मंगलवार 22 मार्च 2022 की दैनिक मुरली

22-03-2022 praatahmurli om shanti "baapdaada"' madhuban

“meethe bachche - agar baap se milan manaana hai, paavan banna hai to sachche-sachche roohaani aashik bano, ek baap ke sivaae kisi ko bhi yaad na karo''

prashn:- brahman jo devta bante hain, un braahmanon ka pad devtaaon se bhi ooncha hai, kaise?

uttar:- brahman is samay sachche-sachche roohaani social worker hain। manushyon ki rooh ko pavitrata, yog ka injection lagaate hain। bhaarat ke doobe hue bede ko shreemat par paar lagaate hain। narkavaasi bhaarat ko svargavaasi banaate hain। aisi seva devtaayen nahin karenge। woh to is samay ke seva ki praalabdha bhogte hain, isliye brahman devtaaon se bhi oonch hain।

geet:- hamaare teertha nyaare hain…

om shanti। bachchon ne geet suna। ham jo jeev aatmaayen hain। aatma aur shareer, aatma ko aatma aur shareer ko jeev kaha jaata hai। aatmaayen aati hain - paramdham se। yahaan aakar shareer dhaaran karti hain। yeh karmakshetra hai jahaan ham aakar part bajaate hain। baap kehte hain mujhe bhi part bajaana hai। main to patiton ko paavan banaane aaya hoon। is samay is patit duniya mein ek bhi paavan nahin hain। paavan duniya mein phir ek bhi patit nahin rahega। satayug treta paavan, dvaapar kaliyug patit। patit-paavan baap hi aakar sabko shiksha dete hain he aatmaayen tumne is shareer ke saath 84 janmon ka part poora kiya। usmein aadha samay sukh, aadha samay duhkh paaya। duhkh bhi dheere-dheere shuru hota hai। abhi bahut duhkh hai। ajun bahut aapdaayen aane vaali hain। is samay sab bhrashtaachaari hain। koi ka bhi yog baap ke saath nahin hai। aatma apne ko bhool gai hai। ab baap baith samjhaate hain jaise aashik maashook hote hain na! jaise dekho bachchi aur bachcha hai, ek do ko bilkul jaante bhi nahin hain। donon ki sagaai hone se phir aashik maashook ban jaate hain। woh sagaai hoti hai vikaar ke liye। vikaari patit aashik maashook kahenge। doosre aashik maashook hote hain jo sirf chehre par aashik hote hain laila majnu aadi ek do ki shakla dekhte rehte hain। woh vikaar mein nahin jaate। kaam karte-karte maashook saamne khada ho jaayega। jaise meera ke saamne krishna khada ho jaata tha। abhi yeh hai parampita paramatma maashook, jiski ham sab aatmaayen aashik bani hain। sab unko yaad karte hain। aashik bahut hain - maashook ek hai sabhi ka। sabhi manushya maatra us ek ke aashik hain। bhakti karte hain bhagwan se milne ke liye। bhagat hote hain aashik, bhagwan hua maashook। ab milan kaise ho? to sabka jo maashook paramatma hai woh aate hain। ab aaye hain aur kehte hain agar tum bachchon ko mere se milna hai to nirantar mujh ek ko yaad karo। mere saath yog lagaakar mere hi aashik bano। is raavanraajya mein duhkh hi duhkh hai। abhi inka vinaash hona hai। main aaya hoon tumko paavan banaane। tumhaara yeh antim janma hai, isliye yaad karo to tumhaare vikarma vinaash honge। dharmaraaj ke dandon se bhi chhoot jaayenge। woh niraakaar baap kehte hain mere laadle bachche, abhi kayaamat ka samay hai, sir par paapon ka bojha hai। abhi punya aatma banna hai। yog se hi vikarma vinaash honge aur punya aatma ban jaayenge। baap kehte hain 63 janma tum raavanraajya mein paap aatma the। abhi tumko paapaatma se punyaatma banaate hain। devtaayen punya aatma hain। paap aatmaayen hi punya aatmaon ka poojan karte hain। abhi yeh hai antim janma, marna to sabko hai to kyon na varsa le leven! kyon na punya aatma banen! sabse bada paap hai vikaar mein jaana। vikaari ko patit, nirvikaari ko paavan kaha jaata hai। sannyaasi bhi patit the tab to paavan hone ke liye gharbaar chhodte hain। phir jab paavan bante hain to sab unko maatha jhukaate hain। pahle jab patit the to koi jhukte nahin the। yahaan to maatha aadi tekne ki baat nahin। baap bachchon ko shreemat dete hain apne ko aatma samjho, ham yahaan aaye hain part bajaane phir baap ke paas jaana hai। abhi jismaani teertha yaatraayen sab banda honi hain। tumko vaapis ghar shantidham jaana hai। jab yaatra par jaate hain to yaatra ke samay pavitra rehte hain। phir ghar mein aakar patit bante hain। woh hui alpakaal ke liye jismaani yaatra। abhi tumko roohaani yaatra sikhlaate hain। baap kehte hain - meri shreemat par chalne se tum aadhaakalpa apvitra nahin banenge। satayug mein raadhe krishna ki sagaai koi patit hone ke liye thode hi hoti hai। vahaan to paavan hain। yogbal se bachche paida hote hain। jaise yogbal se tum vishwa ke maalik bante ho। vahaan bachche kabhi shaitaani nahin karte kyonki vahaan maaya hoti nahin। bachche achhe karma hi karenge। woh karma-akarma ho jaayenge। yahaan raavanraajya mein tumhaara karma vikarma ban jaata hai। yeh khel bana hua hai। tum sab kumaar kumaariyaan aapas mein bhaai behen ho। shivbaaba ke potre ho gaye। varsa daade se milta hai - svarga ki baadshaahi ka। ab baap aakar mel female donon ka yog apne saath lagaate hain। kehte hain grihastha vyavhaar mein rahkar pavitra bano। yeh bahaaduri dikhaao। ikatthe rehte kaam agni na lage. aise rahkar dikhaaya to bahut oonch pad paayenge। bheeshma pitaamah jaisa brahmachaari banna hai, mehnat hai। log samajhte hain yeh bahut mushkil hai। parantu yeh yukti to baap hi sikhlaate hain।

shiv bhagvaanuvaach - krishna koi bhagwan nahin hai। vo to daiveegun vaala manushya hai। brahma-vishnu-shankar bhi sookshm vatan-vaasi hain। brahma ka pad vishnu se ooncha hai। jaise braahmanon ka pad devtaaon se bhi ooncha hai kyonki is samay tum roohaani social worker ho। manushya ki rooh ko pavitrata, yog ka injection lagaate ho। tum hi is bhaarat ko svarga banaate ho, isliye banaane vaalon ki mahima jaasti hai। bhal tum hi devta bante ho parantu is samay tum brahman ban seva karte ho, devta roop mein seva nahin karenge। vahaan to tum raajya karenge। tumhaari seva hai narkavaasi bhaarat ko svargavaasi banaana, isliye vande maatram kehte hain। shiv shakti sena। mama ki sher par savaari dikhaate hain, parantu aise hai nahin। tum sherniyaan ho kyonki tum 5 vikaaron par jeet paate ho। bhaarat ko svarga banaate ho। yeh oonch seva hui na isliye shaktiyon ke mandir bahut hain। mukhya hai ek। shakti dene vaala hai shivbaaba। mahima saari unki hai। phir jo jo madadgaar hain unhon ka bhi naam hai। males paandavon ko bhi mahaarthi kaha jaata hai। mel female donon chaahiye। pravritti maarga hai na। kabhi bhi koi vikaari guru nahin karna chaahiye। grihasthi ko guru karna to koi phaayda hi nahin hai। grihasthi athva patit mila patit ko, woh kabhi bhi paavan bana na sake। sannyaasiyon ke followers apne ko kahlaate hain parantu khud sannyaasi nahin bane to yeh bhi jhooth hua। aajkal to thagi bahut hai। grihasthi guru bankar baith jaate hain, pavitrata ki baat uthaate nahin। yahaan to baap kehte hain pavitra bano to bachcha kahlaao। paavan banne bigar to raajaai nahin milegi। to baap se yog zaroor lagaana hai। phir jo jisko maanne vaale hain, samjho koi gurunaanak ko maanne vaala hoga to us gharaane mein jaayega। svarga mein woh aayenge jo is samay shiksha lekar pavitra bante hain। guroonaanak ko koi devta nahin kahenge। devta hote hain satayug mein। vahaan sukh bahut hai, aur dharma vaalon ko svarga ke sukh ka maaloom nahin। svarga mein hote hi hain bhaaratvaasi। baaki to baad mein aate hain। jo jo devta banne honge vahi banenge। is samay poojte hain devtaaon ko, lakshmi-naaraayan ko aur apna dharma hindu kah dete hain, kyonki patit ban gaye hain to apne pavitra dharma ko bhool hindu kahlaate hain। are tum devi-devta dharma ke ho phir apne ko hindu kyon kahlaate ho! hindu koi dharma nahin hai, parantu gir pade hain। devtaayen to bahut thode hote hain, jo aakar yahaan shiksha lete hain - vahi manushya se devta bante hain। thodi shiksha lenge to saadhaaran praja mein aayenge। baap ka banne se vijay maala mein aayenge। ab to roohaani aashik maashook banna hai। satayug mein jismaani banenge, kaliyug mein bhi jismaani। ab sangamayug par roohaani aashik banna hai ek maashook ka।

baap kehte hain mujhe yaad karte raho। vikaar mein jaane se sau guna danda pad jaayega, gir jaate hain to likhna chaahiye ki baba hamne kaala munh kar diya। baap kehte hain bachche ab tumko gora banna hai। krishna ko shyaam-sundar kehte hain, unki aatma is samay kaali ho gai hai। phir gyaan chita par baith gori ban jaayegi। 21 janma ke liye sundar ban jaayegi phir shyaam banegi। yeh shyaam aur sundar ka khel bana hua hai। shyaam se sundar banne mein ek second, sundar se shyaam banne mein aadhaakalpa lag jaata hai। aadhaakalpa shyaam to aadhaakalpa sundar। ek musaaphir hai shiv-baba baaki sab sajniyaan ho gai kaali। haseen (sundar) banaane ke liye tumko yog sikhlaate hain। satayug mein first-class natural beauty rehti hai kyonki 5 tatva satopradhaan hone se shareer bhi sundar bante hain। yahaan to artificial beauty hai। pavitrata to bahut achhi hai। baba ke paas bahut aate hain, pavitrata ki pratigya karte hain parantu koi fail ho jaate hain, koi paas ho jaate hain। yeh hai eeshvareey mission। doobe hue bhaarat ko salvage karna। bhaarat ka beda raavan ne duboya, raam aakar paar karte hain। tumhaari buddhi mein hai ki ham svarga mein jaakar heere javaahron ke mahal banaayenge। yeh shareer chhod prince princess banenge। jo bachche honge unhon ke hi aise khyaalaat chalenge। yeh hai eeshvareey darbaar athva eeshvareey family। gaate hain tum maat pita.. ham baalak tere, to family ho gai na! eeshvar hai daada, brahma hai baba। tum ho bhaai behen। svarga ka varsa tum daade se lete ho, phir tum ganvaate ho phir baba dene aate hain। tum practical mein baap ke bane ho varsa lene ke liye। brahma ke bachche shiv ke potre ho practical mein। to inko eeshvareey darbaar bhi kehte hain, eeshvareey kutumba bhi kah sakte hain। achha!

meethe meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan chita par baith sampoorn paavan (gora) banna hai। pavitrata hi number one beauty hai, is beauty ko dhaaran kar baap ka bachcha kahlaane ka hakdaar banna hai।

2) is kayaamat ke samay mein sir par jo paapon ka bojha hai, use ek baap ki yaad se utaarna hai। punya aatma banne ke liye shreshtha karma karna hai।

vardaan:- combined swaroop ki smriti dvaara combined seva karne vaale saphalta moorta bhav

jaise shareer aur aatma combined hai, bhavishya vishnu swaroop combined hai, aise baap aur ham aatma combined hain is swaroop ki smriti mein rahkar sva seva aur sarva aatmaon ki seva saath-saath karo to saphalta moorta ban jaayenge। aise kabhi nahin kaho ki seva mein bahut busy the isliye sva ki sthiti ka chart dheela ho gaya। aise nahin jaao seva karne aur lauto to kaho maaya aa gai, mood aaph ho gaya, disturb ho gaye। seva mein vriddhi ka saadhan hi hai sva aur sarva ki seva combined ho।

slogan:- had ke ichchhaaon ki avidya hona hi mahaan sampattivaan banna hai।

maateshvari ji ke anmol mahaavaakya - niraakaari duniya aur saakaari duniya ka vistaar

svayan paramatma dvaara ham jaan chuke hain ki ek hai niraakaari duniya, doosri hai saakaari duniya। ab niraakaari duniya ko kehte hain brahmaanda arthaat akhanda jyoti mahtatva, jo ham aatmaon ka aur parampita paramatma ka nivaas sthaan hai। us niraakaar duniya se hi paramatma ham aatmaon ko part bajaane ke liye saakaar srishti mein bhejte hain। jaise brahmaanda mein aatmaon ka vriksha hai, vaise saakaar srishti mein aatmaon ka shareer sahit vriksha hai। jaise jad jhaad ka misaal dete hain, kaise jhaad ki jaden neeche rehti hain, vaise manushya srishti ko bhi ulta jhaad kehte hain kyonki manushya srishti ke jhaad ki jaden phir oopar niraakaari duniya mein hain। vahaan bhi har ek dharma ka section alag-alag hai, us duniya mein koi soorya chaand ka prakaash nahin hai, balki vo duniya to svayan akhanda jyoti tatva hai jo bilkul sthool tatvon se ati sookshm hai। jaise saakaar srishti paanch tatvon ki bani hui hai aakaash, vaayu, agni, jal aur prithvi, usmein bhi prithvi hai sthool tatva, usse sookshm hai jal, unse sookshm tatva hai agni, unse phir sookshm hai vaayu, phir hai aakaash tatva। ab in paanch tatvon se bhi ati sookshm yeh akhanda jyoti mahtatva hai, jo is sthool srishti se us paar niraakaar duniya hai, jahaan phir ham aatmaayen ande misal (jyoti bindu roop mein) apne parampita paramatma ke saath rehte hain to brahmaanda se alag hai yeh saakaar srishti।