सोमवार 3 अक्टूबर 2022 की दैनिक मुरली

03-10-2022 praatahmurli om shanti "baapdaada"' madhuban

“meethe bachche - tum ho roohaani yoddhe, tumhein baap se bahut bade-bade gyaan ke gole mile hain jinse maaya dushman par jeet paani hai''

prashn:- kis raaz ko samajhne se tum bephikar baadshaah ban gaye ho?

uttar:- saare drama ke raaz ko samajhne se bephikar baadshaah ban gaye। abhi tumhein pata hai ki ham puraana hisaab-kitaab chuktu karke 21 janmon ke liye gyaan yog se apni jholi bhar rahe hain। ham shivbaaba ke potre, brahma baba ke bachche hain… to phikar kis baat ki karen।

geet:- takdeer jagaakar aai hoon.....

om shanti। baap baith samjhaate hain mere laadle bachche, tum gupta sena ho aur tum bachchon ko gyaan ka baarood bade-bade gyaan ke gole mil rahe hain। tum jaante ho - yeh vahi geeta ka episode arthaat vahi drama ka part phir se baj raha hai। ek geeta shaastra hi hai jiska mahaabhaarat ladaai se connection hai। tum bachche gupta sena ho। jaise vo log practice kar rahe hain, gole refine ho jaaen। vaise shivbaaba bhi kehte hain brahma dvaara tumko bahut achhe-achhe gyaan ke gole de raha hoon। to tum manushyon ko achhi tarah se shankh-dhvani karo ki geeta ka part phir se baj raha hai aur heavenly deity kingdom sthaapan ho rahi hai। tum bachche apne liye raajaai sthaapan kar rahe ho। woh sena mehnat karti hai raaja raani ke liye, tum apne liye hi maaya par jeet pahan 21 janmon ki baadshaahi lete ho - 5 hajaar varsha pahle muaaphik। yeh to tumhaari buddhi mein hai ki barobar ham apni takdeer bana rahe hain। woh to alpakaal ke liye badi tankha lete hain। yahaan tum har ek apne liye 21 janmon ki praalabdha banaate ho। tum mama baba se bhi oonch ja sakte ho। parantu vivek kehta hai - mama baba se oonch koi ja nahin sakta hai। bhal soorya, chaand ko grahan lagta hai parantu toot nahin sakte। sitaare to toot padte hain। baba kehte hain mere laadle bachche, main tum bachchon ko kyon nahin yaad karunga। aise sikeeldhe bachche kyon nahin yaad aayenge! parantu anubhav kehta hai bachche baap ko yaad karna bhool jaate hain। apne ko sajni samajhne se bhi bachche samjhenge to jaasti taakat milegi kyonki sajni to half partner hai - saajan ke saath। bachche to baap ke full vaaris ho jaate hain isliye baba kehte hain ki hamko gyaani tu aatma se pyaar hai। dhyaani ko saakshaatkaar ki ichchha rehti hai, jo saara din baba-baba karte rahenge unko to gyaani kahenge। baba ko gyaan ka bahut shauk hai। abhi tumhein gyaan ke gole mil rahe hain, yeh nai baat hai na। dhyaan mein bahut saakshaatkaar aadi karte hain, parantu unko gyaan kuchh nahin milta hai। baba aise bhi nahin kehte dhyaan kharaab hai। bhakti maarga mein saakshaatkaar hota hai to khush ho jaate hain, parantu muktidhaam mein ja nahin sakte। baba kehte hain tum mere dhaam mein aane vaale ho। tum jaante ho is gyaan se ham bhavishya prince banenge। devtaayen yahaan to hain nahin jo in aankhon se dekhen। chitra to hain na। krishna ko tum dekhte ho, vahaan prince-princess ki raas vilaas hoti hai athva baal leela bhi dekhte hain। parantu mahaaraani kab banenge, kab woh prince milega? woh to pata hi nahin hai। baba saakshaatkaar karaate hain ki nishchay ho jaae ki ham bhavishya mahaaraani ban rahe hain। gyaan se bhi samajh sakte hain ki vahaan hamaari aatma aur shareer donon pavitra honge। yeh jo “ham so'' ka mantra hai, woh abhi ka hai। shivbaaba ko yaad karne se taakat milti hai। haatamtaai ka khel dikhaate hain - muhalra daalte the to maaya ud jaati thi। baba khud kehte hain he laadle bachche, bhal sab kuchh kaam kaaj karo sirf buddhi se baap ko yaad karna hai। tumhaara hai ek paramdham। vo log yaatra par jaate hain to bahut phirte rehte hain। chaaron hi dhaam buddhi mein honge। tumhaari buddhi mein sirf ek paramdham hai। koi se poochho tum kya chaahte ho? kahenge mukti। sannyaasi bhi shanti ke kaaran gharbaar chhodte hain। jangal mein jaate hain। samajhte hain ham janma maran se chhoot jaayen, moksha mil jaaye। parantu hamesha ke liye koi chhoot nahin sakte। yeh anaadi bana banaaya drama hai। is drama ke raaz ko koi jaante nahin। creator, director, principal actor ko nahin jaante। tum jaante ho is drama ke poore 4 bhaag hain। aise nahin satayug ki aayu lambi hai। jagannaathpuri mein chaaval ka haanda chadhaate hain to unke poore 4 bhaag ho jaate hain। yeh duniya hai hi 4 yugon ka drama, unke aadi madhya ant ko tum hi jaante ho, yeh khel hai। ham hi devi-devtaayen raajya karte the। phir hamne hi haraaya phir ham jeet pa rahe hain। 5 hajaar varsha ki baat hai। yahaan har ek apne liye purushaartha karte hain। jitna jo aap samaan banaayenge, unko baba phir inaam bhi dete hain। baba kehte hain yog agni se tumhaare paap aapehi vinaash ho jaayenge, main kuchh nahin karta hoon। tum apne purushaartha se raajaai paate ho, raaja janak ka misaal hai na। inko kaha jaata hai saakshaatkaar।

tum jaante ho ham jeevanmukti mein jaane ke liye purushaartha kar rahe hain, jismen gyaan ki darkaar hai। mukti mein hamko thaharna nahin hai। hamaara all-round part hai। jaise rail mein tum aate ho to via ahamdaabaad karte ho na। hamko bhi jeevanmukti mein jaana hai via mukti। ghadi-ghadi paramdham ko yaad karo। un school mein 5-6 ghanta padhte hain yahaan itna nahin padh sakte isliye kaha hai ki ek ghadi-aadhi ghadi.... ismen amritvela achha hai। snaan bhi amritvele kiya jaata hai। ek baar murli sunkar phir yeh points repeat karte raho। tape mein murli bhari jaati hai। bhal tum 15 din ke baad sunenge to bhi sunne se refresh ho jaayenge। koi points dhyaan mein nahin hogi to jhat khyaal mein aa jaayega। murli ke notes apne paas rakhne achhe hain, yeh baarood hai na। bahut bachche to notes rakhte hain। jaise barrister, surgeon log apne paas bhi bahut kitaab rakhte hain, jo bahut kitaab padhe hote hain, woh achhi davaai dete hain। koi to achhi reeti notes bhi lete hain, koi notes bhi nahin le sakte। baba kahenge yeh bhi tumhaara karmabandhan hai। woh bhi unke hi vikarma hain। tum bachche jaante ho hamaari raajdhaani sthaapan ho rahi hai। jaise pahle angrej aaye to vyaapaar ke liye, parantu vyaapaar karte-karte dekha yeh to aapas mein ladte jhagadte hain to kyon na ham apna lashkar banaakar raajya le leven। tumhaare liye to bahut sahaj hai। koi ko maarne karne ki baat nahin। tum yogbal se raajya bhaagya lete ho। satayug mein lakshmi-naaraayan ko raajaai kahaan se mili? kaliyug ki raat poori ho phir satayug din hona hai। din mein raajaai, raat mein dhamchakra, baba aate hain to ham dhanke ban jaate hain। kaliyug ke baad hai satayug। anek dharmon ke baad hai ek dharma। jinhonne kalpa pahle raajaai li hai, vahi ab le rahe hain। unko kaha jaata hai heavenly deity kingdom। abhi to hai hell aur nirvaandhaam hai brahmaanda, jahaan tum ande misal rehte ho। tumhaari buddhi mein saare brahmaanda aur srishti ki knowledge hain। kitni sahaj baat hai। mukhya hai geeta ki baat। geeta mein bhagwan ka naam badal diya hai। yeh hai gyaan ke gole। ek baat ko yukti se samjhaao। is samay sab duban (daldal) mein phanse hue hain। baba aakar duban se nikaalne ke liye saadhna karaate hain। maaya ne pankh tod diye hain, ud nahin sakte hain। abhi sabko pavitra bankar vaapis jaana hai।

tum purushaartha kar rahe ho - baba se phir se raajya-bhaagya lene। baap samjhaate hain ki tumko khushi rahni chaahiye। jo achhi tarah dhaaran kar aap samaan banaate rahenge unko bahut khushi rahegi। number one jo paas hoga unko zaroor khushi hogi na। government bhi scholarship deti hai। tumhaari bhi maala bani hui hai। 108 ki bhi maala hoti hai। 16108 ki bhi hoti hai। ek box banaate hain, usmein daal dete hain। ab tum samajh gaye ho yeh maala kiski hai? rudraaksha ki maala kisko kaha jaata hai। pahle hain brahma ki maala। baap rachna rach rahe hain na। jo brahma ki dil par chadhte vahi shivbaaba ki dil par chadhenge। yeh hai brahma ki maala। sab bachche hain na। to pahle unki maala phir rudra maala banni hai, phir jaakar vishnu ke gale mein piroyenge। yeh heavenly kingdom ab sthaapan ho rahi hai। yeh manushya srishti hi svarga aur narka banti hai। svarga mein god aur goddess rehte hain, unko heaven kaha jaata hai। heaven vaale hi phir hell mein aate hain। phir ham hell se heaven mein jaate hain। maaya par jeet paakar jagatjeet bante hain। tum kahenge ki hamne yeh part anek baar bajaaya hai। koi kahe kya sirf tum hi svarga dekhenge, ham svarga nahin dekhenge? bolo, sab thode hi vahaan ja sakte hain। impossible hai। har ek apna sato rajo tamo mein part bajaate hain। yeh koi ko pata nahin hai। tum jaante ho ki hamaari raajaai sthaapan ho rahi hai। ham svarga ke maalik ban rahe hain। drama tumko avashya hi purushaartha karaayega। drama mein inse murli chalva rahe hain। purushaartha bigar tum rah nahin sakenge। baith nahin jaayenge। kalpa pahle jaise murli chalaai hai vahi drama anusaar chalegi। kitni guhya baaten hain। drama ko repeat zaroor hona hai। ham to bephikar baadshaah hain। parampita paramatma shiv ke potre hain। unko kya parvaah rakhi hai। yeh hai raajayog। baba kehte hain ab puraana hisaab-kitaab khalaas karo, inse buddhiyog hata do। phir jitna gyaan yog se jama karenge utna tumhaari jholi 21 janmon ke liye bharti jaayegi, ismen darne ki to koi baat nahin hai। baba to dene vaala hai। kehte hain jo kuchh tumhaara hai so kurbaan kar do। yahaan koi mahal to nahin banaane hain। in paison se kya karna padta hai। sirf 3 pair prithvi ke lekar centre khol dete hain। yeh jabardasta university athva hospital hai। woh hospital to anek hoti hain। yeh to ek hi hospital hai। jo religious minded honge woh to kahenge ki kyon nahin ham aisa hospital kholen jo manushya ever-healthy ban jaayen, baba health wealth dete hain to woh kehte hain ki baba yeh tumhaari cheez hai, jis bhi kaam mein chaaho lagaao। to nishchay kar poora follow karna chaahiye na। har ek apni jaati ko chadhaate hain na। tum kehte ho ham brahman hain, to phir kyon nahin sab kuchh transfer kar dena chaahiye। baba 21 janma ki baadshaahi dete hain। baba ki service mein lag jaane se tum kabhi bhookh nahin marenge। hamaara kharcha kuchh hai thode hi। tum sirf pet ke liye do roti khaate ho aur kya। manushyon ka to kharcha bahut hai। shaadiyon-muraadiyon par kitna kharcha karte hain। hamaara kuchh bhi kharcha nahin hai। tumhaari sagaai hoti hai shivbaaba ke saath। kharcha paai ka bhi nahin। sagaai kar ham baba ke paas chale jaate hain। yahaan bhi tum bachchon ko service karni hai। tumko apna yaadgaar dekh khushi hogi। yeh hamaare baba mama ka yaadgaar hai aur ham devi-devtaaon ke bhi yaadgaar hai। mukhya yaadgaar hain hi 5-7, pahle-pahle mukhya hai shivbaaba ka yaadgaar। us ek ke hi anek naam hain। phir hai sookshmavtanvaasi brahma vishnu shankar ke yaadgaar, phir manushya srishti mein sangamayugi jagat amba, jagat pita aur tum shaktiyaan, bachche aur satayug mein hain lakshmi-naaraayan bas। baaki to anek prakaar ke mandir banaaye hain। usmein kitna bhatakna padta hai। tum sab baaton se chhoot jaate ho aur kitna khushi mein rehte ho। aisi koi university nahin jahaan manushya se devta banen। tumhaari hai godly student life। tum paas hokar transfer ho jaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) amritvele murli sunkar phir point repeat karni hai। murli ke notes zaroor lene hain। khushi mein rahne ke liye aap samaan banaane ki seva karni hai।

2) brahma baap ki dil par chadhne ke liye gyaan yog mein teekha banna hai। number one paas hokar scholarship leni hai।

vardaan:- drama mein samasyaaon ko khel samajh accurate part bajaane vaale hero paartadhaari bhav

hero paartadhaari use kaha jaata - jiski koi bhi act saadhaaran na ho, har part accurate ho। kitni bhi samasyaayen ho, kaisi bhi paristhitiyaan hon kisi ke bhi adheen nahin, adhikaari ban samasyaaon ko aise paar karen jaise khel-khel mein paar kar rahe hain। khel mein sada khushi rehti hai, chaahe kaisa bhi khel ho, baahar se rone ka bhi part ho lekin andar rahe ki yeh sab behad ka khel hai। khel samajhne se badi samasya bhi halki ban jaayegi।

slogan:- jo sada prasanna rehte hain vahi prashansa ke paatra hain।