शुक्रवार 11 मार्च 2022 की दैनिक मुरली

11-03-2022 praatahmurli om shanti "baapdaada"' madhuban

“meethe bachche - yeh tumhaara antim janma hai isliye vikaaron ka sannyaas karo, is antim janma mein raavan ki janjeeron se apne ko chhudaao''

prashn:- baap ka sahaara kin bachchon ko milta hai? baap kin bachchon se sada raazi rehta hai?

uttar:- baap ka sahaara unhein milta - jo sachchi dil vaale hain। kaha jaata sachchi dil par saaheb raazi। jo baap ke har direction ko amal mein laate hain, baba unse raazi rehta hai। baap ka direction hai yaad mein rah pavitra ban phir service karo, kisko raasta bataao। shoodron ke sang se apni sambhaal karo। karmendriyon se kabhi bura kaam nahin karna। jo in sab baaton ki dhaarna karte baap unse raazi rehta।

geet:- mujhko sahaara dene vaale…

om shanti। bachche yahaan gyaan sun rahe hain। kiska gyaan? kya shaastron ka? nahin। bachche jaante hain ki shaastron ka gyaan to sabhi manushya maatra lete hain। hamko yahaan parampita paramatma gyaan dete hain। koi bhi shaastra aadi padhne athva adhyayan karne vaale sannyaasi aise nahin kahenge। vo koi gyaan nahin sunaate hain। koi bhi satsang mein jaao to manushya baitha hoga। unko shaastri ji, pandit ji va mahaatma ji kahenge। naam ka tailuk rakhte hi hain manushya ke saath। yahaan bachche jaante hain hamko koi manushya gyaan nahin dete, parantu manushya dvaara niraakaar parampita paramatma gyaan dete hain। yeh baaten koi bhi satsang mein nahin sunaai jaati hain। bhaashan karne vaalon ki buddhi mein bhi yeh baaten nahin ho sakti। hamko bhi jo gyaan de raha hai, woh koi manushya va devta nahin hai। bhal is samay devi-devta dharma nahin hai phir bhi brahma vishnu shankar sookshmavtanvaasi jo hain unhon ka to naam gaaya jaata hai। lakshmi-naaraayan aadi yeh sab hain daiveegun vaale manushya। is samay sab hain aasuri gun vaale manushya। koi bhi manushya nahin samajhte ki ham aatma hain। phalaane dvaara paramatma hamko gyaan de rahe hain। woh to samajhte hain phalaana mahaatma, phalaana shaastri hamko katha suna rahe hain। ved shaastra aadi suna rahe hain, geeta suna rahe hain। baap kehte hain main tumko aise shaastron ki baaten sunaata nahin hoon। tum to apne ko aatma nishchay karte ho aur phir kehte ho patit-paavan aao। sarva ka duhkh harta sukh karta, woh hai sarva ka shanti daata, sarva ka mukti-jeevanmukti daata। woh to koi manushya nahin ho sakta। manushya savere-savere uthkar kitni bhakti karte hain। koi bhajan gaate hain, katha karte hain - isko kaha jaata hai bhakti maarga। bhakti maarga vaalon ko yeh maaloom nahin ki bhakti maarga kya hota hai। yahaan sab jagah bhakti hi bhakti hai। gyaan hai din, bhakti hai raat। jab gyaan hai to bhakti nahin। jab bhakti hai to gyaan nahin। dvaapar kaliyug hai bhakti, satayug, treta hai gyaan ka phal। woh gyaan ka saagar hi phal dete hain। bhagwan kya phal dega! phal maana varsa। bhagwan varsa dega mukti ka। saath mein muktidhaam mein le jaayega। is samay manushya itne ho gaye hain jo rahne ki jagah nahin hai, anaaj nahin hai, isliye bhagwan ko aana padta hai। raavan sabko patit banaate hain phir patit-paavan aakar paavan banaate hain। paavan banaane vaala aur patit banaane vaala donon hi alag-alag hain। ab tum jaan gaye ho ki paavan duniya ko patit banaane vaala kaun hai aur patit duniya ko paavan banaane vaala kaun hai! kehte hain patit-paavan aao - ek ko hi bulaate hain। sarva ka paalan karta ek hai। satayug mein koi vikaari ho nahin sakta। patit arthaat jo vikaar mein jaate hain। sannyaasi vikaar mein nahin jaate isliye unko patit nahin kahenge। kaha jaata hai pavitra aatma, 5 vikaar ka sannyaas kiya hua hai, number one vikaar hai kaam। krodh to sannyaasiyon mein bhi bahut hai। stri ko chhodte hain, samajhte hain unke sang mein manushya nirvikaari rah nahin sakte। shaadi ka matlab hi yeh hai। satayug mein yeh kaayda nahin। baap samjhaate hain bachche vahaan patit koi hota hi nahin। devtaaon ki mahima hai sarvagun sampanna, sampoorn nirvikaari। raavan raajya shuru hota hi hai dvaapar yug se। baap khud kehte hain kaam ko jeeto। tum mujhe yaad karo aur pavitra duniya ko yaad karo to tum patit nahin banenge। main paavan duniya sthaapan karne aaya hoon aur doosri baat ek baap ke bachche brahman braahmaniyaan tum aapas mein bhaai-behen thahre। yeh baat jab tak achhi tarah kiski buddhi mein nahin baithegi tab tak vikaaron se chhoot nahin sakte। jab tak brahma ki santaan na banen tab tak paavan banna bada mushkil hai। madad nahin milegi। achha brahma ki baat chhodo। tum kehte ho ham bhagwan ke bachche hain, saakaar mein kehte ho is hisaab se bhaai-behen ho gaye। phir vikaar mein ja na saken। yeh to sab kahenge ham eeshvar ki santaan hain aur baap kehte hain bachche main aa gaya hoon, ab jo mere aakar bante hain woh aapas mein bhaai-behen ho gaye। brahma dvaara bhaai-behen ki rachna hoti hai to phir vikaar mein ja na saken।

baap kehte hain yeh tumhaara antim janma hai। ek janma ke liye to is vikaar ka tyaag karo। sannyaasi log chhodte hain jangal mein jaane ke liye। tum chhodte ho pavitra duniya mein jaane ke liye। sannyaasiyon ko koi temptation nahin hai। grihasthi log unko bahut maan dete hain। parantu woh koi mandiron mein poojne laayak nahin bante hain। mandir mein poojyaneey laayak hain devtaayen kyonki unhon ki aatma aur shareer donon pavitra hote hain। yahaan hamko pavitra shareer mil na sake। yeh to tamopradhaan patit shareer hai। 5 tatva bhi patit hain। vahaan aatma bhi pavitra rehti hai to 5 tatva bhi satopradhaan pavitra rehte hain। abhi aatma bhi tamopradhaan to tatva bhi tamopradhaan hain isliye baadh, toofaan aadi kitne hote rehte hain। kisko duhkh dena - yeh tamogun hai। satayug mein tatva bhi kisko duhkh nahin dete। is samay manushya ki buddhi bhi tamopradhaan hai। sato rajo tamo mein bhi zaroor aana hai। nahin to puraani duniya kaise ho jo phir nai banaane vaala aaye। ab baap kehte hain bachche paavan bano। yeh antim janma raavan ki janjeeron se apne ko chhudaao। aasuri mat par aadhaakalpa tum patit rahe ho, yeh bahut buri aadat hai। sabse bada dushman hai kaam। chhotepan mein bhi vikaar mein chale jaate hain kyonki sang aisa milta hai। samay hi aisa hai, patit zaroor banna hai। sannyaas dharma ka bhi part hai। srishti ko jal marne se kuchh bachaate hain। ab drama ko bhi tum bachche hi jaante ho। bhal kehte hain Christian dharma ko itne varsha hue parantu yeh nahin jaante ki Christian dharma phir khatma kab hoga! kehte hain kaliyug ko abhi 40 hajaar varsha chalna hai to Christian aadi sab dharma 40 hajaar varsha tak vriddhi ko paate rahenge! ab 5 hajaar varsha mein hi jagah poori nahin rahi to 40 hajaar varsha mein pata nahin kya ho jaae। shaastron mein to bahut gapode laga diye hain isliye koi virla hi in baaton ko samajh kadam-kadam shreemat par chalte hain। shreemat par chalna kitna difficult hai। lakshmi-naaraayan jinhon ko saari duniya poojti hai - woh ab tum ban rahe ho। yeh tum hi jaante ho so bhi nambarvaar। ab baap kehte hain mujhe yaad karo aur ghar ko yaad karo। ghar to jaldi yaad aata hai na। manushya 8-10 varsha ki musaaphiri kar ghar lautte hain to khushi hoti hai ki ab ham apne birthplace mein ja rahe hain। ab woh musaaphiri hoti hai thode samay ki, isliye ghar ko bhoolte nahin hain। yahaan to 5 hajaar varsha ho gaye hain isliye ghar ko to bilkul hi bhool gaye hain।

ab baap ne aakar batlaaya hai ki bachche yeh puraani duniya hai - inko to aag lagni hai। koi bhi bachega nahin, sabko marna hai isliye is sadi hui duniya aur sade hue shareer se pyaar mat rakho। shareer badalte-badalte paanch hajaar varsha hue hain। 84 baar shareer change karte aaye hain। ab baap kehte hain tumhaare 84 janma poore hue tab to main aaya hoon। tumhaara part poora hua to sabka poora hua। is knowledge ko dhaaran karna hai। saari knowledge buddhi mein hai। baap dvaara knowledgeful banne se phir saare vishwa ke maalik ban jaate ho aur vishwa bhi nai ban jaati hai। bhakti maarga mein jo bhi karmakaanda ki vastuyen hain sabko khatma karna hai। phir koi ek bhi he prabhu kahne vaala nahin rahega। haay raam, he prabhu yeh akshar duhkh mein hi nikalte hain। satayug mein nahin niklenge kyonki vahaan duhkh ki baat nahin। to aisa baap jisko yaad kiya jaata hai, unki mat par kyon nahin chalna chaahiye। eeshvareey mat se sada sukhi ban jaayenge। yeh samajhte bhi shreemat par na chale to unko mahaamoorkha kaha jaata hai। eeshvareey mat aur aasuri mat donon mein raat-din ka farka ho jaata hai। ab judge karna hai ki ham kis taraph jaayen। maaya ki taraph to duhkh hi duhkh hai। eeshvar ki taraph 21 janma ka sukh hai। ab kiski mat par chalen!

baap kehte hain shreemat par chalne chaaho to chalo। pahli baat hai ki kaam par jeet pahno। unse bhi pahli baat hai ki mujhe yaad karo। yeh puraana shareer to chhodna hi hai। ab vaapis jaana hai। is samay hamko khyaal hai ki ham 84 janmon ki puraani khaal chhodta hoon। vahaan satayug mein samajhte hain - yeh boodha shareer chhod phir bachpan mein aayenge। is puraani duniya ka mahaavinaash hona hai। yeh baaten koi shaastron mein nahin hain। yeh baap baith sammukh samjhaate hain। yeh sab baaten dhyaan mein rahen to aho saubhaagya, kitna sahaj hai। phir bhi pata nahin sweet hom, sweet raajdhaani ko kyon bhool jaate hain। yaad kyon nahin karte! sangadosh mein aakar gande bante hain। baba kehte hain bachche gande vikalpa bahut aayenge, parantu karmendriyon se koi kaam nahin karna। aise nahin vikarma karke phir likho baba yeh vikarma ho gaya, kshama karo। vikarma kar diya to uska phir sauguna danda pad jaayega। ek to na batlaane se danda pad jaaye। is samay pata padta hai ki ajaamil kaun banta hai। jo eeshvar ki god lekar phir vikaar mein jaate to siddha hota hai ki yeh bada ajaamil, paap aatma hai jo vikaar bigar rah nahin sakte। bioscope (cinema) sabko ganda banaane vaala hai। tumhein koi bhi vikaar se door bhaagna chaahiye। brahman hain nirvikaari to sang bhi braahmanon ka chaahiye। shoodron ke sang mein duhkhi hote hain। shareer nirvaah arth to sab kuchh karna hi hai। parantu karmendriyon se koi vikarma nahin karna chaahiye। haan, bachchon ko sudhaarne ke liye samjhaana hai, koi na koi yukti se halki saja deni hai। rachna rachi hai to responsibility bhi hai। unhon ko bhi sachchi kamaai karaani hai। chhote-chhote bachchon ko bhi thoda bahut sikhlaana achha hai। shivbaaba ko yaad karne se madad milegi। sachche dil par saaheb raazi hota hai। sachchi dil vaale bachchon ko hi baap ka sahaara milta hai। ab saari duniya mein koi kiska sahaara nahin। sahaara hota hai sukh mein le jaane ka। ek paramatma ko hi yaad karte hain, vahi aakar sabko shanti dete hain। satayug mein sab sukhi hain। baaki sab aatmaayen shanti desh mein rehti hain। bhaarat svarga tha, sab vishwa ke maalik the। ashaanti maaraamaari kuchh nahin tha। zaroor woh nai duniya baba ne hi rachi hogi। baba se varsa mila hoga। kaise? woh bhi koi samajhte nahin। usko raamraajya kaha jaata tha। ab nahin hai। tha to sahi na। vahi bhaarat jo poojya tha, woh pujaari bana hai phir poojya zaroor banega। abhi tum purushaartha kar rahe ho। shiv bhagvaanuvaach, shreekrishna ki aatma antim janma mein sun rahi hai, phir krishna banne vaali hai। savere uthkar baba ko yaad karna hai। woh time bahut achha hai। vibration bhi shuddh rehta hai। jaise aatma raat ko thak jaati hai to kehti hai main detach ho jaati hoon। tumhaara bhi yahaan hote hue buddhiyog vahaan laga rahe। amritvele uthkar yaad karne se din mein bhi yaad aayegi। yeh kamaai hai। jitna yaad karenge utna vikarmaajeet banenge, dhaarna hogi। jo pavitra bante hain, yaad mein rehte hain vahi service kar sakenge। direction par chalte hain to baba raazi hote hain। pahle service karni hai, sabko raasta bataana hai। yog ka raasta bataane ke liye bhi gyaan denge na! yog mein rahne se vikarma vinaash honge। saath mein chakra ko bhi phiraana hai। roop basanta banna hai। phir points bhi aati rahengi। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is sadi hui duniya aur sade hue shareer se mamatva nikaal ek baap ko aur ghar ko yaad karna hai। shoodron ke sang se apni sambhaal karni hai।

2) vikarmaajeet banne ke liye amritvele uth yaad mein baithna hai। is shareer se detach hone ka abhyaas karna hai।

vardaan:- puraane sansaar aur sanskaaron ki aakarshan se jeete ji marne vaale yathaartha marjeeva bhav

yathaartha jeete ji marna arthaat sada ke liye puraane sansaar va puraane sanskaaron se sankalp aur svapna mein bhi marna। marna maana parivartan hona। unhein koi bhi aakarshan apni or aakarshit kar nahin sakti। woh kabhi nahin kah sakte ki kya karen, chaahte nahin the lekin ho gaya...kai bachche jeete ji markar phir jinda ho jaate hain। raavan ka ek sir khatma karte to doosra aa jaata, lekin foundation ko hi khatma kar do to roop badal karke maaya vaar nahin karegi।

slogan:- sabse lucky vo hain jo yaad aur seva mein sada busy rehte hain।