रविवार 13 मार्च 2022 की दैनिक मुरली

13-03-22 praatahmurli om shanti ''avyakt-baapdaada'' revise 20-01-90 madhuban

brahma baap ke vishesh paanch kadam

aaj vishwa snehi baap apne vishesh ati snehi aur sameep bachchon ko dekh rahe hain। snehi sabhi bachche hain lekin ati snehi va sameep bachche vahi hain jo har kadam mein follow karne vaale hain। niraakaar baap ne saakaari bachchon ko saakaar roop mein follow karne ke liye saakaar brahma baap ko bachchon ke aage nimitta rakha jis aadi aatma ne drama mein 84 janmon ke aadi se ant tak anubhav kiye, saakaar roop mein maadhyam ban bachchon ke aage sahaj karne ke liye example banen kyonki shaktishaali example ko dekh follow karna sahaj hota hai। to snehi bachchon ke liye sneh ki nishaani baap ne brahma baap ko rakha aur sarva bachchon ko yahi shreshtha shreemat di ki har kadam mein follow father। sabhi apne ko follow father karne vaale sameep aatmaayen samajhte ho? follow karna sahaj lagta ya mushkil lagta hai? brahma baap ke vishesh kadam kya dekhe?

1- sabse pahla kadam - sarvansha tyaagi। na sirf tan se aur laukik sambandh se lekin sabse bada tyaag, pahla tyaag man-buddhi se samarpan arthaat man-buddhi mein har samay baap aur shreemat ki har karma mein smriti rahi। sada svayan ko nimitta samajh har karma mein nyaare aur pyaare rahe। deh ke sambadh se, main-pan ka tyaag। jab man-buddhi ki baap ke aage samarpanta ho jaati hai to deh ke sambandh svatah hi tyaag ho jaate hain। to pahla kadam - sarvansha tyaagi।

2- doosra kadam - sada aagyaakaari rahe। har samay har ek baat mein - chaahe sva-purushaartha mein, chaahe yagya-paalna mein nimitta bane kyonki ek hi brahma vishesh aatma hai jiska drama mein vichitra part noondha hua hai। ek hi aatma maata bhi hai, pita bhi hai। yagya-paalna ke nimitta hote hue bhi sada aagyaakaari rahe। sthaapna ka kaarya vishaal hote hue bhi kisi bhi aagya ka ulanghan nahin kiya। har samay “ji haajir'' ka pratyaksha swaroop sahaj roop mein dekha।

3- teesra kadam - har sankalp mein bhi vaphaadaar। jaise pativrata naari ek pati ke bina aur kisi ko svapna mein bhi yaad nahin kar sakti, aise har samay ek baap doosra na koi - yeh vaphaadaari ka pratyaksha swaroop dekha। vishaal nai sthaapna ki jimmevaari ke nimitta hote bhi vaphaadaari ke bal se, ek bal ek bharose ke pratyaksha karma mein har paristhiti ko sahaj paar kiya aur karaaya।

4- chautha kadam - vishwa-sevaadhaari। seva ki visheshta- ek taraph ati nirmaan, world servant; doosre taraph gyaan ki authority। jitna hi nirmaan utna hi beparvaah baadshaah। satyata ki nirbhayta - yahi seva ki visheshta hai। kitna bhi sambandhiyon ne, raajnetaaon ne, dharma-netaaon ne naye gyaan ke kaaran opposition kiya lekin satyata aur nirbhayta ki position se jara bhi hila na sake। isko kehte hain nirmaan aur authority ka balance। iski result aap sabhi dekh rahe ho। gaali dene vaale bhi man se aage jhuk rahe hain। seva ki saphalta ka vishesh aadhaar nirmaan-bhaav, nimitta-bhaav, behad ka bhaav। isi vidhi se hi siddhisvarup bane।

5- paanchava kadam - karmabandhan mukta, karma-sambandh mukta arthaat shareer ke bandhan se mukta pharishta, arthaat karmaateet। second mein nashtomoha smriti swaroop sameep aur samaan।

to aaj vishesh sankshep mein paanch kadam sunaaye। vistaar to bahut hai lekin saar roop mein in paanch kadmon ke oopar kadam uthaane vaale ko hi follow father kaha jaata hai। abhi apne se poochho - kitne kadmon mein follow kiya hai? samarpit hue ho ya sarvansha sahit samarpit hue ho? sarva-vansh arthaat sankalp, svabhaav aur sanskaar, nature mein bhi baap samaan hon। agar ab tak bhi chalte-chalte samajhte ho aur kehte ho - mera svabhaav aisa hai, meri nature aisi hai va na chaahte bhi sankalp chal jaate hain, bol nikal padte hain - to isko sarvansha tyaagi nahin kahenge। apne ko samarpit kahlaate ho lekin sarvansa samarpan - ismen mera-tera ho jaata hai। jo baap ka svabhaav, sva ka bhaav arthaat aatmik bhaav। sanskaar sada baap samaan sneh, raham, udaardil ka, jisko badi dil kehte ho। chhoti dil arthaat had ka apnaapan dekhna - chaahe apne prati, chaahe apne seva-sthaanon ke prati, apne seva ke saathiyon ke prati। aur badi dil - sarva apna-pan anubhav ho। badi dil mein sada har prakaar ke kaarya - chaahe tan ke, chaahe man, chaahe dhan ke, chaahe sambandh mein saphalta ki barakkat hoti hai। barakkat arthaat jyaada phaayda hota hai aur chhoti dil vaale ko mehnat jyaada, saphalta kam hoti hai। pahle bhi sunaaya tha ki chhoti dil vaalon ke bhandaare aur bhandaara - sada barakkat ki nahin hoti। seva-saathi dilaase bahut denge - aap ye karo ham karenge lekin samay par circumstance sunaane shuru kar denge। isko kehte hain badi dil to bada saaheb raazi। raazayukta par saaheb sada raazi rehta hai। teachers sabhi badi dil vaali ho na! behad ke bade te bade kaarya arth hi nimitta ho। yeh to nahin kehte ho na - ham phalaane area ke kalyaankaari hain ya phalaane desh ke kalyaankaari hain? vishwa-kalyaankaari ho na। itne bade kaarya ke liye dil bhi badi chaahiye na? badi arthaat behad va teachers kahengi ki hamko to haden banaakar di gai hain? haden bhi kyon banaai gai hain, kaaran? chhoti dil। kitna bhi area banaakar den lekin aap sada behad ka bhaav rakho, dil mein had nahin rakho। sthaan ki had ka prabhaav dil par nahin hona chaahiye। agar dil mein had ka prabhaav hai to behad ka baap had ki dil mein nahin rah sakta। bada baba hai to dil badi chaahiye na। kabhi brahma baap ne madhuban mein rehte yeh sankalp kiya ki mera to sirf madhuban hai, baaki panjaab, yu.pi., karnaatak aadi bachchon ka hai? brahma baap se to sabko pyaar hai na। pyaar ka arth hai follow karna।

sabhi teachers follow father karne vaali ho ya mera centre, mere jigyaasu, meri madogri aur student bhi samajhte - meri teacher yeh hai? follow father arthaat mere ko tere mein samaana, had ko behad mein samaana। abhi is kadam par kadam rakhne ki aavashyakta hai। sabke sankalp, bol, seva ki vidhi behad ki anubhav ho। kehte ho na - abhi kya karna hai is varsha। to sva-parivartan ke liye had ko sarva vansh sahit samaapta karo। jisko bhi dekho va jo bhi aapko dekhe - behad ke baadshaah ka nasha anubhav ho। had ki dil vaale behad ke baadshaah ban nahin sakte। aise nahin samajhna ki jitne centres kholte va jitni jyaada seva karte ho itna bada raaja banenge। is par svarga ki prize nahin milni hai। seva bhi ho, centres bhi hon lekin had ka naam-nishaan na ho। usko nambarvaar vishwa ke raajya ka takhta praapta hoga isliye abhi-abhi thode samay ke liye apni dil khush karke nahin baithna, behad ki khushbu vaala baap samaan aur sameep ab bhi hai aur 21 janma bhi brahma baap ke sameep hoga। to aisi prize chaahiye ya abhi ki? bahut centres hain, bahut jigyaasu hain… is bahut-bahut mein nahin jaana। badi dil ko apnaao। suna, is varsha kya karna hai? is varsha svapna mein bhi kiske had ka sanskaar utpanna na ho। himmat hai na? ek-do ko follow nahin karna, baap ko follow karna।

doosri baat - baapdaada ne vaani ke oopar bhi vishesh attention dilaaya tha। is varsha apne bol ke oopar vishesh double attention। sabhi ko bol ke liye direction bheja gaya hai। is par prize milni hai। sachchaai-saphaai se apna chart svayan hi rakhna। sachche baap ke bachche ho na। baapdaada sabhi ko direction dete hain - jahaan dekhte ho seva sthiti ko dagmag karti hai, use seva mein koi saphalta mil nahin sakti। seva bhale kam karo lekin sthiti ko kam nahin karo। jo seva sthiti ko neeche le aati hai usko seva kaise kahenge! isliye baapdaada sabhi ko phir se yahi kahenge ki sada sva-sthiti aur seva arthaat sva-seva aur auron ki seva saath-saath sada karo। sva-seva ko chhod par seva karna, isse saphalta nahin praapta hoti। himmat rakho - sva seva aur par-seva ki। sarvashaktivaan baap madad-gaar hai isliye himmat se donon ka balance rakh aage badho। kamjor nahin bano। anek baar ke nimitta bane hue vijayi aatma hain। aisi vijayi aatmaon ke liye koi mushkil nahin, koi mehnat nahin। attention aur abhyaas - yeh bhi sahaj aur svatah anubhav karenge। attention ka bhi tension nahin rakhna। koi-koi attention ko tension mein badal lete hain। brahman-aatmaon ka nizi sanskaar “attention aur abhyaas'' hai। achha!

baaki rahi vishwa kalyaan ke seva ki baat। to is varsha har ek sevaakendra jitne bhi sandesh va samparka vaale hain, unhon ko nimantran dekar yathaashakti sneh-milan karo। chaahe vargeekran ke hisaab se karo va mila hua karo lekin un aatmaon ki taraph vishesh attention do। personal milo। sirf post bhej dete ho to usse bhi result kam nikalti hai। apne hi aane vaale students ke group banaao aur unhon mein se thode logon ko personal sameep aane ke nimitta banaao। to sab students bhi busy honge aur seva ki selection bhi ho jaayegi, jisko aap log kehte ho- peeth nahin hoti। aisi aatmaon ko bhi koi nai baat sunaane ki chaahiye। abhi tak to better world kya hogi। uske visions ikatthe kiye hain। ab phir unhon ko apni taraph attention dilaao। uski vishesh topic rakho “self progress'' aur “self progress ka aadhaar''। yeh nai vishay rakho। is sva - progress ke liye spiritual budget banaao aur budget mein sadaiv bachat ki scheme banaai jaati hai। to spiritual bachat ka khaata kya hai! samay, bol, sankalp aur energy ko vesta se best mein change karna hoga। sabhi ko ab sva taraph attention dilaao। bachchon ne topic nikaali thi “for self transformation''। lekin is varsha harek sevaakendra ko freedom hai, jitni jo kar sakte, apni svaunnati ke saath-saath pahle svayan ke bachat ki budget banaao aur seva mein auron ko is baat ka anubhav karaao। agar koi bade programmes rakh sakte ho to rakho, agar nahin kar sakte to bhale chhote programmes karo। lekin vishesh attention sva-seva aur par-seva ka balance va vishwa seva ka balance ho। aise nahin ki seva mein aise busy ho jaao jo sva-unnati ka samay nahin mile। to yeh svatantra varsha hai seva ke liye। jitna chaaho utna karo। donon plan smriti mein rakh aur bhi addition kar sakte ho aur plan mein ratna jad sakte ho। baap sadaiv bachchon ko aage rakhta hai। achha!

chaaron or ke sarva follow father karne vaali shreshtha aatmaayen, sada double seva ka balance rakhne vaale baap ki blessing ke adhikaari aatmaon ko, sada behad ke baadshaah - aise raajayogi, sahajyogi, svatah yogi, sada anek baar ke vijay ke nishchay aur nashe mein rahne vaale ati sahayogi snehi bachchon ko baapdaada ka yaad-pyaar aur namaste।

avyakt baapdaada se personal mulaakaat:- main har kalpa ki poojya aatma hoon- aisa anubhav karte ho? anek baar poojya bane aur phir se poojya ban rahe hain! poojya aatmaayen kyon bante ho? kyonki jo svany svamaan mein rehte hain unko svatah hi auron dvaara maan milta hai। svamaan ko jaante ho? kitna oonch svamaan hai? kitne bhi bade svamaan vaale hon lekin woh aapke aage kuchh bhi nahin hai kyonki unka svamaan had ka hai aur aapka aatmik svamaan hai। aatma avinaashi hai to svamaan bhi avinaashi hai। unko hai deh ka maan। deh vinaashi hai to svamaan bhi vinaashi hai। kabhi koi president bana ya minister bana lekin shareer jaayega to svamaan bhi jaayega। phir president honge kya? aur aapka svamaan kya hai? shreshtha aatma ho, poojya aatma ho। aatma ki smriti mein rehte ho, isliye avinaashi svamaan hai। aap vinaashi svamaan ki taraph aakarshit nahin ho sakte। avinaashi svamaan vaale poojya aatma bante hain। abhi tak apni pooja dekh rahe ho। jab apne poojya swaroop ko dekhte ho to smriti aati hai na ki yeh hamaare hi roop hai। chaahe bhakton ne apni-apni bhaavna se roop de diya hai lekin ho to aap hi poojya aatmaayen। jitna hi svamaan utna hi phir nirmaan। svamaan ka abhimaan nahin hai। aise nahin - ham to oonch ban gaye, doosre chhote hain ya unke prati ghrina bhaav ho, yeh nahin hona chaahiye। kaisi bhi aatmaayen hon lekin raham ki drishti se dekhenge, abhimaan ki drishti se nahin। na abhimaan, na apmaan। abhi brahman-jeevan ki yeh chaal nahin hai। to drishti badal gai hai na! ab jeevan hi badal gai to drishti to svatah hi badal gai na! srishti bhi badal gai। abhi aapki srishti kaunsi hai! aapki srishti va sansaar baap hi hai। baap mein parivaar to aa hi jaata hai। abhi kisi ko bhi dekhenge to aatmik drishti se, oonchi drishti se dekhenge। abhi shareer ki taraph drishti ja nahin sakti kyonki drishti va naynon mein sada baap samaaya hua hai। jiske naynon mein baap hai woh deh ke bhaan mein kaise jaayenge? baap samaaya hua hai ya sama raha hai? baap samaaya hai to aur koi sama nahin sakta। vaise bhi dekho to aankh ki kamaal hai hi bindu se। yeh saara dekhna-karna kaun karta hai? shareer ke hisaab se bhi bindi hi hai na। chhoti-si bindi kamaal karti hai। to deh ke naate se bhi chhoti-si bindi kamaal karti hai aur aatmik naate se baap bindu samaaya hua hai, isliye aur koi sama nahin sakta। aise samajhte ho? jab poojya aatmaayen ban gaye to poojya aatmaon ke nayan sada nirmal dikhaate hain। abhimaan ya apmaan ke nayan nahin dikhaate। koi bhi devi va devta ke nayan nirmal va roohaani honge। to yeh nayan kiske hain? kabhi kisi ke prati koi sankalp bhi aaye to yaad rakho ki main kaun hoon। mere jad-chitra bhi roohaani nayandhaari hain to main to chaitanya kaise hoon? log abhi tak bhi aapki mahima mein kehte hain - sarvagun sampanna, sampoorn nirvikaari। to aap kaun ho? sampoorn nirvikaari ho na! anshamaatra bhi koi vikaar na ho। sadaiv yeh smriti rakho ki mere bhakta mujhe is roop se yaad kar rahe hain। check karo - jad chitra aur chaitanya-charitra mein antar to nahin hai? charitra se chitra bane hain। sangam par practical charitra dikhaaya hai tab chitra bane hain। achha!

vardaan:- sarva shaktiyon ki sampannata dvaara vishwa ke vighnon ko samaapta karne vaale vighna-vinaashak bhav

jo sarva shaktiyon se sampanna hai vahi vighna-vinaashak ban sakta hai। vighna-vinaashak ke aage koi bhi vighna aa nahin sakta। lekin yadi koi bhi shakti ki kami hogi to vighna-vinaashak ban nahin sakte isliye check karo ki sarva shaktiyon ka stock bharpoor hai? isi smriti va nashe mein raho ki sarva shaktiyaan mera varsa hain, main master sarvashaktivaan hoon to koi vighna thahar nahin sakta।

slogan:- jo sada shubh sankalpon ki rachna karte hain vahi double light rehte hain।