गुरुवार 19 मई 2022 की दैनिक मुरली

19-05-2022 praatahmurli om shanti "baapdaada"' madhuban

“meethe bachche - is samay is bhaarat ko shreemat ki darkaar hai, shreemat se hi kaudi jaisa bhaarat heere jaisa banega, sabki gati sadgati hogi''

prashn:- sarvashaktivaan baap mein kaun si shakti hai, jo manushyon mein nahin?

uttar:- raavan ko maarne ki shakti ek sarvashaktimaan baap mein hai, manushyon mein nahin। raam ki shakti ke sivaae yeh raavan mar nahin sakta। baap jab aate hain tab tum bachchon ko aisi shakti dete hain jisse tum bhi raavan par jeet pa lete ho।

om shanti। meethe bachche jaante hain yeh holeehanson ki sabha hai, yahaan sab brahman baithe hain। pavitra ko brahman kaha jaata hai, apvitra ko shoodra varna ka kahenge। jo purooshaarthi hain unhon ko half caste kahenge, na idhar ke, na udhar ke। ek paanv us paar jaane vaali naanv mein, ek paanv is paar vaali naanv mein hoga to cheer jaayenge isliye nirnay karna chaahiye - kis taraph jaaven? agar koi asur baithe honge to vighna daalenge। yeh kaun samjhaate hain? shivbaaba। shiv ke liye hi baba akshar mukh se nikalta hai। shivbaaba hi jholi bharne vaala hai। baap se zaroor varsa milega। shiv ke kitne athaah mandir hai, woh bhi hai niraakaar, vishwa ka rachayita। vishwa mein lakshmi-naaraayan ka raajya tha, to zaroor baap se varsa mila hoga। abhi tum shoodra se brahman bane ho, shoodra hain pattharbuddhi, lakshmi-naaraayan to paarasbuddhi the na। maaya se buddhi maari jaati hai। maaya ka naam bhaarat mein mashhoor hai। is samay maaya raavan ka raajya hai arthaat raavan sampradaay hain isliye raavan ko maarte hain, parantu marta nahin। raam ki shakti ke sivaae raavan par jeet pa nahin sakte। sarvashaktimaan se hi shakti mil sakti hai। woh to hai ek parampita paramatma। unka na sookshm shareer hai, na sthool - yeh bhi kiski buddhi mein nahin aata ki woh niraakaar phir bhaarat mein kaise aaya। aatma organs ke bigar to karma kar nahin sakti। kuchh bhi samajhte nahin, isliye pattharbuddhi kaha jaata hai। baap baith samjhaate hain bhagwan hai oonch te unch। unki sabse oonch mat hai। nahin to bhagwan ka simran kyon karte hain। unki mat simarte hain। zaroor bhagwan ke aane ka bhi drama mein part hai। manushya samajhte nahin। bahut log kehte hain Christ se 3 hajaar varsha pahle geeta sunaai gai thi। parantu yeh to bataao woh geeta kis nation ko, kis yug mein sunaai gai aur kisne sunaai? ek hi shaastra mein krishna bhagvaanuvaach likha hua hai phir roodra gyaan yagya bhi kehte hain। roodra to shivbaaba ko kaha jaata hai। krishna ko kabhi baap nahin kahenge। shivbaaba kaha jaata hai। shivbaaba hi knowledgeful, blissful hai tab to bhakta log pukaarte hain। samajhte hain bhakti karne ke baad bhagwan milega। achha bhakti kab shuru hoti, bhagwan kab milta? paap aatmaon ki duniya se punya aatmaon ki duniya mein kab jaana hota, yeh koi nahin jaante। tum bhi shoodra varna ke the। ab tum brahma mukh vanshaavli brahman kahlaate ho। brahman kisne banaaya? shivbaaba ne। yeh hai rachayita। brahman varna hai sabse oonch। braahmanon ki choti bhi hai kyonki saakaar mein hai na। parantu unhon ko banaane vaala niraakaar hai। woh parampita param aatma maana paramatma, yeh akshar pakka yaad kar lo। drama anusaar jab srishti tamopradhaan ban jaati hai tab mujhe aana padta hai। main bhi drama ke bandhan mein bandha hua hoon। tumko patit se paavan banaae sukh-shanti ka varsa aakar deta hoon। baaki sabko shanti ka varsa mil jaata hai। barobar satayug treta nai duniya thi, jo raam ne sthaapan ki। raam se bhi shivbaaba akshar theek hai। shivbaaba akshar sabke mukh par hai। to baba nai duniya ka rachayita hai, woh aakar varsa dete hain। geeta braahmanon ko hi sunaani hai। jab shoodra se brahma mukh vanshaavli brahman banen tab unko geeta sunaai। braahmanon ka gyaan ka teesra netra khola isliye kehte hain gyaan anjan satguru diya, agyaan andher vinaash। bachche kehte hain baba narka jaisi duniya se ab svarga mein le chalo। yeh hai shiv bhagvaanuvaach, shivaachaarya vaach। shivaachaarya (shivbaaba) behad ka sannyaas sikhlaate hain। shankaraachaarya ka hai had ka sannyaas। behad ka baap kehte hain puraani duniya ko bhoolo। ab tumko sada sukh ki duniya mein chalna hai। krishnapuri aur kansapuri kehte hain na। krishnapuri satayug ko, kansapuri kaliyug ko kaha jaata hai। donon ikatthe ho na sake। satayug mein phir kans kahaan se aaya? buddhi se kaam lena chaahiye na। ab baap khud aaya hai svarga ka athaah sukh dene।

baba kehte hain is antim janma mein jo padhe woh padhe, phir to raajaai sthaapan ho jaati hai। baap hi aakar shoodra se brahman so devta banaate hain। vo log hindu ko Christian ya bauddhi banaayenge। parantu yeh kabhi suna ki shoodra varna ko brahman varna banaaya! yeh to shivbaaba ka hi kaam hai। vo hi braahmanon ko phir devta banaate hain। harek apne se poochhe ki ham pahle kis dharma mein aur kis varna ke the? guru kaun tha? shaastra kaun sa padhte the? guru se kya mantra mila? phir kab se shivbaaba ne brahma dvaara brahman varna mein laaya? yeh har ek se likhaana chaahiye। ab tum bachchon ko to baap kehte hain mujhe yaad karo। maaya raavan ne tumhaari kya durdasha kar di। ab tum bane ho brahman sampradaay, phir daivi sampradaay banna hai। tumhein niraakaar parampita paramatma ne convert kiya hai। bachchon ko har ek se likhaana chaahiye ki kis dharma ke the, kisko poojte the? guru kiya hai ya nahin? phir brahman varna mein kaun le aaya? yeh baba bhi likhenge ki ham hindu dharma ke kahlaate the। guru bahut kiye। shaastra bahut padhe। sikkha dharma vaale kahenge ham sikkha dharma ke hain। sirf bhaaratvaasiyon ko apne devi-devta dharma ka pata nahin hai। aise nahin ki sikkha dharma vaale apne ko devta kahlaayenge। har ek apne ko apne dharma vaala hi kahlaayenge। ab baap kehte hain jo shiv ke bhakta va shiv ki rachna devi devtaaon ke bhakta honge unhon ko sunaana hai। ve achhi reeti sunenge। satayug treta mein barobar sooyvanshi chandravanshi the, jinhon ke chitra bhi hain। english mein Deityism kaha jaata hai। abhi baba devi-devta dharma ki sthaapna kar rahe hain। ab tum brahman varna se devta varna vaale ban rahe ho। bhaaratvaasi hi aapehi poojya aapehi pujaari bante hain। satayug mein poojya the… baba kehte main to ever poojya hoon। abhi tum yahaan aaye ho raajayog seekhne। bhavishya 21 janmon ke liye shivbaaba se varsa lene। to follow karna chaahiye। jab tak tum brahma vanshi nahin banenge to brahman kaise kahlaayenge? achha।

aaj bhog hai। braahmanon ko khilaane ki bhi rasam padi hui hai। baaki gyaan ka isse tailuk nahin hai। yahaan to hai gyaan saagar aur gyaan gangaaon ka milan। vahaan phir devtaaon aur tum braahmanon ka mela lagta hai, ismen moonjhane ki baat nahin। baap kehte hain deh sahit deh ke sab sambandhon se mamatva mitaate jaao। mujh ek ko yaad karo to ant mati so gati ho jaayegi। main pratigya karta hoon tumko svarga mein bhej doonga। roz class mein poochho - shivbaaba ke saath pratigya karenge! shivbaaba kehte hain meri mat par chalo। baap ki shreemat naameegraami hai। shreemat arthaat shreshtha mat। brahma ki mat bhi gaai jaati hai। brahma se bhi brahma ka baap shiv-baba oonch hai na। jab bhojan par baithte ho to bhi shivbaaba ko yaad karo। most beloved baap hai। jaise ki unke saath ham bhojan pa rahe hain। is yaad se bahut taakat aayegi। parantu bachche ghadi-ghadi bhool jaate hain। bhaarat ko ab shivbaaba ke shreemat ki darkaar hai, kyonki baap hi sarva ka sadgati daata, patit-paavan hai na। baap aur varse ko yaad karna hai। maaya vighna bhi anek prakaar ke daalegi, unse darna nahin hai। gyaan to bahut sahaj hai। baaki yog mein rehna, ek se buddhiyog jodna, ismen hi mehnat hai। aur jagah bhatakne se to ek shivbaaba ko yaad karna achha hai na। geeta padhne ki bhi baat nahin। jabki baap khud aaye hain। baaki sab shaastra hue baal bachche, unse varsa mil na sake। behad ka varsa ek hi behad ke baap se milta hai। achha!

baapdaada to bachchon ke saamne baitha hai। baap kehte hain main tumhaara baap brahma dvaara mama ka, daada ka, bachchon ka sabka yaadapyaar deta hoon। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) most beloved baap ko saath mein rakh bhojan khaana hai। ek baap se hi buddhiyog jodna hai। ek ki shreemat par chalna hai।

2) buddhi se behad ki puraani duniya ko bhoolna hai, iska hi sannyaas karna hai।

vardaan:- deh, deh ke sambandh aur padaartho ke bandhan se mukta rahne vaale jeevanmukta pharishta bhav

pharishta arthaat puraani duniya aur puraani deh se lagaav ka rishta nahin। deh se aatma ka rishta to hai lekin lagaav ka sambandh nahin। karmendriyon se karma ke sabandh mein aana alag baat hai lekin karmabandhan mein nahin aana। pharishta arthaat karma karte bhi karma ke bandhan se mukta। na deh ka bandhan, na deh ke sambandh ka bandhan, na deh ke padaartho ka bandhan - aise bandhan mukta rahne vaale hi jeevanmukta pharishta hain।

slogan:- sthool sampatti se bhi adhik moolyavaan hai - roohaani sneh ki sampatti।

maateshvari ji ke anmol mahaavaakya

badanseebi aur khushanseebi ab in donon shabdon ka madaar kis par chalta hai? yeh to ham jaante hain ki khushanseeb banaane vaala paramatma hai, to badanseeb banaane vaala khud hi manushya hai। jab manushya sarvada sukhi hai to unhon ki achhi kismat kehte hain aur jab manushya apne ko duhkhi samajhte hain to vo apne ko badanseeb samajhte hain। ham aise nahin kahenge ki badanseebi va khushanseebi koi paramatma dvaara milti hai, nahin। takdeer ko bigaadna va banaana, yeh sab karmon ke oopar hi madaar hai। yeh sab manushyon ke sanskaaron ke oopar hi hai। phir jaise paap aur punya ka sanskaar bharta hai vaise takdeer banti hai parantu manushya is raaz na jaanne ke kaaran paramatma ke oopar dosh rakhte hain। ab dekho, manushya apne ko sukhi rakhne ke liye kitne maaya ke tareeke nikaalte hain phir us hi maaya se koi apne ko sukhi samajhte hain aur koi phir us hi maaya ka sannyaas kar maaya ko chhodne se apne ko sukhi samajhte hain। matlab to kai prakaar ke prayatna karte hain parantu itne tareeke karte bhi result duhkh ke taraph ja rahi hai। jab srishti par bhaari duhkh hota hai tab usi samay svayan paramatma aae gupta roop mein apne eeshvareey yog power se daivi srishti ki sthaapna karaae sabhi manushya aatmaon ko khushkismat banaate hain।

2) manushya gaate hain - tum maat pita ham baalak tere, tumhari kripa se sukh ghanere... ab yeh mahima kiske liye gaai hui hai? avashya paramatma ke liye gaayan hai kyonki paramatma khud maata pita roop mein aae is srishti ko apaar sukh deta hai। paramatma ne zaroor kabhi to sukh ki srishti banaai hai tabhi to unko maata pita kahkar bulaate hain। parantu manushyon ko yeh pata hi nahin ki sukh kya cheez hai? jab is srishti par apaar sukh the tab shanti bhi thi, parantu ab vo sukh nahin hain। ab manushya ke andar yeh chaahna uthti hai ki vo sukh humein chaahiye, phir koi dhan padaartha maangate hain, koi bachche maangate hain, koi to phir aise bhi maangate hain ki ham pativrata naari banen, jab tak mera pati jinda hai, ham duhaagin (vidhva) na banen। to chaahna to sukh ki hi rehti hai na। to paramatma bhi koi samay unhon ki aash avashya poorn karenge। satayug ke samay jab srishti par svarga hai to vahaan sada sukh hai, jahaan stri kabhi duhaagin nahin banti। to vo aash satayug mein poorn hoti hai jahaan apaar sukh hai। baaki to is samay hai hi kaliyug। is samay to manushya duhkh hi duhkh bhogte hain। duhkhi manushya phir kah dete hain ki prabhu ka bhaana meetha karke bhogna hai। parantu woh kabhi kisko duhkh nahin de sakte। woh hamaare saare karmon ka khaata chuktu karaate hain tab hi ham kehte hain tum maat pita ham baalak tere...। achha। om shanti।