बुधवार 23 मार्च 2022 की दैनिक मुरली

23-03-2022 praatahmurli om shanti "baapdaada"' madhuban

“meethe bachche - koi bhi karma, vikarma na bane iski poori sambhaal karni hai, kadam-kadam par baap ki shreemat lekar karma mein aana hai''

prashn:- vikarmo se kaun bach sakte hain? baap ki sahaayta kinhen milti hai?

uttar:- jo baap se sada sachche rehte, pratigya kar vikaaron ka daan dekar vaapis lene ka sankalp nahin karte, woh vikarmo se bach jaate hain। baap ki sahaayta unhein milti jo karma, vikarma banne ke pahle raay lete hain। saakaar ko apna sachcha-sachcha samaachaar bataate hain। baba kehte bachche, surgeon ke aage kabhi apni beemaari chhipaana nahin। paapon ko chhipaayenge to vriddhi hoti rahegi, pad bhi bhrashta ho jaayega, sajaayen bhi khaani padengi।

geet:- bachpan ke din bhula na dena…

om shanti। bachchon ne geet suna ki baap bachchon ko saavdhaani dete hain ki he bachche, tum aakar eeshvar ke bane ho aur jaante ho ham eeshvar ki santaan hain। saari duniya maanti hai ki woh god father hai। father maana ham unki santaan thahre। parampita to bachche hi kahenge। tum laukik ke bachche to ho। ab paarlaukik baap ke bane ho। kislie? behad ke baap se behad sukh ka varsa lene ke liye। baap hai hi svarga ka rachayita, svarga mein zaroor devtaaon ki baadshaahi hai। yeh jaankar tum bachche bane ho। raaja ko agar bachcha nahin hota to god mein lete hain। god lete hain saahookaar ki, kabhi gareeb ki god nahin lenge। kuchh laabh hoga tab hi god lenge। tum bhi abhi jaante ho ham eeshvar ke bane hain, usse svarga ki baadshaahi milegi। ab aise baap ko kabhi bhoolna nahin chaahiye, unki mat par chalna chaahiye। raavan ki mat par to vikarma karte rahenge। in 5 vikaaron ke vash nahin hona hai। kahaan bhi dekho dhokha khaata hoon to jhat baba se mat lena। karma-vikarma banaane ke pahle poochhna chaahiye to baba ham yeh kar sakte hain! to samjhaaya jaata hai ki kabhi deh-abhimaan mein nahin aana। apne ko aatma samajh parampita paramatma ki mat par chalte rehna, kadam-kadam। kabhi koi baat samajh mein na aaye to poochhna ki baba main phalaane par phida hua hoon। mere ko kaam ke bhoot ne ghera hai। toofaan to bahut aayenge, parantu apne ko sambhaalna hai। gutter mein gira to goya behad ke baap ko bhool kaala munh kar diya। baba tumko gora banaane aaye hain isliye 5 vikaaron ke phande mein kabhi nahin phansana। phansenge tab jab deh-abhimaan mein aayenge। dehi-abhimaani hoga to baba ka dar rahega। vikaar mein jaane se to bada vikarma ban jaayega kyonki tumne vikaaron ka daan diya hai। agar daan dekar vaapis liya to haal vahi hoga jaise harishchandra ka misaal hai। yahaan paise ki to koi baat nahin। yahaan to hai 5 vikaaron ka daan। tumhaare paas jo kaante hain woh daan mein de do phir kabhi kaam mein nahin laana। agar vaapis lena ho to itlaav karna। na bataane se paap vriddhi ko paata jaayega। phir-phir vikaar mein jaate rahenge। batlaane se sahaayta milegi। ham shivbaaba ke bachche hain। baap se pratigya ki hai, kabhi haar nahin khaayenge। yeh hai 5 vikaaron roopi dushman ko jeetne ki boxing। usmein kabhi haraayenge nahin। agar gira to shiv-baba to jhat jaan jaayega। phir hukm mila hua hai saakaar ko likhna, nahin likhenge to vikarma badhta jaayega aur sau guna saza khaani padegi। baba ko bataane se aadha kat ho jaayega। aise bahut bachche hain jo lajja ke maare samaachaar dete nahin hain। jaise koi gandi beemaari hoti hai to surgeon ko bataane mein dil khaati hai। to surgeon kya kahenge? phir nateeja kya nikalta hai? beemaari badhti jaati hai। baap samjhaate hain bachche koi bhi paap ho to chhipaana nahin। nahin to bilkul pad bhrashta ho jaayega aur kalpa-kalpaantar aisa hi pad bhrashta milega, phir gyaan to le nahin sakenge। poochhte hain baba unki gati kya hogi? woh bahut saza khaayenge। kayaamat ke samay sajaaon ka hisaab-kitaab chuktu hota hai na। jaise kaashi kalvat khaate hain। sach-sach shiv par bali tum ab chadhte ho। shiv ka bante ho varsa lene ke liye। baaki woh jo kaashi kalvat khaate hain, woh to ghaat karna hai। parantu naudha bhakti se bali chadhte hain to jo paap kiye hue hain, uski saza us samay bhog kar paap khatma hote hain। phir paap karne se to chhoot na saken। yog agni se hi paap bhasma ho sakte hain। maaya ke raajya mein karma-vikarma hi bante hain। satayug mein vikarma nahin banta kyonki maaya ka raajya hi nahin। ab saari duniya bhrashtaachaari hai। pahla number bhrashtaachaar hai vikaar mein jaana। jo paida hi bhrashtaachaar se hote hain, woh paap hi karte hain। hai hi raavan raajya। raavan ko jalaate hain, parantu raavan kya cheej hai, bilkul hi nahin jaante। raavan kaha hi jaata hai 5 vikaaron ko। svarga mein yeh vikaar hote nahin, isliye unko viceless world kaha jaata hai। vahaan doosra koi raajya athva khanda hota hi nahin। islaami, bauddhi aadi sab peechhe aaye hain। woh bhi pahle satopradhaan hote hain phir rajo tamo mein aate hain। satayug treta mein sampoorn nirvikaari the। ab dheere-dheere sampoorn vikaari bante aaye hain। poora vikaari banne mein bhi samay lagta hai। satayug mein 16 kala phir 14 kala, phir kala utarte jaate hain kyonki hai hi utarti kala। ab tumhaari hai chadhti kala। chadhti kala raam banaate hain, utarti kala raavan banaate hain। jaise chandrama ki dheere-dheere kala kam hoti jaati hai। duniya bhi aise hai। abhi to no kala। aise samay par baap aakar phir 16 kala banaate hain। yeh khel saara bhaarat ke oopar hi bana hua hai। varna bhi bhaarat par hi hain। nahin to 84 janmon ka hisaab kahaan? baap samjhaate hain yeh hai hi iron aged duniya। kaliyug ka ant hai phir satayug ka aadi hoga। jo devi devta dharma vaale dharma bhrashta, karma bhrashta ho gaye hain woh phir aayenge। tum aaye ho na। dekho jhaad ke ant mein brahma khada hai। woh hai tamopradhaan aur neeche tapasya kar rahe hain - satopradhaan banne ke liye। to jaise brahma tapasya kar rahe hain, vaise brahmaakumaar kumaariyaan। ab jo yeh brahma satopradhaan ban rahe hain, unmein paramatma aakar apna parichay dete hain। inko bataate hain to bachchon ko bhi bataate hain। baba aur tum bachche jo kalpa vriksha ke neeche tapasya kar rahe ho - devta banne ke liye। yeh mandir hoobhu tumhaara jad yaadgaar hai। ab aisa koi buddhivaan bachcha ho to is mandir ki poori history geography bataaye ki yeh oonche te ooncha mandir hai। ismen mama bhi hai, baba bhi hai, bachche bhi tapasya kar rahe hain। jinhonne bhaarat ko svarga banaaya hai unki history-geography vilaayat vaale sunenge to kahenge - yeh to hamaare baap ka mandir hai, jo bhaarat ko heaven banaate hain। jo is samay practical mein baitha hai। yeh to koi jaante nahin। yeh sab chitra andhashraddha ke bane hue hain, inko bhoot pooja kaha jaata hai। gudiyon ki pooja। guru naanak ki aatma jisne sikkha dharma sthaapan kiya woh nai aatma thi, nirvikaari thi। woh kahaan aai? zaroor kisi shareer mein pravesh kiya hoga। to pavitra aatma kabhi duhkh nahin bhog sakti। pahle to unko sukh bhogna hai, peechhe duhkh। aisa koi vikarma hi nahin kiya to duhkh kyon bhoge! ham bhi pahle sampoorn rehte hain phir dheere-dheere kalaayen kam hoti hain। har ek manushya ka aise hota hai। bulaate hain patit paavan aao to zaroor aakar paavan duniya ki sthaapna karenge aur patit duniya ka vinaash karenge। brahma dvaara sthaapna aur shankar dvaara vinaash, kitna achhi reeti samjhaate hain। yeh unki buddhi mein baithega jo devi-devta dharma ka hoga, isliye baba kehte hain bhakton ko yeh gyaan do। koi ko yeh pata hi nahin hai ki ham pahle devi-devta dharma ke the phir asur bane hain। lakshmi-naaraayan ne poore 84 janma liye hain। abhi tum shoodra se brahman bane ho, jo baad mein aate hain woh brahman nahin banenge। yeh baaten unki buddhi mein baithengi jinki buddhi mein kalpa pahle baithi hongi। nahin to baahar gaya aur khalaas। ismen mehnat hai aur jagah to sirf kathaayen sun phir ghar mein aakar vikaaron mein girte hain। guru ko poora follow karte nahin phir followers kaise kahlaayenge। guru log bhi unko kuchh kehte nahin। agar kahen to phir ek bhi followers na rahe phir khaayen kahaan se! grihasthiyon ka hi to khaate hain। phir vikaariyon ke paas janma lena padta hai। devtaayen to sannyaas karte nahin। yeh hai pravritti maarga ka sannyaas। woh hai nivritti maarga ka sannyaas। baap aakar stri purush donon ko samjhaate hain। bachche sampoorn pavitra banenge to sampoorn raajya pad paayenge। kam pavitra banenge to kam pad paayenge। follow karna hai mo baap ko।

baap kehte hain - maa baap ke misal mehnat karo to gaddi nasheen honge। mukhya baat hai pavitrata ki। ab deh-abhimaan chhod do। main aatma hoon, baba lene aaya hai, pavitra banne se hi pavitra duniya ke maalik banenge। kumbha ka mela kehte hain। woh triveni aadi ka hai nadiyon ka mela, unko sangam kehte hain। vaastav mein yeh hai anek nadiyon aur saagar ka mela। tum sab gyaan nadiyaan ho - baap gyaan saagar hai। baap kehte hain mere se yog lagaao to tum patit se paavan ban jaayenge। marna to hai hi। baap se varsa lena hai, to abhi hi bhakti ka phal bhagwan se le sakte ho। nahin to samjhenge tumne bhakti ki hi nahin hai। bhakti karne vaale hi aakar raajya-bhaagya lenge। baap kitna achhi reeti samjhaate hain। aur sabhi ki buddhi mein to shaastra hi honge। yahaan gyaan saagar baap samjhaate hain to tum shreshtha ban rahe ho। raajdhaani sthaapan karne mein kitni mehnat hoti hai। roodra gyaan yagya mein bahut vighna padte hain। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) deh-abhimaan mein aakar kabhi bhi vikaaron ke phande mein nahin phansana hai। karma, vikarma na banen isliye karma ke pahle baap se raay leni hai।

2) maa baap ko follow karna hai। oonch pad ke liye sampoorn paavan zaroor banna hai।

vardaan:- nyaarepan ki avastha dvaara paas with honour ka certificate praapta karne vaale ashareeri bhav

paas with honour ka certificate praapta karne ke liye mukh aur man donon ki aavaaj se pare shant swaroop ki sthiti mein sthit hone ka abhyaas chaahiye। aatma shanti ke saagar mein sama jaaye। yeh sweet silence ki anubhooti bahut priy lagti hai। tan aur man ko aaraam mil jaata hai। ant mein yeh ashareeri banne ka abhyaas hi kaam mein aata hai। shareer ka koi bhi khel chal raha hai, ashareeri ban aatma saakshi (nyaara) ho apne shareer ka part dekhe to yahi avastha ant mein vijayi bana degi।

slogan:- sarva gunon va sarvashaktiyon ka adhikaar praapta karne ke liye aagyaakaari bano।

maateshvari ji ke anmol mahaavaakya ’srishti par kabhi pralay hoti nahin“

srishti par pralay kabhi hoti nahin, ab yeh jo manushya samajh baithe hain ki isi srishti par koi samay pralay avashya hoti hai, vo pralay to aise hi samajhte hain। ab pralay ka matlab hai srishti par jalmai ho jaana। nai srishti ki sthaapna hoti hai, jis nai srishti ki shuruvaat dikhaate hain, kaise srishti ke aadi mein shreekrishna devta peepal ke patte par angutha chooste srishti par padhaare hain। phir aise hi srishti ki utpatti shuru hoti hai ab yeh vivek chalaane ki baat hai, jab apan (ham) kehte hain pralay ka arth hai jalmai to iska matlab hai ki ek bhi srishti par na rahe। manushya yeh nahin jaante hain ki pralay ka matlab kya hai? pralay ka yathaartha matlab hai ki srishti par jo itni apvitrata hone kaaran srishti duhkhi ho padi hai, us apvitrata ki pralay ho jaati hai aur srishti pavitra ban jaati hai goya tamoguni srishti badal satoguni srishti ban jaati hai। to iska matlab hai srishti par pralay nahin hoti magar srishti par aasuri avgunon ki pralay hoti hai, baaki koi manushyon ki pralay nahin hoti। agar srishti pralay ho jaati to phir geeta mein bhagwan ne jo kaha hai ki srishti anaadi chali aati hai, to kya yeh bhagvaanuvaach jhootha samjhen? baaki itna jarur hai ki puraani duniya arthaat tamoguni srishti ka vinaash ho phir nai satoguni duniya ki sthaapna hoti hai। to vinaash aur sthaapna ka kaarya donon ikattha chalta aata hai। aise nahin kahenge ki srishti pralay ho jaati hai, is hi srishti par svarga aur narka ki sthaapna hoti hai। balki jab svarga hai to narka nahin, jab narka hai to svarga nahin। svarga kehte hain jahaan pavitra devi devtaaon ka nivaas sthaan hai aur narka kehte hain mrityulok ko jahaan apvitra manushya aatmaon ka nivaas sthaan hai, maano apvitrata ki pralay ho jaati hai।