शुक्रवार 25 नवंबर 2022 की दैनिक मुरली

25-11-2022 praatahmurli om shanti "baapdaada"' madhuban

meethe bachche - avgunon ko nikaal saaph dil bano, sachchaai aur pavitrata ka gun dhaaran karo to seva mein saphalta milti rahegi

prashn:- tum brahman bachchon ki karmaateet avastha kab aur kaise banengi?

uttar:- jab ladaai ka saamaan poora taiyaar ho jaayega tab tum sabki karmaateet avastha nambarvaar ban jaayegi। abhi race chal rahi hai। karmaateet banne ke liye puraani duniya se buddhi nikal jaani chaahiye। shivbaaba jinse 21 janmon ka varsa milta hai unke sivaae doosra koi yaad na aaye, poora pavitra bano।

geet:- mukhda dekh le praani…

om shanti। jabki behad ka baap bachchon ko mila hai aur bachchon ne pahchaana hai, ab har ek mahsoos karte hain ki ham kitna paap aatma the aur kitna punya aatma ban rahe hain। jitna-jitna shreemat par chalenge utna zaroor baap ko follow karenge। bachchon ke aage ek to yeh chitra hai aur delvaada mandir bhi poora yaadgaar hai। geet bhi gaate hain doordesh ke... ab paraaye desh, patit shareer mein aaye hain। baap khud kehte hain yeh paraaya desh hai। paraaya kiska? raavan ka। tum bhi paraaye desh athva raavanraajya mein ho। bhaaratvaasi pahle raam raajya mein the। is samay paraaye arthaat raavan raajya mein hain। shivbaaba to vichaar saagar manthan nahin karte। yeh brahma vichaar saagar manthan kar samjhaate hain ki yeh jo jaini log hain unka yeh delvaada mandir hai। yeh jo chaitanya hokar gaye hain unka hi jad yaadgaar hai। aadi dev aadi devi bhi baithe hain। oopar mein svarga hai। ab agar jo unhon ke bhagat hain unhon ko gyaan mile to achhi tarah samajh sakte hain ki barobar neeche raajayog ki shiksha le rahe hain। oopar mein bhi pravritti maarga, neeche bhi pravrittimaarga। kuvaari kanya, adhar kanya ka chitra bhi hai। adharkumaar aur kumaar bhi hain। to mandir mein aadi dev brahma bhi baitha hai aur bachche bhi baithe hain। ab tum samajh gaye ho ki brahma sarasvati hi raadhe-krishna bante hain। brahma ki aatma ka bahut janmon ke ant ka janma hai। yeh baap aur bachchon ka yaadgaar hai। aise to nahin hazaar laakh chitra rakhenge। model mein thode chitra rakhe jaate hain। yeh hai jad aur hamaara hai chaitanya। jinhonne kalpa pahle bhaarat ko svarga banaaya hai, unhon ka yaadgaar hai। jagat amba, jagat pita aur unke bachche hain। majority maataaon ki hone kaaran bi.ke.naam likh diya hai। mandir mein bhi kuvaari kanya aur adhar devi hai। andar jaayenge to haathiyon par males ke chitra hain। yeh sab baaten tum bachche hi samajh sakte ho।

tum abhi saaph dil bante ho। aatma se avgun nikaal rahe ho। tumhaari mama kisko samjhaati thi to unko teer lag jaata tha। unmein sachchaai, pavitrata thi। thi bhi kumaari। mama ka naam pahle aata hai। pahle lakshmi phir naaraayan। ab baap kehte hain mama jaise gun dhaaran karo। avgunon ko nikaalte jaao। nahin nikaalenge to pad bhrashta ho jaayenge। sapoot bachchon ka kaam hai har ek baat samajhna। pahle tum besmajh the। ab baba samajhdaar banaate hain। agyaan mein bachche kharaab hote hain to baap ka naam badnaam karte hain। yeh to behad ka baap hai। brahmaakumaar kumaariyaan kahlaakar phir eeshvar baap ka naam badnaam karenge to unka kya haal hoga। aisa kaam kyon karna chaahiye jo pad bhi bhrashta ho aur bahuton ka nuksaan bhi ho। to baap ne samjhaaya hai doordesh se aate hain paraaye desh mein। phir raavan raajya dvaapar se shuru hota hai। bhakti bhi dvaapar se shuru hoti hai, is samay sabki tamopradhaan, jadajdeebhoot avastha hai। yeh behad ka puraana jhaad hai। behad ka gyaan koi de na sake। behad ka sannyaas koi kara na sake। woh had ka sannyaas karaate hain। behad ka baap behad ki puraani duniya ka sannyaas karaate hain। aatmaon ko samjhaate hain he bachche, yeh puraani duniya hai। tumhaare ab 84 janma poore hue hain। mahaabhaarat ladaai saamne khadi hai। vinaash avashya hona hi hai isliye behad ke baap aur varse ko yaad karo। he aatmaayen sunti ho? ham aatma hain, paramatma baap hamko padhaate hain। jab tak yeh pakka nishchay nahin, goya kuchh bhi nahin samjhenge। pahle yeh nishchay karen ki ham aatma avinaashi hain। ham ashareeri aatma shareer mein aakar pravesh karti hain। nahin to aadamshumaari vriddhi ko kaise paaye। jaise aatmaayen paramdham se aakar shareer mein pravesh karti hain vaise parampita paramatma bhi is shareer mein pravesh kar kehte hain - tum hamaare bachche ho। tum mujh saagar ke bachche jalkar khaak ho gaye ho। ab main aaya hoon tumko paavan banaakar vaapis ghar le jaane ke liye। jo vikaar mein jaasti jaate hain unko hi patit bhrashtaachaari kaha jaata hai। yeh saari duniya hi vikaari hai isliye drama plan anusaar main raavan ke desh mein aaya hoon। 5 hazaar varsha pahle bhi aaya tha। har kalpa aata hoon aur aata bhi hoon sangamayuge। bachchon ko mukti, jeevanmukti dene aata hoon। satayug mein hai jeevanmukti। baaki sab mukti mein rehte hain। to bhi itni sab jo aatmaayen hain unko le kaun jaayega? baap ko hi liberator aur guide kaha jaata hai। baap hi aakar bhakton ko bhakti ka phal dete hain। tum hi pujaari se poojya bante ho। baba koi aur takleeph nahin dete। delvaada mandir mein chitra barobar theek hain। bachche yog mein baithe hain, unhon ko shiksha dene vaala kaun hai? parampita paramatma ka chitra bhi hai। shivbaaba brahma dvaara satayug ki sthaapna kar rahe hain। yahaan bhi chitra mein dekho jhaad ke neeche tapasya kar rahe hain। brahma, sarasvati ki bhi maa ho gai। gaaya bhi jaata hai tvamev maataashcha pita... niraakaar ko kaise kah sakte। ismen usne pravesh kiya hai to yeh maata bani na। sannyaasi to nivritti maarga vaale hain - apne mukh se kehte hain ki yeh hamaare followers hain। ve kehte hain ham followers hain। yahaan to maata pita donon hain, isliye kehte hain tvamev maataashcha pita... bandhu bhi hain। jismen pravesh karte hain woh bhi padhte rehte hain, to sakha bhi ban jaate hain। shivbaaba kehte hain mainne brahma dvaara adopt kiya hai। tum raajayog seekh rahe ho। shivbaaba ko apna shareer to hai nahin। vahaan mandir mein ling rakha hai। delvaada ka arth koi samajh na saken। adharkumaari, kunvaari kanya bhi hai, sikhlaane vaale shiv ka bhi chitra hai। svarga ka maalik banaane vaala zaroor ustaad chaahiye। vahaan shreekrishna ki baat nahin। jahaan brahma baitha hai - vahaan shreekrishna kaise aaye। shreekrishna ki aatma tapasya kar rahi hai, sundar banne ke liye। abhi woh shyaam hai। oopar mein vaikuntha ke sundar chitra khade hain। brahman braahmaniyaan hi phir devta banenge। tumhein aisa banaane vaala sabse ooncha hai। to yeh delvaada mandir bhi sabse ooncha hai।

tum bachche gyaan to sabko dete ho lekin kai samajhte hain ki gyaan mein aakar pati patni donon saath rehte pavitra rahen - yeh to bahut badi taakat hai। parantu yeh nahin samajhte ki yeh sarvashaktimaan baap ki taakat hai। baap dekho svarga ki kitni bheeti dete hain। bachche pavitra bano to svarga ke maalik ban jaayenge। maaya ke toofaan to bahut aayenge। baap kehte hain bachche tum kitna first class the। tumko kya ho gaya? baba jhat bataayenge, is samay braahmanon ki maala mein nambarvaar kaun-kaun hain। parantu sab kaayam nahin rahenge। kamaai mein dashaayen baithti hain na। kisko raahu ki dasha baithti hai to phir chhod chale jaate hain - puraani duniya mein। kehte hain hamse mehnat nahin hoti hai। baba ko yaad nahin kar sakte। nahin kahne se naastik ban jaate hain। dashaayen phirti rehti hain। maaya ke toofaan aane se dheele ho jaate hain। agar bhaaganti ho gaya to samjhenge shyaam ban gaya। yahaan aate hain - sundar banne। tum brahman kul vaale shyaam se sundar ban rahe ho। yahaan bahut jabardasta kamaai hai। bachche jaante hain mama baba, lakshmi-naaraayan banenge। bachche kehte hain baba ham bhi aap jaisa purushaartha kar zaroor takhtansheen banenge। vaaris banenge। parantu phir bhi grahchaari baith jaati hai। chalan bhi achhi chaahiye। tumhaara dhandha hai ghar-ghar mein sandesh pahunchaana ki shivbaaba ko yaad karo to vikarma vinaash honge। vinaash saamne khada hai - tum nimantran dete raho। tumhaari din pratidin vriddhi hoti jaayegi। centres khulte jaayenge। yeh itna bada makaan bhi kam pad jaayega। aage chal kitne makaan chaahiye। drama mein aane vaalon ke liye prabandha bhi zaroor chaahiye। bachche apne liye sab kuchh kar rahe hain। to bachchon ko behad ki khushi honi chaahiye। parantu maaya ghadi-ghadi buddhiyog tod deti hai। abhi maala ban nahin sakti - ant mein rudra maala banegi, phir vishnu ki maala ban jaayegi। baba kitna achhi reeti samjhaate hain। amba ke mandir ke aage bhi apna centre hona chaahiye jo sabko samjhaaya jaae, to abhi yeh gyaan gyaaneshvari hai। vahaan bhi bheed mach jaayegi। tum sirf kaam karo, paise chham-chham kar aa jaayenge। drama mein pahle se noondha hua hai। tum 10 centre kholo, baba graahak de denge। parantu centre hi nahin khol sakte। kalkatte jaise shahar mein to bahut centre khulne chaahiye। himmate bachche madde baap, kisko bhi touch kar denge। kaam tumko karna hai। bahuroopi ke bachche tum bahuroop dhaaran kar yeh service kar sakte ho। kahaan bhi jaakar bahuton ka kalyaan kar sakte ho। jainiyon ki bhi service karni hai। bahut achhe bade-bade jaini hain। parantu bachchon ki itni vishaal buddhi nahin hai, jo service karen। kuchh deh-abhimaan rehta hai। achha!

meethe meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste ।

dhaarna ke liye mukhya saar:-

1) baap ka bankar maaya ke vash nahin hona hai। karmaateet banne ka purushaartha karna hai। baap ko bhool naastik nahin banna hai।

2) buddhi se behad ka sannyaas karna hai। behad khushi mein rahkar vishaal buddhi ban seva karni hai।

vardaan:- dil ki sameepta dvaara sahayog ka adhikaar praapta kar umang-utsaah mein udne vaale teevra purooshaarthi bhav

jo bachche door baithe bhi sada baap ki dil ke sameep hain unhein sahayog ka adhikaar praapta hai aur ant tak sahayog milta rahega isliye is adhikaar ki smriti se kabhi bhi na to kamjor banna, na dilshikasta banna, na purooshaartha mein saadhaaran purooshaarthi banna। baap combined hai isliye sada umang-utsaah se teevra purooshaarthi ban aage badhte rehna। kamjori va dilshikasta-pan baap ke havaale kar do, apne paas sirf umang-utsaah rakho।

slogan:- shreemat ke kadam par kadam rakhte chalo to sampoornata ki manzil sameep aa jaayegi।

maateshvari ji ke anmol mahaavaakya

1) satoguni, rajoguni, tamoguni yeh teen shabd kehte hain isko yathaartha samajhna zaroori hai। manushya samajhte hain yeh teenon gun ikatthe chalte rehte hain, parantu vivek kya kehta hai - kya yeh teenon gun ikatthe chale aate hain va teenon gunon ka part alag-alag yug mein hota hai? vivek to aise hi kehta hai ki yeh teenon gun ikatthe nahin chalte jab satayug hai to sato-gun hai, dvaapar hai to rajogun hai aur kaliyug hai to tamogun hai। jab sato hai to tamo rajo nahin, jab rajo hai to phir satogun nahin hai। yeh manushya to aise hi samajhkar baithe hain ki yeh teenon gun ikatthe chalte aate hain। yeh baat kehna saraasar bhool hai, vo samajhte hain jab manushya sach bolte hain, paap karma nahin karte hain to vo satoguni hote hain parantu vivek kehta hai jab ham kehte hain satogun, to is satogun ka matlab hai sampoorn sukh goya saari srishti satoguni hai। baaki aise nahin kahenge ki jo sach bolta hai vo satoguni hai aur jo jhooth bolta hai vo kaliyugi tamoguni hai, aise hi duniya chalti aati hai। ab jab ham satayug kehte hain to iska matlab hai saari srishti par satogun satopradhaan chaahiye। haan, koi samay aisa satayug tha jahaan saara sansaar satoguni tha। ab vo satayug nahin hai, abhi to hai kaliyugi duniya goya saari srishti par tamopradhaanta ka raajya hai। is tamoguni samay par phir satogun kahaan se aaya! ab hai ghor andhiyaara jisko brahma ki raat kehte hain। brahma ka din hai satayug aur brahma ki raat hai kaliyug, to ham donon ko mila nahin sakte।

2) is kaliyugi sansaar ko asaar sansaar kyon kehte hain? kyonki is duniya mein koi saar nahin hai maana koi bhi vastu mein vo taakat nahin rahi arthaat sukh shanti pavitrata nahin hai, jo is srishti par koi samay sukh shanti pavitrata thi। ab vo taakat nahin hain kyonki is srishti mein 5 bhooton ki praveshta hai isliye hi is srishti ko bhay ka saagar athva karmabandhan ka saagar kehte hain isliye hi manushya duhkhi ho paramatma ko pukaar rahe hain, paramatma hamko bhav saagar se paar karo isse siddha hai ki zaroor koi abhay arthaat nirbhayta ka bhi sansaar hai jismen chalna chaahte hain isliye is sansaar ko paap ka saagar kehte hain, jisse paar kar punya aatma vaali duniya mein chalna chaahte hain। to duniyaayen do hain, ek satayugi saar vaali duniya, doosri hai kaliyugi asaar ki duniya। donon duniyaayen is srishti par hoti hain। achha - om shanti।