शनिवार 15 अक्टूबर 2022 की दैनिक मुरली

15-10-2022 praatahmurli om shanti "baapdaada"' madhuban

“meethe bachche - savere-savere uth yaad mein baithne ka abhyaas daalo, bhojan par bhi ek do ko baap ki yaad dilaao, yaad karte-karte tum paas with honour ho jaayenge''

prashn:- kis ek kami ke kaaran bachchon ki report baap ke paas aati hai?

uttar:- kai bachche abhi tak prem swaroop nahin bane hain। mukh se duhkh dene vaale bol bolte rehte hain isliye baap ke paas report aati hai। bachchon ko bahut prem se chalna hai। agar svayan mein hi koi avgun roopi bhoot hoga to doosron ka kaise niklega, isliye devtaaon jaisa prem swaroop banna hai, bhoot nikaal dena hai।

geet:- aakhir woh din aaya aaj…

om shanti। bachche gareeb-nivaaz baap ko jaan chuke hain aur baap ki yaad mein baithe rehte hain। bhal okhon se kisko bhi dekhen, karmendriyon se karma bhi karen parantu gaaya jaata hai haathon se karma karte raho, dil maashook taraph lagaate raho। brahman kul bhooshan jaante hain aur unse hi baap baat karte hain ki aadhaakalpa tumne baap ko yaad kiya। drama anusaar ab tumko baap ki smriti aai hai ki srishti chakra kaise phirta hai। saari duniya vismriti mein hai। baap ki rachna ko aur baap ke patit se paavan banaane va sarva ki sadgati karne ke kartavya ko koi bhi nahin jaante। tum rachayita aur rachna ke aadi-madhya-ant ko jaante ho। tumko smriti aai ki srishti chakra kaise phirta hai, ham 84 ka chakra kaise lagaate hain, jinhonne satayug se lekar kaliyug ke ant tak part bajaaya hai, vahi abhi bhi bajaayenge। satayug se lekar kaliyug tak janma lete neeche utarte aaye hain। ab kaliyug ant mein tumhaari chadhti kala hai। kehte hain chadhti kala tere bhaane sarva ka bhala। to tumko saari smriti aai hai, isko kaha jaata hai smritirlabdha, nashtomoha। kis dvaara smriti aai hai? baap dvaara। apne aap smriti nahin aai। tum jaante ho ham aatma parampita paramatma ki santaan hain। yeh shareer to laukik baap ne diya। ab paarlaukik baap kehte hain yeh puraane shareer ka bhaan chhodo, jaise sarpa puraani khaal chhodta hai aur nai leta hai। yeh baat satayug se lagti hai। to tum bhi satayug se lekar khaal chhodna shuru karenge। ab tumhaara antim janma hai। baap kehte hain - baaki thoda samay hai। tumko dheeraj mila hai, tum khushi mein ho ki ham phir se baap dvaara sukh ka varsa pa rahe hain। sukh ka varsa to baap dvaara milega na। yeh baat koi manushyon ki buddhi mein nahin aati। woh lakshmi-naaraayan ke mandir mein jaayenge to unki buddhi mein yeh nahin aayega ki yeh kaun hain! yeh to bhakti maarga mein haath jodkar kehte rehte hain tum maat-pita..... shivbaaba to sabse bada thahra। shivbaaba baagvaan bhi hai kyonki naye daivi bageeche ka kalam lagaate hain। to khud maali bhi hai aur haath pakad kar saath le jaate hain। to baba maali, baagvaan aur khivaiya kaise hai - yeh sab tum bachche hi jaante ho। yeh sab anek naam hain, unko liberator bhi kehte hain। yaad bhi unko karna hai। baba kehte hain yahaan aate ho to shivbaaba ko yaad karke aao। hamne to shivbaaba ko apna banaaya hai। brahma ne bhi unko apna banaaya hai। to ham unko hi kyon na yaad karen। chitra mein bhi dikhaaya hai - sabhi shiv ko maante hain। baba aatmaon se baat karte hain। aatma na kah jeevaatma kahenge kyonki jab aatma akeli hai to bol nahin sakti। shareer bigar aatma, aatma se baat nahin karti। paramdham mein kya paramatma aatma se baat karenge? bhal kah dete Christ ko paramatma ne bheja parantu vahaan paramatma bolta nahin hai, vahaan ishaara bhi nahin hota। drama anusaar aatma aapehi part bajaane neeche aa jaati hai। aatma mein part bhara hua hai। to aatma neeche aakar shareer dhaaran kar part bajaati hai। shareer ka naam to sabka alag hai। aatma ka naam to aatma hi hai। ham aatma ek shareer chhod doosra le part bajaate hain। ab hamko smriti aai hai aur koi ki yaad nahin honi chaahiye kyonki puraani duniya mein puraana part, puraana shareer chhod nai duniya mein jaana hai। vahaan naya shareer hamko milna hai। to isse matlab nikalta hai ki abhi 5 vikaaron ko chhodna hai, to kitni mushkilaat hoti hai।

dekho, bachche likhte hain - kaam, krodh ka toofaan aata hai। to baba kehte hain bachche de daan to chhoote grahan। is samay aatma par grahan laga hua hai। pahle tum 16 kala sampoorn the, ab no kala hai। jaise chandrama ki bhi poornamaasi ke baad dheere-dheere kala kam hoti jaati hai। ant mein jara si lakeer rah jaati hai। tumhaari bhi abhi vahi avastha hai। baba kehte hain de daan to chhoote grahan। agar vikaaron ka daan dekar phir vaapis liya to oonch pad pa nahin sakenge। yahaan vikaaron ki hi baat hai। paise ki baat nahin। harishchandra ka misaal......dhan daan mein dekar vaapis nahin lena chaahiye। vaastav mein hai vikaaron ki baat। vikaar daan mein dekar vaapis nahin lene chaahiye। dil andar dekhte raho ki hamaari dil baba se lagi hui hai, jisse hamaara janma-janmaantar ka grahan chhoota hai। samay to lagta hai, ekdam to nahin chhootta। jo karmabhog raha hua hai uski nishaani hai beemaari। toofaan aate hain, iska kaaran poora yog nahin hai। baap kehte hain aur sang tod mujh ek sang jodo। aur satsangon mein maashuk ko jaante nahin। yeh bhi nahin jaante ki aatma mein 84 janmon ka avinaashi part noondha hua hai। pahle hamaari buddhi mein bhi nahin tha to auron ki buddhi mein kaise hoga! jo ham devta gharaane ke the, woh bhi nahin jaante the। ab tumko smriti aai hai ki ham brahman hain phir satayug mein praalabdha shuru ho jaayegi phir jo karma har ek ne satayug mein kiye the vahi repeat karenge। sanskaar emerge hote jaayenge। yeh jab baba ki mahima karte hain - gyaan ka saagar, prem ka saagar.... to ham bhi prem seekh rahe hain। hamaare mukh se aise shabd nahin nikalne chaahiye jo kisko duhkh mile। agar kisi ko duhkh diya to samajhna chaahiye - hamaare andar bhoot hai phir lakshmi ko var nahin sakenge। baap ke bane hain to lakshmi ko varne laayak banna chaahiye। agar koi bhoot rah gaya to treta mein chale jaayenge। bachchon mein krodh nahin hona chaahiye। bade prem se chalna chaahiye। dekho, baba ke kitne bachche hain to bhi baba krodh thode hi karte hain। to tumko bhi bada prem swaroop banna hai। abhi kai bachche prem swaroop nahin bane hain। kabhi-kabhi report aati hai to woh bhi samajh jaate hain ki inmen bhoot hai, jismen khud bhoot hai woh auron ka kya nikaalenge। bada prem swaroop banna hai aur yahaan hi banna hai। devta prem swaroop hain na। dekho, lakshmi-naaraayan ka chitra kitna kheenchata hai to hamko bhi aisa banna hai। tumko pati krodh karta hai to bhi prem se baat karni hai, yeh nahin unmein bhoot hain to mujh mein bhi aa jaae। nahin, mere mein jo avgun hain kaise bhi karke avgunon ko nikaalna hai। bahut-bahut meetha banna hai। kisi ne kaha laukik baap gussa karta hai, to mainne kaha ki jab woh krodh karta hai to tum achhe-achhe phool chadhaao। to woh wonder khaaye, phir woh thanda ho jaayega। bada yukti se samjhaana hai kyonki raavanraajya hai na। ham hain raam ki sampradaay। khud na banen to doosron ko kya banaayenge isliye sthaapna mein deri padti hai। ek to prem se chalna hai, doosra smriti mein rehna hai, svadarshan chakradhaari banna hai। dhandha to karna hi hai isliye subah ka samay bahut achha hai। kehte hain na savere sona... savere uthna... isliye savere-savere uth yahaan aakar baitho to 5 minute bhi yaad thahregi। phir dheere-dheere aadat padne se yaad pakki ho jaayegi। achha khaana khaate ho to dekho ki kitna samay baba ki yaad mein khaaya! agar saara samay yaad kiya to woh bhi badi bahaaduri hai। bhojan par ek do ko ishaara dena hai ki baap ko yaad karo। ek-ek gitti par yaad dilaao। hamaara hai hi sahjayog। abhi buddhi mein gyaan aaya hai parampita paramatma ko sarva shaktimaan kehte hain to unmein bhala kya shakti hai। yeh nahin ki bombs banaane ki shakti hai। nahin, unko yaad karne se vikarma vinaash ho jaate hain। yeh shakti hai na। dekho hai kitna bhola aur shakti kitni hai। yathaartha reeti yaad karne mein mehnat hai na। to mehnat karni chaahiye। subah ka samay achha hota hai। bhakti mein bhi savere-savere uthte hain, gyaan mein bhi savere ka samay bahut achha hai। baap kehte hain main kalpa mein ek hi baar aata hoon, tumko saath le jaane ke liye to bilkul khushi khushi se jaana hai। duhkhadhaam se nikalna hai। aisi smriti hogi to darenge nahin। kitni bhi pareekshaayen aaye to bhi smriti pakki rahni chaahiye। aisi avastha jamaani hai। ab tum bachchon ko ham so, so ham ka arth bhi samjhaaya hai। ham so paramatma nahin, lekin paramatma ka bachcha hoon। yeh ho gaya ham so ke chakra ka darshan। is yaad se hi khaad niklegi। khaad nikaalne ka samay hi hai amritvela। to paas with honour banne ke liye krishnapuri ka maalik banaane vaale baap ko yaad karna hai। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) dhandha aadi karte bhi svadarshan chakradhaari bankar rehna hai। ek do ko baap ki yaad dilaani hai। kitni bhi pareekshaayen aa jaayen to bhi smriti mein zaroor rehna hai।

2) vikaaron ka daan dekar phir kabhi vaapas nahin lena। kisi ko bhi duhkh nahin dena hai। krodh nahin karna hai। andar jo bhoot hain unhein nikaal dena hai।

vardaan:- maalikpan ki smriti dvaara parvash sthiti ko samaapta karne vaale sada samartha bhav

jo sada maalikpan ki smriti mein sthit rehte hain - unke sankalp order pramaan chalte hain। man, maalik ko parvash nahin bana sakta। brahman aatma kabhi apne kamjor svabhaav-sanskaar ke vash nahin ho sakti। jab svabhaav shabd saamne aaye to svabhaav arthaat sva prati va sarva ke prati aatmik bhaav, is shreshtha arth mein tik jaao aur jab sanskaar shabd aaye to apne anaadi aur aadi sanskaaron ko smriti mein laao to samartha ban jaayenge। parvash sthiti samaapta ho jaayegi।

slogan:- vardaanon ki shakti jama kar lo to paristhiti roopi aag bhi paani ban jaayegi।

maateshvari ji ke anmol mahaavaakya

1) badanseebi aur khushanseebi, ab yeh do shabdon ka madaar kis par chalta hai? yeh to ham jaante hain ki khushanseeb banaane vaala paramatma aur badanseeb banaane vaala khud hi manushya hai। jab manushya sarvada sukhi hai to unhon ki achhi kismat kehte hain aur jab manushya apne ko duhkhi samajhte hain to vo apne ko badanseeb samajhte hain। ham aise nahin kahenge ki badanseebi va khushanseebi koi paramatma dvaara milti hai, nahin। yeh samajhna badi moorkhata hai। paramatma to humein khushanseeb banaata hai parantu takdeer ko bigaadna va banaana yeh sab karmon ke oopar hi madaar hai। yeh sab manushyon ke sanskaaron ke oopar hi hai। phir jaise paap aur punya ka sanskaar bharta hai vaise takdeer banti hai parantu manushya is raaz na jaanne ke kaaran paramatma ke oopar dosh rakhte hain। ab dekho manushya apne ko sukhi rakhne ke liye kitni maaya ke tareeke nikaalte hain phir us hi maaya se koi apne ko sukhi samajhte hain aur koi phir us hi maaya ka sanyaas kar maaya ko chhodne se apne ko sukhi samajhte hain, matlab to kai prakaar ke prayatna karte hain parantu itne tareeke karte bhi result duhkh ke taraph ja rahi hai। jab srishti par bhaari duhkh hota hai tab usi samay svayan paramatma aae gupta roop mein apne eeshvareey yog power se daivi srishti ki sthaapna karaae sabhi manushya aatmaon ko khushkismat banaate hain।

2) jis samay om shanti kehte hain to uska yathaartha arth hai main aatma saaligraam us jyoti swaroop paramatma ki santaan hoon, ham bhi vahi pita jyotirbindu paramatma ke muaaphik aakaar vaali hain। baaki ham saaligraam bachche hain to inhon ko apne jyoti swaroop paramatma ke saath yog rakhna aur light might ka varsa lena hai। us niraakaar paramatma ko shvaanson shvaans yaad karna isko hi ajpaajaap kaha jaata hai। ajpaajaap maana koi bhi mantra japne ke sivaae natural us paramatma ki yaad mein rehna, isko hi poorn yog kehte hain, yog ka matlab hai ek hi yogeshvar paramatma ki yaad mein rehna। to jo aatmaayen us paramatma ki yaad mein rehti hain, unhon ko yogi athva yoginiyaan kaha jaata hai। jab us yog arthaat yaad mein nirantar rahen tab hi vikarmon aur paapon ka bojh nashta hota hai aur aatmaayen pavitra ban bhavishya janma mein devtaai praalabdha paati hain। ab yeh chaahiye knowledge tab hi yog poora lag sakta hai to apne ko aatma samajh paramatma ki yaad mein rehna, yeh hai sachcha gyaan। achha। om shanti।