गुरुवार 10 मार्च 2022 की दैनिक मुरली

10-03-2022 praatahmurli om shanti "baapdaada"' madhuban

“meethe bachche - bhagwan, jise saari duniya yaad karti hai, woh tumhaare sammukh baitha hai, tum aise baap se poora varsa le lo, bhoolo mat''

prashn:- baap ki shreemat par yathaartha chalne ki shakti kin bachchon mein rehti hai?

uttar:- jo apna sachcha-sachcha potaamel baap ko sunaakar har kadam par baap se raay lete hain। baap se raay li to us par chalne ki shakti bhi mil jaati hai। baap bachchon ko shreemat dete hain - bachche us kamaai ke peechhe yeh kamaai miss nahin karo kyonki woh paai-paise ki saari kamaai khatma hone vaali hai। har baat mein shreemat lete bahut khabardaar raho, sambhalkar chalna hai। apni mat nahin chalaani hai।

geet:- chhod bhi de aakaash sinhaasan…

om shanti। abhi bachche sammukh baithe hain, kiske? behad ke baap aur daada ke। yeh badi wonderful cheez hai। behad ka baap parampita paramatma aur phir behad ka daada prajaapita brahma, donon sammukh baithe hain। kiske? bachchon ke। to yeh jaise eeshvareey kutumba (parivaar) baitha hai aur behad ka baap baith bachchon ko padha rahe hain athva sahaj raajayog sikhla rahe hain। yeh buddhi mein rahe to khushi ka paara bhi chadhe। geet bhi aise kehte hain ki baba aao, is samay bahut duhkh hai। aahvaan karte rehte hain aur yahaan tumhaare sammukh baithe hain। tum jaante ho behad ka baap is daada dvaara hamko padha rahe hain। bachchon mein bhi nambarvaar purushaartha anusaar buddhi mein nishchay hai। bairistari padhte hain to zaroor nishchay hoga na - yeh hamko bairistari padhaate hain! phalaana surgeon hamko surgery sikhla rahe hain। yeh aisi wonderful cheez hai ki abhi-abhi kehte hain hamko pakka nishchay hai, behad ka baap niraakaar hamko padhaate hain, raajayog sikhlaate hain। abhi-abhi kahaan baahar door gaye to nishchay toot padta। wonder hai na! bhagwan jisko saari duniya yaad karti, vahi bachchon ke sammukh baith kehte hain - bachche ab achhi reeti baap se varsa lene ka purushaartha karo। samajhte bhi hain phir second mein bhool jaate hain। tum behad ke baap ke sammukh baithe ho aur shreemat par chalna hota hai kadam-kadam par। lekin chalenge vahi jinka saara samaachaar baap ko maaloom hoga। bachchon ki rahni-karni aadi ka poora samaachaar baap ke paas aana chaahiye। to baap ko bhi maaloom pade aur us reeti phir samay prati samay raay dete rahen। kadam-kadam par shreemat leni pade। yeh hai god fatherly university, ismen achhi reeti padhna hai। aise nahin aaj padha phir kab koi kaam pada to padhaai miss kar di। woh sab kaam hain paai-paise ke। is duniya mein manushya jo bhi kamaai karte hain, woh koi rahne vaali nahin hai। sab khatma ho jaane vaali hai। baap kamaate hain bachchon ke liye। samajhte hain putra potre, par potre khaate rahenge। phir bachcha jab baap banenge to woh apne bachchon ke liye koshish karenge। ab to vinaash saamne khada hai। to baap ko jab bachchon ke potaamel ka maaloom pade tab to mat de। kadam-kadam par poochhna padta hai। aise nahin koi vikarma ho jaae। yeh hai behad ka ghar। baap aise baith samjhaate hain - jaise hoobhu had ke ghar mein laukik baap samjhaate hain। sab bachche jaante hain ham brahman hain। koi se poochho bhagwan tumhaara kya lagta hai? to kahenge woh to sabka baap hai। phir poochho woh kahaan rehte hain? to kah denge sarvavyaapi hai। behad ke baap ko nahin jaante। tum bachche abhi baap ko yathaartha reeti jaante ho to tumhein daivi mat par chalna hai। baap aaye hain devi-devta banaane ke liye। kadam-kadam shreemat par chalna pade। pande log yaatra par le jaate hain to khabardaar karte rehte hain, kehte hain sambhalkar chalo। aise bhi bahut hain jo teertho aadi ko nahin maante hain। teertha maana bhakti। teertha ko na maana goya bhakti ko hi nahin maana। bhakti maarga aadhaakalpa chalta hai। bhagwan ki khoz karte rehte hain। bahut bhaavna rakhte hain। shiv ke aage bahut jaate hain। samajhte hain bhagwan ka deedaar ho jaae, yeh hai bhaavna। phir saakshaatkaar ho jaata hai to bahut khush ho jaate hain। samajhte hain hamko bhagwan mil gaya, krishna mil gaya, hanumaan mil gaya। bas ab to hamaari mukti ho gai। parantu mukti to koi ki hoti nahin।

ab baap achhi reeti baith samjhaate hain meethe bachche ab ek to sabko baap ka parichay do। is samay sab nidhan ke hain, tum bhi nidhan ke the। ab baap dvaara tum sab kuchh samajhte jaate ho। kehte hain na - ham neech paapi hain। bhala aisa neech kisne banaaya? kisko bhi maaloom nahin hai। koi bhi apne ko moorkha nahin samajhte hain। yeh drama anaadi bana hua hai, sabko neeche jaana hi hai, bhrashtaachaari banna hi hai। to yeh khyaal karna chaahiye ki ham bhagwan ki family hain। bhagwan hamaara baap hai to zaroor ham vishwa ke maalik hone chaahiye। phir hamaari aisi durgati kyon hui hai? yeh kiski bhi buddhi nahin chalti hai। ek taraph kehte paramatma sarvavyaapi hai, doosre taraph kehte shanti kaise sthaapan ho! moonjh pade hain। conference karte rehte hain। samjhaane se bhi samajhte nahin hain, unhon ko samajhna hai ant mein। tum bachchon ko yog mein rahkar karmaateet banna hai। tum hi sampoorn nirvikaari the phir banna hai। baaki jo itne dharma hain, woh satayug mein nahin honge। jo satayug mein the vahi bahut samay se alag hue hain। unke liye hi kaha jaata hai sikeeldhe। aatma paramatma alag rahe.... kaun si aatmaayen pahle-pahle paramdham se aai yahaan part bajaane! pahle-pahle aati hain devi-devta dharma ki aatmaayen part bajaane। unhon ko hi apne dharma mein laana hoga। baap kehte hain - unke liye hi aana padta hai। saath mein sabke liye bhi zaroor aana pade kyonki sabko mukti deni hai। ab devta dharma hai nahin। unka hi sapling lagna hai। koi kis dharma mein, koi kis dharma mein chale gaye hain। vahi nikal padte hain। yeh dharma ki sthaapna kitni wonderful hai। tab to kehte hain he prabhu teri shreemat gati sadgati ki badi wonderful hai, jo koi samajh na sake। devi-devta dharma ki sthaapna kaise hoti hai! itna samay jo patit deh-abhimaani ban pade hain, unke liye phir dehi-abhimaani banna - ismen mehnat lagti hai। ghadi-ghadi bhool jaate hain। baba kehte hain, uthte baithte mujhe yaad karo। vikarmo ka bojha tumhaare oopar bahut hai। sukh bhi tumne bahut dekha hai, duhkh bhi tumne bahut dekha hai। ab phir duhkh se tumko sukh mein le ja raha hoon। to shreemat par chalna pade aur phir auron ko bhi yaad dilaate hain। srishti chakra ka raaz samjhaana bada sahaj hai। unko hi trikaaldarshi kaha jaata hai।

baba ne samjhaaya hai - bolo bhagwan ke to tum bachche ho na। bhagwan hai svarga ka rachayita to bhagwan se zaroor svarga ka varsa milna chaahiye। yeh baat tum hi jaante ho aur tum hi poochh sakte ho। kehte hain eeshvar ne paida kiya to tum eeshvar ke vaaris hone chaahiye na! eeshvar baap svarga ka rachayita phir tum narka mein kyon pade ho! yeh to tum jaante ho ham pahle svarga mein the। raavan ne hamko narka mein dhakela hai। raavan kya cheez hai, yeh bhi koi nahin jaante। tum yaad dila sakte ho bhaarat hi praacheen svarga tha aur bhaaratvaasi svarga ke maalik the। ab hi bhaarat narka bana hai। yeh khel bana hua hai। raamraajya aur raavan raajya aadha-aadha hai। yahi khel hai। phir unke beech mein kya hota hai, woh bhi detail baith samjhaate hain। koi-koi bachche nishchaybuddhi hain jo samajhte hain ham baap ke saamne baithe hain। baba trinetri, trikaaldarshi hai, trimoorti hai, brahma vishnu shankar ka bhi rachayita hai। trimoorti shiv ke badle trimoorti brahma ka naam rakh diya hai। ab trimoorti ka rachayita brahma kaise ho sakta? gaate bhi hain brahma dvaara sthaapna, shankar dvaara vinaash to rachayita zaroor koi doosra hoga। itni chhoti baat ko bhi koi samajhte nahin hain। shivbaaba brahma dvaara svarga ka varsa denge aur kya denge! vishnupuri kaun sthaapan karte hain? baap vishnupuri arthaat lakshmi-naaraayan ka raajya sthaapan kar rahe hain, yeh bhi kisko maaloom nahin hai। vishnu ka alag chitra banaae unko nar naaraayan kehte hain aur lakshmi-naaraayan ka phir alag-alag bana diya hai। chitra kaise wonderful bana hua hai।

tum bachchon ko pradarshani mein samjhaana hota hai। pradarshani ho aur bachche apne hi dhandhe mein lage rahen to thode hi samjhenge ki isne baba ko pahchaana hai। baap samajh jaate hain yeh khud hi poora samjha hua nahin hai tab to service par nahin bhaagte hain। nahin to jhat service par bhaagna chaahiye। andhon ki laathi na banen to goya khud hi andhe hain। baba ko jaante nahin। kisko kehna thode hi hota hai ki tum service par jaao। aapehi aana chaahiye baba ham service par ja sakte hain, aap permission do। baba jaante hain kaun-kaun service kar sakte hain। aisa koi likhta nahin hai ki baba ham ready hain। manushya ko kaudi se heere jaisa banaana hai। agar 10-20-50 roopaya nahin kamaaya to kya hua? bahuton ka kalyaan karna hai। parantu poori pahchaan nahin। koton mein koi jaante hain। hamaare paas bhi thode bachche hain serviceable, jinko telegram karke bulaana padta hai। aapehi nahin kehte hain baba ham taiyaar hain। baba dekhte hain - kisko service ka shauk hai। manushya jo jaanvar misal ban pade hain, unko devta banaana hai।

tum bachchon ko nirhankaari banna hai। head mein to badi namrata chaahiye। baap kitna nirhankaari hai, koi-koi bachchon mein bahut ahankaar hai। jaisa karma main karoongi mujhe dekh aur bhi karenge। uska danda, unki avastha gir padegi। baba kehte hain bachche, tumhein sab kuchh apne haath se karna hai। baba kaise saadhaaran reeti se padhaate hain। manushya to samajhte hain - woh sarvashaktimaan hai, kya nahin kar sakte hain! parantu baba kehte hain mujhe to servant bankar aana padta hai। kehte bhi hain he gyaan ke saagar, patit-paavan aao। sukh ke saagar aao, aakar ham patiton ko paavan banaao। baap ko aakar aisi service karni padti hai। kahaan aakar rehna padta hai! kaise-kaise vighna padte hain। laakha bhavan ko aag lagaate the, sabhi practical mein ho raha hai। baba to saare part ko jaante hain, ham nahin jaante। baap kehte hain mujhe aana padta hai। bhagwan khud kehte hain mujhe gaali khaani padti hai। sabse jaasti gaali main hi khaata hoon। bhakti maarga mein bhi gaali hi dete hain। 3 pair prithvi ke bhi nahin milte। phir bhi kitna nirhankaareepne se part baja rahe hain। mama baba bachchon ko sikhlaane ke liye sab kuchh karte hain। kitna neeche utarna padta hai। patiton ko paavan banaana hai। moot paleeti kapdon ko dhona hai to dhobi bhi hai, sonaar bhi hai। sabko gala-gala kar sachcha sona banaate hain। achha !

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap samaan nirhankaari, namrachit banna hai। apni seva apne haath se karni hai। kisi bhi baat mein ahankaar nahin dikhaana hai।

2) service ke liye sada taiyaar rehna hai। service ke liye svayan ko aapehi offer karna hai। kaudi jaise manushyon ko heere jaisa banaane ki seva karni hai।

vardaan:- sampannata ke aadhaar par santushtata ka anubhav karne vaale sada tripta aatma bhav

jo sada bharpoor va sampanna rehte hain, ve tripta hote hain। chaahe koi kitna bhi asantushta karne ki paristhitiyaan unke aage laaye lekin sampanna, tripta aatma asantushta karne vaale ko bhi santushtata ka gun sahayog ke roop mein degi। aisi aatma hi merciful ban shubh bhaavna aur shubh kaamna dvaara unko bhi parivartan karne ka prayatna karegi। roohaani royal aatma ka yahi shreshtha karma hai।

slogan:- yaad aur seva ka double lock lagaao to maaya aa nahin sakti।