatmaon ko kaun yaad karta! kitna bada nasha hai! yeh nasha sada rehta hai? kam jyaada to nahin hota? kabhi udte, kabhi chadhte, kabhi chalte… aise to nahin? na peechhe hatne vaale ho, na rookne vaale ho lekin speed change ho jaati hai। baap-daada sada bachchon ka khel dekhte rehte hain, kabhi chalna shuru karte hain, phir kya hota hai? koi-na-koi aisa circumstance ban jaata hai, phir jaise koi dhakka deta hai to chal padte hain, aise koi-na-koi baat drama anusaar hoti hai jo phir se udti kala ki or le jaati hai kyonki draamaanusaar pakke nishchaybuddhi hain, dil mein sankalp kar liya hai ki baap mera, main baap ka, to aisi aatmaon ko svatah madad mil jaati hai। madad milne mein kitna samay lagta hai? (second) dekho, photo nikal raha hai। baap ka camera second mein sab nikaal leta hai। kuchh bhi ho jaae lekin baap aur seva se kabhi bhi kinaara nahin karna hai। yaad karne mein va padhaai padhne mein man nahin bhi lage to bhi jabardasti sunte raho, yog lagaate raho, theek ho jaayenge। kyonki maaya trial karti hai। yeh thoda-sa kinaara kar le to aa jaaoon iske paas, isliye kabhi kinaara nahin karna। niymon ko kabhi nahin chhodna। apni padhaai, amritvela, seva jo bhi dincharya bani hui hai, usmein man nahin bhi lage lekin dincharya mein kuchh miss nahin karo। bhaarat mein kehte hain - jitna kaayda utna phaayda। to ye jo kaayde bane hue hain, niyam bane hue hain usko kabhi bhi miss nahin karna hai। dekho, aapke bhakta abhi tak aapka niyam paalan kar rahe hain। chaahe mandir mein man nahin bhi lage to bhi jaayenge zaroor। yeh kisse seekhe? aap logon ne sikhaaya na! sadaiv yeh anubhav karo ki jo bhi maryaadaayen va niyam bane hain, usko banaane vaale ham hain। aapne banaaya hai ya bane hue mile hain? law-makers ho yaad nahin? amritvele uthna, yeh aapka man maanta hai ya bana hua hai isliye is par chalte ho - aap svayan anubhav karte, chalte ho ya direction ya niyam bana hua hai isliye chalte ho? aapka man maanta hai na! to jo man maanta hai, woh man mein nahin banaaya na! koi majboori se to nahin chale rahe ho - karna hi padega। sab man ko pansad hai na? kyonki jo khushi se kiya jaata hai usmein bandhan nahin lagta hai। yahaan baap ne aadi, madhya, ant - teenon kaalon ki knowledge de di hai। kuchh bhi karte ho to teenon kaalon ko jaankar ke aur usi khushi se karte ho। baap dekhte hain ki kamaal karne vaale bachche hain। baap se pyaar atoot hai isliye koi bhi baat hoti hai to bhi udte rehte hain। baap se pyaar mein sabhi full paas ho। padhaai mein nambarvaar ho lekin pyaar mein number one ho। seva bhi achhi karte hain, lekin kabhi-kabhi thoda khel dikhaate hain। jaise baap se number one pyaar hai, aise murli se bhi pyaar hai? jab se aaye ho tab se kitni murliyaan miss hui hongi? kabhi koi aise bahaane se class miss kiya hain? jaise baap ko yaad karna miss nahin kar sakte, aise padhaai miss na ho। ismen bhi number one hona hai। baap ke roop mein yaad, shikshak ke roop mein padhaai aur satuguru ke roop mein praapta vardaan kaarya mein lagaana - yeh teenon mein number one chaahiye। vardaan to sabko milte hain na lekin samay par vardaan ko kaarya mein lagaana - isko kehte hain vardaan se laabh lena। to yeh teenon hi baaten check karna ki aadi se ab tak in teenon baaton mein kitna paas rahe, tab vijay maala ke manke banenge। achha!

baapdaada bachchon ke nishchay aur umang ko dekhkar khush hain। baapdaada ek-ek ki visheshta dekh rahe hain। baapdaada jab dekhte hain ki kitna muhabbat se aage badh rahe hain, mehnat ko mehnat nahin samajhte hain, muhabbat se chal rahe hain - to khush hote hain। ek-ek ki visheshta ki list baapdaada ke paas hai। samjha? achha!

vidaai ke samay - aaj baapdaada aur anek bachchon ke janma-divas ki padmaguna mubaarak ho। chaaron or ke bachchon ke janma-divas ki padmaguna mubaarak ho। chaaron or ke bachchon ke dil ka yaad-pyaar aur saath-saath sthool yaadgaar sneh-bhare patra aur cards mubaarak ke paaye। sabke dil ki aavaaj baap ke paas pahunchi। dilaaraam baap sabhi badi dil vaale bachchon ko badi dil se bahut-bahut-bahut yaad-pyaar dete hain। padmaguna kehna bhi bachchon ke svamaan ke aage kuchh nahin hai, isliye diamond night ki diamond varsha se mubaarak ho। sabhi ko yaad-pyaar aur sada pharishta ban udte rahne ki mubaarak ho। achha, diamond morning।

vardaan:- akalyaan ki scene mein bhi kalyaan ka anubhav kar sada achal-atal rahne vaale nishchay-buddhi bhav

drama mein jo bhi hota hai - woh kalyaankaari yug ke kaaran sab kalyaankaari hai, akalyaan mein bhi kalyaan dikhaai de tab kahenge nishchaybuddhi। paristhiti ke samay hi nishchay ke sthiti ki parakh hoti hai। nishchay ka arth hai - sanshay ka naam-nishaan na ho। kuchh bhi ho jaae lekin nishchaybuddhi ko koi bhi paristhiti halchal mein la nahin sakti। halchal mein aana maana kamjor hona।

slogan:- parmaatma pyaar ke paatra bano to sahaj hi maayaajeet ban jaayenge।