बुधवार 13 अप्रैल 2022 की दैनिक मुरली

13-04-2022 praatahmurli om shanti "baapdaada"' madhuban

“meethe bachche - grihastha vyavhaar mein rehte kamaal kar dikhaani hai, shreshtaachaari devta banne aur banaane ki seva karni hai''

prashn:- raajaai ke varse ka adhikaar kin bachchon ko praapta hota hai?

uttar:- jo baap ke sameep sambandh mein aate hain, apni chalan aur aamadni ka poora-poora samaachaar baap ko dete hain। aise maatele bachche hi raajaai ke varse ka adhikaar praapta karte hain। jo baap ke aage aate hi nahin, apna samaachaar sunaate hi nahin, unhein raajaai ka varsa mil nahin sakta। woh hain sautele bachche। baba kehte bachche apna poora-poora samaachaar do to baba samjhe yeh kya service kar rahe hain। baba bachchon ko har haalat mein oonch pad paane ka purushaartha karaate hain।

geet:- kaun aaya mere man ke dvaare…

om shanti। bachche jaante hain parampita paramatma shiv se hamaara kya sambandh hai? parampita to kehte hi hain। patit-paavan akshar bhi daal do। dil mein hai ki patit-paavan parampita paramatma shiv se hamaara sambandh baap ka hai। baap kehte hain main bachchon ke saamne pratyaksha hota hoon। baap bachchon se hi roohrihaan karte hain, milte julte hain। jo baat samjhaai jaati hai woh phir auron ko samjhaani hai। abhi tum jagat amba aur jagatpita ko bhi jaante ho। shiv ko jagatpita nahin kahenge kyonki jagat mein praja hai isliye kaha jaata hai prajaapita brahma aur jagat amba। amba saare jagat ki। isse siddha hua woh rachayita hai। yeh bhi samajh chaahiye। manushya to sab paramatma ko yaad karte hain, parantu jaante nahin। tum ab parampita paramatma ko, jagat amba ko, prajaapita brahma ko jaante ho। unki aae santaan bane ho। laukik maa baap to sabko hain। unko jagat amba, jagatpita nahin kahenge। jagat amba jagatpita hokar gaye hain। is samay phir tum aakar unke bane ho phir se history-geography repeat ho rahi hai। tum jaante ho ham ab baap se varsa le rahe hain। baap hai svarga sthaapan karne vaala, jismen lakshmi-naaraayan ka raajya tha। tumko bhi baadshaahi mili thi। ab phir se tum le rahe ho। to tumko poochhna chaahiye parampita paramatma ko jaante ho। yeh baat aisi hai jo samajhte hue bhi bhool jaate hain। apne aapko bhool, maat-pita ko bhool varsa ganva dete hain। yeh hai hi yuddha-sthal। tum is samay maaya par jeet paane ke liye yuddha ke maidaan par khade ho। jab tak ant na aaye to ladaai chalti rahegi। us ladaai vaale bhi jaante hain, agar ham chaahen to second mein sabko uda den। abhi to ek do ko hathiyaar dete rehte hain। karja dete rehte hain। agar koi maar de to karja khatma ho jaayega। baba bhi akhbaar padhte hain। bachchon ko bhi akhbaar padhkar usse service karni chaahiye। baba se poochhna chaahiye baba aap to maalik ho phir radio kyon sunte ho? ab bachche maalik to shivbaaba hai, hamko kaise pata pade ki vaayumandal kya hai! kahaan tak ladaai aadi ke aasaar hain! is samay gapode to bahut maarte hain। sadaachaar committee aadi banaate hain। unko likhna chaahiye yeh duniya hi bhrashtaachaari hai। sadaachaari koi kaise ho sakta hai। bhrashtaachaari vikaari ko kaha jaata hai। yeh baaten tum bachche hi jaante ho। bachchon mein bhi nambarvaar hain। tum sabse poochho ki parampita paramatma se aapka kya sambandh hai? jaise Christian jaante hain Christ ne phalaane samay par janma liya। achha unke aage kaun the? lakshmi-naaraayan ko raajya kiye kitna samay hua hai। is samay aadi sanaatan devi-devta dharma vaale hi dharma bhrashta, karma bhrashta ho gaye hain। shaastron mein hi laakhon varsha kah diya hai। ab tum sujaag ho gaye ho phir auron ko bhi sujaag karna hai।

tum jaante ho shiv hamaara baap hai। prajaapita brahma aur jagat amba bhi hamaare mama-baba hai। phir poochha jaata hai lakshmi-naaraayan ko satayug ka varsa kahaan se mila? 5 hajaar varsha hua, mila tha ab nahin hai, ab mil raha hai। ab history repeat ho rahi hai। ab sabhi ko baap ka sandesh kaise den! kya ghar-ghar mein dhindhora peeten! achha board bhi tum laga sakte ho, kyonki tum ho master avinaashi surgeon। parampita paramatma hai niraakaar। ab yeh to koi nahin jaante ki shivbaaba ne kiske shareer mein janma liya! aise bhi nahin kah sakte ki krishna ke shareer mein pravesh kar janma liya। yeh to tum nambarvaar jaante ho ki woh hamaara parampita bhi hai aur hamaara teacher bhi hai। hamko bahut achhi shiksha de rahe hain। baba phir se kalpa ke baad aakar mile hain। samajhte ho pakka-pakka nishchay bhi hai phir ghar jaate hi woh nasha ud jaata hai। ghar grihastha mein rehte dhandhe-dhori mein rehte kahaan tak nasha rehta hai, yeh to zaroor baap ko likhna chaahiye। parantu bachche baap ko poora samaachaar dete nahin। tum bachche baap ko poora jaante ho to baap ko bhi tumhaara poora maaloom hona chaahiye। jabki woh tumhaara daada hai to unko tumhaari chalan aur aamadni ka poora-poora maaloom hona chaahiye, tab to mat denge। tum kahenge shivbaaba to antaryaami hai, parantu yeh brahma kaise jaane। koi to baba ke aage aate hi nahin hain, isliye samjha jaata hai yeh sautele bachche hain, to raajaai ka varsa nahin pa sakenge। agar shreemat par chalna hai to poora samaachaar dena hai। bachche bhi baap ka sab kuchh jaan lete hain। baap ko bhi samaachaar dena chaahiye। yeh hai hamaara roohaani grihastha vyavhaar ka sambandh।

yeh hai roohaani eeshvareey parivaar। supreme rooh se sabhi aatmaon ka sambandh hai na। sabse yeh prashn poochho ki tum in lakshmi-naaraayan ko jaante ho, parampita paramatma ko jaante ho? tum satayugi shreshtaachaari devi devtaaon ko jaante ho? tum likh sakte ho ki in sab baaton ko jaanne se tum shreshtaachaari ban sakte ho, nahin to kadaachit nahin ban sakte। aisi-aisi service karne se tum oonch pad pa sakte ho। bhrashtaachaari ko shreshtaachaari banaana-yeh tumhaara dhandha hai। to kyon nahin board lagaate ho! stri-purush donon is service par hain। baba direction dete hain parantu bachche phir bhool jaate hain, apne hi dhandhe mein lag jaate hain। service jo karni hai woh karte hi nahin hain। na poora samaachaar dete hain, na board lagaate hain। board nahin lagaaya, service nahin ki to samjhenge deh-abhimaan bahut hai। murli to sab sunte hain। baba kya kehte hain, anek mat milti hain। pradarshani ke liye baba kehte bachche garmi hai to pahaadi par jaakar prabandha karo। ab dekhen kahaan se samaachaar aata hai ki baba ham yeh prabandha kar sakte hain। jaankaari hai to jaakar haal va dharmashaala lekar prabandha rachna hai, to bahuton ko sandesh mile। yahaan bhi board laga hua ho gyaan saagar patit-paavan niraakaar paramatma se tumhaara kya sambandh hai? phir jagat amba aur jagat pita se tumhaara kya sambandh hai? woh kya denge? zaroor jagat ka maalik banaayenge। barobar tum ab ban rahe ho। kalpa pahle bhi bane the। tum yeh board likh do to phir aur sab prashn hi khatma ho jaayenge। lakshmi-naaraayan ko yeh vishwa ke maalikapne ka varsa kaise mila? poochhne vaala to zaroor jaanta hoga। agar itni service nahin karenge to gaddi par kaise baithenge। yeh raajayog hai nar se naaraayan banne ka। praja banne ka nahin। kya tum yahaan praja banne aaye ho? baba ke paas samaachaar aaye to baba samjhe ki yeh service kar rahe hain। na ghar ka, na service ka samaachaar denge to kaise samjhenge ki yeh vijay maala mein aayenge। nishchaybuddhi vijayanti, sanshaybuddhi vinshanti।

tum jaante ho abhi hamaari raajdhaani sthaapan ho rahi hai। us raajdhaani mein oonch pad paane ka tum bachchon ko purushaartha karna hai। parantu koi ki takdeer mein nahin hai to teacher kya kar sakta hai। tumne hi aise khote karma kiye hain, jo tumhein bhogna padta hai। mama ne achhe karma kiye hain to kitna achha attention se mama ne oonch pad praapta kiya। tum bachchon ko har haalat mein khoob purushaartha karna chaahiye। baba ne raay di hai - board banaae lagaana chaahiye aur chhote-chhote parche banaakar baantane chaahiye ki in lakshmi-naaraayan ko jaanne se tum yeh shreshtaachaari devta ban jaayenge। shubh kaarya mein deri nahin karni chaahiye। tum meethe-meethe bachchon ko bahut service karni chaahiye। grihastha vyavhaar mein rehte kamaal kar dikhaani hai। kab chhodne ka khyaal nahin karna hai। tum jaante ho baba hamko brahma dvaara sikhla rahe hain, shivbaaba bhaarat mein aaya hai to kya niraakaar aaya? kaise aaya, kya kiya? koi ko pata hi nahin hai। shivraatri manaate hain, jara bhi pata nahin hai। paramatma aate hi hain paavan banaane।

baba kehte hain koi bhi baat mein moonjhate ho to poochho ki baba hamko yeh baat samajh mein nahin aati hain, 84 janmon ka raaz bhi samjhaaya hai। varno mein bhi aana hai। tum yeh dhaarna karte ho। barobar hamne aise 84 janma liye hain। ab phir ham sooryavanshi bante hain। jitna jo purushaartha karega utna oonch pad paayega। kitni sahaj baat hai, phir bhi buddhi mein baithta nahin hai to aakar poochho - baba ham is samjhaani mein moonjhate hain। pahle-pahle alpha ka parichay dena hai। yeh board sab laga den, is knowledge se tum sada sukhi, shreshtaachaari ban jaate ho to yeh achha hai na। temptation hoga - kyon na aisi baat jaakar samjhen। baba service se samajh jaayenge ki kaun-kaun sachcha bachcha hai, jo attention dete hain - vahi maala ka daana banenge। karke dikhaana hai। tum to practical sammukh baith sun rahe ho। baaki bachche murli dvaara sunenge। yeh sab samajhne ki baaten hain। paramatma baap bhi hai phir patit se paavan banaakar le jaate hain to guru ho gaya। srishti ke aadi madhya ant ki knowledge shikshak ban padhaate hain to teenon ho gaye na। parantu bahut bachche bhool jaate hain। buddhi se woh nasha nikal jaata hai। nahin to sthaai khushi rahni chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) vijay maala ka daana banne ke liye apne oopar poora attention dena hai। shreshtaachaari banne aur banaane ki seva karni hai।

2) koi bhi aisa khota karma nahin karna hai, jiski bhogna bhogni pade। baap ki raay par kadam-kadam chalna hai।

vardaan:- apni aakarshanmay sthiti dvaara sarva ko aakarshit karne vaale roohaani sevaadhaari bhav

roohaani sevaadhaari kabhi yeh nahin soch sakte ki seva mein vriddhi nahin hoti ya sunne vaale nahin milte। sunne vaale bahut hain sirf aap apni sthiti roohaani aakarshanmay banaao। jab chumbak apni taraph kheench sakta hai to kya aapki roohaani shakti aatmaon ko nahin kheench sakti! to roohaani aakarshan karne vaale chumbak bano jisse aatmaayen svatah aakarshit hokar aapke saamne aa jaayen, yahi aap roohaani sevaadhaari bachchon ki seva hai।

slogan:- samaadhaan swaroop banna hai to sabko sneh aur sammaan dete chalo।

maateshvari ji ke anmol mahaavaakya - “paramatma ek hai baaki sarva manushya aatmaaye hain''

ab yeh to saari duniya jaanti hai ki paramatma ek hai vo sarvashaktivaan hai, jaaneejaananhaar hai, aise to saari duniya khud bhi kehti hai ham paramatma ki santaan hain। paramatma ek hai, bhal koi dharma vaala ho vo bhi paramatma ko hi maante hain। vo bhi apne ko paramatma dvaara bheja hua sandeshvaahak samajhte hain, aise hi sandesh lekar apne apne dharma ki sthaapna karte hain। jaise gurunaanak ne bhi paramatma ki itni badaai ki ekonkaar sat naam। ekonkaar ka arth hai paramatma ek hai। sat naam arthaat uska naam satya hai to goya paramatma naam roop vaala bhi hai, avinaashi hai, akaalmoorta bhi hai to phir karta purush bhi hai maana vo khud akarta hote hue bhi kaise brahma tan dvaara karta purush banta hai। ab yeh saari mahima ek paramatma ki hai, ab manushya itna samajhte hue phir bhi kehte hain eeshvar sarvatra hai। aham aatma so paramatma hai, agar sabhi paramatma thahre phir ekonkaar ....yeh mahima kis paramatma ki karte hain? isse siddha hai ki paramatma ek hai। achha - om shanti।