मंगलवार 15 नवंबर 2022 की दैनिक मुरली

15-11-2022 praatahmurli om shanti "baapdaada"' madhuban

“meethe bachche, vikaaron ko daan dene ke baad bhi yaad mein rahne ka purushaartha zaroor karna hai kyonki yaad se hi aatma paavan banengi''

prashn:- takhtansheen banne va roodra maala mein pirone ki vidhi kya hai?

uttar:- baap samaan duhkh harta sukh karta bano। sabhi par gyaan jal ke chheente daal sheetal banaane ki seva karo। kisi ko bhi duhkh dene ki baaten chhod do। koi bhi vikarma nahin karo। achhe manners dhaaran karo। apna time baap ki yaad mein saphal karo to baap ke diltakhtansheen ban roodra maala mein piro jaayenge। agar koi apna time vesta karta hai to muphta apna pad bhrashta karta hai। jhooth bolna, bhool karke chhipaana, kisi ki dil ko duhkhaana - yeh sab paap hain, jiski 100 guna saza milegi।

geet:- na woh hamse zuda honge…

om shanti। yeh hain gopikaaon ke geet। kaun si gopikaayen? yeh hain prajaapita brahma mukh vanshaavli। phir inko kaha jaata hai gopi vallabh arthaat baap ke gop gopiyaan। baaki woh sab kahaaniyaan hain। yeh to samajhne ki baat hai ki barobar jab tum eeshvar ke bante ho to aasuri vikaari sampradaay dushman bante hain। hans aur bagule iktthe rah na saken। hans thode hote hain। bagule bahut karodon ki andaaj mein hain। tumko grihastha vyavhaar mein rehte kamal phool samaan pavitra rehna hai। iska gaayan bhi hai। grihastha vyavhaar mein rehte pavitra raho। haan vighna bahut padenge। aadhaakalpa ke patit hain woh itna jaldi paavan nahin bante। vikaar ke liye kitni kashamkas chalti hai, ablaaon par atyaachaar hote hain, tab to dropdi ne pukaara hai। dropdi ek nahin। is samay sab dropdiyaan aur dushaasan hain। cheer utaarte hain। yeh hai hi patit vikaari duniya aur satayug ko kaha jaata hai viceless duniya। yeh hai vicious duniya, raavan raajya। is duniya mein kitna duhkh hai, rona, peetna, ladaai-jhagda kya laga pada hai। jab nai duniya mein devtaayen raajya karte the to pavitrata sukh-shanti thi, ashaanti vaale koi dharma nahin the। abhi to ashaanti phailaane vaale kitne dharma hain। tum phir siddhakar batlaate ho sabse puraana dushman hai raavan, jisne bhaarat ko kaudi jaisa patit banaaya hai। baap baith karma-akarma-vikarma ki gati samjhaate hain। raavanraajya mein koi kitna bhi daan punya kare, yagya, jap-tap kare to bhi neeche utarna hi hai। jisko daan karte woh bhi vikaari paap aatma hain। vikarma karte-karte ab sir par bahut bojha hai। tumhaari aatma jo satopradhaan thi so ab tamopradhaan ban padi hai। yeh sab baap samjhaate hain - kalpa pahle muaaphik baap hi aakar kalpa-kalpa hamko devta banaate hain। sahaj raajayog aur gyaan sunaate hain। apne ko aatma samajh baap ko yaad karo। yeh to sahaj hai na। sab kehte hain ki he bhagwan aao। ham patiton ko aakar paavan banaao। to patit-paavan baap hi thahra। tum jaante ho baap hamko paavan banaane ka purushaartha karaate hain। bhal koi 5 vikaar daan mein de dete hain parantu phir yog bhi lagaana hai। janma-janmaantar ke jo sir par paap hain, jisse tum tamopradhaan bane ho, vo yog ke sivaae kaise bhasma honge?

tum 5 vikaaron ka daan karte ho ki ham koi paap nahin karenge। parantu janma-janmaantar ke jo paapon ka hisaab hai, woh kaise chuktu hoga? uski yukti hai jahaan tak jeena hai baap ki yaad mein rehna hai। is yaad se hi vikarma vinaash honge। patit aatma vahaan ja nahin sakti। har ek ko apna-apna part aur apna-apna martaba mila hua hai। jaisa manushya ka martaba vaise aatma ka bhi martaba। pahle-pahle aatma svarga mein aayegi। pahle number mein hain lakshmi-naaraayan, unka sabse bada part hai। drama mein devi-devta dharma ki aatmaayen sabse achha part bajaakar sabse jaasti sukh bhogti hain। phir sato rajo tamo mein aana hai। khaad padti jaati hai। ab woh khaad nikle kaise? sone ko agni mein daalne se khaad nikalti hai। yeh yog agni hai jisse vikarma vinaash hote hain। yeh koi nahin jaante ki yog agni se vikarma vinaash ho sakte hain। bachche kehte hain ghadi-ghadi yog toot padta hai। ham baap ko bhool jaate hain। yeh maaya ke vighna hain। vighna na aayen, jaldi yog lag jaaye to jaldi vinaash ho jaae, parantu aisa ho nahin sakta। time lagta hai। jab tak yog lagaate raho, ant mein karmaateet avastha hogi। phir duniya bhi khatma ho jaayegi। tum shreemat se raavan par jeet paate ho। geeta, mahaabhaarat, raamaayan sabmen bhakti ki saamagri hai। tumne sangam par jo kartavya kiya hai, uska yaadgaar yeh mandir aadi bane hain। yaadgaar banna dvaapar se shuru hota hai। pahle parampita paramatma shiv ka yaadgaar banta hai, jo aakar patiton ko paavan banaate hain। devtaaon ki mahima gaai jaati hai। lakshmi-naaraayan ka bada mandir hai। unhon ki itni pooja kyon hoti hai? yeh kisko maaloom nahin hai। poojya se phir pujaari zaroor banna pade, poojya hain to praalabdha bhogte hain। jaise bade raajaaon ke jeevan charitra gaate hain to satayug ke pahle number mein mahaaraaja mahaaraani, lakshmi-naaraayan ki zaroor mahima gaayenge। parantu woh kaise banen, yeh nahin jaante। jaise brahma aur sarasvati in donon ko sikhlaane vaala shiv hai। unka naam shaastron se gum kar agdam bagdam kar diya hai। in baaton ko sensible bachche nambarvaar jaante hain। yeh drama chal raha hai - kalpa pahle bhi tum aise bane the jaise ab ban rahe ho। yeh jhaad vriddhi ko paata rahega। phal bhi zaroor pakega। jhaad ko badhne mein time lagta hai। jab jhaad taiyaar ho jaayega to tum devi-devta ban jaayenge। baaki sabka vinaash ho jaayega। tum bachche ab pak rahe ho। koi poora pakte, koi kam, koi ko toophaan lagte hain। kamaai mein grahchaari aati hai। baba kehte hain yog lagaate raho taaki tumhaare sab paap dagdha ho jaaen। kitni bhaari kamaai hai, isliye bhaarat ka praacheen yog mashhoor hai। parantu usse kya hota hai, yeh kisko pata nahin। ab baap samjhaate hain - tumhaari aatma mein khaad padi hui hai। aapehi poojya aur aapehi pujaari manushya ki aatma banti hai। bhagwan to ban nahin sakta। agar woh bhi pujaari bane to phir poojya kaun banaave! hamko poojya banaane vaala baap hai। ham poojya, paavan devta the phir utarte-utarte ham shoodra ban gaye। satayug ke devi-devtaaon ko kahenge - eeshvar ki nai rachna। gaate hain - manushya ko devta kiye.... baap samjhaate hain achhi tarah padho। baap, teacher, guru ka kaam hota hai - taakeed karna (purushaartha karaana), bachche time vesta mat karo। muphta pad bhrashta ho jaayega, phir bahut pachhtaayenge। kahenge kalpa-kalpa hamaari aisi avastha hogi! phir kuchh kar nahin sakenge। saakshaatkaar ho jaayega। pakka nishchay ho jaayega ki kalpa-kalpa aise durgati ko paaoonga। baap samjhaate rehte hain - yeh nateeza niklega, phir bahut rona padega। jaise class transfer hoti hai, nambarvaar baithte hain। ham bhi nai duniya mein transfer hote hain। braahmanon ki maala gaai hui nahin hai, roodra maala hi pooji jaati hai। parantu yeh kisko pata nahin hai ki yeh maala kya hai? oopar mein meru dikhaate hain। meru vishnu hai। oopar mein phool shivbaaba hai, phir hai maala। ab tum brahman purushaartha kar rahe ho phir roodra maala mein pirona hai isliye purushaartha aisa karo jo takhtansheen bano। kisko duhkh dene ki baaten chhod do। baap duhkh harta, sukh karta hai। agar bachche duhkh denge to kaun samjhenge - yeh eeshvar ke bachche hain। vikarma karna athva jeevghaat karna, jhooth paap nahin karna chaahiye। haar khaate hain to kshama maangani pade, bhakti mein bhi kuchh ho jaata hai to tobaan-tobaan karte hain। yeh gyaan maarga hai, ismen kiski dil kabhi nahin duhkhaani hai। gyaan ka chheenta to sheetal karne vaala hai, yahaan tum bachche aaye ho padhne ke liye। padhaai mein manners achhe rakhne hote hain। yeh bhi padhaai hai। niraakaar baap padhaate hain। woh tumhaare andar ki sab baaten jaante hain। ek centre se samaachaar aaya tha - ek bachche ne bhool ki to dharmaraaj ne satka lagaaya। is baba ko maaloom hi nahin tha। aise bahut hain jo vikaar mein jaate hain phir sach nahin bataate। apne ko bachaane ke liye bhool chhipaate hain। parantu shivbaaba se to chhip nahin sakte। tumko padhaane vaala shivbaaba hai। unko bhi bhool jaate hain। yeh to kambakhti kahenge। yahaan kiska bhi jhooth va sach chhip nahin sakta। yeh baba kehte hain main antaryaami nahin hoon। shivbaaba antaryaami hai। baap khud kehte hain - main niraakaar sab jaanta hoon। yeh to saakaar mein hai। main punarjanma rahit, yeh janma maran mein aane vaala, tab to inko kehte hain tum apne janmon ko nahin jaante ho, ham tumko sunaate hain। jo bhi sooryavanshi gharaane ke hain, un sabko sunaata hoon। bahut bachche chhipaate hain। baba ke aage aate hi nahin hain। baba ne kaha hai inse mat chhipaao, inko sab kuchh sunaao। to maaph ho jaayega। phir bhi mera bachcha hai। main to sab kuchh jaanta hoon, inko kaise pata pade isliye sab inko sunaao। aage janma-janmaantar ka hisaab to mere paas jama hai। baaki is janma ka jo hai woh inko sunaao to main bhi sunoonga। baaki ghar baithe samjhenge shivbaaba to sab kuchh jaante hain। nahin। woh to bhakti maarga mein karte aaye ho। ab to main sammukh aaya hoon, to bataana pade tab phir saavdhaani bhi milegi। baap to samjhaayenge kaala munh nahin karna। nahin to bahut saza khaayenge। pichhaadi ka samay bahut naazuk hota hai। bahut sazaayen milti hain। misaal bhi tum dekhte sunte rehte ho। paap kabhi bhi surgeon se chhipaao mat। maaph woh karenge, yeh nahin। is samay paap karne se to sauguna ho jaayega, aur phaaltu jhooth bhi mat bolo। baba sab bachchon ko warning dete hain। kitni badi behad ki paathshaala hai।

tum gop gupta vesh mein bahut kaam kar sakte ho। samjhaayenge to dil mein zaroor lagega ki barobar yeh bhi government hai। yeh gyaan gupta hai। beej, jhaad aur srishti chakra ko jaanna hai। yeh 4 yugon ka chakra hai। unhonne phir charkha rakh diya hai। tum ho bi.ke. paandav sena, woh kot aaph arms le jaana chaahiye। charkha chalaane se satyamev jayte hogi kya? yeh to srishti chakra ki baat hai। tumko darna nahin chaahiye। gupta vesh mein tum kahaan bhi ja sakte ho। bahuroopi ke bachche bahuroopi hone chaahiye। parantu bachchon ki buddhi mein aata nahin hai। thodi hi service mein khush ho jaate hain। dimaag ekdam aasmaan mein chadh jaata hai। ajun to bahut kaam karna hai। kisam-kisam se purushaartha karna hai। baba anek points dete hain। yeh gyaan yagya to chalna hi hai। har ek panth vaale ko bulaate raho। raajaaon ko bhi bula sakte ho। conference bhi kar sakte ho। jaisa aadmi vaisa-vaisa card chhapaana pade। aakar samjho yeh srishti ka chakra kaise phirta hai, aao to ham aapko parampita paramatma ki aur 5 hajaar varsha ki jeevan kahaani sunaayen। wonder hai na। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) paavan banne ke liye jab tak jeena hai, maaya ke vighnon ki parvaah nahin karni hai।

2) sabhi par gyaan ke chheeten daal sheetal banaane ki seva karni hai, kisi ki dil ko kabhi bhi duhkhaana nahin hai। baap samaan duhkh harta, sukh karta banna hai।

vardaan:- svamaan mein sthit rah dehbhaan ko samaapta karne vaale akaal takhtansheen, akaalmoorta bhav

sangamayug par baap dvaara anek svamaan praapta hain। roz ek naya svamaan smriti mein rakho to svamaan ke aage dehbhaan aise bhaag jaayega jaise roshni ke aage andhakaar bhaag jaata hai। na samay lagta, na mehnat lagti। aapke paas direct parmaatma light ka connection hai sirf smriti ka switch direct line se on karo to itni light aa jaayegi jo svayan to light mein honge lekin auron ke liye bhi light house ho jaayenge। jo aise svamaan mein rehte hain, unhein hi akaal takhtansheen, akaalmoorta kaha jaata hai।

slogan:- apni sthiti oonchi banaao to paristhitiyaan chhoti ho jaayengi।